Read kumam Marcos 1 Bible Online

Marcos 1 - kumam bible

Marcos 1

¹Atzun jlu t-xe'tlen tqanil b'a'n in yolin ti'j Jesucrist, aju Tk'wa'l Dios.

²Ik tza'n tz'ib'an tuj tu'jil Isaías aju t-sanjel Dios, in tma'n: Lu kxel nsama'ne nsanjele tu'n tkub' nej twitza b'inchalte tb'eya.

³In jaw tq'ajq'ajel twi' jun xjal tuj lugar minti' kynajb'il xjal tuj, in tma'n: Kyb'inchame tb'e Qman; kyb'inchame jun tb'e jiqun ti'j, chi Isaías.

⁴Kyja'tzun ul Juan ex e b'yan xjal tu'n tuj a' tuj lugar minti' kynajb'il xjal tuj, ex in pakb'an ti'j tu'n tajtz ti'j kyanmi xjal ex tu'n kyb'yan tuj a', tu'ntzun tnajset kyil.

⁵E tzajtzun kykyaqil xjal tuj tx'otx' Judea, kyuk'ix kykyaqil xjal tuj tnam Jerusalén, e pon tuk'il Juan; tej tjatz kypa'n kyil kykyaqiltzun e b'yan tu'n Juan tuj nima Jordán.

⁶In b'ettoq Juan tok t-xb'alun ttzmal chej camey, ex tz'u'm k'alb'il tk'u'j tok, ex ẍplon twa in xi' tuk'ix ta'l kab' tuj tze'.

⁷Ex in pakb'an Juan kye xjal in tma'n kyja': —At jun xjal tzul wi'jxiye mas at tipumal nwitze, ex minti' woklene tu'n nkub' muk'e'ye pjulte taq'al t-xajab'.

⁸Ax tok, weye ma che b'yane wu'ne tuj a'; atzunju tzul wi'jxiye, che b'yale tu'n tuj junxitl tumel ok kyk'monteye Xewb'aj Xjan.

⁹Kukxtoq kyb'yan xjal tu'n Juan, etz Jesús tuj tnam Nazaret tuj tx'otx' Galilea, ex o b'yan Jesús tu'n Juan tuj nima Jordán.

¹⁰Tejtzun tjatz Jesús tuj a', o til jaqet ttzi kya'j, ex o til kub'il Xewb'aj Xjan tib'aj, ik ke'yin ik tza'n paloma.

¹¹Ex tzaj jun tq'ajq'ajel wib'aj tuj kya'j in tma'n: —Aya Nk'wa'le, k'ujla'nxixa wu'ne; in chin tzalaje ti'ja.

¹²Ex jurat naj xi q'i'n Jesús tu'n Xewb'aj Xjan, pon q'i'n tuj jun lugar minti' kynajb'il xjal tuj.

¹³Ex axtzun o kyaj ten 40 q'ij tuj lugar minti' kynajb'il xjal tuj, o ten kyxol jil; ex ok tuj joyb'il ti'j tu'n Satanás, ex e ul qe anjel tuk'il tu'n kyajb'en te.

¹⁴Otoq tz'okx q'o'n Juan tuj pres tej tpon Jesús tuj Galilea in pakb'an ti'j tqanil b'a'n ti'j tkawb'il Dios.

¹⁵Chi Jesús: —Ma japun tq'ijlalil ex ma tzul laq'e' tq'ijlalil tu'n tkawin Dios; tajtz ti'j kyanmiye ex kyokslame tqanil kolb'il.

¹⁶In b'ettoq Jesús ttzi laguna tuj Galilea, o til Jesús Simón tuk'ix Andrés aju titz'in Simón, in ku'x kyq'o'n xyub' tuj a' te tzuyb'il kyiẍ, porke tzyul kyiẍ qe.

¹⁷Xitzun tma'n Jesús kye: —Che lpe'tze wi'je, che okeltzun nq'o'ne te tzyul xjal ik tza'n in che tzyet kyiẍ kyu'ne.

¹⁸Jurattzun kyaj kyq'o'n kyxuyb', e ok lpe' ti'j Jesús.

¹⁹Ik'tzun Jesús, xi laq'e' ch'intl, ex o til Jesús Jacobo aju tky'ajal Zebedeo, tuk'ix Juan aju terman Jacobo, ate'toq tuj barc in che xb'uqin kyxuyb'.

²⁰Jurattzun e tzaj ttxko'n Jesús; kyajtzun kyq'o'n kyman tuj barc, aju Zebedeo tb'i, kyuk'ix qe majen, e oktzun lpe' ti'j Jesús.

²¹E pontzun tuj tnam Capernaum; okx Jesús tuj ja te k'ulb'il tuj q'ij te ojlab'l, ex xi tq'o'n xnaq'tzb'il kye xjal.

²²Ex e lab'in xjal ti'j ju t-xnaq'tzb'il; tu'nju at toklen tu'n t-xi tq'o'n xnaq'tzb'il, ex mya ik tten t-xnaq'tzb'il ik tza'n kye xnaq'tzal ti'j ley.

²³Ex at jun xjal tokx tuj ja te k'ulb'il at ju'ẍ tuj tanmi, jaw sch'in,

²⁴ex tma kyja': —¿Ti toklena qi'je, Jesús aj Nazaret? ¿Maj ma tzula tu'n qnaje tu'na? B'a'n wu'ne alkyeya, aya xjan Tk'wa'l Dios, chi ju'ẍ.

²⁵Xi tmayo'n Jesús aju ju'ẍ: —K'ol ttzi'ya, ku tetza tuj tanmi xjal, chi Jesús.

²⁶Atzunte xjal jaw lu'lunxix wen tu'n tipumal ju'ẍ; etztzun ju'ẍ tuj tanmi xjal in sch'in wen.

²⁷Kykyaqiltzun xjal e lab'in ti'j, kyja'tzun e ok ten yolil ti'j kyxolx, in kyma'n: —¿Ti t-xilen jlu? ¿Ti tten ju ak'aj xnaq'tzb'il lu? Tu'nju at toklen xjal lu tu'n tkawin kyi'j ju'ẍ, ex in xi niman tyol kyu'n, che chi xjal.

²⁸Jurat naj el tqanil Jesús tuj tkyaqil lugar tuj tx'otx' Galilea.

²⁹Tejtzun kyetz Jesús tuj ja te k'ulb'il, e pon kyja Simón ex Andrés, tuk'ix Jacobo pon ex Juan.

³⁰Ex aju xu'j tji' Simón yab'toq tu'n kyaq, tx'ayl twi' watb'il; jurattzun xi kyma'n te Jesús ti'j yab'.

³¹Pontzun laq'e' Jesús ttxlaj, jaw ttzyu'n tq'ab' ex jaw twab'an; jurat naj ik' kyaq ti'j, ex ok ten xu'j ajb'el kye.

³²Tejtzun tok qax, otoq tz'ex q'ij, ul kyi'n xjal kykyaqil yab' tuk'il Jesús, kyuk'ix qeju at ju'ẍ tuj kyanmi.

³³Kykyaqil xjal tuj tnam pon kychmon kyib' ttzi ja.

³⁴Nimku xjal yab' e b'ant tu'n Jesús, ela' txkaj kyyab'il, ex nimku ju'ẍ e je'tz tlajo'n Jesús tuj kyanmi xjal; minti' xi tq'o'n Jesús amb'il tu'n kyyolin ju'ẍ, porke b'a'n kyu'n alkyete Jesús.

³⁵Jaw we' Jesús primxix, atx qwitz, etz tuj tnam, xi' na'l Dios tuj jun lugar minti' kynajb'il xjal tuj.

³⁶Xi'tzun Simón kyuk'ix qeju ate' tuk'il jyolte Jesús.

³⁷Tejtzun tknet kyu'n, xi kyma'n te: —Kykyaqil xjal in che jyon ti'ja, che chi.

³⁸Xitzun tma'n Jesús kye: —Qo'qe kyuj qe lugar niqayin ate' ax ikx tu'n t-xi npakb'a'ne tyol Dios kye xjal; ex atzun waq'une ma chin ule.

³⁹Xi'tzun Jesús ex b'aj tb'etin tuj tkyaqil tx'otx' Galilea in pakb'an kyuj ja te k'ulb'il; ex e je'tz tlajo'n Jesús qe ju'ẍ at tuj kyanmi xjal.

⁴⁰Ultzun jun xjal tuk'il Jesús, nim tx'a'k ti'j minti' q'anb'il ti'j, o kub'san twitz Jesús ex kub' ẍmeje': —Qa taja, jaku chin b'anixe tu'na, chi xjal.

⁴¹Tzajtzun q'aq'an tk'u'j Jesús ti'j, xi tnuqpi'n tq'ab' ok tmako'n ti'j: —Wajb'ile, b'i'x kb'antela, chi Jesús.

⁴²Tejtzun t-xi tma'n Jesús ju yol lu, b'i'x el ju tx'a'k ti'j xjal ex kyaj b'anix.

⁴³Txi'ya, chi Jesús te xjal. Ex xi tkyuwsa'nxix te:

⁴⁴—Mi'n txi tma'na kye xjal; noq o'kx txi'ya ex yek'unx tib'a twitz pal, ex q'onxa jun oyaj tu'nju ma b'anixa, ik tza'n kyaj tma'n Moisés, tu'n tel kynik' xjal ti'j qa ma b'anixa.

⁴⁵Tejtzun tex ju xjal, ok ten q'ol tqanil, xi tma'n kye kykyaqil aju otoq tb'incha Jesús te. Kyja'tzun tten minti'tl okx tyek'un tib' Jesús tuj junjun tnam; atzun o ten ti'jxi tnam kyuj qe lugar minti' kynajb'il xjal tuj; ex e pon qe xjal tuk'il e tzaj tuj tkyaqil lugar.