Read kumam Marcos 10 Bible Online

Marcos 10 - kumam bible

Marcos 10

¹Ik'tzun Jesús tuj tnam Capernaum, pon tuj tx'otx' Judea ex tuj tx'otx' jlajxi nima Jordán. Pon kychmon kyib' juntl maj xjal tuk'il, ex xi tq'o'n juntl maj Jesús xnaq'tzb'il kye ik tza'n in tb'incha'n junjun maj.

²E pontzun laq'e' qe fariseo tuk'il, xi kyqanin qa q'o'n tu'n ley tu'n tex tlajo'n xinaq t-xu'jil, xi kyqanin jlu noq tu'n tok Jesús tuj joyb'il ti'j kyu'n.

³Xi ttzaq'we'n Jesús: —¿Tza'n tten kyaj tma'n Moisés?

⁴Tzajtzun kyma'n qe fariseo: —Xi tq'o'n Moisés amb'il tu'n ttz'ib'anjtz jun u'j jatum in tma'n qa otoq kub' kypa'n kyib', tu'ntzun tex tlajo'n xjal t-xu'jil, che chi.

⁵Xitzun tma'n Jesús kye: —Noq tu'nju puro kyuw kyanmiye, kyja'tzun kyaj ttz'ib'an Moisés ju mandamyent lu kyeye.

⁶Ex atxix t-xe tnejel tej tb'ant tkyaqil tu'n Dios, kub' tb'incha'n Dios xinaq tuk'ix xu'j.

⁷Kyja'tzun kyjel tq'o'n xinaq tman tuk'ix ttxu' tu'n tmoje' tuk'il t-xu'jil.

⁸Kykab'iltzun che okel te junx; kyja'tzun mya kab'e kytentl, noq junx kyten.

⁹Tu'ntzunju, aju ma tz'ok tmojb'a'n Dios, mi'n tz'el tpa'n xjal, chi Jesús kye.

¹⁰Tejtzun kyokx tuja xi kyqanintl t-xnaq'tzb'en Jesús ax ti'j jlu.

¹¹Xitzun tma'n Jesús kye: —Qa at jun xjal ma kub' tpa'n tib' tuk'il t-xu'jil ex qa ma moje' tuk'il juntl, in tb'incha'n aj pajil, ex in tb'incha'n il twitz nej t-xu'jil.

¹²Ex qa at jun xu'j ma kub' tpa'n tib' tuk'il tchmil, ex qa ma moje' tuk'il juntl, ax ikx in tb'incha'n aj pajil.

¹³Ex pon kyi'n xjal tal kyk'wa'l tu'n kyok tmako'n Jesús; atzun kye t-xnaq'tzb'en e mayet qe xjal kyu'n, aqeju e pon q'inte kye tal k'wa'l.

¹⁴Tejtzun tlonte Jesús jlu, tzaj tlo'ch tk'u'j ex xi tma'n kye t-xnaq'tzb'en: —Kyq'onxe amb'il kye tal k'wa'l tu'n kytzaj wuk'ile ex mi'n che'x kymayo'ne; porke aju tkawb'il Dios kyekye xjal ik kyten ik tza'n qe tal k'wa'l lu.

¹⁵Ax tok kxel nma'ne kyeye, qa minti' ma che oke ik tza'n jun tal k'wa'l tu'n t-xi kynimane tkawb'il Dios, mlay che okxe tuj tkawb'il Dios, chi Jesús kye.

¹⁶E jawtzun tchle'n Jesús qe tal k'wa'l, kub' tq'o'n tq'ab' kyib'aj, ex e kub' tky'iwla'n.

¹⁷Tejtzun tik' Jesús tu'n t-xi' tuj tb'e, ul qelan jun xinaq tuk'il, kub' ẍmeje' twitz ex xi tqanin te: —Xnaq'tzal b'a'n, ¿alkye ok nb'incha'ye tu'n nkamb'anteye chwinqlal te jumajx? Chi xinaq.

¹⁸Xi tma'n Jesús te: —¿Tiqu'n in chin ok tq'o'na te b'a'n? Mi a'lo jun xjal b'a'n, o'kxte Dios b'a'n.

¹⁹B'a'n qe mandamyent tu'na: Mi'n kyb'inchaye aj pajil, mi'n che b'iyune; mi'n che elq'ane, mi'n che nik'ane yol ti'j juntl, mi'n kub' kysb'u'ne jun xjal, kynimanxe kymane ex kytxu'ye, chi tz'ib'an tuj ley, chi Jesús te.

²⁰Atzunte xinaq xi tma'n: —Xnaq'tzal, tkyaqil jlu o japun wu'ne tej matoq k'wa'lx qine.

²¹Xitzun tke'yin Jesús twitz ex o tk'ujla, ex xi tma'n te: —Atx jun tu'n tb'ant tu'na: Txi'ya, k'ayinxa tkyaqilju at teya, ex q'onxa kye meb'a, kteltzun tq'inumab'la tuj kya'j; tzajtzuna wuk'ile [q'im tcrusa] ex lpe'ka wi'je, chi Jesús te.

²²Atzunte xinaq tzaj nim tb'is tu'nju yol lu, ajtzun meltz'aj in b'isun porke attoq nim tq'inumab'l.

²³Xitzun tke'yin Jesús ti'jele ex xi tma'n kye t-xnaq'tzb'en: —Kyuw tu'n kyokx qe q'inun tuj tkawb'il Dios.

²⁴B'i'x o naj kynab'l t-xnaq'tzb'en Jesús tu'nju yol lu; ex xi tma'ntl Jesús kye: —Aqeye nk'wa'l, [kyuw tu'n kyokx tuj tkawb'il Dios qeju q'uql kyk'u'j ti'j kyq'inumab'l,]

²⁵mas jurat jaku tz'ex jun chej camey tuj toy' jun b'aq, twitzju tu'n tokx jun q'inun tuj tkawb'il Dios.

²⁶Atzun kye t-xnaq'tzb'en mas jaw naj kynab'l, in kyma'n kyxolx: —Qa ikju, ¿alkyetzun jaku klet?

²⁷Xitzun tke'yin Jesús kywitz ex xi tma'n kye: —A jlu mlay b'ant kyu'n xjal, atzunte Dios jaku b'ant tu'n; ex tkyaqil in b'ant tu'n Dios.

²⁸Oktzun ten Pedro q'malte te Jesús kyja': —Kina qo'ye Tat, ma kyaj qq'o'ne tkyaqilju at qeye, ex ma qo ok lpe'ye ti'ja.

²⁹Xitzun tma'n Jesús kye: —Ax tok kxel nma'ne kyeye, alkye jun xjal ma kyaj tq'o'n tja, ex qa ttzik, ex qa titz'in, ex qa tman, ex qa ttxu', ex qa t-xu'jil, ex qa tk'wa'l, ex qa ttx'otx' tu'n nlaje, ex tu'n tlaj tqanil kolb'il,

³⁰tkyaqilju ma kyaj tq'o'n, ok tk'ma' jun syent maj t-xel tuj tq'ijlalil ja'lo: Nimku tja che tzajel q'o'n, nimku che okel te ttzik, nimku che okel te titz'in, nimku che okel te ttxu', nimku che okel te tk'wa'l, ex nim ttx'otx' ktzajel q'o'n; ax ikx k'ik'ex nim yajb'il tu'n, ex ktel tchwinqlal te jumajx tuj tq'ijlalil tzul.

³¹Ex qeju ate' te tnejel ja'lo, nimku che okel te mankb'il; ex qeju ate' te mankb'il ja'lo, nimku che okel te tnejel.

³²Kyja' t-xi' Jesús tuj b'e tu'n tjax tuj tnam Jerusalén kyuk'ix qe t-xnaq'tzb'en, ex in b'et Jesús nejni kywitz; ex qeju lepch qe'ktoq ti'j e jaw lab'in ex tzaj kyxob'il. E je'xtzun tuk'in Jesús juntl maj qeju kab'laj t-xnaq'tzb'en, ok ten q'malte kye tkyaqilju at ttzajel ti'j.

³³—Qo jawix tuj tnam Jerusalén ja'lo ex chin xel q'o'ne tuj kyq'ab' qe nejenel kye pal ex tuj kyq'ab' xnaq'tzal ti'j ley, aqine sk'o'maj qine tu'n Dios tu'n ntene kyuk'il xjal, ex kb'el q'o'n nsentense tu'n nkyime, ex chin xel q'o'ne kyu'n tuj kyq'ab' stranjer xjal.

³⁴Chin okel xmayine kyu'n, ex ok chin b'ajel asyaline, ex k'okel tzub'an tuj nwitze, ex chin b'el b'yo'ne; ex tuj toxin q'ij chin jawitz anq'ine, chi Jesús kye.

³⁵E pontzun laq'e' Jacobo tuk'ix Juan, aqeju tky'ajal Zebedeo, ex xi kyma'n te Jesús: —Xnaq'tzal, qajb'ile tu'n tb'inchanteya qeye aju kxel qqanine teya, che chi.

³⁶Atzunte Jesús xi tqanin kye: —¿Alkyetzun kyajb'ile tu'n nb'inchanteye kyeye?

³⁷Atzun kye xi kyma'n te: —Q'ontza qoklene tu'n qkub' qe'ye ttxlaja ok tk'monteya toklena, jun tuj tb'anq'ab'a ex juntl tuj tnayaja.

³⁸Xitzun tma'n Jesús kye: —Minti' nne'l kynik'e ti'j aju in tzaj kyqanine. ¿Jakupe tzik'x yajb'il kyu'ne, aju weye k'ik'ex wu'ne? ¿ex jakupe tzik'x nim k'ixk'oj kyu'ne, ik tza'n weye k'ik'ex wu'ne? Chi Jesús kye.

³⁹Tzajtzun kyma'n: —Jaku tzik'x qu'ne. Xitzun tma'n Jesús kye: —Ax tok k'ik'ex yajb'il kyu'ne aju weye k'ik'ex wu'ne, ex k'ik'ex nim k'ixk'oj kyu'ne ik tza'n weye k'ik'ex wu'ne.

⁴⁰Ex aju tu'n kykub' qe'ye tuj nb'anq'ab'e ex tuj nnayaje, mya tuj nkwente ta' tu'n t-xi nq'o'ne kyoklene, porke b'animaj alkye qeju che b'el qe' ntxlaje.

⁴¹Tejtzun kyb'inte qeju lajtl t-xnaq'tzb'en, tzaj kyq'oj ti'j Jacobo ex ti'j Juan.

⁴²E tzajtzun ttxko'n Jesús ex xi tma'n kye: —B'a'n kyu'ne, aqeju ate'k te kawil kyxol qe nasyon, in che kawin kyib'aj xjal, ex aqeju ma' kyoklen kyxol, in che kyaj xjal tjaq' kykawb'il.

⁴³Ex myatzun ik tten kyeye kyxole: alkye tajb'il tu'n tten mas toklen kyxole, atzunju tu'n tok te ajb'el kyeye;

⁴⁴ex alkye tajb'il tu'n tok te nejenel kyxole, atzunju tu'n tok te kymajen kykyaqil.

⁴⁵Porke minti' ma chin ule tu'n kyok txqantl te nmajene tu'n kyajb'en weye, noq o'kx ma chin ule tu'n wajb'ene kye mastl ex tu'n t-xi nq'on wib'e tu'n nkyime tu'n kykolpet nimku xjal, aqine sk'o'maj qine tu'n Dios tu'n ntene kyuk'il xjal, chi Jesús kye.

⁴⁶E ultzun tuj tnam Jericó. Tejtzun tetz Jesús tuj tnam Jericó kyuk'ix qe t-xnaq'tzb'en ex kyuk'ix nim xjal, lu jun xjal moẍ, Bartimeo tb'i, tky'ajal Timeo, q'uqltoq ttzi b'e in mo'n.

⁴⁷Tejtzun tb'inte moẍ kyja'toq ttzaj Jesús aj Nazaret, jaw sch'in, in tma'n: —Aya Jesús tk'wa'l David, q'aq'antz tk'u'ja wi'je, chi moẍ.

⁴⁸Nimku xjal ok ten ilil ti'j, xi kymayo'n tu'n tq'ajen, atzun te, mas jaw sch'in kyuwxix: —Aya Tk'wa'l David, q'aq'antz tk'u'ja wi'je, chi Bartimeo.

⁴⁹We'tzun Jesús, xi tma'n kye xjal tu'n ttzaj kytxko'n; tzajtzun kytxko'n xjal ju moẍ ex xi kyma'n te: —Qe' tk'u'ja, we'ktza, lu in txkonjtza tu'n Jesús, che chi.

⁵⁰Kyajtzun t-xo'n moẍ ttxo'w, jaw we' naj ex xi' tuk'il Jesús.

⁵¹Xitzun tqanin Jesús te: —¿Alkye tajb'ila tu'n nb'inchanteye teya? Atzunte moẍ xi tma'n: —Xnaq'tzal, wajb'ile tu'n tjaqet nwitze.

⁵²Xitzun tma'n Jesús te: —B'a'n tu'n taja; tu'n tokslab'la ma b'anixa, chi Jesús te. Te jurat naj jaqet twitz moẍ, ex ok lpe' ti'j Jesús tuj b'e.