Read kumam Marcos 12 Bible Online

Marcos 12 - kumam bible

Marcos 12

¹Ex ok ten Jesús q'malte junjun techal kye, chi kyja': —At jun xjal ku'x tawa'n tqan uva, ok tq'o'n pe'n ti'j, ku'x tlaku'n jun jul jatum tu'n tel ptz'et ta'l uva, ex jaw tb'incha'n jun ja te kwentb'il tqan uva. Tu'n jlu xi tq'o'n ttx'otx' te kymajen aq'nal, ex xi' tuj juntl lugar najchaq.

²Tejtzun tpon tq'ijlalil tu'n tkub' twitz awal, tzaj t-sama'n jun tmajen kyuk'il majenal tx'otx' tu'n t-xi kyq'o'n majenal tx'otx' ch'in twitz awal te.

³Atzun kye majenal tx'otx' tzaj kytzyu'n ju majen ex b'aj kyk'ixb'isa'n, ex aj kysama'n minti' ch'in q'i'n tu'n.

⁴Tzaj t-sama'n xjal juntl tmajen; atzun kye majenal tx'otx' ok kyxo'n tu'n ab'j, ok kyk'ixb'isa'n twi', ex ok kyyaso'n.

⁵Tzaj t-sama'n xjal juntl tmajen, atzun te jlu b'i'x kub' kyb'yo'n. Ex te tib'ajxi e je'x t-sama'n txqantl majen; junjun b'aj kyk'ixb'isa'n, ex junjun kub' kyb'yo'n.

⁶Ex atxtoq juntl tu'n ttzaj t-sama'n, aku ju tk'wa'l k'ujla'nxix tu'n; te mankb'ilxitzun tzaj t-sama'n tk'wa'l. Qapelo at ch'in tchi tuj kywitz ok tpon nk'wa'le, chi xjal.

⁷Atzun kye majenal tx'otx' kyma kyxolx: Atzunte etzal jlu; chux qeye, qb'yonku tu'ntzun tkyaj ten tqan awal te qe, che chi.

⁸Tzyettzun kyu'n, kub' kyb'yo'n, ex kyxo'n ti'jxi tqan awal.

⁹¿Titzun ok tb'incha' tajwil tqan awal? Ktzajeltzun ex che b'el tb'yo'n qe majenal tx'otx', ex kxel tq'o'n ttx'otx' te kymajen txqantl xjal.

¹⁰¿B'ajxpe jaw kysch'i'ne jatum in tma'n tuj Tu'jil chi kyja'?: Aju ab'j el kyik'un qe b'inchal ja, atzunju ma tz'ok te skyini te simyent.

¹¹Tu'n Qman ma b'ant jlu, ex ma' t-xilen jlu tuj qwitz, chi tuj Tu'jil.

¹²Oktzun tilil kyu'n tu'n ttzyet Jesús porke kanun tuj kynab'l qa kyi'j xi tma'n Jesús ju techal lu, ex tzaj kyxob'il kywitz xjal, kyja'tzun kyaj kyq'o'n ex e ik'.

¹³Ex tzaj kysama'n fariseo junjun kyuk'il kyuk'ix junjun xjal ate' tuj tpartid Herodes, tu'ntzun tkub' tz'aq Jesús tuj jun tyol kyu'n.

¹⁴Tejtzun kyul qe, xi kyma'n te: —Xnaq'tzal, b'a'n qe qu'n ax tok tyola, ex minti' in xob'a kywitz xjal, porke minti' in tke'yina ti t-xilen xjal, noq o'kx in tq'o'na jun xnaq'tzb'il axix tok ti'j jun b'e tu'n kyok lpe' xjal ti'j Dios. ¿B'a'npe tu'n t-xi qq'o'ne chojenj nne'l tqanin gobierni te Roma, ex qa mi'n? ¿Okpe kxel qq'o'ne, ex qa mi'n? Che chi.

¹⁵Atzunte Jesús el tnik' kyi'j xmletz' qe ex xi tma'n kye: —¿Tiqu'n in che jyone tumel wi'je? Kyi'ntze jun pwaq tu'n tok nke'yine.

¹⁶Ultzun kyi'n, ex xi tma'n Jesús kye: —¿Al etzun tilb'ilal jlu tok twitz, ex al etzun b'iyb'aj tz'ib'an twitz? —Te gobierni, che chi.

¹⁷Xitzun tma'n Jesús kye: —Pues kyq'onxe te gobierni aju te gobierni, ex kyq'onxe te Dios aju te Dios, chi Jesús kye. Ex e jaw lab'inxix ti'j tyol.

¹⁸E ultzun junjun saduceo tuk'il Jesús, aqeju in kyma'n qa mlay jatz anq'in jun xjal kyxol kyimni; ex xi kyqanin te:

¹⁹—Xnaq'tzal, at jun yol kyaj ttz'ib'an Moisés qe. Qa at jun xjal ma kyim ttzik ex ma kyaj ten t-xu'jil qtzan ttzik ex minti' jun tk'wa'l otoq tzaj, il ti'j tu'n tmoje' xjal tuk'il t-xu'jil qtzan ttzik, tu'ntzun tkyaj jun t-xel qtzan ttzik tu'n, tu'n mi'n tnaj tiyjil.

²⁰At wuq xjal e ten kyitz'in kyib'; aju tnejel knet t-xu'jil, ex o kyim minti' jun tk'wa'l kyaj.

²¹Ex ax ju xu'j jaw ti'n tz'inb'aj te t-xu'jil; ax ikx o kyim minti' jun tk'wa'l kyaj. Ax ikx o b'aj ti'j tkab'in tz'inb'aj.

²²Ex elpun b'aj kywitz kywuqil xinaq tu'n xu'j, ex minti' jun kyk'wa'l kyaj. Te mankb'ilxitzun ikxte xu'j kyim.

²³Tuj tq'ijlalil ok kyjatz anq'in xjal, ¿alkyetzun jun kyxol kywuqil k'okel te tchmil xu'j lu, porke kywuqil e xu'jlan te? Che chi.

²⁴Xi ttzaq'we'n Jesús: —¿Myapetzun tu'n jlu in che el txalpuje tu'nju minti' nne'l kynik'e ti'j ju tz'ib'an tuj Tu'jil ex tu'nju minti' nne'l kynik'e ti'j tipumal Dios?

²⁵Porke tuj tq'ijlalil ok kyjatz anq'in xjal kyxol kyimni, minti' kyxu'jil xinaq ex minti' kychmil xu'j knetel, noq o'kx che okel ik tza'n qe anjel ate' tuj kya'j.

²⁶Atzunju yol kyi'j kyimni ok kyjatz anq'in, ¿b'ajxpe jaw kysch'i'ne tuj tu'jil Moisés tza'n tten kub' tyek'un tib' Dios ti'j jun ch'i'x in k'ant, tu'n tyolin tuk'il Moisés? Chi Dios: Aqine Tdios Abraham ex Tdios Isaac ex Tdios Jacob.

²⁷Ate Dios mya Kydios kyimni, noq o'kx Kydios itz'; kyja'tzun nim in che el txalpuje ti'j, chi Jesús kye.

²⁸Pontzun laq'e' jun xnaq'tzal ti'j ley, in b'intoq kyi'j tej kyyolin saduceo tuk'il Jesús, ex o tb'i qa otoq tzaq'wet xjel tu'n Jesús tuj tumelxix, xitzun tqanin te Jesús: —¿Alkye tnejel mandamyent mas nim toklen kyxol kykyaqil? Chi xjal.

²⁹Xi ttzaq'we'n Jesús: —Aju tnejel mandamyent kyxol kykyaqil, atzun jlu: Kyb'intze aqeye aj Israel, ate Qman Qdios, o'kxku junx.

³⁰Kyk'ujlamtzune Qman Dios tu'n tkyaqil kyanmiye, tu'n tkyaqil kyk'u'je, tu'n tkyaqil kynab'le, ex tu'n tkyaqil kyipumale. Atzun tnejel mandamyent jlu ma'xix toklen.

³¹Ex aju tkab'in mandamyent ikx tten ik tza'n tnejel, atzun jlu: Kyk'ujlame qe kyuk'ile ik tza'n kyeye in kyk'ujlan kyib'e, chi tuj Tu'jil. Minti' juntl mandamyent mas nim toklen kywitz jlu, chi Jesús te.

³²Atzunte xnaq'tzal ti'j ley xi tma'n: —Tuj tumelxix ma tmaya Xnaq'tzal. Ax tok tyola, noq junxte Dios at, ex minti' juntl, o'kx te.

³³Ex aju tu'n qk'ujlante Dios tu'n tkyaqil qk'u'j, ex tu'n tkyaqil qnab'l, ex tu'n tkyaqil qanmi, ex tu'n tkyaqil qipumal, ex tu'n qk'ujlante qe quk'il ik tza'n qe in qk'ujlan qib', mas ma' toklen jlu twitz tkyaqil oyaj in kub' patit tib'aj altar ex twitz tkyaqil oyaj in xi q'ot te Dios, chi xnaq'tzal ti'j ley.

³⁴Tejtzun tb'inte Jesús otoq tzaj ttzaq'we'n xjal tuj tumelxix, xi tma'n te: —Noq ch'intl taj tu'n tkanuna ti'j tkawb'il Dios, chi Jesús te. Ya minti'tl ok kynimarin kyib' tu'n t-xi kyqanin juntl yol te.

³⁵Tejtzun t-xi tq'o'n Jesús xnaq'tzb'il kye xjal tuj tja Dios, xi tma'n: —¿Tza'n tten in kyma'n qe xnaq'tzal ti'j ley qa tk'wa'l David ju Crist aju at toklen tu'n Dios?

³⁶Ex ax David kyaj q'mante jun yol tu'n tipumal Xewb'aj Xjan. Chi kyja': Xi tma'n Qman te Wajawe: Qekuya tuj nb'anq'ab'e, akutzun in kub' kyi'j qe aj q'oj ti'ja wu'ne, chi tuj Tu'jil.

³⁷Qa in tma'n David qa a Crist Tajaw, ¿tza'ntzun tten tu'n tok Crist te tk'wa'l? Chi Jesús kye. Ex nimku xjal kub' kyb'i'nxix tyol Jesús in che tzalaj ti'j.

³⁸Ex tuj ju t-xnaq'tzb'il xi tma'n Jesús kye: —Ten kykwente kyi'je kye xnaq'tzal ti'j ley, nim kygan ti'j tu'n kyb'et tok kyxb'alun ẍjo'w, ex kyajb'il tu'n kyok q'olb'e'n tuj plas.

³⁹Ex kyajb'il tu'n kykub' qe' kyuj kynejel q'uqb'il kyuj ja te k'ulb'il, ex kyajb'il tu'n kykub' qe' kyuj tb'anil q'uqb'il kyuj nintz wa'n.

⁴⁰Nne'l kyi'n kyja meb'a xu'j, ex in che na'n Dios nim tuj, tu'ntzun tmaqset kyb'inchb'en. Mas nim kysentens jlu kb'el, chi Jesús kye.

⁴¹Ex kub' qe' Jesús ttxlaj k'ub'l pwaq tuj tja Dios, in ke'yin ti'j tej tku'x kyq'o'n xjal kyoyaj tuj k'ub'l pwaq, ex nimku q'inun ku'x kyq'o'n nim pwaq.

⁴²Ax ikx pon jun meb'a xu'j, tal yajxix, ku'x tq'o'n kab'e tal sentav.

⁴³E tzajtzun ttxko'n Jesús qe t-xnaq'tzb'en ex xi tma'n kye: —Ax tok kxel nma'ne kyeye, aju meb'a xu'j lu tal yajxix, mas nim ma ku'x tq'o'n kywitz kykyaqil qeju ma ku'x kyq'o'n kyoyaj tuj k'ub'l pwaq;

⁴⁴ex kykyaqil qe jlu ma ku'x kyq'o'n aju in kyaj ten kye; atzunte xu'j lu maske tal yajxix, pero ma ku'x tq'o'n tkyaqilju at tajb'enil twi twa, chi Jesús kye.