Read kumam Marcos 13 Bible Online

Marcos 13 - kumam bible

Marcos 13

¹Tej tetz Jesús tuj tja Dios, xi tma'n jun t-xnaq'tzb'en te: —Xnaq'tzal, kina qe ab'j tb'anilxix ex qe ja tb'anilxix, chi t-xnaq'tzb'en.

²Ex xi tma'n Jesús te: —¿Mape tz'ok tke'yina qe nmaq ja lu? Mlay kyaj ten ab'j tib'aj juntl ab'j, tkyaqil kb'el tilj.

³E je'xtzun twi witz Olivos tb'i, jlajtzi tja Dios; tejtzun tkub' qe' Jesús, xi tqanin Pedro te, tuk'ix Jacobo, tuk'ix Juan, tuk'ix Andrés kyjunalx:

⁴—Q'mantza qeye, che chi, ¿jtoj b'an tjapun jlu? ¿Ex alkye jun señ tzul ch'ixtoq tjapun tkyaqil jlu?

⁵Xi ttzaq'we'n Jesús: —Ten kykwente kyi'je tu'n mi'n kykub' sb'u'ne kyu'n xjal,

⁶ok che ul nimku xjal, ax nb'iye k'okel kyq'o'n te kyb'i, in kyma'n: Aqine ju Crist, che chilo; ex nimku xjal che b'el sb'u'n kyu'n.

⁷Oktzun kyb'inteye ok tok q'oj ex qa tqanil ti'j q'oj, mi'n che jaw sek'paje, porke ilxix ti'j tu'n tjapun tkyaqil jlu, ex myatzun a mankb'il tq'ijlalil tu'n tjapun b'aj tkyaqil.

⁸Ok che okel ten nasyon q'ojlel kyi'j txqantl nasyon, ex qe tnam che okel ten q'ojlel kyi'j txqantl tnam; ex noq jachaq tzul kyaqnajnab', tzul we'yaj, ex che jawil tilj xjal; tkyaqil jlu atzun tnejel k'ixb'isab'l.

⁹Atzun kyeye ten kykwente kyi'je; ok che xel q'o'ne tuj kyq'ab' aj sanjelal, ex ok che b'ajel asyaline kyuj ja te k'ulb'il. Che xel q'i'ne kywitz qe gobernador ex kywitz qe rey tu'n nlaje tu'n kyoke te testiw wi'je kywitz.

¹⁰Ex na'nxtoq tul mankb'il tq'ijlalil ilxix ti'j tu'n t-xi pakb'et tqanil kolb'il kye xjal kyuj kykyaqil nasyon.

¹¹Ex ok kytzyete kyu'n xjal tu'n kyxi q'i'ne kywitz aj sanjelal, mi'n b'aj kyk'u'je ti'j alkye tu'n t-xi kyma'ne, ex mi'n che ximane ti'j, noq alkye ktzajel tma'n Dios kyeye, atzunju kxel kyma'ne ok kytzyete; porke mya aqeye che yolil, ate Xewb'aj Xjan k-yolil.

¹²Che xel q'o'n qe xjal kyu'n kyerman tu'n kykyim; ikx qe k'wa'lb'aj che xel q'o'n kyu'n kyman tu'n kykyim; ex qe k'wa'lb'aj che okel ten q'ojlel kyi'j kyman ex che xel kyq'o'n tu'n kykub' b'yo'n.

¹³Ex che elel ik'une kyu'n kykyaqil xjal tu'n tlaj okslal qeye wi'je, ex alkyeju kukx ma tzik'x tu'n ex minti' ma kub' numj, atzunju ok kletel.

¹⁴At jun yol kyaj ttz'ib'an Daniel aju t-sanjel Dios. K'okex kyq'o'n xjal jun tilb'ilal ik'b'ilxix ax tuj tja Dios, chi Daniel. Alkye ma jaw sch'inte jlu, tz'elx tnik' ti'j. Kyja'tzun, ok kylonteye tokx tilb'ilal lu tuj lugar jatum mya q'o'n te, tu'n jlu qe xjal ate' tuj tx'otx' Judea, kyxi oq twi witz.

¹⁵Ex qa at jun xjal tjax twi tja ok tpon q'ij lu, ok tku'tz, mi'n tz'okx q'il jun ti'xti tuj tja;

¹⁶ex qa at jun xjal tuj kojb'il, mi'n tz'ajtz meltz'aj tja q'il t-xb'alun.

¹⁷B'ek'b'il kywitz qe xu'j ch'ixtoq tul itz'j kyal tuj tq'ijlalil tzul, ex b'ek'b'il kywitz qe xu'j kukx kych'u'n kyal.

¹⁸Kyja'tzun, che na'ne Dios myawt tuj jb'alil tu'n kyel oqe.

¹⁹Porke tuj tq'ijlalil tzul, tzul jun k'ixb'isab'l nimxix, b'ajx tzaj jun k'ixb'isab'l ik tza'n jlu atxix t-xe tnejel tej tb'ant tkyaqil tu'n Dios, ex mlay tzaj juntl maj.

²⁰Ex noqwit minti' tu'n tajtz laq'e' ti'j tq'ijlalil k'ixb'isab'l tu'n Qman, miwtlo jun xjal tu'n tkyaj anq'in; ex tu'n kylaj qe xjal sk'o'maj tu'n Dios, k'ajetz laq'e' ti'j tq'ijlalil k'ixb'isab'l.

²¹Ex qa at jun xjal ma tzaj tma'n kyeye: Lu Crist at tzalu, aju at tulel qa chi, ex qa lu Crist ta' ma chixin qa chi, mi'n txi kyoksla'ne tyol.

²²Ok che ul qe xjal nik'al yol, k'okel kyq'on kyib' ik tza'n Crist qe, ex k'okel kyq'on kyib' ik tza'n t-sanjel Dios; ex che b'antel qe señ kyu'n kyuk'ix qe b'inchb'en nim kyipumal, tu'n kysb'unjtz qe xjal kyu'n, ax ikx jaku kyajb'e tu'n kysb'un kyi'j qeju sk'o'maj tu'n Dios, noqwit at tumel.

²³Kyja'tzun, ten kykwente kyi'je; lu ma txi nma'ne tkyaqil kyeye na'nxtoq tul kanun jlu.

²⁴Tb'ajlenxitzun yajb'il tuj tq'ijlalil tzul, k'okel qlolj twitz q'ij, ex ju xjaw mlay k'ant t-spik'umal.

²⁵Qe che'w che tzajel tz'aq twitz kya'j, ex qeju at kyipumal tuj kya'j ok che yukchtel.

²⁶Oktzun kyila' xjal ok ntzaje tuj muj, aqine sk'o'maj qine tu'n Dios tu'n ntene kyuk'il xjal, ex ok kyila' at nim wipumale ex in qoptz'aj wi'je.

²⁷Che tzajeltzun nsama'ne qe n-anjele, ex kb'ajel kychmo'n qeju sk'o'maj wu'ne tuj tkyaqil twitz tx'otx', ktzajelx qe' ttxa'npun tx'otx' ex kpol b'aj max t-xe kya'j.

²⁸Kyi'mele nik' ti'j tqan higo: Ok in cha'xix tq'ab', ex ok in tzaj t-xul, nne'l kynik'e ti'j in laq'e'x ttzaj ttzi jb'alil.

²⁹Ikxtzun kyeye, ok kylonteye ok tjapun tkyaqil jlu, tz'elx kynik'e ti'j, niqayin ta' tq'ijlalil tu'n wule, mer ik tza'n otoq chin pone ttzi ja.

³⁰Ax tok kxel nma'ne kyeye, qe xjal ate' tuj tq'ijlalil ja'lo na'nxtoq kykyim ok tjapun tkyaqil jlu.

³¹Knajel kya'j tuk'ix tx'otx', atzunwe nyol mlay naj.

³²Ex mi a'l jun b'ilte alkye q'ij ex alkye or tu'n wule; mi qe anjel ate' tuj kya'j minti' b'i'n kyu'n, ax ikx weye Tk'wa'l Dios qine minti' b'i'n wu'ne. O'kx te Dios Mamb'aj b'a'n tu'n.

³³Kyja'tzun, ten kykwente kyi'je, che xq'uqine ex che na'ne Dios; porke minti' b'i'n kyu'ne jtoj b'an tjapun tq'ijlalil.

³⁴Ik tten ik tza'n jun xjal xi' tuj jun tb'e najchaq; na'nxtoq tetz tuj tja, kyaj tq'o'n kyoklen qe tmajen ex xi tma'n te teyle junjun alkye taq'un, ex kyaj tma'n te kwentil ttzi ja tu'n t-xq'uqin.

³⁵Kyja'tzun, che xq'uqine porke minti' b'i'n kyu'ne jtoj b'an tul ju tajaw ja, qa otoq qok yupj ok tul, qa te tmij aq'b'il, qa ok ttzaj oq' tzek', ex qa ch'ixtoq qsqix.

³⁶Kyja'tzun, che xq'uqine, mya yajku tzul kuchiwt mi'n che knete tu'n in che tane.

³⁷Aju in xi nma'ne kyeye, kye kykyaqil in xi nma'ne: Che xq'uqine.