Read kumam Marcos 14 Bible Online

Marcos 14 - kumam bible

Marcos 14

¹Atxtoq kab' q'ij tu'n tik'set Xjan Q'ij ex tu'n t-xi kywa'n xjal pan minti' t-samel tu'n tjaw mal tk'u'j; atzun qe nejenel kye pal kyuk'ix qe xnaq'tzal ti'j ley in che jyon tumel tza'n tten tu'n ttzyet Jesús kyu'n tuj ewaj ex tu'n tkub' kyb'yo'n.

²—Mya tuj ninq'ij tu'n ttzyet qu'n, tu'ntzun mi'n kyjaw tilj xjal, che chi.

³Attoq Jesús tuj Betania tuj tja Simón aju at tx'a'k ti'j nej, aju tx'a'k minti' q'anb'il ti'j; ex q'uqltoq Jesús ti'j mes, ultzun jun xu'j q'i'n jun tal botey tu'n, alabastro ttx'otx'il, nojni tu'n perjum nardo tb'i, junxte, mya smo'n, ex puro wi'yilxix: kub'tzun tpa'n xu'j ju tal botey, jax tqo'n perjum tib'aj twi' Jesús.

⁴Ex at junjun tzaj tlo'ch kyk'u'j ex kyma kyxolx: —¿Tiqu'n noqx gan ma naj perjum lu?

⁵Ex mawtlo txi k'ayit tu'n ox syent denari pwaq ex qa mastl, tu'n t-xi q'ot kye meb'a, che chi. Ex ok ilin xu'j kyu'n.

⁶Atzunte Jesús xi tma'n kye: —E tten xu'j, ¿tiqu'n in che lab'te ti'j? B'a'n ma tb'incha weye.

⁷Qe xjal meb'a kukx che tel kyuk'ile, ex alkye q'ij kyajb'ile tu'n kyonine kyi'j, b'a'n tu'n kyb'inchanteye b'a'n kye; atzun weye, mya kukx chin tele kyuk'ile.

⁸Aju b'a'n tb'ant tu'n xu'j lu ma tb'incha; porke ma tz'ok tq'o'n naj perjum ti'j nximlale na'nxtoq nku'x maqu'ne.

⁹Ax tok kxel nma'ne kyeye, tuj tkyaqil lugar jatum kxel pakb'et tqanil kolb'il tuj tkyaqil twitz tx'otx', ax ikx kxel q'met aju ma tb'incha xu'j lu, te nab'l te.

¹⁰Atzunte Judas Iscariote, jun kye kab'laj xnaq'tzb'en, xi' kyuk'il nejenel kye pal, q'malte kye tu'n t-xi q'o'n Jesús tuj kyq'ab' tu'n.

¹¹Tejtzun kyb'inte jlu e jaw tzalajxix, ex o b'ant ti'j kyu'n tu'n t-xi kyq'o'n ch'in pwaq te Judas. Atzunte Judas ok ten jyol jun tumel tza'n tten tu'n t-xi q'o'n Jesús tuj kyq'ab'.

¹²Kanuntzun tnejel q'ij tu'n kywa'n xjal pan minti' t-samel tu'n tjaw mal tk'u'j, atzun q'ij tu'n tkub' b'yet ju tal ẍne'l te ik'sb'il Xjan Q'ij. Xitzun kyma'n qe t-xnaq'tzb'en Jesús te: —¿Jatum tajb'ila tu'n qxi'ye b'inchal wab'j tu'n twa'na tuj Xjan Q'ij?

¹³Xitzun t-sama'n Jesús kab'e t-xnaq'tzb'en, ex xi tma'n kye: —Kyxi'ye tuj tnam ex k'okel kyk'ulb'a'ne jun xinaq q'i'n jun ẍoq' a' tu'n; che lpe'xtzune ti'j.

¹⁴Oktzun tokx tuj jun ja, kxel kyma'ne te tajaw ja: ¿Alkye jun kol ja jatum tu'n nwa'ne kyuk'il nxnaq'tzb'ene tu'n tik'set Xjan Q'ij? Chi Xnaq'tzal, che chikuye.

¹⁵Ktzajeltzun tyek'un jun tkab' kolin ja ma'xix, b'animaj tten; atzun kyb'inchame qwa, chi Jesús kye.

¹⁶E je'xtzun qe t-xnaq'tzb'en, ex e okx tuj tnam, knettzun ju ja kyu'n ik tza'n otoq txi tma'n Jesús kye; b'ajtzun kyb'incha'n wab'j tu'n tik'set Xjan Q'ij.

¹⁷Tejtzun tok qax, pontzun Jesús kyuk'ix qeju kab'laj t-xnaq'tzb'en.

¹⁸Tejtzun kykub' qe' ti'j mes, matoq in che wa'n, xi tma'n Jesús kye: —Ax tok kxel nma'ne kyeye, ax jun kyeye aju in wa'n wuk'ile kxel q'onte weye tuj kyq'ab' xjal.

¹⁹Atzun kye t-xnaq'tzb'en tzaj kyb'is, ex teyle junjun xi tma'n te: —¿Apelo qine? Chi jun. Ax ikx tma juntl, ax ikx tma juntl.

²⁰Xitzun ttzaq'we'n Jesús: —Kab'laj kyb'ete nxnaq'tzb'en qeye, ex ax jun kyxole kxel q'onte weye tuj kyq'ab' xjal. Aju in ku'x tmu'n twa tuj laq junx wuk'ile, atzunju.

²¹Ax tok chin xel q'o'ne tuj kyq'ab' xjal ik tza'n ju yol tz'ib'an wi'je tuj Tu'jil, ex b'ek'b'il twitz ju xjal aju kxel q'onte weye tuj kyq'ab' xjal, aqine sk'o'maj qine tu'n Dios tu'n ntene kyuk'il xjal. Mas b'a'nwtlo miwt o itz'j ju xjal lu, chi Jesús kye.

²²Kukxtoq kywa'n, jaw ttzyu'n Jesús ju pan, xi tq'o'n chjonte te Dios, kub' tpiẍk'u'n, xi tq'o'n kye ex xi tma'n: —Kywa'nxe jlu, atzun nximlale jlu.

²³Ax ikx jaw ttzyu'n ju vas, xi tq'o'n chjonte te Dios ex xi tq'o'n kye; kykyaqiltzun e k'an ti'j.

²⁴Ex xi tma'n kye: —Atzun nchk'ele jlu te kyuwsab'l teju ak'aj yol aju ma kyaj b'ant ti'j tu'n Dios kyuk'ile; atzun nchk'ele k'elel chitj tu'n kyklet nimku xjal.

²⁵Ax tok kxel nma'ne kyeye, mlay txi nk'a'ntle juntl maj ta'l twitz uva ja'lo, maxitzun kxel nk'a'ntle tuj tq'ijlalil ok tul tkawb'il Dios.

²⁶Tb'ajlenxitzun kyb'itzan jun b'itz, e je'xtzun twi witz Olivos.

²⁷Xitzun tma'n Jesús kye: —Kykyaqile che kyjel kolinte weye tuj qonik'an ja'lo; porke in tma'n tuj Tu'jil: Kb'el nb'yo'ne ju pastor, ex che elel sputj qe ẍne'l.

²⁸Ex njatzlenxi anq'ine, nej chin pole kywitze tuj Galilea.

²⁹Xitzun tma'n Pedro te Jesús: —Maske kyjel kolina kyu'n kykyaqil, atzun weye mlayx kyaj nkoline, chi Pedro.

³⁰Xi tma'n Jesús te: —Ax tok kxel nma'ne teya, teju qonik'an ja'lo, na'nxtoq ttzaj oq' tkab'maji'n tzek', ox maj kb'el tewana kywitz xjal qa minti' ojtzqi'n qine tu'na.

³¹Atzunte Pedro xi tkyuwsa'nxix: —Maske chin kyime tuk'ila ma b'ant-x pero mlay kub' wewane, chi Pedro. Ax ikx o kyma kykyaqil.

³²E ultzun tuj jun lugar Getsemaní tb'i; ex xi tma'n Jesús kye t-xnaq'tzb'en: —Che qekuye tzalu, atzun weye chin na'le Dios.

³³Ex xi uk'in Pedro tu'n Jesús, tuk'ix Jacobo ex Juan; tzajtzun nim tb'is ex tzaj ta'w tuj tanmi,

³⁴ex xi tma'n kye: —Ma tzajxix b'is tuj wanmiye, chin kymele tu'n b'is; che tenkje tzalu ex che xq'uqine, chi Jesús.

³⁵Ex xi laq'e' ch'intl Jesús, kub' mutze' twitz tx'otx', o kub'san twitz Dios ex tma: —Qa at tumel, kuchiwt tu'n mi'n tik'x wu'ne aju k'ixk'oj tzul tuj or lu.

³⁶Tat, aya Nman, tkyaqil jaku b'ant tu'na; q'i'mela k'ixk'oj lu wi'je tu'n mi'n tik'x wu'ne; ex mya tu'n tb'ant aju wajb'ile, noq o'kx tu'n tb'ant aju tajb'ila, chi Jesús.

³⁷Ultzun meltz'aj Jesús kyuk'il t-xnaq'tzb'en, in che tan tej tul; xi tma'n te Pedro: —Simón, ¿maj in tana? ¿Maj minti' ma tipaya tu'n t-xq'uqina jun or?

³⁸Che xq'uqine ex che na'ne Dios tu'ntzun mi'n kyoke tuj joyb'il kyi'je. Ax tok tajb'il kyanmiye, atzunju kychib'jale minti' tipun.

³⁹Xi' Jesús juntl maj ex ok ten na'l Dios, ax yol xi tma'n ik tza'n xi tma'n nej.

⁴⁰Tej tul meltz'aj juntl maj kyuk'il t-xnaq'tzb'en, lu qe in che tantl, porke attoq nim watl tuj kywitz, ex minti' b'a'n kyu'n alkye tu'n t-xi kyma'n.

⁴¹Tejtzun tul meltz'aj toxmaji'n, xi tma'n kye: —Che tanxtzune ja'lo ex che ojlane. O'kxtzunju, ya ma pon or; lu qine chin xel q'o'ne tuj kyq'ab' aj il, aqine sk'o'maj qine tu'n Dios tu'n ntene kyuk'il xjal.

⁴²Che we'ktze, qo'qe; lu ma tzul laq'e' aju kxel q'onte weye tuj kyq'ab' xjal, chi Jesús kye.

⁴³Kukxtoq tyolin Jesús pon naj Judas, jun kyxol qeju kab'laj xnaq'tzb'en, kyuk'ix nim xjal tuk'il, q'i'n spad kyu'n tuk'ix tze', otoq che tzaj sama'n kyu'n nejenel kye pal ex kyu'n xnaq'tzal ti'j ley ex kyu'n kytijil xjal.

⁴⁴Otoq txi tma'n Judas kye tza'n tten tu'n t-xi tq'o'n tuj kyq'ab': —Aju k'elel ntz'ub'ane twitz, atzunju; kytzyuntztzune ex kyi'nxe, mi'n txi kytzoqpi'ne, chi Judas.

⁴⁵Tejtzun tpon Judas tuk'il Jesús, jurat naj pon laq'e' ttxlaj, ex tma: —Xnaq'tzal, Xnaq'tzal. Ex el ttz'ub'an twitz.

⁴⁶Tzyettzun Jesús kyu'n, ex xi kyi'n.

⁴⁷Ex at jun kyxol qeju ax wa'l qe'toq, jatz ti'n t-spad ex ok ttx'emin tmajen nejenel kye pal, b'i'x el t-ẍkyin tu'n.

⁴⁸Xitzun tma'n Jesús kye xjal: —¿Eleq'pe qine tuj kywitze ma che ule tzyul weye, q'i'n spad kyu'ne tuk'ix tze'?

⁴⁹Tkyaqil q'ij in tene kyxole tuj tja Dios, xi nq'o'ne xnaq'tzb'il kyeye, ex minti' in tzaj kytzyu'ne; pero ma kyb'inchaye jlu tu'ntzun tjapun aju yol tz'ib'an tuj Tu'jil, chi Jesús kye.

⁵⁰Kyajtzun kolin Jesús kyu'n kykyaqil xnaq'tzb'en, e je'l oq.

⁵¹Ex at jun ku'xun lepchix t-xi' ti'j Jesús, minti' t-xb'alun tok, noq o'kx jun sábana b'alq'i'n ti'j, tzyettzun kyu'n xjal.

⁵²Atzunte ku'xun kyaj kotpaj aju sábana tok ti'j, ex el oq sqi't ti'j.

⁵³Xitzun q'i'n Jesús kyu'n twitz nejenel kye pal; ex ok kychmon kyib' kykyaqil nejenel kye pal kyuk'ix qe kytijil xjal ex qe xnaq'tzal ti'j ley.

⁵⁴Atzunte Pedro lepchix t-xi najchaq, okx max ttxa'n tpe'n nejenel kye pal; ex ax kub' qe' kyxol qe polisiy in q'axnen q'aq'.

⁵⁵Atzun qe nejenel kye pal kyuk'ix kykyaqil aj sanjelal kye xjal judiy in che jyon kyi'j xjal tu'n kyok te testiw ti'j Jesús tu'n tkub' t-sentens Jesús tu'n tkyim; ex minti' o knet kyu'n jun testiw axix tok tyol.

⁵⁶Ex nimku xjal e nik'an yol ti'j, ex minti' moje' kyyol.

⁵⁷E jawtzun we' junjun xjal, e ok ten si'mil yol ti'j, in kyma'n:

⁵⁸—O qb'iye in tma'n xjal lu: Kb'el nxitune tja Dios lu, aju kyu'n xjal o b'ant, ex tuj ox q'ij kjawil nb'incha'ne juntl tja Dios mya kyu'n xjal kb'antel, chi xjal lu, che chi.

⁵⁹Ex ikx qe xjal lu minti' moje' kyyol.

⁶⁰Jawtzun we' ju nejenel kye pal ex xi tqanin te Jesús: —¿Maj minti' in tzaj ttzaq'we'na? ¿Chi tok tu'na ti'j ju in kyma'n qe xjal lu ti'ja?

⁶¹Atzunte Jesús minti' o q'ajt, ex minti' jun yol xi tma'n. Atzunte nejenel kye pal xi tqanin juntl maj te Jesús: —¿Apeya ju Crist Tk'wa'l Dios, aju Dios nimanxix tb'i qu'n? Chi xjal.

⁶²Xi tma'n Jesús te: —Aqine, ex ok kyila'ye q'uql qine tuj b'anq'ab'aj ttxlaj Dios at nim tipumal, aqine sk'o'maj qine tu'n Dios tu'n ntene kyuk'il xjal, ex ok kyila'ye ok ntzaje tuj muj twitz kya'j, chi Jesús.

⁶³Atzunte nejenel kye pal el t-sb'it'un t-xb'alun ex tma: —¿Ti til txqantl testiw qe?

⁶⁴Ma kyb'iye ma yolin mya b'a'n ti'j Dios. ¿Chi tok kyu'ne? Chi nejenel kye pal. Kykyaqiltzun o kyma: At til, b'a'n tu'n tkub' t-sentens tu'n tkyim, che chi.

⁶⁵E oktzun ten junjun tzub'al tuj twitz, ok kymaqsi'n twitz, ex ok kyb'ju'n, ex xi kyma'n te: —Q'mantza alkye ma tz'ok b'jun teya, che chi. Ikx qe polisiy ok kytz'ajan twitz.

⁶⁶Atzunte Pedro tku'tztoq ttxa'n pe'n; ultzun jun tcriad nejenel kye pal;

⁶⁷tejtzun tlonte criad lu Pedro in q'axnen q'aq', xi tke'yin criad twitz Pedro ex tma: —Ikx teya o tena tuk'il Jesús aj Nazaret.

⁶⁸Atzunte Pedro kub' tewan ex tma: —Minti' ojtzqi'n xjal lu wu'ne, ex minti' nne'l nnik'e ti'j ju in tma'na, chi Pedro. Etztzun laq'e' Pedro ttzi sawan ex tzajtzun oq' tzek'.

⁶⁹Ok tke'yin criad juntl maj ti'j Pedro, oktzun ten criad q'malte kye xjal ax ate'toq: —Ajun te xjal lu kyuk'il.

⁷⁰Atzunte Pedro kub' tewan juntl maj. Te yajxi ch'intl tzaj kyma'n qe xjal te Pedro, aqeju ax ate'toq: —Ax tok ajuna kyuk'il porke aj Galilea, [ex ikx yolina ik tza'n kye], che chi.

⁷¹Xi tma'n Pedro: —Tzqan Dios ax tok nyole. B'a'n tu'n ttzaj jun ncastiwoye tu'n Dios qa mya ax tok nyole; minti' ojtzqi'n wu'ne aju xjal in kyma'ne, chi Pedro.

⁷²Ex tzajtzun oq' tkab'maji'n tzek'. Ultzun ti'j tk'u'j Pedro aju yol otoq tma Jesús te: Na'nxtoq ttzaj oq' tkab'maji'n tzek', ox maj kb'el tewana kywitz xjal qa minti' ojtzqi'n qine tu'na, chi Jesús. Tej tul jlu tuj tnab'l Pedro, b'i'x jaw oq'.