Read kumam Marcos 15 Bible Online

Marcos 15 - kumam bible

Marcos 15

¹Tejtzun qsqix, e yolin qe nejenel kye pal ti'j alkye tu'n tb'ant kyu'n, kyuk'ix qe kytijil xjal ex qe xnaq'tzal ti'j ley ex kykyaqil Aj Sanjelal kye xjal judiy. B'ajtzun k'alo'n Jesús kyu'n, xi kyi'n ex xi kyq'o'n tuj tq'ab' Pilato.

²Xitzun tqanin Pilato te Jesús: —¿Apeya ju Rey kye xjal judiy? Xi ttzaq'we'n Jesús: —Aqine ik tza'n ma tmaya.

³Atzun kye nejenel kye pal nimku til Jesús xi kyma'n te Pilato.

⁴Xitzun tqanin Pilato juntl maj te Jesús: —¿Maj minti' jun tyola? B'inxa nimku tila in kyma'n xjal.

⁵Pero te Jesús mi jun yol xi tma'n; kyja'tzun nim o lab'in Pilato ti'j.

⁶Tkyaqil ab'q'i nne'tz ttzoqpi'n Pilato jun pres tuj ninq'ij, noq alkye kyajb'il tnam xjal tu'n tetz tzoqpi'n.

⁷Ex attoq jun xjal Barrabás tb'i, presintoq kyuk'ix qe tuk'il tu'n tlaj at xjal otoq kub' kyu'n tej kyq'ojin ti'j gobierni.

⁸E ultzun nim xjal tuk'il Pilato qanil te tu'n tetz ttzoqpi'n jun pres ik tza'n in tb'incha'n junjun maj.

⁹Xitzun tma'n Pilato kye: —¿Kyajpeye tu'n tex ntzoqpi'ne aju Kyreye, aqeye xjal judiy? Chi Pilato.

¹⁰Porke el tnik' Pilato ti'j, xi q'o'n Jesús tuj tq'ab' Pilato kyu'n qe nejenel kye pal tu'nju at tlo'ch kyk'u'j ti'j.

¹¹Atzun kye nejenel kye pal e ok ten kyuwsal kyk'u'j xjal tu'n t-xi kyqanin xjal tu'n tetz tzoqpi'n Barrabás, ex mya ate Jesús tu'n tetz tzoqpi'n.

¹²Xi tqanin Pilato juntl maj kye: —¿Alkyetzun kyajb'ile tu'n nb'inchanteye ti'j ju xjal lu, aju in kyma'ne ti'j qa atzun Kyreye? Chi Pilato.

¹³Atzun kye xjal e jaw sch'in juntl maj: —E tjaw twitz crus.

¹⁴Atzunte Pilato xi tma'ntl kye: —¿Alkyetzun mya b'a'n ma tb'incha? Atzun kye xjal mas e jaw sch'in: —E tjaw twitz crus.

¹⁵Etztzun tzoqpi'n Barrabás tu'n Pilato tu'ntzun tqe' kyk'u'j xjal, atzunte Jesús b'aj asyalin, ex xi tq'o'n tuj kyq'ab' soldad tu'n tjaw kyq'o'n twitz crus.

¹⁶Atzun kye soldad xi q'i'n Jesús kyu'n tuja, okx kyi'n tuj cuartel, ex tzaj kytxko'n txqantl soldad.

¹⁷Ex ok kyq'o'n jun t-xb'alun Jesús ẍjulin ke'yin, ex b'aj kyb'incha'n jun coron ch'i'x, ex jax kyq'o'n tuj twi'.

¹⁸E oktzun ten q'olb'elte: —Kuchiwt kukx tel tq'ija, aya Rey kye xjal judiy.

¹⁹Ex ok kyb'ju'n ti'j twi' tu'n ajlaj, ex xi kytzub'an ti'j, ex e kub' ẍmeje' k'ulul twitz.

²⁰Kyb'ajlenxitzun tze'n ti'j, el kyi'n ju xb'alun ẍjulin ke'yin tok ti'j, ex ok kyq'o'n aju tex t-xb'alun, etztzun kyi'n tu'n tjaw kyq'o'n twitz crus.

²¹Ex nnik'ku jun xjal tzajni tuj kojb'il, Simón tb'i xjal ex aj Sirene, atzun tman Alejandro tuk'ix Rufo, tzyettzun Simón kyu'n ex ok kyq'o'n jwers ti'j tu'n t-xi ti'n tcrus Jesús.

²²Xitzun q'i'n Jesús kyu'n tuj jun lugar Gólgota tb'i, atzun in tma'n ju yol lu: Jun lugar Tb'aqil wib'aj.

²³Ex xi kyq'o'n tk'a' vin t-sem tib' tuk'il ta'l tze' mirra tb'i; atzunte Jesús minti' xi tk'a'n.

²⁴Jawtzun q'o'n Jesús twitz crus kyu'n soldad, b'aj kysipan t-xb'alun kyxolx ex e ok ten q'il swert ti'j tu'n tel kynik' ti'j alkye te junjun tu'n t-xi ti'n.

²⁵Las nueve te prim tej tjaw q'o'n Jesús twitz crus.

²⁶Aju tb'i tkaws tz'ib'antoq jax kyq'o'n twitz crus in tma'n: Aju Rey kye xjal judiy.

²⁷Ax ikx e jaw q'o'n kab'e eleq' twitz crus tuk'il Jesús, jun tuj tb'anq'ab' ex jun tuj tnayaj.

²⁸[Ex japun aju tz'ib'an tuj Tu'jil in tma'n: Ok te tajlal kyxol qe mya b'a'n.]

²⁹Ex qeju in che ik' twitz crus, in che xmayin ti'j Jesús, in xi kyyukun kywi' ex in kyma'n: —Bay atzun taja, aya o tmaya tu'n tkub' t-xituna tja Dios ex tuj ox q'ij tu'n tjaw tb'incha'na juntl maj.

³⁰Klom tib'a, ex tku'tza twitz crus, che chi.

³¹Ax ikx qe nejenel kye pal e xmayin ti'j kyuk'ix qe xnaq'tzal ti'j ley, in kyma'n kyxolx: —Qe txqantl xjal e klet tu'n, atzunte minti' in b'ant tu'n tklonte tib'.

³²Qa a Crist jlu, aju Rey kye aj Israel, e tku'tz twitz crus ja'lo tu'ntzun qlonte ex tu'n qokslan ti'j, che chi. Ax ikx qeju otoq che jaw q'o'n twitz crus ttxlaj Jesús e ilin ti'j.

³³Tejtzun tpon chilkuq'ij, ok qloljxix tkyaqil twitz tx'otx', texi las tres te qale el spik'e'.

³⁴Tejtzun tpon las tres te qale, jaw tq'ajq'ajel twi' Jesús kyuwxix: —Eloi, Eloi, ¿lama sabactani? chi Jesús; atzun in tma'n ju yol lu: Nman Dios, Nman Dios, ¿tiqu'n ma chin kyaj tkolina?

³⁵Ex at junjun xjal ax wa'l qe'toq, tej kyb'inte tyol Jesús, kyma: —Kyb'inxe in txokon ti'j Elías aju t-sanjel Dios.

³⁶Tu'n jlu xi ojqelan jun, ku'x tmu'n jun esponja tuj vinagre ex ok tq'o'n twi' jun ajlaj, ex jax tq'o'n tu'n tel ttz'ub'an Jesús. —E tten nej, chi xjal, jaku qil qa ma tzul Elías tu'n tku'tz q'i'n tu'n.

³⁷Atzunte Jesús jaw tq'ajq'ajel twi' kyuwxix, ex kyimtzun.

³⁸Atzunju xb'alun tkub' te maqb'il tuj tmij tja Dios kub' sb'it'j tuj tmijil, tzajx twi', kub'il t-xe'.

³⁹Atzunte capitán aju wa'ltoq twitz Jesús, tej tlonte tza'n tten jaw sch'in Jesús ex tza'n tten kyim, tma capitán: —Axix tok ate xjal lu Tk'wa'l Dios.

⁴⁰Ax ikx at junjun xu'j in che ke'yin najchaq, tuk'ix Mariy aj Magdala at kyxol, tuk'ix Mariy ttxu' Jacobo ch'in ex ttxu' José, ex tuk'ix Salomé at kyxol.

⁴¹Tej tten Jesús tuj Galilea e ten qe xu'j lu tuk'il ex in che ajb'en te; ex nimku txqantl xu'j in che ke'yin, otoq che ja'wil junx tuk'il Jesús tuj Jerusalén.

⁴²Ch'ixtoq tok qax, atzun q'ij tu'n tb'ant kyten xjal, porke ch'ixtoq t-xe't q'ij te ojlab'l,

⁴³ultzun José aj Arimatea, ajun kyxol Aj Sanjelal kye xjal judiy ex nim toklen. In ayontoq José ti'j tq'ijlalil tu'n tkawin Dios; okx tuk'il Pilato minti' o xob', xi tqanin t-ximlal Jesús.

⁴⁴Ex jaw lab'in Pilato ti'j qa otoq kyim Jesús; tzajtzun ttxko'n Pilato aju capitán, xi tqanin te qa otoq kyim Jesús.

⁴⁵Tejtzun tb'inte tu'n capitán qa otoq kyim, xi tma'n tu'n t-xi ti'n José t-ximlal Jesús.

⁴⁶Laq'ettzun jun saq xb'alun tb'anilxix tu'n José, ku'tz ti'n t-ximlal Jesús, okx tb'alq'i'n tuj saq xb'alun, ex okx tq'o'n tuj jun pantyón lakumaj tuj pik, ex tzaj ttolin jun ab'j, ok tq'o'n ttzi pantyón.

⁴⁷In che ke'yin Mariy aj Magdala tuk'ix Mariy ttxu' José, ex o kyil jatum okx q'o'n t-ximlal Jesús.