Read kumam Marcos 4 Bible Online

Marcos 4 - kumam bible

Marcos 4

¹Ok ten juntl maj Jesús q'olte xnaq'tzb'il kye xjal ttzi laguna, ex nim xjal pon kychmon kyib' ti'j; kyja'tzun jax Jesús tuj jun barc at ttzi a', kub'tzun qe', atzun kykyaqil xjal q'uql qe twitz tx'otx' ttzi laguna.

²Ex nimku xnaq'tzb'il xi tma'n Jesús kye tuj techal; atzunju xnaq'tzb'il lu xi tma'n kye:

³—Kyb'intze nyole. At jun xjal xi' awal triw.

⁴Tej t-xi tchitun xjal iyaj, at ch'in kub' tz'aq tuj b'e; e ultzun qe chyu'j ex jaw kywa'n.

⁵Ch'intl iyaj kub' tz'aq kyxol ab'j jatum mya nim tpimil tx'otx'; jurat tzaj poq'l iyaj porke mya nim tpimil tx'otx'.

⁶Ex tej tmeq't q'ij o tz'e'y ex b'i'x tzqij tu'n tlaj mya nim tlok'.

⁷Ch'intl iyaj kub' tz'aq t-xol ch'i'x k'ul; ch'iytzun ch'i'x k'ul, b'i'x xk'ost triw tu'n, ex minti' ok twitz.

⁸Ex ch'intl iyaj kub' tz'aq tuj tb'anil tx'otx'; tzaj poq'l, ex o ch'iy ex ok twitz; ex ti'j junjun tqan at ok 30 twitz, ex at ok 60 twitz, ex at ok jun syent twitz, chi Jesús kye.

⁹Xi tma'ntl Jesús kye: —Alkye at t-ẍkyin, b'inx ju yol lu.

¹⁰Tejtzun kyaj b'aj xjal, atzun qeju e kyaj ten tuk'il Jesús kyuk'ix qe kab'laj t-xnaq'tzb'en xi kyqanin te Jesús alkye tnab'l ju techal.

¹¹Xitzun tma'n Jesús kye: —Te kyeye ma tzaj q'o'n tu'n tel kynik'e ti'j ju yol ti'j tkawb'il Dios aju ewantoq nej; atzun kye txqantl xjal, tkyaqil tu'n t-xi q'met kye tuj techal,

¹²tu'n mi'n tkyil aju in kyke'yin, ex tu'n mi'n tel kynik' ti'j aju in kyb'i'n, tu'ntzun mi'n kyajtz meltz'aj tuk'il Dios ex tu'n mi'n tkub' najset kyil, chi Jesús kye.

¹³Ex xi tma'ntl Jesús kye: —¿Maj minti' nne'l kynik'e ti'j ju techal lu? ¿Tza'ntzun tten k'elel kynik'e kyi'j txqantl techal?

¹⁴Aju iyaj in ku'x tawa'n xjal, atzunju tyol Dios.

¹⁵Aju b'e jatum kub' tz'aq iyaj, atzun in yolin kyi'j xjal in ku'x awet tyol Dios tuj kyanmi: nej in xi kyb'i'n, ex nnu'l naj Satanás ex nne'l ti'n tyol Dios aju otoq ku'x awet tuj kyanmi.

¹⁶Qe ab'j jatum kub' tz'aq iyaj, atzun in yolin kyi'j xjal ok kyb'inte tyol Dios jurat naj in xi kyoksla'n in che tzalaj ti'j,

¹⁷ex minti' in xi' tlok' Tyol Dios kyuj, noq te kab'e q'ij in che ten; ok ttzaj yajb'il kyi'j ex ok kyel ik'un kyu'n xjal tu'n tlaj tyol Dios, jurat naj in che kub' tz'aq.

¹⁸Aju tx'otx' at ch'i'x k'ul tuj jatum kub' tz'aq ju iyaj, atzun in yolin kyi'j xjal in xi kyb'i'n tyol Dios,

¹⁹ex o'kx in che b'isun ti'j tza'n tten tu'n kyanq'in twitz tx'otx', in che sb'unjtz tu'nju kyaj tu'n kyok q'inun, ex nimku in pon kyk'u'j ti'j. Tkyaqil jlu tok kyk'u'j ti'j; tu'ntzunju nne'l tipun tyol Dios tuj kyanmi, ex minti' in witzan.

²⁰Atzunju tb'anil tx'otx' jatum kub' tz'aq ju iyaj, atzun in yolin kyi'j xjal in xi kyb'i'n tyol Dios ex in xi kyoksla'n, ex nno'k twitz iyaj kyuj; ti'j junjun tqan at nno'k 30 twitz, ex at nno'k 60 twitz, ex at nno'k jun syent twitz.

²¹Ax ikx xi tma'n Jesús kye: —¿Baqa in tzaj kyi'n xjal jun kandil tu'n tokx kyq'o'n tjaq' almi ex qa tjaq' watb'il? ¿Myapetzun tib'aj jun tkub'il tu'n tkub' q'ot tu'n tq'onte spik'un?

²²Ex tkyaqilju at tuj ewaj ktzajel yek'un, ex tkyaqilju ewan k'elel tuj q'ancha'l.

²³Alkye at t-ẍkyin, b'inx ju yol lu.

²⁴Ax ikx xi tma'n kye: —Kyq'o'nke kwent ti'j ju in kyb'i'ne, ex ax ju malb'il k'ajb'el tu'n Dios kyeye jatum in xi kymalo'ne te juntl, ex ktzajel tq'o'n Dios ch'intl tib'aj kyeye.

²⁵Ex alkye jun xjal at ch'in te, ktzajel q'o'n txqantl te; ex alkye jun xjal minti' te, aju ch'in at te, k'elel q'i'n.

²⁶Ax ikx xi tma'n Jesús: —Aju tkawb'il Dios ik tten ik tza'n jun xjal in ku'x tawa'n iyaj tuj tx'otx';

²⁷in xi'tzun xjal tal qonik'an ex in jaw we' q'ijl, atzunju iyaj in poq'l ex in ch'iy, ex te xjal minti' b'i'n tu'n tza'n tten in poq'l iyaj.

²⁸Ex ax tx'otx' in tzaj q'onte twitz; tnejel in ch'iy tqan, te tib'ajxi in yek'un twi', ex te tib'ajxi nno'k twitz ti'j twi'.

²⁹Oktzun tq'anax twitz, in che'x t-sama'n xjal tu'n tjaw chmet twitz, tu'nju otoq pon q'ij tu'n tjaw.

³⁰Ax ikx o tma Jesús: —¿Chi tok kyu'ne ti'j tkawb'il Dios? ¿Tza'n tten? Ex ¿alkye jun techal ktzajel qi'n ti'j?

³¹Ik tten tkawb'il Dios ik tza'n twitz mostaza ok in ku'x awet tuj tx'otx', mas tal ch'inxix twitz txqantl iyaj at twitz tx'otx';

³²ex ok in ku'x awet, in tzajtzun ch'iy, ex ma' nno'ka kywitz txqantl itzaj, ex ma' in che ok qe tq'ab', kyja'tzun in che okx ten qe chyu'j t-xol tq'ab' tjaq' t-xlekumal.

³³Tej tyolin Jesús kyuk'il xjal, nimku techal xi tma'n kye, ik tza'n qe techal lu, alkyeju tu'n tel kynik' ti'j.

³⁴Puro tuj techal o yolin Jesús kyuk'il xjal, ex xi tchik'b'a'n tkyaqil kye t-xnaq'tzb'en tej kyten kyjunalx.

³⁵Ax q'ij tej tok qax, xi tma'n Jesús kye t-xnaq'tzb'en: —Qo ik'x jlajxi laguna.

³⁶E kyajtzun ten kykyaqil xjal kyu'n xnaq'tzb'en, xi'tzun q'i'n Jesús kyu'n t-xnaq'tzb'en tujx barc jatum q'uql; ex at txqantl barc e je'x lpe' ti'j.

³⁷Ex tzaj jun kyq'iq' nimxix, ex jaw pulin a' tu'n kyq'iq', okx tuj barc, kyja'tzun ch'ixtoq t-xi mulq'aj barc tuj a'.

³⁸Atzunte Jesús otoq tzik' tan ttxa'n tje' barc, tx'ayl tib'aj jun xq'anwi'; jawtzun kyk'asun, ex xi kyma'n te: —Xnaq'tzal, ¿minti'pe taja qi'je, qo najele?

³⁹Jawtzun we' Jesús, xi tmayo'n kyq'iq' ex xi tma'n te a': —Mi'n q'ajta. Numekuya. We'tzun kyq'iq', b'i'xtzun take' tkyaqil.

⁴⁰Xitzun tma'n kye t-xnaq'tzb'en: —¿Tiqu'n in che xob'e? ¿Tza'n tten minti' kyokslab'le? Chi Jesús.

⁴¹Tzajtzun nim kyxob'il, ex kyma kyxolx: —¿Alkyetzunju xjal lu? Porke tuk'ix kyq'iq' ex a' in xi kyniman tyol, che chi xnaq'tzb'en.