Read kumam Marcos 5 Bible Online

Marcos 5 - kumam bible

Marcos 5

¹E pontzun jlajxi laguna tuj kytx'otx' aj Gadara.

²Tejtzun tetz Jesús tuj barc, jurat naj ul jun xinaq kanul ti'j, tzaj tuj camposant, tokx jun ju'ẍ tuj tanmi.

³Axtoq najl xjal tuj camposant, ex mi a'l jun xjal in xkye' ti'j tu'n tk'alet tu'n caden.

⁴Ex nimku maj e b'aj k'alo'n qe tqan kyuk'ix qe tq'ab' tu'n caden, ex e kub' tzaqj qe caden tu'n ex e b'aj tpaẍu'n, ex mi a'l jun xjal in xkye' ti'j.

⁵Tkyaqil q'ij ex qonik'an ax ta' twi witz ex tuj camposant, in sch'in ex nno'k tk'ixb'isan tib' tu'n ab'j.

⁶Tejtzun tlonte xjal najchaq kyja'toq ttzaj Jesús, xi qelan ex kub' ẍmeje' twitz Jesús.

⁷Jaw tq'ajq'ajel twi' kyuw, ex xi tma'n: —¿Ti toklena wi'je, Jesús, aya Tk'wa'l Dios ma' toklen? Chin kub'sale twitza, mi'n chin kub' tyajla'na.

⁸Tma xjal ikju tu'nju xi tma'n Jesús te: —Aya ju'ẍ, tetza tuj tanmi xjal lu.

⁹Ex xi tqanin Jesús te: —¿Ti tb'iya? Atzunte xjal xi ttzaq'we'n: —Legión we nb'i, porke nim qb'ete.

¹⁰Ex o kub'sanxix ju'ẍ twitz Jesús tu'n mi'n kyex lajo'n tuj kytx'otx' aj Gadara.

¹¹Ate'toq txqan b'och niqayin, nim kyb'et in che wa'ntoq tk'u'j witz.

¹²Ex e kub'san qe ju'ẍ twitz Jesús: —Qo t-samanxa kyxol b'och tu'n qokxe kyuj, che chi.

¹³Xitzun tq'o'n Jesús amb'il kye. E je'tztzun qe ju'ẍ tuj tanmi xjal, e jo'kx kyuj b'och b'alo te kab' mil kyajlal b'och; extzun kyxo'n kyib' kykyaqil b'och ttxa'n xaq, ex e b'aj naj tuj a'.

¹⁴Atzun qeju in che pastorin qe b'och e je'l oq, ex xi kyq'o'n tqanil kye xjal tuj tnam ex kye xjal tuj kojb'il. E tzajtzun xjal ke'yilte ti otoq b'aj.

¹⁵E ultzun tuk'il Jesús, ex o kyil q'uqltoq ju xjal aju otoq yajlanjtz kyu'n ju'ẍ nimku kyb'et, tok t-xb'alun ju xjal ex otoq b'anix tnab'l; tzajtzun kyxob'il xjal.

¹⁶Ex aqeju e lonte jlu, xi kytx'olb'a'n kye xjal tza'n tten otoq b'anix ju xjal aju otoq yajlanjtz kyu'n ju'ẍ, ex ti o b'aj kyi'j b'och.

¹⁷E oktzun ten xjal kub'sal twitz Jesús tu'n tex tuj kytanmi.

¹⁸Kyja'toq tokx Jesús tuj barc, aju xjal otoq yajlanjtz kyu'n ju'ẍ o kub'san twitz Jesús tu'n t-xi' tuk'il Jesús.

¹⁹Atzunte Jesús minti' tkuyi tu'n t-xi' xjal tuk'il, noq o'kx xi tma'n te: —Txi'ya tjaya kyxol qe termaniya, ex tx'olb'anxa kye aju nimxix ma tb'incha Qman teya ex tza'n tten ma tzaj q'aq'an tk'u'j ti'ja.

²⁰Xi'tzun ju xjal, ok ten tx'olb'alte tuj tx'otx' Decápolis, xi tma'n aju nimxix o tb'incha Jesús te; ex kykyaqil xjal e lab'in ti'j.

²¹Tej tik'tz Jesús juntl maj tuj barc, ul jlajtzi laguna, ul kychmon kyib' nim xjal ti'j; axtzun kub' ten Jesús ttzi a'.

²²At jun kye qeju nejenel tuj ja te k'ulb'il, Jairo tb'i, ul tuk'il Jesús; tej tlonte Jairo kyja' ttzaj Jesús, kub' mutze' t-xe' tqan.

²³Nimxix o kub'san twitz, ex tma: —Ch'ix tkyim nme'jele; tzaja wuk'ile tu'n tkub' tq'o'na tq'ab'a tib'aj tu'ntzun tb'anix ex tu'n tanq'in, chi Jairo.

²⁴Xi'tzun Jesús tuk'il, ex e ok lpe' nim xjal ti'j, ex ok kyb'etz'an kyib' xjal ti'j Jesús.

²⁵Ex at jun xu'j kyxol xjal, otoq b'ant kab'laj ab'q'i yab'toq tu'n ẍwo'j.

²⁶Ela'xi maj otoq txi aj kyuk'il nimku q'anal, ex nim otoq k'ixb'i, ex otoq b'aj tnajsa'n tkyaqilju at te; ex minti' o b'ant ch'in, noq mas xi' tuj tilil.

²⁷Tej tb'inte xu'j tqanil ti'j Jesús, pon laq'e' ttzal ti'j Jesús kyxol xjal, ex ok tmako'n xu'j t-xb'alun Jesús.

²⁸Porke chi xu'j: Ichaq noq t-xb'alun tz'ok nmako'ne, chin b'antele.

²⁹Ex jurat naj o we' ẍwo'j ti'j; ex o tna' xu'j tuj t-ximlal otoq b'anix ex otoq tz'el tyab'il.

³⁰Jurattzun el tnik' Jesús ti'j qa otoq b'anix jun xjal tu'n tipumal; ajtztzun tke'yin kywitz xjal, ex tma: —¿Alkye ma tz'ok makonte nxb'alune?

³¹Xi kyma'n t-xnaq'tzb'en te: —Lu in tke'yina qe xjal nno'k kyb'etz'an kyib' ti'ja, atzun teya in tma'na: ¿Alkye ma tz'ok makonte weye?

³²Xitzun tke'yin Jesús kywitz kykyaqil xjal ate'toq ti'jele, tu'n tel tnik' ti'j alkye otoq tz'ok makonte te.

³³Atzunte xu'j tzaj lu'lun tu'n t-xob'il, porke b'a'ntoq tu'n aju otoq b'inchanjtz te; pontzun laq'e' xu'j twitz Jesús, kub' ẍmeje' t-xe tqan, ex clarxix xi tma'n tkyaqil.

³⁴Xitzun tma'n Jesús te: —Nme'jel, tu'n tokslab'la ma b'anta; txi'ya, txub'txaj ta'ya ja'lo, b'i'x ma kyaj b'anixa, ma tz'el tyab'ila.

³⁵Matoq in yolin Jesús tej kyul kab'e xjal e tzaj tuj tja nejenel tuj ja te k'ulb'il ex xi kyma'n te: —Ma kyim tme'jela; ¿tigan sikt Xnaq'tzal tu'na? Che chi.

³⁶Tejtzun tb'inte Jesús aju in kyma'n, xi tma'n teju nejenel tuj ja te k'ulb'il: —Mi'n xob'a, o'kx qe' tk'u'ja.

³⁷Ex minti' o tkuyi Jesús tu'n kyxi lpe' xjal ti'j, noq o'kx Pedro, tuk'ix Jacobo ex Juan aju titz'in Jacobo e je'x tuk'il.

³⁸Tejtzun tpon Jesús tja nejenel o til Jesús qe xjal in che wulj ex in che oq' ex nimxix in che wu'yin.

³⁹Okxtzun Jesús tuja ex xi tma'n kye xjal: —¿Tiqu'n in che wulje ex in che oq'e? Aju txin mya kyimni, noq in tan, chi Jesús kye.

⁴⁰Ex e ok ten xjal xmayil ti'j Jesús. Atzunte Jesús e je'tz tlajo'n kykyaqil xjal ttxa'n pe'n, o'kx tman txin okx tuk'in, tuk'ix ttxu', ex kyuk'ix qeju ate' tuk'il Jesús. E okxtzun jatum ta' txin.

⁴¹Jawtzun ti'n Jesús tq'ab' txin ex xi tma'n te: —Talita cumi, chi Jesús. Atzun in tma'n ju yol lu: Txin, teya in xi nma'ne, we'ktza.

⁴²Jurattzun jaw we' txin ex ok ten b'etel, tu'nju otoq japun kab'laj ab'q'i tu'n. Atzun kye xjal nim e jaw lab'in tej kyke'yinte jlu.

⁴³Ex xi tkyuwsa'nxix Jesús kye, xi tma'n tu'n mi'n t-xi kyma'n kye xjal, ex xi tma'n tu'n t-xi q'ot ch'in twa txin.