Read kumam Marcos 6 Bible Online

Marcos 6 - kumam bible

Marcos 6

¹Ik'tzun Jesús tuj lugar lu, xi' tuj ttanmi, ex e ok lpe' qe t-xnaq'tzb'en ti'j.

²Tejtzun tul kanun q'ij te ojlab'l, oktzun ten Jesús q'olte xnaq'tzb'il tuj ja te k'ulb'il. Ex nimku xjal e b'inte t-xnaq'tzb'il, in che lab'in ti'j, ex in kyma'n: —¿Jatum in tzaj tkano'n xjal lu tkyaqil jlu? ¿Ex ti t-xilen ju nab'l lu ma tzaj q'o'n te? ¿Ex tza'n tten in che b'ant qe b'inchb'en nim kyipumal tu'n?

³¿Myapetzun a xjal lu calpinter? ¿Myapetzun tal Mariy jlu? ¿Myapetzun a Jacobo terman, tuk'ix José, tuk'ix Judas tuk'ix Simón? ¿Myapetzun ikx qe tanab' ax ate' qxol? Che chi xjal. Kyja'tzun mya b'a'n ela tyol Jesús tuj kywitz.

⁴Xitzun tma'n Jesús kye: —Jun t-sanjel Dios at toklen tuj kywitz xjal tuj tkyaqil lugar, atzun tuj ttanmi ex kyxol qe terman ex tuj tja minti' toklen tuj kywitz, chi Jesús kye.

⁵Kyja'tzun minti' tumel tu'n tb'inchante Jesús jun b'inchb'en nim tipumal tuj ttanmi, noq o'kx kab' ox yab' e b'anix tu'n, kub' tq'o'n tq'ab' kyib'aj.

⁶Ex jaw lab'in Jesús kyi'j xjal tu'nju minti' xi kyoksla'n. Xi'tzun Jesús b'etel kyuj aldey ti'jele tnam, in tq'o'n xnaq'tzb'il kye xjal.

⁷E tzajtzun ttxko'n Jesús qeju kab'laj t-xnaq'tzb'en, e je'x t-sama'n kab'chaq kyb'et, ex xi tq'o'n kyoklen tu'n kyetz qe ju'ẍ tuj kyanmi xjal.

⁸Ex xi tma'n kye tu'n mi'n t-xi kyi'n jun ti'xti tuj kyb'e, mi pa, mi wab'j, mi pwaq tuj kybols, noq o'kx kyky'aqo'ch tu'n t-xi kyi'n;

⁹ex tu'n tok kyq'o'n kyxajab', ex tu'n mi'n tok kyq'o'n kab'e kykamiẍ.

¹⁰Ex xi tma'n kye: —Alkye jun ja jatum che okexe, axtzun che posadiyile, maxitzun che ik'ele okxi kyetze tuj tnam.

¹¹Ex qa at jun tnam minti' ẍe k'monjtze kyu'n xjal ex minti' ma kub' kyb'i'n kyyole, kyetze tuj tnam lu ex kychto'mele puj ti'j kyqane te jun yek'b'il kyi'j qa mya b'a'n qe. Ax tok kxel nma'ne kyeye: Tuj tq'ijlalil jwisi, mas nim tcastiw tnam lu kb'el twitz tcastiw tnam Sodoma ex tnam Gomorra.

¹²E je'xtzun qe xnaq'tzb'en, in che pakb'an ti'j tu'n tajtz ti'j kyanmi xjal.

¹³Ex e je'tz nimku ju'ẍ tuj kyanmi xjal kyu'n, ex ok kyq'o'n aseyt kyi'j nimku yab', ex e b'anix yab' kyu'n.

¹⁴Ex o tb'i rey Herodes tqanil ti'j Jesús, tu'nju otoq tz'el tqanil Jesús kyxol kykyaqil xjal; ex tma Herodes: —Ate Juan jlu, aju e b'yan xjal tu'n; ma jaw anq'in kyxol kyimni, kyja'tzun at nim tipumal tu'n tb'inchante tkyaqil jlu, chi Herodes.

¹⁵At txqantl xjal in kyma'n: —Ate Elías jlu, aju t-sanjel Dios. Ex txqantl in kyma'n: —Jun t-sanjel Dios te jlu ik tza'n qe t-sanjel Dios e ten ojtxi, che chi.

¹⁶Tejtzun tb'inte Herodes kyyol xjal, tma: —Ate Juan jlu, aju el wi'ne twi', ma jaw anq'in kyxol kyimni, chi Herodes.

¹⁷Tu'nju axte Herodes q'mante tu'n ttzyet Juan ex otoq tz'okx tq'o'n tuj pres tu'n tlaj xu'j Herodías, ex b'aj k'alo'n tu'n caden; ate Herodías t-xu'jil Felipe nej, aju titz'in Herodes; ex el t-xk'ayin Herodes tu'n tok te t-xu'jil.

¹⁸Okx q'o'n Juan tuj pres tu'n tlaj ok tma'n te Herodes kyja': —Mya q'o'n teya tu'n ley tu'n tok t-xu'jil titz'ina te t-xu'jila, chi Juan.

¹⁹Atzunte xu'j Herodías tzaj tlo'ch tk'u'j ti'j Juan, ex o tajb'e tu'n tkub' b'yo'n Juan, ex minti' knet tumel tu'n;

²⁰porke in xob' Herodes twitz Juan; b'i'ntoq tu'n ate Juan jun xjal tz'aqlxix ex tpa'n tib' ti'j tkyaqil mya b'a'n, ex o kolin ti'j. Maske in jolpaje' tk'u'j Herodes tu'n tyol Juan, pero minti'xix nne'l tnik' ti'j, ex at tgan tu'n tb'inte tyol.

²¹Pontzun jun q'ij tu'n tkamb'ante Herodías alkyeju tajb'il, atzun q'ij tu'n tkub' tik'sa'n Herodes tq'ijlalil titz'jlen. Tb'incha Herodes jun nintz wa'n tu'n kywa'n qe aj sanjelal tuk'il, kyuk'ix qe coronel, kyuk'ix qe xjal ma' kyoklen tuj tx'otx' Galilea.

²²Okxtzun ju txin tal Herodías jatum in che wa'n xjal, ex ok ten b'ixal kywitz, ex o tzalaj Herodes ti'j, kyuk'ix qeju ate'toq tuk'il ti'j mes. Xitzun tma'n rey te txin: —Qanintza weye alkye tajb'ila, jaku txi nq'o'ne teya.

²³Tzqan Dios, chi Herodes, noq alkyex ma tzaj tqanina weye jaku txi nq'o'ne teya, ex qa ma tzaj tqanina mij tx'otx' jatum in chin kawine, jaku txi nq'o'ne teya.

²⁴Etztzun ju txin ex xi tma'n te ttxu': —¿Alkye kxel nqanine? —Qaninxa twi' Juan, aju in che b'yan xjal tu'n tuj a', chi ttxu', xi tma'n te.

²⁵Jurattzun okx txin tuk'il rey ex xi tqanin te: —Wajb'ile b'i'x ja'lo tu'n ttzaj tq'o'na twi' Juan tuj jun plat, aju in che b'yan xjal tu'n tuj a'.

²⁶Tzajtzun nim tb'is rey; ex tu'n tlaj otoq txi tma'n tzqan Dios, ex tu'n kylaj qeju ate'toq tuk'il ti'j mes, minti' kub' t-xk'ayin aju o tqani txin.

²⁷Jurat naj xi t-sama'n rey jun soldad, xi tq'o'n orden tu'n ttzaj q'i'n twi' Juan.

²⁸Xi'tzun soldad, el ttamtz'u'n twi' Juan tuj pres ex tzaj ti'n twi' tuj jun plat, xi tq'o'n teju txin, atzunte txin xi tq'o'n te ttxu'.

²⁹Tejtzun kyb'inte qe t-xnaq'tzb'en Juan jlu, e ultzun, xi kyi'n t-ximlal ex okx kyq'o'n tuj jun pantyón.

³⁰E ultzun meltz'aj qe apostol tuk'il Jesús, ex xi kytx'olb'a'n tkyaqilju otoq kyb'incha ex aju xnaq'tzb'il otoq txi kyq'o'n kye xjal.

³¹Xitzun tma'n Jesús kye: —Kytzaje kyjunalxe, qo'qe tuj jun lugar minti' kynajb'il xjal tuj, tu'ntzun qojlan ch'in, chi Jesús kye. Ex nimku xjal in che ul aj kyuk'il, kyja'tzun minti' ch'in amb'il kye tu'n kywa'n ch'in.

³²E je'xtzun kyjunalx tuk'ix Jesús tuj jun barc tu'n kypon tuj jun lugar minti' kynajb'il xjal tuj.

³³Ex nimku xjal e ke'yin kye tej kyxi', ex el kynik' ti'j Jesús; ex nimku xjal e tzaj tuj junjun tnam e je'x qelan tu'n kypon jatum tu'n kypon Jesús, ex nej e pon xjal kywitz.

³⁴Tejtzun tetz Jesús tuj barc o til nimku xjal otoq che pon, tzaj q'aq'an tk'u'j kyi'j, porke ik kyten ik tza'n qe ẍne'l minti' pastor kyi'j; oktzun ten Jesús q'ol nimku xnaq'tzb'il kye.

³⁵Ex tu'nju otoq tz'ok qax, e pon laq'e' t-xnaq'tzb'en Jesús ttxlaj, ex xi kyma'n: —Aju lugar lu minti' kynajb'il xjal tuj, ex ma tz'ok qax.

³⁶Q'manxa kye xjal tu'n kyxi' tuj kojb'il ex kyuj aldey niqayin ate' tu'ntzun tlaq'et kywa, porke minti' kywa q'i'n, che chi.

³⁷Ex xi ttzaq'we'n Jesús: —Ax qeye che xel q'onte kywa. Xi kyma'n te: —¿Okpetzun qo xe'le laq'ol wab'j tu'n 200 denari tu'n t-xi qq'o'ne kywa? Che chi.

³⁸Xi tma'n Jesús kye: —¿Jte' wab'j at kyuk'ile? Kyxi'ye ke'yil te. Tejtzun kylonte, xi kyma'n: —Jwe' wab'j at ex kab'e kyiẍ.

³⁹Xitzun tma'n Jesús kye tu'n t-xi kyma'n kye kykyaqil xjal tu'n kykub' qe' tuj k'lojin kyten tib'aj cha'x ch'im.

⁴⁰E kub'tzun qe' xjal tuj k'lojin; at junjun k'loj te jun syentchaq kyten, ex at te sinkwentchaq kyten.

⁴¹Jawtzun ttzyu'n Jesús aqeju jwe' wab'j kyuk'ix kab'e kyiẍ, jaw tke'yin twitz kya'j, xi tq'o'n chjonte te Dios ti'j, ex e kub' tpiẍk'u'n qe wab'j, xi tq'o'n kye t-xnaq'tzb'en tu'ntzun t-xi kysipan kye xjal; ex xi t-sipan kab'e kyiẍ kyxol kykyaqil.

⁴²E wa'ntzun kykyaqil, ex e b'aj noj.

⁴³Ex jaw kychmo'n kab'laj chi'l nojni tu'n ttx'aqan wab'j ex tu'n ttx'aqan kyiẍ.

⁴⁴Aju kyajlal xjal e wa'n, jwe' mil xinaq.

⁴⁵Ex xi tma'n naj Jesús kye t-xnaq'tzb'en tu'n kyokx tuj barc ex tu'n kyxi' nej twitz tu'n kypon tuj Betsaida jlajxi laguna, atzunte Jesús kyaj ten q'malte kye xjal tu'n kyaj kyja.

⁴⁶Tejtzun tb'aj tq'olb'en tib' Jesús kyuk'il xjal, xi na'l Dios twi witz.

⁴⁷Tejtzun tok qax, otoq kanun barc tmijil laguna, atzunte Jesús attoq tjunalx twi witz.

⁴⁸O til Jesús otoq che sikt qe t-xnaq'tzb'en ti'j barc tu'n tb'et, porke ate kyq'iq' in maqonte kye; pontzun Jesús kyuk'il ch'ixtoq tja'wil q'ij, in b'et Jesús tib'aj a', kyja'toq tik' nej kywitz.

⁴⁹Tej kylonte qe xnaq'tzb'en in b'et Jesús tib'aj a', ela tuj kynab'l qa jun kylab' jlu, ex e jaw sch'in.

⁵⁰Ex kykyaqil e ke'yinte, ex tzaj kyxob'il. Ex jurat naj xi yolin Jesús kyuk'il: —Qe' kyk'u'je, aqine, mi'n che xob'e, chi Jesús kye.

⁵¹Okxtzun Jesús kyuk'il tuj barc, ex b'i'x take' kyq'iq'; b'i'xtzun naj kynab'l, ex e lab'in ti'j.

⁵²Tu'nju na'nxtoq tel kynik' ti'j ti t-xilen aju o tb'incha Jesús ti'j wab'j, porke kyuw tu'n tex tuj kywi'.

⁵³Tejtzun kykanun jlajxi laguna, atzun e pon ttzi tx'otx' Genesaret tb'i, ex kyaj kyk'alo'n ju barc.

⁵⁴Tejtzun kyetz tuj barc, jurat naj el kynik' xjal ti'j Jesús.

⁵⁵E je'x naj xjal tuj tkyaqil lugar, tzaj kyi'n xjal qe yab' twitz kykoẍb'il, pon kyi'n tuk'il Jesús tej kyb'inte jatum ta'.

⁵⁶Jachaqtum pon Jesús, qa tuj aldey, ex qa tuj tnam, ex qa tuj kojb'il, kub' kyq'o'n xjal qe yab' tuj b'e, ex in che kub'san twitz Jesús tu'n ttzaj tq'o'n Jesús amb'il kye yab' tu'n tok kymako'n ttxa'n t-xb'alun; kykyaqil qeju ok kymako'n ttxa'n t-xb'alun e b'anix.