Read kumam Marcos 7 Bible Online

Marcos 7 - kumam bible

Marcos 7

¹Ul kychmon kyib' fariseo tuk'il Jesús, kyuk'ix junjun xnaq'tzal ti'j ley e tzaj tuj tnam Jerusalén.

²Tej kylonte at junjun t-xnaq'tzb'en Jesús in che wa'n ex minti' nne'l kytx'jo'n kyq'ab' ik tza'n in tma'n kyley: —Mya b'a'n jlu, che chi fariseo.

³(Porke qe fariseo kyuk'ix kykyaqil xjal judiy, nimanxix kyu'n aju ley kyaj b'ant ti'j kyu'n kytijil xjal, kyja'tzun qa minti' ma b'aj kytx'jo'n kyq'ab' ik tza'n in tma'n ley, ax mlay che wa'n.

⁴Ex ok kyajtz meltz'aj tuj plas, mlay che wa'n qa minti' ma b'aj kytx'jo'n kyq'ab'. Ex nimku txqantl in kyb'incha'n aju in tma'n kyley, ik tza'n tu'n kytx'jet qe vas kyu'n, ex qe xar, ex qe k'il k'uxb'il ex qe watb'il.)

⁵Xitzun kyqanin fariseo ex qe xnaq'tzal ti'j ley te Jesús: —¿Tiqu'n minti' in kyb'incha'n t-xnaq'tzb'ena ik tza'nxju kyaj b'ant ti'j kyu'n kytijil xjal? In che wa'n ex minti' nne'l kytx'jo'n kyq'ab'. Che chi.

⁶Xi ttzaq'we'n Jesús: —Xmletz' qeye, ax tok aju o tma Isaías kyi'je, aju t-sanjel Dios, ik tza'n tz'ib'an tuj Tu'jil, porke chi Isaías tuj Tu'jil: Qe xjal lu noq tu'n kytzi' in chin nimanjtze kyu'n, atzunju kyanmi najchaq ta' wi'je.

⁷Noqx gan in che k'ulun nwitze, porke aju xnaq'tzb'il in kyq'o'n, kymandamyent xjal, chi Isaías.

⁸Porke in kyaj kyq'o'ne aju tmandamyent Dios, atzunju kyaj b'ant ti'j kyu'n xjal atzunju in b'ant kyu'ne, tu'n kytx'jet qe xar kyu'ne ex qe vas; ex nimku txqantl in kyb'incha'ne ik tza'n qe jlu.

⁹Ax ikx xi tma'n Jesús kye: —Ax tok aju tmandamyent Dios nno'k kyq'o'ne minti' tajb'en tu'n tjapun kyu'ne aju kyaj q'ma'n kyeye kyu'n kytijil xjal.

¹⁰Porke o tma Moisés: Kynimanxe kymane ex kytxu'ye; ax ikx in tma'n: Alkye ma yasun ti'j tman ex qa ti'j ttxu', il ti'j tu'n tkub' b'yet.

¹¹Atzun kyeye in kyma'ne qa b'a'n tu'n t-xi tma'n jun xjal te tman ex qa te ttxu' kyja': Mlay chin onine ti'ja, ex tkyaqilju at weye Corbán. (Aju yol Corbán atzun in tma'n, ma txi nq'o'ne te Dios te jun oyaj.)

¹²Tu'n jlu in xi kymayo'ne tu'n mi'n tonin xjal te tman ex qa te ttxu'.

¹³Kyja'tzun nno'k kyq'o'ne tyol Dios te minti' tajb'en, tu'nju yol kyaj q'ma'n kyeye, ex wiqinwiq tkyaj kymane kye kyk'wa'le. Ex nimku in kyb'incha'ne ik tza'n jlu.

¹⁴E tzaj ttxko'n Jesús qe xjal ex xi tma'n kye: —Kyb'intze nyole kykyaqile, ex tz'elx kynik'e ti'j:

¹⁵Aju in xi' tu'n xjal, mlay tz'ilix tuj tanmi tu'n, atzunju in jatz tuj tanmi xjal, atzunju in tz'ilsante tuj tanmi xjal.

¹⁶[Alkye at t-ẍkyin, b'inx ju yol lu.]

¹⁷Tejtzun tel tpa'n tib' Jesús kyi'j xjal, okx tuj ja. Xitzun kyqanin qe t-xnaq'tzb'en ti t-xilen ju techal lu.

¹⁸Xi tma'n Jesús kye: —¿Maj ikx kyeye minti' nne'l kynik'e ti'j? ¿Minti'pe nne'l kynik'e ti'j, aju in xi' tu'n xjal mlay tz'ilix tuj tanmi tu'n?

¹⁹Porke minti' nno'kx tuj tanmi, noq o'kx in ku'x tuj tk'u'j, ex nne'x tk'u'jin. Tma Jesús jlu tu'n tel kynik' ti'j qa b'a'n tchyo'njtz tkyaqil chib'j.

²⁰Ex tmatl Jesús: —Aju in jatz tuj tanmi xjal, atzunju in tz'ilsante tuj tanmi.

²¹Porke tuj kyanmi xjal in jatz kyximb'etz mya b'a'n, tu'n kyb'inchante aj pajil, tu'n kyyaẍin, tu'n tkub' kyb'yo'n jun xjal,

²²tu'n kyelq'an, tu'n tpon kyk'u'j ti'j nimku, tu'n kyb'inchante mya b'a'n, tu'n kysb'un, tu'n mi'n kyjak'unte kyib', tu'n ttzaj tlo'ch kyk'u'j, tu'n tb'ant jun simj yol, tu'n kyok puro jawni qe, ex tu'n kyok minti' kynab'l.

²³Tkyaqil jlu mya b'a'n tuj tanmi xjal in jatz, ex in tz'ilix tuj tanmi xjal tu'n, chi Jesús kye.

²⁴Ik'tzun Jesús tuj lugar lu, xi' tuj tx'otx' jatum ate' qe tnam Tiro tuk'ix Sidón. Okxtzun tuj jun ja posadiyil, o tajb'e tu'n mi'n kyb'inte xjal, ex minti' tumel tu'n tten tuj ewaj.

²⁵Tu'nju at jun xu'j at jun tal txin at ju'ẍ tuj tanmi; tej tb'inte xu'j tqanil ti'j Jesús, pon naj tuk'il ex kub' ẍmeje' t-xe tqan.

²⁶Ate xu'j lu aj Sirofenicia, mya judiy xjal, ex kub'san twitz Jesús tu'n tetz tlajo'n Jesús ju'ẍ tuj tanmi txin aju tal.

²⁷Atzunte Jesús xi tma'n te: —E tnoj kyk'u'j k'wa'lb'aj nej, porke mya b'a'n tu'n tel q'i'n kywa k'wa'lb'aj ex tu'n t-xi q'ot kye tx'yan, chi Jesús te.

²⁸Xi ttzaq'we'n xu'j: —Ax tok Tat; pero qe tx'yan in che wa'n tjaq' mes ti'j tb'uchil kywa k'wa'lb'aj, chi xu'j.

²⁹Xi tma'n Jesús te xu'j: —Tu'nju yol lu ma tzaj tma'na b'a'n tu'n taja, ma tz'etz ju'ẍ tuj tanmi tala, chi Jesús te.

³⁰Tejtzun tpon xu'j tja, lu tal koẍl twitz watb'il, otoq tz'etz ju'ẍ tuj tanmi.

³¹Ajtztzun meltz'aj Jesús tuj tx'otx' jatum ta' tnam Tiro, ik' aj tuj tnam Sidón, ex ik' aj tuj tx'otx' Decápolis tb'i, pon ttzi laguna tuj Galilea.

³²Ul kyi'n xjal jun xjal twitz Jesús, chkyin twi' ex men, ex e kub'san twitz Jesús tu'n tkub' tq'o'n tq'ab' tib'aj.

³³El tlaq'b'an tib' Jesús kyi'j xjal, xi ti'n ju xjal men, okx tq'o'n tal tq'ab' tuj t-ẍkyin, ex ok ttzub'an twi tq'ab', ok tmako'n taq' xjal.

³⁴Jawtzun tke'yin Jesús twitz kya'j, in xjiq'b'an tk'u'j ex tma: —Efata. (Atzun in tma'n ju yol lu, kjaqetel t-ẍkyina.)

³⁵Te jurat naj e jaqet qe t-ẍkyin xjal, ex b'ant naj tyolin clarxix wen.

³⁶Xi tkyuwsa'n Jesús kye tu'n mi'n tel tqanil kyu'n; maske nimku maj xi tma'n Jesús kye, atzun kye mas el tqanil kyu'n.

³⁷Nimxix e lab'in xjal ti'j, in kyma'n: —B'a'n tkyaqilju in tb'incha'n: qe chkyin in b'ant kyb'in tu'n, ex qe men in b'ant kyyolin tu'n.