Read kumam Marcos 8 Bible Online

Marcos 8 - kumam bible

Marcos 8

¹Tej atxtoq Jesús ttzi laguna, nim xjal otoq pon kychmon kyib', ex minti' kywa q'i'n. E tzajtzun ttxko'n Jesús qe t-xnaq'tzb'en ex xi tma'n kye:

²—In q'aq'an nk'u'je kyi'j xjal lu, porke ma b'ant ox q'ij ja'lo ate' wuk'ile, ex minti' kywa.

³Qa ma txi nma'ne kye tu'n kyaj kyja na'nxtoq kywa'n, che b'el numj tuj b'e, tu'nju at junjun kyxol ma che tzaj najchaq, chi Jesús kye.

⁴Tzajtzun kytzaq'we'n qe t-xnaq'tzb'en: —¿Jatum b'a'n ttzaj qi'n kywa xjal lu, ato' tuj jun lugar minti' kynajb'il xjal tuj?

⁵Xi tqanin Jesús kye: —¿Jte' wab'j at kyuk'ile? —At wuq, che chi.

⁶Xitzun tma'n Jesús kye xjal tu'n kykub' qe' twitz tx'otx'; jaw ttzyu'n qeju wuq wab'j, xi tq'o'n chjonte te Dios, kub' tpiẍk'u'n, xi tq'o'n kye t-xnaq'tzb'en tu'ntzun t-xi kysipan kye xjal, ex kub'tzun kyq'o'n kywitz xjal.

⁷Ax ikx attoq kab' ox tal kyiẍ kyuk'il; kub' tky'iwla'n Jesús, ex xi tma'n kye t-xnaq'tzb'en tu'n t-xi kysipan kye xjal.

⁸E wa'ntzun kykyaqil xjal ex e noj; ex jaw kychmo'n wuq chi'l ttx'aqan wab'j kyaj ten.

⁹Aju kyajlal xjal e wa'n, b'alo kyaje mil xjal; xitzun tma'n Jesús kye tu'n kyaj kyja.

¹⁰Atzunte Jesús okx naj tuj barc kyuk'ix qe t-xnaq'tzb'en, pon tuj tx'otx' Dalmanuta tb'i.

¹¹E ultzun qe fariseo e ok ten yolil tuk'il Jesús in che xjelin te: —Yek'untza jun señ qeye tu'n tel qnik'e ti'j qa tuj kya'j tzajni tipumala, che chi, noq tu'n tok tuj joyb'il ti'j kyu'n.

¹²O xjiq'b'an tk'u'j Jesús: —¿Tiqu'n in tzaj kyqanin xjal lu jun señ? Ax tok kxel nma'ne kyeye, mlay txi yek'un jun señ kye xjal lu, chi Jesús xi tma'n kye.

¹³E kyajtzun tkolin, okx juntl maj tuj barc, xi' jlajxi laguna.

¹⁴Qe t-xnaq'tzb'en Jesús ik' tna'l kyu'n, minti' tzaj kyi'n wab'j, noq o'kx jun wab'j q'i'n kyu'n tuj barc.

¹⁵Xitzun tkyuwsa'n Jesús kye: —Ten kykwente kyi'je ti'j t-samel pan kyu'n fariseo, aju in jaw mal tk'u'j pan tu'n, ex ten kykwente kyi'je teju t-samel pan tu'n Herodes, chi Jesús kye.

¹⁶E oktzun ten xnaq'tzb'en yolil ti'j kyxolx, in kyma'n: —In tma'n jlu tu'nju minti' saj qi'n wab'j, che chi.

¹⁷Tejtzun tel tnik' Jesús ti'j, xi tma'n kye: —¿Tiqu'n in che yoline ti'j qa minti' wab'j q'i'n kyu'ne? ¿Minti'pe in kanun tuj kynab'le, ex minti'pe nne'l kynik'e ti'j? ¿Maj ma kyuwix kyanmiye?

¹⁸¿Myapetzun at tb'aq' kywitze ex minti' in kyile? ¿Myapetzun at kyẍkyine ex minti' in kyb'i'ne? ¿Minti'petzun na'n kyu'ne?

¹⁹Tej tkub' npiẍk'u'ne jwe' wab'j tu'n t-xi sipet kye jwe' mil xjal, ¿jte'tzun chi'l o noj tu'n ttx'aqan wab'j tej tjaw kychmo'ne? Chi Jesús. —Kab'laj chi'l che chi.

²⁰—Ex tej tkub' npiẍk'u'ne wuq wab'j tu'n t-xi sipet kye kyaje mil xjal, ¿jte'tzun chi'l o noj tu'n ttx'aqan wab'j tej tjaw kychmo'ne? Chi Jesús. —Wuq chi'l che chi.

²¹Xitzun tma'n Jesús kye: —¿Tza'ntzun tten na'nx tel kynik'e ti'j?

²²E pontzun tuj tnam Betsaida. Ex ul kyi'n xjal jun moẍ tuk'il Jesús, e kub'san twitz tu'n tok tmako'n Jesús ju moẍ.

²³Tzajtzun ttzyu'n Jesús tq'ab' moẍ, ex ti'n ti'jxi tnam; ok ttzub'an ti'j tb'aq' twitz, ex ok tq'o'n tq'ab' ti'j tb'aq' twitz, ex xi tqanin te: —¿Atpe ch'in ma tila?

²⁴Jawtzun tke'yin twitz xjal. —Ma wile qe xjal in che b'et ik che ke'yin ik tza'n qe tze', chi xjal.

²⁵Ex ok tq'o'n juntl maj tq'ab' Jesús ti'j tb'aq' twitz moẍ, ex b'ant tke'yin, ex b'i'x kyaj b'anix twitz, ex clarxix o til tkyaqil.

²⁶Xitzun tma'n Jesús te tu'n taj tja. —Mi'n tz'okxa tuj tnam ex mi'n txi tma'na kye xjal tuj tnam, chi Jesús xi tma'n te.

²⁷Xi'tzun Jesús kyuk'ix qe t-xnaq'tzb'en kyuj qe aldey ate' ti'jele tnam Cesarea Filipo. Xi tqanin Jesús kye t-xnaq'tzb'en tej kyja' kyxi' tuj b'e ex xi tma'n kye: —¿Chi tok kyu'n xjal wi'je? ¿Alkye qine, che chi xjal?

²⁸Xitzun kytzaq'we'n: —At junjun in kyma'n qa aya Juan aju e b'yan xjal tu'n tuj a'; ex junjuntl in kyma'n qa aya Elías; ex junjuntl in kyma'n qa aya jun kye t-sanjel Dios e ten ojtxi, che chi.

²⁹Xitzun tqanin Jesús kye: —¿Yajtzun kyeye, alkye qine tuj kywitze? Xi ttzaq'we'n Pedro: —Aya ju Crist aju at toklen tu'n Dios.

³⁰Ex xi tma'n Jesús kye tu'n mi'n t-xi kyma'n jlu kye xjal.

³¹Oktzun ten Jesús q'olte xnaq'tzb'il kye ex tma: —Ilxix ti'j tu'n tik'x nimku wu'ne, aqine sk'o'maj qine tu'n Dios tu'n ntene kyuk'il xjal, ex il ti'j tu'n wel ik'une kyu'n kytijil xjal ex kyu'n qe nejenel kye pal ex kyu'n xnaq'tzal ti'j ley, ex tu'n nkub' b'yo'ne, ex tu'n njatz anq'ine tuj toxin q'ij, chi Jesús kye.

³²Clarxix xi tma'n jlu kye. Tu'n jlu xi uk'in tu'n Pedro, e je'l laq'e' ex ok ten Pedro mayolte ti'j t-ximb'etz.

³³Atzunte Jesús ajtz meltz'aj ex tzaj tke'yin kywitz qe t-xnaq'tzb'en, ok ik'le'n Pedro tu'n, ex xi tma'n te: —Laq'eb'ila wi'je Satanás porke myatzun tok tnab'la ti'j tajb'il Dios, noq o'kx tok tnab'la ti'j kyajb'il xjal.

³⁴E tzajtzun ttxko'n Jesús qe xjal kyuk'ix qe t-xnaq'tzb'en, ex xi tma'n kye: —Qa at jun xjal taj tu'n tok lpe' wi'je, xk'ayink tib' teju tex tajb'il, q'inx tcrus, ex lpe'k wi'je.

³⁵Ex alkye jun xjal o'kx tok tk'u'j ti'j tu'n tten tchwinqlal twitz tx'otx', mlay tkamb'a aju chwinqlal in tzaj tq'o'n Dios; ex alkye jun xjal tq'on tib' tu'n tnaj tchwinqlal twitz tx'otx' noq tu'n nlaje ex tu'n tlaj tqanil kolb'il, ok tkamb'a' aju chwinqlal in tzaj tq'o'n Dios.

³⁶Ex ¿ti tajb'en te xjal qa ma tkamb'a tkyaqilju at twitz tx'otx' ex qa ma naj tanmi?

³⁷Ex ¿alkye b'a'n t-xi tq'o'n xjal te chojb'il tu'n tklet tanmi?

³⁸Ex alkye ma ch'ixwi wi'je ex ti'j nyole kyxol qe xjal ate' tuj tq'ijlalil ja'lo ma tz'el kypa'n kyib' ti'j Dios ex aj il qe, ax ikx weye, chin jawil ch'ixwiye ti'j ok wule in chin qoptz'aje tu'n t-spik'umal Nmane ex kyuk'ix qe anjel xjan wuk'ile, aqine sk'o'maj qine tu'n Dios tu'n ntene kyuk'il xjal.