Read kumam Marcos 9 Bible Online

Marcos 9 - kumam bible

Marcos 9

¹Ax ikx xi tma'n Jesús kye: —Ax tok kxel nma'ne kyeye, at junjun kyxol qeju ate' tzalu na'nxtoq kykyim ex ok kyila' ok tul tkawb'il Dios tuk'il tipumal.

²Tb'ajlenxitzun qaq q'ij, xi tuk'in Jesús Pedro, tuk'ix Jacobo ex Juan, kyjunalx e je'x tuk'in twi' jun witz ma' twa'l; ex o ch'expaj tilb'ilal Jesús kywitz.

³O qoptz'aj t-xb'alun ex ok pur saq wen ik tza'n ttxa che'w; mi jun tx'jol xb'alun tzalu twitz tx'otx' jaku saqix tu'n ik tza'n jlu.

⁴Ex kub' tyek'un tib' Elías tuk'ix Moisés, in che yolintoq tuk'il Jesús.

⁵Xitzun tma'n Pedro te Jesús: —Xnaq'tzal, b'a'n ax tu'n qten tzalu; e tjaw qb'incha'n ox tal ja t-xaq tze'yin kywi': jun teya, jun te Moisés, ex jun te Elías, chi Pedro.

⁶Porke minti' b'a'n tu'n Pedro alkye tu'n t-xi tma'n tu'nju otoq naj kynab'l xnaq'tzb'en.

⁷Ex tzaj jun muj kub' ten kyib'aj; ex at jun tzaj yolin tuj muj in tma'n: —Atzun Nk'wa'le jlu k'ujla'nxix wu'ne; kyb'inxe tyol.

⁸Ex te jurat, tej t-xi kyke'yin kyi'jele, mi a'l juntl o kyil, noq o'kxte Jesús attoq kyuk'il.

⁹Kyja'toq kyku'tz twi witz, xi tma'n Jesús kye: —Aju ma kyile, mi'n txi kyma'ne kye xjal, maxitzun kxel kyma'ne okxi njatz anq'ine kyxol kyimni, aqine sk'o'maj qine tu'n Dios tu'n ntene kyuk'il xjal, chi Jesús kye.

¹⁰Ex xi kyk'u'n ju yol lu tuj kyanmi, ex e ok ten xjelil ti'j kyxolx ti t-xilen jlu tu'n tjatz anq'in kyxol kyimni.

¹¹Xitzun kyqanin te Jesús: —¿Tiqu'n in kyma'n xnaq'tzal ti'j ley qa ilxix ti'j tu'n tul nej Elías? Che chi.

¹²Xi ttzaq'we'n Jesús: —Ax tok tzul nej Elías, ex kb'ajel tb'incha'n juntl maj tkyaqil. ¿Ex chi tok in tma'n tuj Tu'jil wi'je? In tma'n tu'n tik'x nimku wu'ne, aqine sk'o'maj qine tu'n Dios tu'n ntene kyuk'il xjal, ex in tma'n tu'n wel ik'une kyu'n xjal.

¹³Ex lu kxel nma'ne kyeye, ate Elías o tzul, ex tkyaqilju kyajb'il xjal o kyb'incha ti'j, ik tza'n in tma'n ti'j tuj Tu'jil, chi Jesús kye.

¹⁴Tejtzun kyul jatum ate' txqantl t-xnaq'tzb'en, o kyil nimku xjal otoq tz'ok kychmon kyib' kyi'j kyuk'ix junjun xnaq'tzal ti'j ley ex jaw jun yol kyxol.

¹⁵Tejtzun kylonte xjal otoq tzul Jesús, b'i'x e lab'in ti'j ex e tzaj qelan naj q'olb'el te.

¹⁶Xitzun tqanin Jesús kye t-xnaq'tzb'en: —¿Alkye yol in che yoline ti'j kyuk'il xjal?

¹⁷Tzajtzun tma'n jun kyxol xjal: —Xnaq'tzal, ma tzul wi'ne nky'ajale tuk'ila, at jun ju'ẍ tuj tanmi ma tz'ok nky'ajale men tu'n.

¹⁸Noq jachaq in tzaj tuj twitz tu'n ju'ẍ, in kub' xo'n tu'n, ex in swakin tuj ttzi', ex in qitx'itx'in t-xe' te', ex in xi ttx'ilin tib'. Ma txi nma'ne kye t-xnaq'tzb'ena tu'n tetz kylajo'n ju'ẍ tuj tanmi k'wa'l, ex minti' xb'ant kyu'n, chi xjal.

¹⁹Xi ttzaq'we'n Jesús: —Aqeye xjal minti' in xi kyoksla'ne. ¿Jte' q'ij tu'n ntene kyuk'ile? ¿Jte' q'ij tu'n kyik'xe wu'ne? Kyi'ntze k'wa'l tzalu.

²⁰Ultzun kyi'n tuk'il Jesús. Tejtzun tilwaj Jesús tu'n ju'ẍ, tzaj tuj twitz k'wa'l tu'n ju'ẍ, kub' tz'aq k'wa'l twitz tx'otx', in b'alq'aje' ex in swakin tuj ttzi'.

²¹Xi tqanin Jesús te tman k'wa'l: —¿Jte'xi ab'q'i ttzyetlen tk'ixb'isanjtz k'wa'l lu tu'n ju'ẍ? Chi Jesús. Xi tma'n mamb'aj: —Matoq k'wa'lx tej ttzyet.

²²Ex nimku maj in xi tz'aq k'wa'l tuj q'aq' tu'n ju'ẍ ex tuj a', taj ju'ẍ tu'n tkyim k'wa'l tu'n; ex qa jaku b'ant tu'na, q'aq'antz tk'u'ja qi'je, ex qo tonintza, chi mamb'aj.

²³Xi tma'n Jesús te: —¿Tiqu'n in tzaj tma'na weye ikju: Qa jaku b'ant tu'na, chiya? Alkye at tokslab'l, tkyaqil jaku b'inchanjtz te.

²⁴Jurattzun tzaj q'ajt tman k'wa'l ex tma: —Kxel woksla'ne Tat, chin tonintza tu'n tten mastl wokslab'le.

²⁵Tejtzun tlonte Jesús kyja'toq kypon tilj xjal, xi mayo'n ju'ẍ tu'n. —Aya ju'ẍ, tu'na ma tz'ok k'wa'l men ex chkyin twi'; aqine in chin q'mante teya, tetza tuj tanmi k'wa'l ex mi'n tz'okxa juntl maj, chi Jesús xi tma'n te ju'ẍ.

²⁶Atzunte ju'ẍ jaw sch'in ex tzaj juntl maj tuj twitz k'wa'l tu'n, etztzun, ex ik tza'n kyimni ok k'wa'l tu'n; kyja'tzun o kyma nimku xjal: Ma kyim k'wa'l, che chi.

²⁷Ex jaw ttzyu'n Jesús tq'ab' k'wa'l, jaw twab'an ex jawtzun we' k'wa'l.

²⁸Tejtzun tokx Jesús tuj ja, xi kyqanin qe t-xnaq'tzb'en te kyjunalx: —¿Tiqu'ntzun minti' xb'ant qu'ne tu'n tetz qlajo'ne ju'ẍ? Che chi.

²⁹Xitzun tma'n Jesús kye: —Aqeju jun k'loj ju'ẍ lu mlay che etz noq kukx, noq o'kx jaku che etz tu'n na'j Dios ex qa ma kub' qyo'n we'yaj, chi Jesús kye.

³⁰Tejtzun kyik' tuj lugar lu, e ik' aj tuj tx'otx' Galilea. Ex minti' o tajb'e Jesús tu'n kyb'inte xjal,

³¹porke in tq'o'ntoq xnaq'tzb'il kye t-xnaq'tzb'en in tma'n: —Chin xel q'o'ne tuj kyq'ab' xjal ex chin b'el b'yo'ne; ex nkyimlenxitzune, chin jawil anq'ine tuj toxin q'ij, aqine sk'o'maj qine tu'n Dios tu'n ntene kyuk'il xjal, chi Jesús kye.

³²Atzun kye t-xnaq'tzb'en minti' el kynik' ti'j ju yol lu, ex in che xob' tu'n t-xi kyqanin te.

³³E pontzun tuj tnam Capernaum. Tejtzun tokx Jesús tuja, xi tqanin kye t-xnaq'tzb'en: —¿Alkye yol in che xjeline ti'j kyxolxe tuj b'e? Chi Jesús.

³⁴Atzun kye minti' e q'ajt, tu'nju otoq che yolin ti'j kyxolx tuj b'e alkyeju mas at toklen kyxol.

³⁵Kub'tzun qe' Jesús, e tzaj ttxko'n qe kab'laj t-xnaq'tzb'en, ex xi tma'n kye: —Qa at jun tajb'il tu'n tok te tnejel, q'o'nk tib' te mankb'il kye kykyaqil, ex q'o'nk tib' te ajb'el kye kykyaqil.

³⁶Ex tzaj ti'n Jesús jun k'wa'l, kub' tq'o'n kyxol, jawtzun tchle'n, ex xi tma'n kye:

³⁷—Alkye ma k'monte jun tal k'wa'l ik tza'n jlu tu'nju at tk'ujlalil wi'je, aqine in chin tk'mo'n; ex alkye ma k'monte weye, mya o'kx aqine in chin tk'mo'n, ax ikx in k'monjtz Dios tu'n, aju tzaj samante weye.

³⁸Atzunte Juan xi tma'n te Jesús: —Xnaq'tzal, ma qile jun xjal in ajb'en tb'iya tu'n tu'n kyetz qe ju'ẍ tuj kyanmi xjal tu'n, ex mya a jun quk'ile, kyja'tzun xi qmayo'ne, porke mya quk'ile in b'et, chi Juan.

³⁹Xitzun tma'n Jesús: —Mi'n txi kymayo'ne; ex qa at jun xjal ma tz'ajb'en nb'iye tu'n tu'n tb'inchante jun b'inchb'en nim tipumal, mlay b'ant tu'n tyolin naj mya b'a'n wi'je.

⁴⁰Ex alkyeju minti' in q'ojl qi'j, axtzun quk'ilju.

⁴¹Ex alkye jun xjal ma tzaj q'onte jun vas a' kyeye tu'nju okslal qeye wi'je, aqine Crist, ax tok kxel nma'ne kyeye, ktzajel q'o'n jun oyaj te ti'j jlu.

⁴²Qa at jun xjal ma kub' tz'aq jun tal ch'in tu'n tuj il, aju kyxol qeju okslal wi'je, mas b'a'n tu'n tok k'alet jun ma tij kya' ti'j tqul xjal ex tu'n tku'x xo't tuj mar.

⁴³Qa tu'n tq'ab'a kb'el tz'aqa tuj il, tx'emin ela, porke mas b'a'n tu'n tokxa tuj kya'j ẍtunka, ex mya tu'n t-xi'ya tuj infierni tuk'il kab'e tq'ab'a, jatum ta' q'aq' mlay b'ant tyupit.

⁴⁴[Atzun minti' in che kyim qe ẍuq' in che wa'n ti'j kychib'jal kyimni, ex atzun mlayx yupj q'aq'.]

⁴⁵Ex qa tu'n tqana kb'el tz'aqa tuj il, tx'emin ela; ex mas b'a'n tu'n tokxa tuj kya'j koxa, ex mya tu'n t-xi xo'na tuj infierni tuk'il kab'e tqana tuj q'aq' mlay b'ant tyupit.

⁴⁶[Atzun minti' in che kyim qe ẍuq' in che wa'n ti'j kychib'jal kyimni, ex atzun mlayx yupj q'aq'.]

⁴⁷Ex qa tu'n tb'aq' twitza kb'el tz'aqa tuj il, q'i'metza; ex mas b'a'n tu'n tokxa tuj tkawb'il Dios tuj kya'j junx tb'aq' twitza, ex mya tu'n t-xi xo'na tuj infierni tuk'il kab'e tb'aq' twitza.

⁴⁸Atzun minti' in che kyim qe ẍuq' in che wa'n ti'j kychib'jal kyimni, ex atzun mlayx yupj q'aq'.

⁴⁹Ex kykyaqile kb'antel kytene tu'nju k'ixk'oj k'ik'ex kyu'ne, mer ik tza'n tuj q'aq' che okex q'o'ne, [ex tkyaqil oyaj in xi q'ot te Dios, il ti'j tu'n tok atz'an ti'j].

⁵⁰B'a'n te atz'an; ex qa ma naj ta'w atz'an, ¿alkye k'ajb'el tu'n toktl ta'w? Che okxe ik tza'n atz'an; tenwt kymojb'ab'l kyib'e kyxolxe.