Read kumam Lucas 1 Bible Online

Lucas 1 - kumam bible

Lucas 1

¹Nimku xjal o kyajb'e tu'n tkub' kytz'ib'an qe yol tuj tumelxix ti'j tkyaqilju o b'aj qxole.

²Ik tza'n ma qo xnaq'tzanjtze kyu'n qeju e ke'yinte atxix ttzajlen xe't, ex e ok pakb'al ti'j tqanil b'a'n.

³Tb'ajlenxi nke'yine tkyaqil tuj tumelxix atxix t-xe tnejel, ax ikx weye b'a'n ela tuj nwitze tu'n t-xi ntz'ib'ane tkyaqil teya tuj tumelxix, aya Teófilo ma' toklena,

⁴tu'ntzun telxix tnik'a ti'j qa axix tok tkyaqilju o xnaq'tzanjtza ti'j.

⁵Tej toktoq Herodes te rey tuj tx'otx' Judea, attoq jun pal kye xjal judiy, Zacarías tb'i, at toklen kyxol jun k'loj pal tiyjil Abías. Aju t-xu'jil Zacarías Elisabet tb'i, ax tiyjil pal Aarón.

⁶Kykab'il tz'aqlxix qe twitz Dios, ex in che anq'in minti' kypaltil, porke in xi kyniman kykyaqil tmandamyent Qman tuk'ix ju tley.

⁷Ex minti' jun kyk'wa'l at, porke mib'an alin Elisabet, ex kykab'il otoq che tijin.

⁸Tej tpon q'ij tu'n kyajb'en Zacarías kyuk'ix qe tuk'il tuj tja Dios,

⁹ik tza'nx kymod qe pal kye judiy, tk'ulb'aku a Zacarías tu'n tokx tuj tja Dios patulte storak.

¹⁰Ex kykyaqil xjal in che na'ntoq Dios ttxa'n pe'n tuj or tej matoq in tz'e'y storak.

¹¹Ex kub' tyek'un tib' jun t-anjel Qman twitz Zacarías, wa'ltoq ju anjel lu tuj b'anq'ab'aj ttxlaj altar jatum in kub' patit storak.

¹²Tej tke'yinte Zacarías ju anjel, jaw sek'paj ex tzaj nim t-xob'il.

¹³Atzunte anjel xi tma'n te: —Mi'n xob'a Zacarías; porke tzul tq'o'n Dios aju xi tqanina te, ex ktzajel jun tk'wa'la ti'j t-xu'jila Elisabet, ex Juan tb'i k'okel tq'o'na.

¹⁴Ktzalajela nimxix ti'j, ex nimku xjal che tzalajel ok titz'j k'wa'l lu;

¹⁵porke nim toklen ju tk'wa'la twitz Dios. Mi'n txi tk'a'n vin mi q'e'n, ex knojel tuj tanmi tu'n Xewb'aj Xjan tzajnix b'ant na'nxtoq tul itz'j.

¹⁶Ex nimku aj Israel che ajetz meltz'aj tu'n Juan tu'n kyul tuk'il Qman aju Kydios.

¹⁷Ate Juan kxe'l nej twitz Qajaw, ax toklen ex tipumal ik tza'n te Elías aju t-sanjel Dios, tu'ntzun tb'ant kyten qe mamb'aj kyuk'il kyk'wa'l, ex tu'n tb'ant kyniman qeju mib'an che niman. Kyja'tzun noq b'anin kyten xjal tu'n Juan tu'ntzun tk'met Qajaw kyu'n ok tul, chi anjel.

¹⁸Xitzun tqanin Zacarías te anjel: —¿Tza'n tten k'elel nnik'e ti'j jlu qa ax tok? Porke weye ma chin tijine, ax ikx nxu'jile, chi Zacarías.

¹⁹Xitzun ttzaq'we'n anjel: —Aqine Gabriel in chin ajb'ene te Dios; axte Dios ma tzaj samante weye tu'n nyoline tuk'ila, ex tu'n t-xi nma'ne aju b'a'n tqanil lu teya.

²⁰Ex ja'lo k'okela men ex mlay b'ant tyolina; maxi kb'antel tyolina okxi tul itz'j tk'wa'la, k'okela men porke minti' ma txi toksla'na aju ma txi nma'ne teya, aju kjapunel ok tpon tq'ijlalil, chi anjel.

²¹Atzun kye xjal in che ayontoq ti'j Zacarías ttxa'n pe'n ex in che lab'in ti'j tu'nju nim tuj o ten tuj tja Dios.

²²Tejtzun tetz Zacarías minti' b'ant tyolin kyuk'il xjal; eltzun kynik' xjal ti'j qa at jun otoq tzaj yek'un te ik tza'n tuj witzik' tuj tja Dios. Atzunte Zacarías noq tu'n tq'ab' xi tyek'un kye, tu'nju otoq tz'ok te men.

²³Tejtzun tjapun b'aj q'ij tu'n tajb'en Zacarías tuj tja Dios, ajtzun tja.

²⁴Tb'ajlenxitzun jlu, ok ten tal Elisabet aju t-xu'jil Zacarías, ex kyaj ten jwe' xjaw tuj tja minti' ex b'etel, in ximan ti'j chi kyja':

²⁵Ma tb'incha Qman jun xtalb'il weye ja'lo, tu'ntzun mi'n nch'ixwiye mastl kyxol xjal, chi Elisabet.

²⁶Tb'ajlenxitzun qaq xjaw, tzaj t-sama'n Dios aju anjel Gabriel, ul tuj jun tnam Nazaret tb'i tuj tx'otx' Galilea.

²⁷Ul tja jun q'apoj na'nxtoq tlonte xinaq, b'anin ti'j tu'n tmoje' tuk'il jun xinaq José tb'i, ate José tiyjil rey David; atzun tb'i q'apoj Mariy.

²⁸Okxtzun ju anjel jatum ta' Mariy ex xi tma'n te: —In xi nq'olb'ena, nim t-xtalb'il Dios ma tzaj tq'o'n teya. Ate Qman at tuk'ila. [Mas ma kub' ky'iwla'na tu'n Dios kywitz kykyaqil xu'j.]

²⁹Tej tke'yinte Mariy ju anjel, b'i'x naj tnab'l tu'nju yol lu, ex kub' t-ximan tiqu'n in q'olb'enjtz ikju.

³⁰Atzunte anjel xi tma'n te: —Mi'n xob'a Mariy, porke ma tzaj tq'o'n Dios t-xtalb'il teya.

³¹Ex ja'lo k'okel ten tala, ex tzul itz'j jun tala, ex JESÚS tb'i k'okel tq'o'na.

³²Ma' toklen K'wa'l lu; ex k'okel q'ma'n tb'i Tk'wa'l Dios, aju Dios Ma'xix Toklen; kxel tq'o'n Qman Dios toklen tu'n tok te rey ik tza'n te David, ex atzun t-xe'chel.

³³Kkawil kyib'aj tiyjil Jacob te jumajx; ex aju tkawb'il minti' b'ajsb'il te, chi anjel.

³⁴Atzunte Mariy xi tqanin te anjel: —¿Tza'n tten jlu? Porke weye na'nx nmoje'ye tuk'il xinaq.

³⁵Xitzun ttzaq'we'n anjel: —Aju Xewb'aj Xjan tzul tuk'ila, ex kyjel tena tjaq' tipumal Dios Ma'xix Toklen; kyja'tzun aju ne' tzul itz'j o'kx k'ajb'el te Dios, ex k'okel tb'i Tk'wa'l Dios.

³⁶Ax ikx aju ttzika Elisabet tzul itz'j jun tal maske ma tijin; ex ma b'ant-xi qaq xjaw toklen ten tal, aju in q'manjtz ti'j qa mib'an alin.

³⁷Porke minti' jun ti'xti mlaywit b'ant tu'n Dios, chi anjel b'aj tma'n.

³⁸Xitzun tma'n Mariy te anjel: —Lu qine lu aqine tmajen Qman; b'ant-xwit wi'je tu'n Dios ik tza'nx ma tmaya, chi Mariy. Ex eltzun tpa'n tib' anjel ti'j.

³⁹Kyujtzun qe q'ij lu ex Mariy ex jurat xi' tuj tiwitz tx'otx' tuj jun tnam tuj tx'otx' Judea;

⁴⁰ex okx tuj tja Zacarías, ex xi q'olb'en Mariy te Elisabet.

⁴¹Tej tb'inte Elisabet aju q'olb'eb'l te tu'n Mariy, jaw yukch tal ne' tuj talb'il, ex o noj tuj tanmi Elisabet tu'n Xewb'aj Xjan.

⁴²Ex jaw tq'ajq'ajel twi' Elisabet kyuwxix ex tma: —Mas ma kub' ky'iwla'na kyxol kykyaqil xu'j, ex ma kub' ky'iwla'n ju tala.

⁴³¿Ti woklene tu'nju ma tzula visitaril weye, aya ttxu' Wajawe?

⁴⁴Porke o'kx tej xi nb'i'ne tq'olb'eb'la, ma jaw yukch tal ne' tu'n tzalajb'il tuj walb'ile.

⁴⁵At tzalajb'il teya tu'nju ma txi toksla'na, ex tkyaqilju o tma Qman teya kjapunel, chi Elisabet.

⁴⁶Atzunte Mariy tma: In tnimsa'n wanmiye tb'i Qman,

⁴⁷ex in tzalaj wanmiye ti'j Dios aju Klol weye.

⁴⁸Porke ma tzaj tke'yin Dios mans qine, aqine tmajen; ex texju ja'lo kukx ok kyma' kykyaqil xjal weye: At tzalajb'il teya, che chilo.

⁴⁹Ex nimxix ma b'inchanjtz weye tu'n Dios aju at nim tipumal, ex Xjan ju tb'i.

⁵⁰Ex kukx in q'aq'an tk'u'j kyi'j qeju in che niman te.

⁵¹Nimxix ma tb'incha tu'nju at tipumal; ex qeju in jaw kyniman kyib', ma kub' tq'uchin Dios kyximb'etz.

⁵²Ma tz'el ti'n kyoklen qe kawil at nim kyipumal, ex ma che jaw tnimsa'n qeju mans.

⁵³Qeju nne'l kyk'u'j ma tzaj tq'o'n nimku kye, atzun kye q'inun minti' ch'in ma tzaj q'o'n kye.

⁵⁴Ma onin kyi'j aj Israel aqeju tmajen; minti' ma tzik' tna'l tu'n tu'n ttzaj q'aq'an tk'u'j kyi'j,

⁵⁵ik tza'n tzaj ttzi'yan kye qxe'chel, tzaj ttziyan te Abraham ex kye tiyjil te jumajx, chi Mariy.

⁵⁶Axtzun kyaj ten Mariy tuk'il Elisabet b'alo ox xjaw; ex te tib'ajxi aj tja.

⁵⁷Tej tpon q'ij tu'n tul itz'j tal Elisabet, q'a jun tal ul itz'j.

⁵⁸Qe tvesin ex qeju at kyxilen tuk'il e tzalajxix junx tuk'il tej kyb'inte otoq tzaj q'aq'an tk'u'j Dios ti'j.

⁵⁹Ex tuj twajxaqin q'ij e tzaj tu'n t-sircunsidarinjtz ju ne'; ex o kyajb'e tu'n tok kyq'o'n tb'i Zacarías ik tza'nx tb'i tman.

⁶⁰Atzunte ttxu ne' tma: —Mi'n, Juan k'okel tb'i.

⁶¹—¿Tiqu'n Juan k'okel tb'i? Baqa at jun kyxol qe termaniya ik tb'i ik tza'n jlu, che chi.

⁶²Ex xi kyyek'un tu'n kyq'ab' tu'n t-xi kyqanin te tman ne' alkye tb'i ne' tu'n tok.

⁶³Tzaj tqanin Zacarías jun tal tz'lom ex kub' ttz'ib'an twitz kyja': Juan k'okel tb'i, chi ju kub' ttz'ib'an. Kykyaqiltzun e lab'in ti'j.

⁶⁴Jurattzun b'ant tyolin Zacarías, ex xi tq'o'n chjonte te Dios.

⁶⁵Kykyaqiltzun qe vesin tzaj nim kyxob'il ti'j jlu, ex tuj tkyaqil tiwitz tx'otx' tuj tx'otx' Judea e yolin xjal ti'j jlu.

⁶⁶Ex kykyaqil qeju o kyb'i tqanil ti'j jlu, e ximan ti'j ex in kyma'n kyxolx: ¿Titzun k'okel ju k'wa'l lu? Che chi. Ex ok kwentin ju k'wa'l tu'n tipumal Qman.

⁶⁷Atzunte Zacarías aju tman tal ne' o noj tuj tanmi tu'n Xewb'aj Xjan, xi tchik'b'a'n ju yol tzaj tma'n Dios te ex tmatzun kyja':

⁶⁸Nimanxwit tb'i Qman aju Qdios aj Israel qo', porke ma tzul quk'il onil qe etzan qo' tu'n, ex ma qo kolpet tu'n.

⁶⁹Ma tzaj tq'o'n jun Klol qe nim tipumal, atzun ma tzaj kyxol qe tiyjil David aju tmajen.

⁷⁰Ik tza'nx tzaj ttziyan Dios atxix ojtxi noq tu'n kyyol qe t-sanjel xjan:

⁷¹Tzaj tma'n tu'n qklet tu'n tuj kyq'ab' aj q'oj qi'j, ex tuj kyq'ab' qeju in qo el ik'un kyu'n;

⁷²ex tu'n ttzaj q'aq'an tk'u'j kyi'j qxe'chel, ex tu'n ttzaj tna'n aju yol xjan kyaj b'ant ti'j tu'n Dios kyuk'il.

⁷³Atzun yol jlu tzaj ttziyan Dios tu'nx tib' te qxe'chel Abraham:

⁷⁴Qa tu'n qklet tu'n tuj kyq'ab' aj q'oj qi'j, tu'ntzun qajb'en te Dios minti' qxob'il,

⁷⁵tu'n qok xjan ex tz'aqlxix twitz Dios tkyaqil q'ij te qanq'ib'l.

⁷⁶Atzun teya tal nk'wa'l, k'okel tb'iya t-sanjel Dios, aju Dios Ma'xix Toklen, porke kb'el neja twitz Qajaw b'inchalte tb'e,

⁷⁷tu'n t-xi tq'o'na tqanil kolb'il kye qe xjal etzan qe tu'n Dios, tu'ntzun tnajset kyil.

⁷⁸Ate Qdios nim in q'aq'an tk'u'j qi'j ex nim tk'ujlalil, ma tzul qoptz'aj t-spik'umal qib'aj ma tzaj tuj kya'j,

⁷⁹tu'n tq'onjtz spik'un kyib'aj qeju ate' tuj qlolj ex tjaq' tipumal kamik, ex tu'n tyek'unte qb'e tu'n qb'et minti' qxob'il, chi Zacarías.

⁸⁰Ex aju tal k'wa'l in ch'iytoq, ex nno'kxi tnab'l; ex o ten tuj lugar minti' kynajb'il xjal tuj, maxitzun ajtz tuj lugar tuj q'ij tej ttzyet taq'un kyxol aj Israel.