Read kumam Lucas 10 Bible Online

Lucas 10 - kumam bible

Lucas 10

¹Tb'ajlenxitzun jlu, e jaw t-sk'o'n Qajaw 72[1] t-xnaq'tzb'entl, e je'x t-sama'n tu'n kyxi' nej twitz, te kab'chaq kyb'et, e je'x t-sama'n kyuj kykyaqil tnam ex lugar jatum attoq tponel.

²Ex xi tma'n kye: —Ax tok, nimxix twitz awal at, atzun qe aq'nal mya nim; kyja'tzun, che kub'sane twitz Tajaw awal tu'n kyxi t-sama'n aq'nal tu'n tjaw chmet twitz awal.

³Kyxi'ye; che xel nsama'ne ex ik che okele ik tza'n qe tal ẍne'l kyxol xo'j.

⁴Mi'n txi kyi'ne ch'u'ẍ, mi pa, mi xjab'; ex mi'n che we'ye tuj b'e tu'n kyq'olb'ene kye xjal.

⁵Ok kyokxe tuj jun ja, tnejel kyq'onxe jun q'olb'eb'l: Che tenwt xjal tuj tzalajb'il tuj ja lu, che chikuye.

⁶Qatzun b'a'n kyten xjal tuj ja lu, che teltzun tuj tzalajb'il ik tza'n kxel kyma'ne; qatzun mya b'a'n kyten xjal, mlay tz'ajb'en aju q'olb'eb'l otoq txi kyq'o'ne.

⁷Ax che tenkje jatum ktzajel q'o'n kyposadiye; kywa'nxe ex kyk'anxe aju ktzajel q'o'n kyeye; porke il ti'j tu'n tchjet twi tk'u'j aq'nal. Mi'n che ik'e jyol kyposadiye tuj juntl ja.

⁸Ok kypone tuj jun tnam, qa ma che k'monjtze kyu'n xjal, kywa'nxe aju kb'el q'o'n kywitze;

⁹ex qeju yab' ate' tuj tnam lu che b'anix kyu'ne, ex kymanxe kye xjal: Ma tzul laq'e' tkawb'il Dios kyuk'ile, che chikuye.

¹⁰Ex qa at jun tnam ma che pone tuj ex minti' ma che k'monjtze kyu'n xjal, kyexe tuj cay ex kymanxe:

¹¹Axju tpujil kytanmiye, aju ma tz'ok lak'e' ti'j qqane, k'elel qchto'ne te jun yek'b'il kyi'je qa mya b'a'n qeye. Ex tz'elx kynik'e ti'j, aju tkawb'il Dios ma tzul laq'e' kyuk'ile, che chikuye.

¹²Kxel nma'ne kyeye: Mas nim tcastiw tnam lu kb'el twitz tcastiw tnam Sodoma tuj tq'ijlalil ok tul jwisi.

¹³B'ek'b'il kywitze aj Corazín. B'ek'b'il kywitze aj Betsaida. Ex noqwit tuj tnam Tiro ex tuj tnam Sidón o che b'inchanjtz qe b'inchb'en nim kyipumal ik tza'n ma nb'inchaye kyxole, b'i'xwitlo ajtz ti'j kyanmi ojtxi, owtlo tz'ok kyq'o'n kyxb'alun ch'i'x twitz ex owtlo che kub' qe' tuj tza'j, te jun techal qa otoq tz'ajtz ti'j kyanmi.

¹⁴Kyja'tzun, tuj tq'ijlalil jwisi mas nim kyeye kycastiw kb'el ik tza'n te tnam Tiro ex tnam Sidón.

¹⁵Ex aqeye aj Capernaum, ¿maj che japunele tuj kya'j? Mlay, max che b'elponele tuj kynajb'il kyimni.

¹⁶Alkye ma kub' b'inte kyyole, weye nyole in kub' tb'i'n: ex alkye ma tz'el ik'un te kyeye, aqine in chin el tik'un; ex alkye ma tz'el ik'un te weye, nne'l ik'un Dios tu'n, aju tzaj samante weye, chi Jesús kye.

¹⁷E ultzun meltz'aj qeju 70 t-xnaq'tzb'en Jesús in che tzalaj, ex xi kyma'n te: —Tat, ikx qe ju'ẍ in qo'x nimane kyu'n noq tu'n tipumal tb'iya.

¹⁸Xi tma'n Jesús kye: —Ax tok ma wile Satanás ma ku'tz tz'aq twitz kya'j ik tza'n tqan q'ankyoq.

¹⁹Xi nq'o'ne kyoklene tu'n tkub' kywab'ane qe lob'aj ex qe si'nin ex tu'n tkub' ti'j tkyaqil tipumal aj q'oj kyu'ne. Ex minti' jun tu'n tb'aj kyi'je.

²⁰Ex mi'n che jaw tzalaje tu'nju in che nimanjtze kyu'n ju'ẍ, o'kx che tzalajxe tu'nju tz'ib'an kyb'iye tuj kya'j.

²¹Ax or jaw tzalaj Jesús tu'n Xewb'aj Xjan ex tma: —Kxel nq'one chjonte teya, Tat, aya Tajaw kya'j ex tx'otx', tu'nju ma kub' tewana tkyaqil jlu kywitz qe xjal at kynab'l ex kywitz qe xjal b'a'nxix kyu'n, ex ma tzaj tyek'una kye qe xjal ch'in kyoklen. Ma tb'inchaya ikju, Tat, tu'nju b'a'n ela tuj twitza, chi Jesús tuj tna'j Dios.

²²Ax ikx tma Jesús kye xjal: Tkyaqil ma tzaj q'o'n weye tu'n Nmane. Ex minti' jun xjal ojtzqilte alkye qine, o'kx Nmane ojtzqilte, porke aqine Tk'wa'l; ex minti' jun xjal ojtzqilte alkye Nmane, o'kx aqine ojtzqilte, porke aqine Tk'wa'l; ex alkye jun xjal waje tu'n t-xi nyek'une Nmane te k'eleltzun tnik' xjal ti'j Nmane, porke aqine Tk'wa'l, chi Jesús kye.

²³Ajtz meltz'aj twitz Jesús kyuk'il t-xnaq'tzb'en, ex xi tma'n o'kxku kye: —At tzalajb'il kye xjal in kyke'yin tkyaqilju in kyile;

²⁴ex kxel nma'ne kyeye, nimku t-sanjel Dios ex nimku rey o kyajb'e tu'n kylonte aju in kyile, pero minti' o kyil; ex o kyajb'e tu'n kyb'inte aju in kyb'i'ne, pero minti' o kyb'i, chi Jesús kye t-xnaq'tzb'en.

²⁵Ex at jun chik'b'al ti'j ley ul laq'e' tu'n tok Jesús tuj joyb'il ti'j tu'n, ex xi tma'n te: —Xnaq'tzal, ¿ti ok nb'incha'ye tu'n tten nchwinqlale te jumajx?

²⁶Xi tma'n Jesús te: —¿Alkye tz'ib'an tuj ley? ¿Chi tok tu'n ok in jaw t-sch'ina?

²⁷Xi ttzaq'we'n xnaq'tzal ti'j ley: —Aju tz'ib'an tuj ley in tma'n kyja': Kyk'ujlame Qman Dios tu'n tkyaqil kyanmiye, tu'n tkyaqil kyk'u'je, tu'n tkyaqil kyipumale ex tu'n tkyaqil kynab'le; ex kyk'ujlame qe kyuk'ile ik tza'n kyeye in kyk'ujlan kyib'e, chi tuj Tu'jil.

²⁸Xitzun tma'n Jesús te: —B'a'n ma tmaya; qa ma tb'inchaya jlu kteltzun tchwinqlala.

²⁹Atzunte xjal o tajb'e tu'n mi'n tkub' tz'aq tyol Jesús tib'aj, xi tma'n te: —¿Alkyetzun ju wuk'ile?

³⁰Xi ttzaq'we'n Jesús: —At jun xinaq tzaj tuj tnam Jerusalén, kyja' tku'x tuj b'e tu'n tpon tuj tnam Jericó, ex tzyet kyu'n eleq' tuj b'e, el kyi'n tkyaqilju at te tuk'ix t-xb'alun ex b'aj kyb'ju'n, ex e ik'tzun, kyaj kyq'o'n ch'ixtoq tkyim.

³¹Ex tk'ulb'aku, ku'x jun pal kye judiy tuj b'e, ex tej tlonte pal ju xjal aju otoq b'aj k'ixb'isa'n, ik'x ttxlaj b'e minti' o we'.

³²Ax ikx jun aj Leví, tej tkanun tuj lugar jatum ta' xjal aju otoq b'aj k'ixb'isa'n, noq xi'ku tke'yin, ax ikx ik'x ttxlaj b'e minti' o we'.

³³Ex at jun xjal aj Samaria kyja' t-xi' tuj b'e, pon laq'e' jatum ta' xjal aju otoq b'aj k'ixb'isa'n, ex tej tlonte, tzaj q'aq'an tk'u'j ti'j.

³⁴Pontzun laq'e' ttxlaj, b'aj tq'anan tk'ixb'len tu'n aseyt ex vin ex ok tpotzin; ex jax tq'o'n tib'aj tchej, xi ti'n tuj mesón, ex ok tkwentin.

³⁵Ex te juntl q'ij tej tik' ju xjal aj Samaria, jatz ti'n kab'e denari pwaq, xi tq'o'n te tajwil mesón ex kyaj tma'n: Kwentin oka ju xjal lu; noq jte'x kb'ajel tnajsa'na ti'j jaku chjet wu'ne ok wule juntl maj, chi aj Samaria.

³⁶¿Chi tok tu'na? ¿Alkyetzun jun kyxol qeju ox xjal lu ok te tuk'il ju xjal aju tzyet kyu'n eleq' tuj b'e?

³⁷Xitzun tma'n xnaq'tzal ti'j ley: —Aju tzaj q'aq'an tk'u'j ti'j. Xitzun tma'n Jesús te: —Txi'ya ex b'inchama ik tza'n jlu.

³⁸Kyja' t-xi' Jesús tuj b'e, pon tuj jun tal tnam; ex at jun xu'j Marta tb'i o k'met Jesús tu'n tuj tja.

³⁹Ex attoq jun terman Marta, Mariy tb'i, kub' qe' t-xe tqan Jesús ex ok ten b'ilte tyol.

⁴⁰Atzunte Marta in b'isun kyi'j qe tichaq in b'ant tu'n, pon laq'e' ttxlaj Jesús, ex xi tma'n te: —Tat, ¿minti'pe nno'k tq'o'na kwent ti'j wermaniye, ma chin kyaj tq'o'n njunalxe ti'j aq'untl? Q'manxa te tu'n tonin wuk'ile.

⁴¹Ex xi ttzaq'we'n Jesús: —Marta, Marta, nimxix in b'isuna ti'j tkyaqil taq'una ex in b'aj tk'u'ja ti'j.

⁴²Pero noq jun mas ilxix ti'j; ex aju mas b'a'n, atzunju ma jaw t-sk'o'n Mariy, ex mlay tz'el q'i'n te.