Read kumam Lucas 11 Bible Online

Lucas 11 - kumam bible

Lucas 11

¹At jun maj ok ten Jesús na'l Dios tuj jun lugar, ex tej tb'aj na'n Dios, at jun t-xnaq'tzb'en xi tma'n te: —Tat, qo t-xnaq'tzama tu'n tb'ant qna'ne Dios, ik tza'n te Juan xi tq'o'n xnaq'tzb'il kye t-xnaq'tzb'en tza'n tten tu'n tb'ant kyna'n Dios.

²Xitzun tma'n Jesús kye: —Ok kyna'ne Dios, kyq'manxe kyja': A Qman [ata tuj kya'j], tenwt tchiylal tb'iya qeye. E ttzaj ju tkawb'ila. [B'ant-xwit ju tajb'ila twitz tx'otx' ik tza'n in b'ant tuj kya'j.]

³Q'ontza qwaye ja'lo, aju in ajb'en tkyaqil q'ij.

⁴Ex najsama aju mya b'a'n in qb'incha'ne twitza, ik tza'n qeye in kub' qnajsa'ne kypaltil qeju in kyb'incha'n mya b'a'n qi'je. Ex mi'n taq'a amb'il tu'n qoke tuj joyb'il qi'je, [noq o'kx qo tkloma teju mya b'a'n.]

⁵Ax ikx xi tma'n Jesús kye: —Alkye jun kyeye at jun tamiw, ex qa ma txi' tuk'il tamiw tmij aq'b'il ex ma txi tma'n te kyja': Amiw, q'ontza ox pan nch'exe

⁶tu'nju at jun wamiwoye kyja' t-xi' tuj tb'e ma tzul wuk'ile, ex minti' ch'in b'a'n t-xi nq'o'ne te, qa chi kxel tma'n.

⁷Ex qa ma tz'etz ttzaq'we'n tamiw te kyja': Mi'n tz'el ti'na watl tuj nwitze; ma lamet ttzi ja, ex ate' qe tal nk'wa'le wuk'ile tuj nkoẍb'ile; mlay chin jaw we'ye tu'n t-xi nq'o'ne aju in tzaj tqanina, qa chi tamiw;

⁸kxel nma'ne kyeye, maske mlay jaw we' kyamiwoye q'ol pan kyeye tu'nju kyamiw kyib'e, pero tu'nju kukx kywuline kjawil we' q'olte tkyaqilju at tajb'en kyeye.

⁹Kyja'tzun kxel nma'ne kyeye: Kyqaninxe, ex ktzajel tq'o'n Dios kyeye; kyjyome, ex knetel kyu'ne; kyq'ajtza'n oke, ex kjaqetel ttzi ja kywitze.

¹⁰Ex alkye jun xjal in qanin ti'j, ok tk'ma'; ex aju in jyon ti'j, knetel tu'n; ex aju nno'k tq'ajtza'n, kjaqetel ttzi ja twitz.

¹¹¿Ex alkye jun mamb'aj kyxole, qa ma tzaj tqanin tk'wa'l jun twa pan, maj kxel tq'o'n jun ab'j? Ex qa ma tzaj tqanin tk'wa'l jun tchi' kyiẍ, ¿maj kxel tq'o'n jun lob'aj?

¹²Ex qa ma tzaj tqanin tk'wa'l jun tchi jos, ¿maj kxel tq'o'n jun si'nin?

¹³Maske mya b'a'n qeye, pero in xi kyq'o'ne oyaj b'a'n kye kyk'wa'le. ¿Yajtzunte Kymane aju at tuj kya'j, mlaypelo tzaj tq'o'n aju Xewb'aj Xjan kye qeju in che qanin te?

¹⁴At jun xjal etz jun ju'ẍ tuj tanmi tu'n Jesús, otoq tz'ok xjal men tu'n ju'ẍ; tejtzun tetz ju'ẍ tuj tanmi xjal, b'ant tyolin xjal; ex qe xjal e lab'in ti'j.

¹⁵Ex at junjun xjal in kyma'n: —In che etz ju'ẍ tuj kyanmi xjal tu'n Jesús, porke ate Beelsebú in q'onte tipumal, porke atzun nejenel kye ju'ẍ, che chi.

¹⁶Ex txqantl xjal xi kyqanin tu'n tb'ant jun señ tu'n tel kynik' ti'j qa atzun tzajni tipumal tuj kya'j, xi kyqanin noq tu'n tok Jesús tuj joyb'il ti'j kyu'n.

¹⁷Ex el tnik' Jesús ti'j kyximb'etz ex xi tma'n kye: —Qa at jun kawb'il at pab'l tib' tuj ex in che q'ojin xjal kyxolx, kb'el xitj kawb'il; ex qa at jun ja xjal at pab'l tib' kyxol, kb'el xitj jun ja xjal lu.

¹⁸Ikxte Satanás, qa tpa'n tib' ex in q'ojin ti'jx, ¿tza'ntzun tten kukx tu'n tkyaj ten tkawb'il? Ex aqeye in kyma'ne qa noq tu'n tipumal Beelsebú in che etz qe ju'ẍ tuj kyanmi xjal wu'ne.

¹⁹Qa ax tok noq tu'n tipumal Beelsebú in che etz ju'ẍ tuj kyanmi xjal wu'ne, ¿yajtzun kye kyuk'ile, alkye in q'onte kyipumal tu'n kyetz ju'ẍ tuj kyanmi xjal? Kyja'tzun, ax qe kyuk'ile ok kyma' qa mya tuj tumel kyyole.

²⁰Qatzun tu'n tipumal Dios in che etz ju'ẍ tuj kyanmi xjal wu'ne, tz'elxtzun kynik'e ti'j ax tok ma tzul tkawb'il Dios kyuk'ile.

²¹Jun xinaq at tipun noq b'anin tten, ex qa ma tz'ok t-xq'uqin tja, tkyaqilju at te segur ta'.

²²Ex qa ma tzul juntl xjal mas at tipun twitz, kb'el ti'j tu'n, tu'n jlu k'elel q'i'n tkyaqil tmakb'il aju q'uql tk'u'j ti'j, ex kb'el sipan tkyaqilju otoq tz'el q'i'n te.

²³Alkye jun xjal mya tq'on tib' wuk'ile, in q'ojl wi'je; ex alkye jun xjal minti' in onin wuk'ile tu'n tjaw chmet twitz awal, noq in b'aj tchitun.

²⁴Ok nne'tz jun ju'ẍ tuj tanmi jun xjal, in xi' ju'ẍ b'etel kyuj lugar tzqij tx'otx' in jyon ti'j jatum tu'n tojlan; ex qa minti' ma knet tu'n, in tma'n: Chin ajel meltz'aje juntl maj tuj njaye jatum ẍin etze, chi ju'ẍ.

²⁵Oktzun tul meltz'aj ju'ẍ tuj tanmi xjal, k'okex tke'yin ik tten ik tza'n jun ja tz'iso'maj tuj ex b'incha'maj.

²⁶In xi'tzun ju'ẍ ex in che tzaj ti'n wuqtl ju'ẍ mas mya b'a'n qe twitz; in che okxtzun tuj tanmi xjal ex ax in che najan; te yajxitl mas pyor ta' xjal ik tza'n nej.

²⁷Matoq in yolin Jesús ti'j tkyaqil jlu, at jun xu'j jaw sch'in kyxol xjal, ex tma: —At tzalajb'il te xu'j aju sel itz'ja ti'j ex ma ch'u'na ti'j.

²⁸Atzunte Jesús xi tma'n: —Mik' ttenju, mas at tzalajb'il kye qeju in xi kyb'i'n tyol Dios ex in xi kyniman.

²⁹Ex tej tok kychmon kyib' nim xjal ti'j Jesús, ok ten Jesús q'malte: —Aqeju xjal ate' tuj tq'ijlalil ja'lo mya b'a'n qe; kyajb'il tu'n kylonte jun señ, ex mlay txi yek'un jun señ kye, noq o'kx ju señ ti'j Jonás aju t-sanjel Dios.

³⁰Porke ik tza'n te Jonás ok te jun señ kye xjal aj Nínive, ax ikxtzun weye chin okele te jun señ kye xjal ate' tuj tq'ijlalil ja'lo, aqine sk'o'maj qine tu'n Dios tu'n ntene kyuk'il xjal.

³¹Tuj tq'ijlalil jwisi ok kyok xjal tuj xjel, aqeju ate' tuj tq'ijlalil ja'lo, kjawil we' xu'j rey aju o kawin tuj jun tx'otx' t-xe kya'j tuj tnayaj q'ij, ex che b'el tz'aq qe xjal lu tuj kyil tu'n; porke ate xu'j rey tzaj max ttxa'npun tx'otx' tu'n tul b'ilte tyol Salomón, ex nimxix tnab'l Salomón; ex at jun tzalu mas ma' toklen twitz Salomón.

³²Tuj tq'ijlalil jwisi, ok kyok xjal tuj xjel, aqeju ate' tuj tq'ijlalil ja'lo, che jawil we' qe xjal aj Nínive ex che b'el tz'aq qe xjal lu tuj kyil kyu'n; porke qe xjal aj Nínive ajtz ti'j kyanmi tej kyb'inte tpakb'ab'l Jonás; ex at jun tzalu mas ma' toklen twitz Jonás.

³³Mi jun xjal in kub' q'onte jun kandil tuj ewaj toklenxi ttxaqo'n, ex mlay tz'okx tq'o'n tjaq' jun cajón, o'kx in jax tq'o'n tib'aj jun tkub'il, tu'ntzun tq'onte spik'un kye kykyaqil qeju ate' tuja.

³⁴Qe tb'aq' twitza atzun t-spik'umal t-ximlala; qatzun b'a'n ate' tb'aq' twitza, ax ikx tkyaqil t-ximlala at tuj spik'un; ex qa mya b'a'n ate' tb'aq' twitza, ax ikx t-ximlala at tuj qlolj.

³⁵Q'o'nka kwent ti'j aju spik'un at teya myawt qlolj.

³⁶Qatzun tkyaqil t-ximlala at tuj spik'un, ex minti' ch'in qlolj tuj, tkyaqil kspik'eb'el twitza ik tza'n jun tqan q'aq' in t-spik'b'a'n twitza.

³⁷Tej tb'aj yolin Jesús, at jun fariseo o kub'san twitz tu'n twa'n Jesús tuk'il; okxtzun Jesús tuj tja, ex kub' qe' ti'j mes.

³⁸Tej tok tke'yin fariseo minti' el ttx'jo'n Jesús tq'ab' tej tok wa'l, o lab'in ti'j.

³⁹Atzunte Qajaw xi tma'n te: —Aqeye fariseo ik kytene ik tza'n jun xjal o'kx ti'j vas ex ti'j laq nne'l ttx'jo'n, atzun tujxi minti' in b'aj ttx'jo'n, porke tuj kyanmiye o'kx in che ximane ti'j tu'n kyelq'ane ex tu'n kyb'inchanteye mya b'a'n.

⁴⁰Miban che b'ine. ¿Minti'pe nne'l kynik'e ti'j, aju o b'inchante te ti'jxi, axju o b'inchante te tujxi?

⁴¹Kyja'tzun, kyq'onxe kykotz xjal tu'n tkyaqil kyk'u'je, ex che kyjeltzune saq qeye.

⁴²B'ek'b'il kywitze, fariseo. Tu'nju in xi kyq'o'ne tlaji'n te Dios ti'j tal k'ul alwen tb'i, ex ti'j rud, ex ti'j tkyaqil tal k'ul awa'n kyu'ne, ex minti' nno'k kyq'o'ne kwent ti'j tu'n kyb'inchanteye aju tz'aqlxix ex tza'n tten tu'n kyk'ujlanteye Dios. Atzun jlu tu'n tb'ant kyu'ne, ex tu'n mi'n tkyaj kyq'o'ne aju txqantl.

⁴³B'ek'b'il kywitze, fariseo. Kyajb'ile tu'n kykub' qe'ye tuj tnejel q'uqb'il tuj ja te k'ulb'il, ex tu'n kyok q'olb'e'ne tuj plas tuk'il nimb'il.

⁴⁴B'ek'b'il kywitze xnaq'tzal ti'j ley ex fariseo, xmletz' qeye. Ik kytene ik tza'n tjulil kyimni minti' q'ancha'l, ex qe xjal in che b'et tib'aj minti' b'a'n kyu'n.

⁴⁵Ex tzaj ttzaq'we'n jun chik'b'al ti'j ley: —Xnaq'tzal, aju tyola lu ax ikx qib'aje in kub' tz'aq.

⁴⁶Ex tma Jesús: —Ax ikx b'ek'b'il kywitze chik'b'al ti'j ley, porke in xi kyq'o'ne kyiqatz xjal mlay k'isj kyu'n, atzun kyeye minti' nno'k kyq'o'ne jun tal kyq'ab'e ti'j iqtz.

⁴⁷B'ek'b'il kywitze, in jaw kyb'incha'ne kypantyón qe t-sanjel Dios ex kyu'n kyxe'chele e kub' b'yo'n ojtxi.

⁴⁸Kyja'tzun in kyyek'une qa mojl taq'pon kyu'ne kyuk'il kyxe'chele; porke kyu'n kyxe'chele e kub' b'yo'n qe t-sanjel Dios ojtxi, atzun kyeye in jaw kyb'incha'ne kypantyón.

⁴⁹Kyja'tzun o tma Dios aju at nim tnab'l: Che xel nsama'ne nsanjele kyuk'ix apostol yolil kyuk'il; at junjun kye che b'el b'yo'n kyu'n, ex junjun che b'ajel yajla'n kyu'n, chi Dios.

⁵⁰Kyja'tzun che b'el tz'aq qe xjal lu tuj kyil tu'n tlaj kychk'el kykyaqil t-sanjel Dios, aqeju o che kub' b'yo'n atxix tb'antlen twitz tx'otx',

⁵¹tzajnix b'ant tej tkub' b'yo'n Abel ex japun ti'j Zacarías, aju o kub' b'yo'n ti'jxi altar twitz tja Dios. Kyja'tzun kxel nma'ne kyeye, che b'el tz'aq xjal lu tuj kyil tu'n kylaj t-sanjel Dios e kub' b'yo'n.

⁵²B'ek'b'il kywitze, chik'b'al ti'j ley. Ma txi kytzyu'ne ju tal ja te ojtzqib'l; ax qeye minti' ma che okxe tuj; o kyajb'e xjal tu'n kyokx, pero xi kymayo'ne tu'n mi'n kyokx xjal.

⁵³Tejtzun tetz Jesús tuj tja fariseo, qe xnaq'tzal ti'j ley ex qe fariseo tzaj nimxix kyq'oj ti'j, xi kyxjelin nimku yol te;

⁵⁴in che jyon tumel tza'n tten tu'n tkub' tz'aq kyu'n tuj jun til tu'nx ju tyol.