Read kumam Lucas 12 Bible Online

Lucas 12 - kumam bible

Lucas 12

¹B'aj kychmon kyib' ela' mil xjal, b'aj kylamon kyib' kyxolx. Ex tnejel ok ten Jesús q'malte kye t-xnaq'tzb'en: —Ten kykwente kyi'je teju t-samel pan kye fariseo, aju kyxmletz'il.

²Ex tkyaqilju ewan, k'elel tuj q'ancha'l; ex tkyaqilju at tuj ewaj, ok kyb'i' xjal.

³Kyja'tzun, aju ma kymaye tuj qlolj, kb'injtzel tuj tqan q'ij; ex tkyaqilju ma kymaye tuj ewaj tujxi ja, ktzajel q'ma'n twi ja ex ok kyb'i' kykyaqil xjal.

⁴Kxel nma'ne kyeye aqeye wuk'ile: Mi'n che xob'e kywitz qeju in kub' kyb'yo'n t-ximlal xjal ex minti' mastl jaku b'ant kyu'n.

⁵Kxel nma'ne kyeye alkye tu'n kyxob'e twitz: Che xob'e twitzju at tipumal tu'n tkyim xjal tu'n ex at tipumal tu'n t-xi q'o'n xjal tuj infierni tkyimlenxi xjal; kyja'tzun in xi nma'ne kyeye, che xob'e twitz.

⁶¿Minti'pe in che k'ayinjtz jwe' tal chyu'j tu'n kab'e sentav? Pero mi jun kye nnik' tna'l tu'n Dios.

⁷Tkyaqil ttzmal kywi'ye ajla'maj tu'n Dios. Kyja'tzun mi'n che xob'e; aqeye mas ma' kyxilene kywitz nimku tal chyu'j.

⁸Kxel nma'ne kyeye, alkyeju minti' in kub' tewan ex in tma'n kye xjal qa ax tok okslal wi'je, ax ikxtzun weye mlay kub' wewane, kxel nma'ne kywitz t-anjel Dios qa ax tok okslal wi'je, aqine sk'o'maj qine tu'n Dios tu'n ntene kyuk'il xjal.

⁹Ex alkye ma kub' tewan kywitz xjal qa minti' ojtzqi'n qine tu'n, ax ikx weye kb'el wewane kywitz t-anjel Dios qa minti' ojtzqi'n wu'ne.

¹⁰Ex alkye jun xjal ma q'mante jun yol mya b'a'n wi'je, aqine sk'o'maj qine tu'n Dios tu'n ntene kyuk'il xjal, jaku najset til; pero alkye ma yolin mya b'a'n ti'j Xewb'aj Xjan, mlay najset til.

¹¹Ex ok kyxi q'i'ne tuj ja te k'ulb'il, ex kywitz jwes ex kywitz aj sanjelal, mi'n b'aj kyk'u'je tza'n tten tu'n t-xi kytzaq'we'ne ex alkye yol tu'n t-xi kyma'ne;

¹²porke jurat ktzajel tma'n Xewb'aj Xjan kyeye alkye yol tu'n t-xi kyma'ne.

¹³At jun xinaq kyxol xjal xi tma'n te Jesús: —Xnaq'tzal, q'manxa te ntzike tu'n tkub' tmij qetzb'ile.

¹⁴Atzunte Jesús xi tma'n te: —¿Alkye ma tz'ok q'onte weye te jwes kyib'aje ex tu'n tkub' tmij kyetzb'ile wu'ne?

¹⁵Ex tmatl Jesús kye: —Atx kyna'ne ti'j, ex ten kykwente kyi'je tu'n mi'n tpon kyk'u'je ti'j q'inumab'l; porke mya tok tchwinqlal jun xjal ti'j nimku at te.

¹⁶Ax ikx xi tma'n Jesús jun techal kye: —At jun xjal q'inun, nim twitz awal o chmet tuj ttx'otx'.

¹⁷Kub'tzun t-ximan q'inun ex tma: ¿Ti ok nb'incha'ye? Tu'nju minti' jatum tu'n tokx nk'u'ne twitz wawale.

¹⁸Ex b'a'n wu'ne alkye ok nb'incha'ye. Che b'el nxitune ntx'utx'e, ex che jawil nb'incha'ne mas matijtl qe, ex atzun k'okex nk'u'ne tkyaqil twitz wawale ex tkyaqilju at weye.

¹⁹Tu'n jlu kxel nma'ne te wanmiye: Wanmi, nimku at teya k'u'n qe te nimku ab'q'i; tz'ojlana, wa'na, k'ana, ex tzalajxa, chi q'inun.

²⁰Ex xi tma'n Dios te xjal: Minti' tnab'la, teju qonik'an ja'lo kymela; ex tkyaqilju ma b'aj tk'u'na, ¿alkye kyjel tajwil?

²¹Kyja'tzun tten aju xjal in b'aj tchmo'n tq'inumab'l te tex, ex tuj twitz Dios meb'a te xjal lu.

²²Xitzun tma'n Jesús kye t-xnaq'tzb'en: —Kyja'tzun kxel nma'ne kyeye: Mi'n b'aj kyk'u'je ti'j kychwinqlale, ti kxel kywa'ne; ex mi'n b'aj kyk'u'je ti'j kyximlale, ti k'okel kyq'o'ne kyi'je.

²³Aju kychwinqlale mas ma' t-xilen twitz wab'j, ex aju kyximlale mas ma' t-xilen twitz xb'alun.

²⁴Kyke'yinxe qe joj, minti' in che awan ex minti' in che chmon twitz awal; minti' jun ja te k'ub'l kywa ex minti' kytx'utx', ex ax Dios in k'a'chan kye. ¿Yajtzun kyeye, myapelo mas ma' kyxilene kywitz qe joj?

²⁵¿Ex alkyetzun jun kyxole jaku b'ant tu'n tu'n tok tq'o'n juntl q'ij tchwinqlal[2] tu'nju nimxix in b'aj tk'u'j ti'j?

²⁶Qa mlayx b'ant aju ch'in kyu'ne, ¿tiqu'ntzun in b'aj kyk'u'je ti'j txqantl?

²⁷Che ximane kyi'j b'ech tuj k'ul tza'n tten in che ch'iy, minti' in che aq'nan ex minti' in che chqon; ex kxel nma'ne kyeye ti'j rey Salomón, maske tb'anilxix t-xb'alun ok tq'o'n, pero minti' pon jun t-xb'alun ik tza'n kye tal b'ech lu.

²⁸Qatzun ik in t-xb'alumi'n Dios tal k'ul tuj kojb'il at ja'lo ex nchi'j tz'okx q'o'n tuj q'aq', ¿yajtzunlo kyeye, mlaypelo che xb'aluminjtze tu'n, aqeye xinaq ch'in kyokslab'le?

²⁹Kyja'tzun, mi'n b'aj kyk'u'je ti'j kywaye ex ti'j kyk'a'ye, ex mi'n che b'isune ti'j.

³⁰Porke qe txqantl xjal tuj tkyaqil twitz tx'otx' in che jyon ti'j tkyaqil jlu; atzun kyeye at jun Kymane ojtzqi'n tu'n qa at tajb'en tkyaqil jlu kyeye.

³¹Kynimanxe tnejelxix aju tkawb'il Dios, tkyaqiltzun jlu ktzajel q'o'n kyeye.

³²Mi'n che xob'e aqeye nẍne'le, ichaq nik'xi kyb'ete, porke ate Kymane b'a'n ela tuj twitz tu'n t-xi tq'o'n aju kawb'il te kyeye.

³³Tkyaqilju at kyeye, kyk'ayinxe ex kyq'onxe kye meb'a; kyb'inchame kych'u'ẍe aju mlay b'aj, kychmome kyq'inumab'le tuj kya'j aju mlay b'aj, jatum mlay pon laq'e' eleq' ex mlay naj tu'n pok'.

³⁴Porke jatum ta' kyq'inumab'le, axtzun ktel kyanmiye.

³⁵Kyk'alomtzun kyk'u'je wen, ex kytxaqo'nk kykandile.

³⁶Che okxe ik tza'n qe majen in che ayon ti'j kypatrón ok tajtz tuj mejeb'le'n, tu'ntzun tjaqet naj ttzi ja kyu'n ok tul, ex ok tok tq'ajtza'n ttzi ja.

³⁷At tzalajb'il kye qeju majen lu ok tul kypatrón in che ayon ti'j; ax tok kxel nma'ne kyeye, ate patrón k'okel tk'alo'n tk'u'j ex kxel tma'n kye tmajen tu'n kykub' qe' ti'j mes, ex k'okel ten sipal kywa.

³⁸Ichaq qa ma tzul tmij aq'b'il ex qa ch'ixtoq qsqix, qa in che itz'len majen ti'j ok tul, at tzalajb'il kye qeju majen lu.

³⁹Ex tz'elx kynik'e ti'j jlu, noqwit b'i'n tu'n tajaw ja alkye or tu'n tul eleq', jakulo kub' ten xq'uqil, ex mlaylo tz'okx eleq' elq'al tuj tja.

⁴⁰Ikxtzun kyeye, noq b'anin kytene, ex alkye or minti' in che ximane ti'j, atzun or chin ule, aqine sk'o'maj qine tu'n Dios tu'n ntene kyuk'il xjal.

⁴¹Xitzun tma'n Pedro te Jesús: —Tat, ¿o'kxpe qeye in tma'na aju techal lu, ex qa kye kykyaqil?

⁴²Xitzun tma'n Qajaw kye: —Aju mayordom in japunxix taq'un tu'n ex at tnab'l, ktzajel tma'n tpatrón te tu'n kyok tkwentin qeju ate' tuj tja, ex tu'n t-xi q'ot kywa ok tpon or.

⁴³At-xix tzalajb'il teju majen qa in tb'incha'n alkyeju taq'un ok tul tpatrón.

⁴⁴Ax tok kxel nma'ne kyeye, k'okel q'o'n ju majen lu tu'n tpatrón te kwentil tkyaqilju at te tpatrón.

⁴⁵Ex qa ma kub' t-ximan ju majen tuj tanmi: Yajxi tzulwe npatrón, qa chi, ex qa ma tz'ok ten k'ixb'isal kye txqantl majen xinaq ex majen xu'j, ex qa ma tz'ok ten wa'l ex k'al, ex qa ma tz'ok ten k'al q'e'n,

⁴⁶tzultzun tpatrón majen lu tuj q'ij minti' in ayon ti'j, ex tuj or minti' b'i'n tu'n; kb'el q'o'n nim tcastiw ex kxel tq'o'n kyxol qeju mya b'a'n.

⁴⁷Aju majen ojtzqi'n tu'n alkye tajb'il tpatrón ex mya b'anin tten, ex minti' in b'ant tu'n aju tajb'il tpatrón, kk'ixb'isetel ela' maj tu'n asyal.

⁴⁸Atzunju majen na'nxtoq tlonte tajb'il tpatrón ex qa ma tb'incha jun mya b'a'n, noq ch'in kk'ixb'isetel; porke jun xjal qa nim ma txi q'o'n tuj tkwent, ax nim kxel qanin te ti'j ju taq'unb'en; ex jun xjal qa ma txi oqxenit nim te, ax nim kxel qanit te.

⁴⁹Aqine ma chin ule q'ol q'aq' twitz tx'otx', ex kuchiwt mawt jaw k'ant.

⁵⁰Il ti'j tu'n wik'e tuj nim k'ixk'oj, ex nim in chin b'isune okxi tjapun b'aj tkyaqil.

⁵¹¿Maj in che ximane ti'j qa ma chin ule twitz tx'otx' tu'n kyten xjal tuj tzalajb'il? Kxel nma'ne kyeye: Mi'n, o'kx tu'n tten pab'l tib' kyxol.

⁵²Porke texju ja'lo, jwe' xjal tuj jun ja kb'el ten pab'l tib' kyxol, kb'el ten q'oj kyxol ox kyuk'il kab'etl, ax ikx kyxol kab'e kyuk'il oxtl.

⁵³Ktel q'oj kyxol mamb'aj tuk'il tk'wa'l, ikx te k'wa'lb'aj tuk'il tman; ktel q'oj kyxol txuyb'aj tuk'il tal, ikx te txin tuk'il ttxu'; ktel q'oj kyxol xu'j alib'aj tuk'il txin alib'aj, ikx te txin alib'aj tuk'il xu'j alib'aj.

⁵⁴Ax ikx xi tma'n Jesús kye xjal: —Ok in xi kyke'yine muj in jaw tuj telex q'ij, jurat in kyma'ne: Tzul jb'al ex in tzajtzun,

⁵⁵ex ok in tzaj kyq'iq' elni, in kyma'ne: Tzul kyaq ex in tzajtzun.

⁵⁶Xmletz' qeye. Nne'l kynik'e ti'j alkye ktzajel tu'nju techal in kyke'yine twitz kya'j ex twitz tx'otx'; ¿tza'ntzun tten minti' nne'l kynik'e ti'j alkye ktzajel tuj tq'ijlalil lu tu'nju techal in kyke'yine?

⁵⁷¿Ex tiqu'n minti' in kub' kyximane kyu'nxe alkyeju tz'aqlxix?

⁵⁸Qa ma txi q'i'na twitz jwes tu'n aj q'oj ti'ja, tz'ok tililx tu'na tu'n t-xi kyb'incha'ne ti'j tuj b'e, tu'ntzun mi'n tpon q'i'na twitz jwes tu'n, ex tu'n mi'n t-xi q'o'na te polisiy tu'n jwes, ex tu'n mi'n tokx q'o'na tuj pres tu'n polisiy.

⁵⁹Kxel nma'ne teya, mlay tz'etza tuj pres qa mya cabal tmulta k'okex tchjo'na.