Read kumam Lucas 13 Bible Online

Lucas 13 - kumam bible

Lucas 13

¹Tujx ju tq'ijlalil lu e pon junjun xjal xi kyma'n te Jesús kyi'j junjun aj Galilea otoq che kub' b'yo'n tu'n Pilato ex b'aj t-smo'n tib' kychk'el tuk'il kychk'el alumaj otoq che kub' kyb'yo'n te chojb'il.

²Ex xi tma'n Jesús kye: —¿Chi tok kyu'ne? ¿Maspe aj ilxix qe aj Galilea lu kywitz txqantl aj Galilea, tu'nju e kub' b'yo'n?

³Kxel nma'ne kyeye: Mi'n; ikx kyeye, qa minti' ma tz'ajtz ti'j kyanmiye, che najele kykyaqile.

⁴Ex qeju wajxaqlaj xjal e kyim, aqeju kub' tz'aq cuartel kyib'aj tuj Siloé. ¿Chi tok kyu'ne? ¿Maspe nimxix kyil kywitz txqantl xjal najl tuj Jerusalén?

⁵Kxel nma'ne kyeye: Mi'n; ikx kyeye, qa minti' ma tz'ajtz ti'j kyanmiye, che najele kykyaqile.

⁶Ax ikx xi tma'n Jesús aju techal lu: —At jun xjal at jun wi' higo awa'n tu'n tuj ttx'otx', ex tzaj jyol twitz, ex minti' knet tu'n.

⁷Xitzun tma'n te kwentil awal: Ja'lo toxin ab'q'i kukx in chin ule jyol jun twitz higo lu, ex minti' jun twitz in knet wu'ne. Tx'eminktza; noqx gan xmu'jin tx'otx' tu'n.

⁸Atzunte kwentil awal xi ttzaq'we'n: Tat, q'onkja juntl ab'q'i; kb'ajel waq'nane tx'otx' t-xe'; ex k'okel nq'o'ne abon t-xe'.

⁹Qa ma tz'ok twitz, mlay jaw tx'emit; qatzun minti', b'a'n tu'n tjaw tx'emit.

¹⁰Tuj jun q'ij te ojlab'l in tq'o'ntoq Jesús xnaq'tzb'il tuj jun ja te k'ulb'il;

¹¹ex attoq jun xu'j otoq b'ant-xi wajxaqlaj ab'q'i toklen tyab'il; otoq kyaj tze'jix ti'j tu'n ju'ẍ, ex minti' tumel tu'n tjaw we' ti'j.

¹²Tej tlonte Jesús, tzaj ttxko'n ex xi tma'n te: —Aya xu'j, ma tzoqpeta, ma tz'el tyab'ila.

¹³Kub'tzun tq'o'n Jesús tq'ab' tib'aj; ex jurat jiqumax ti'j xu'j, ex jaw tnimsa'n tb'i Dios.

¹⁴Atzunte nejenel tuj ja te k'ulb'il tzaj nim tq'oj tu'n tlaj b'anix jun xjal tu'n Jesús tuj q'ij te ojlab'l, ex xi tma'n nejenel kye xjal: —O'kx tuj qaq q'ij b'a'n tu'n qaq'nan; atzun q'ij b'a'n tu'n kyule tu'n kyb'anixe, ex mya tuj q'ij te ojlab'l.

¹⁵Atzunte Qajaw xi ttzaq'we'n: —Xmletz' qeye, teyle junjun kyeye ¿maj minti' nne'l tpaju'n twakẍ ex qa tchej tuj q'ij te ojlab'l ex in xi ti'n k'al a'?

¹⁶Yajtzun ju xu'j lu, ax tiyjil Abraham, ex wajxaqlaj ab'q'i mer ik tza'n k'alo'ntoq tu'n Satanás tu'n yab'il, ¿myapelo b'a'n tu'n ttzoqpet ex tu'n tel tyab'il tuj q'ij te ojlab'l?

¹⁷Tej tmante Jesús tkyaqil jlu, tzaj kych'ixwi qeju in che q'ojin ti'j; atzun kye kykyaqil xjal e jaw tzalaj ti'j tkyaqil tb'inchb'en Jesús tb'anilxix qe.

¹⁸Tmatzun Jesús: —¿Chi tok kyu'ne ti'j tkawb'il Dios? ¿Tza'n tten? Ex ¿alkye jun techal ktzajel qi'n ti'j?

¹⁹Ik tten ik tza'n jun twitz mostaza xi ti'n jun xjal ex ku'x tawa'n tuj tpe'n; ex ch'iy, ex ok ma'xix ik tza'n jun tze', ex qe chyu'j kyb'incha kyq'u' kyxol tq'ab'.

²⁰Ex tma Jesús juntl maj: —At jun techal kxel nma'ne tza'n tten tkawb'il Dios.

²¹Ik tten ik tza'n ch'in t-samel pan xi ti'n jun xu'j ex ku'x t-smo'n tuj ox malb'il arin, ex tkyaqil tq'otjil pan jaw mal tk'u'j.

²²Ik'tzun Jesús kyuj qe tnam ex qe aldey, in tq'o'n xnaq'tzb'il kye xjal, ex kyja' t-xi' tuj Jerusalén.

²³Ex xi tma'n jun xjal te: —Tat, ¿maj nik'xi qeju in che klet? Xitzun tma'n Jesús kye:

²⁴—Kyq'o'nk kyipune tu'n kyokxe ttzi ja ch'in; ex kxel nma'ne kyeye, nimku xjal k'okel tilil kyu'n tu'n kyokx ex mlay che okx.

²⁵Porke tzul q'ij kjawil we' ju tajaw ja lamol ttzi ja; atzun kyeye qa otoq che kyaj tene ttxa'n pe'n, che okel tene q'ajtzal ttzi ja, ex ok kyma'ye kyja': Tat, Tat, jaqo'nkxa ttzi ja qwitze. Atzunte tajaw ja k'eletz ttzaq'we'n: Minti' b'a'n wu'ne jatum tzajni qeye.

²⁶Atzun kyeye che okel tene q'malte te: O qo wa'ne ex o qo k'ane tuk'ila, ex tzaj tq'o'na xnaq'tzb'il tuj qtanmiye.

²⁷Atzunte tajaw ja ktzajel tma'n kyeye: Kxel nma'ntle kyeye: Minti' b'a'n wu'ne jatum tzajni qeye; kypa'mil kyib'e wi'je kykyaqile aqeye b'inchal mya b'a'n.

²⁸Oktzun che jawil oq'e, ex kqitx'itx'il t-xe kye'ye ok kylonteye Abraham tuk'ix Isaac, tuk'ix Jacob ex kykyaqil t-sanjel Dios ate' tuj tkawb'il Dios, atzun kyeye otoq che kyaj tene ti'jtze.

²⁹Ok che tzajel xjal te okni, te elni, te jawni ex te kub'ni, ex che b'el qe' wa'l ti'j mes tuj tkawb'il Dios.

³⁰Ex aqeju ate' te mankb'il ja'lo, at junjun che okel te tnejel; ex qeju ate' te tnejel ja'lo, at junjun che okel te mankb'il.

³¹Tujx ju q'ij lu e pon junjun fariseo ex xi kyma'n te Jesús: —Texa tzalu ex txi'ya, porke taj Herodes tu'n tkub' b'yo'na tu'n.

³²Ex xi tma'n Jesús kye: —Kyxi'ye, ex kyq'manxe te wech Herodes: Aqine in che etz ju'ẍ tuj kyanmi xjal wu'ne, ex che b'anixel xjal wu'ne ja'lo tuk'ix nchi'j, ka'jxitzun kweb'el waq'une, che chikuye te.

³³Ex il ti'j tu'n nb'ete ja'lo tuk'ix nchi'j tuk'ix ka'j; ex mlay b'ant tu'n tkyim jun t-sanjel Dios ti'jxi tnam Jerusalén.

³⁴Aya tnam Jerusalén, aya tnam Jerusalén, in che kub' tb'yo'na qe t-sanjel Dios ex in che b'aj t-xo'na tu'n ab'j aqeju in che tzaj t-sama'n Dios tuk'ila. Nimku maj o wajb'eye tu'n kyok nchmo'ne qe tk'wa'la ik tza'n jun ttxu ek' in che ok tchmo'n qe tal tjaq' t-xik', ex minti' o tajb'eya.

³⁵Aju tja Dios at kyxole kyjel kolin tu'n Dios, ex kxel nma'ne kyeye mlay chin kyile juntl maj, maxi chin okel kyke'yine ok tpon tq'ijlalil ok kymanteye: Ky'iwla'n teju tzul, aju ktzajel sama'n tu'n Qman.