Read kumam Lucas 14 Bible Online

Lucas 14 - kumam bible

Lucas 14

¹At jun q'ij te ojlab'l okx Jesús wa'l tuj tja jun xjal nejenel kye fariseo, ex in che ke'yin txqantl fariseo ti'j alkye tu'n tb'inchante Jesús tuj q'ij te ojlab'l.

²Ex ultzun jun xjal twitz Jesús, at mal ti'j.

³Xitzun tqanin Jesús kye chik'b'al ti'j ley ex kye fariseo: —¿Q'o'npelo tu'n ley tu'n tq'ananjtz jun xjal tuj q'ij te ojlab'l ex qa mi'n? Chi Jesús.

⁴Atzun kye minti' e q'ajt. Tzajtzun ttzyu'n Jesús aju xjal at mal ti'j ex b'anix tu'n, ex xi tma'n te tu'n taj tja.

⁵Xitzun tma'n Jesús kye fariseo: —¿Alkye jun kyxole, qa ma ku'x tz'aq jun tk'wa'l[3] ex qa jun tchej tuj jun jul, mlaypelo jatz ti'n naj maskelo tuj q'ij te ojlab'l?

⁶Ex minti' b'ant ttzaq'wenjtz jlu kyu'n.

⁷Tej tke'yinte Jesús tza'n tten mas kyajb'il xjal tu'n kykub' qe' tuj jun q'uqb'il tb'anilxix, xi tma'n jun yol kye qeju otoq che txkonjtz:

⁸—Ok ttxkonjtza tu'n jun xjal tu'n t-xi'ya tuj mejeb'le'n, mi'n kub' qe'ya tuj ju q'uqb'il tb'anilxix, mya yajku otoq txkonjtz juntl mas ma' toklen twitza,

⁹ex oktzun tul ju otoq tzaj txkonte kyeye ok tma' teya kyja': Tik' laq'e'ya tuj q'uqb'il lu ex qekuya tuj juntl q'uqb'il. Kjawiltzun ch'ixwiya, ex kb'el qe'ya tuj mankb'il q'uqb'il.

¹⁰Ex ok ttxkonjtza, txi'ya ex qekuya tuj mankb'il q'uqb'il; oktzun tul aju kxel txkonte teya ok tma' teya kyja': Amiw, laq'etz ch'intla ntxlaje; ex ma'lo t-xilena kywitz qeju in che kub' qe' tuk'ila ti'j mes.

¹¹Ex alkye jun xjal in jaw tniman tib', k'okel q'o'n te ch'in; ex alkye ma tz'ok tq'on tib' te ch'in, kjawil nimsa'n.

¹²Ex xi tma'n Jesús teju xinaq xi txkonte te: —Qa ma tb'inchaya jun nintz wa'n, ex qa taja tu'n kyul xjal wa'l tuk'ila, mi'n che tzaj ttxko'na qe tamiwoya, qe termaniya, qe xjal at t-xilena kyuk'il ex qe tvesina q'inun; ex jakulo txi txko'ntla kyu'n tu'n twa'na kyuk'il, atzun t-xelju tzul q'o'n teya.

¹³Ok tkub' tik'sa'na jun ninq'ij, txkontza qe meb'a, qe xjal tzkaj kyten, qe kox, ex qe moẍ;

¹⁴at tzalajb'il teya ikju, ex mlay b'ant kyu'n tu'n ttzaj kyq'o'n t-xel teya, maxitzun ktzajel q'o'n t-xel teya okxi kyjatz anq'in qe xjal tz'aqlxix.

¹⁵At jun xjal q'uqltoq ti'j mes, tej tb'inte jlu xi tma'n te Jesús: —At tzalajb'il te jun xjal kwa'l tuj tkawb'il Dios.

¹⁶Xitzun tma'n Jesús te: —At jun xjal o tb'incha jun nintz wa'n, ex e tzaj ttxko'n nimku xjal.

¹⁷Tej tpon or te wab'l, xi t-sama'n xjal jun tmajen q'malte kye qeju otoq che txkonjtz: Kytzaje, porke ma b'ant tten tkyaqil, chikuya, chi xjal.

¹⁸Ex kykyaqil tzaj kyma'n tiqu'n mlay che tzaj. O tma ju tnejel: Ma laq'et ch'in ntx'otx'e, ex il ti'j tu'n nxi'ye ke'yilte; chin kub'sale twitza mlay chinxe.

¹⁹Ex o tma juntl: Ma laq'et jwe' moj nwakẍe, ma chinxe aq'nal kyuk'il tu'ntzun tik' nwitze kyi'j qa b'a'n qe; chin kub'sale twitza mlay chinxe.

²⁰Ex o tma juntl: Ma ẍin moje'ye, tu'ntzun jlu mlay chinxe.

²¹Tej tul meltz'aj ju majen, xi tma'n tkyaqil jlu te tpatrón. Tzajtzun tq'oj patrón, ex xi tma'n te tmajen: Juratx t-xi'ya kyuj plas ex kyuj cay tuj tnam, ex q'intza qe meb'a, qe xjal tzkaj kyten, qe kox, ex qe moẍ, chi xjal.

²²Tejtzun tul meltz'aj majen, xi tma'n te tpatrón: Tat, ma b'ant wu'ne ik tza'n saj tma'na, ex atx lugar.

²³Xitzun tma'n patrón te tmajen: Txi'ya kyuj b'e ex kyuj tal tq'ab' b'e ex q'onka il kyi'j xjal tu'n kytzaj, tu'n tnoj njaye.

²⁴Ex kxel nma'ne kyeye, qe xjal e tzaj ntxko'ne nej, mi jun kxel nik'b'ente wab'j ma b'ant wu'ne, chi patrón.

²⁵Nimku xjal lepchqe'k ti'j Jesús; ex ajtz meltz'aj twitz kyuk'il xjal, ex xi tma'n kye:

²⁶—Qa at jun xjal ma tz'ok lpe' wi'je, ex qa o'kx tok tk'u'j ti'j tman, ti'j ttxu', ti'j t-xu'jil, kyi'j qe tk'wa'l, kyi'j qe ttzik ex qe titz'in, ax ikx ti'j tchwinqlal, mlay tz'ok te nxnaq'tzb'ene.

²⁷Ex alkye jun xjal mya q'i'n tcrus ex mya lepcho'k wi'je, mlay tz'ok te nxnaq'tzb'ene.

²⁸Ex alkye jun kyxole, qa taj tu'n tb'ant jun ja tu'n, ¿mlaypelo kub' qe' ximal ti'j nej nik'pun knajel tu'n, qa akux aju pwaq tu'n tb'ant ja?

²⁹Mya yajku mlay japun b'aj tu'n, ex otoq kub' qe' t-simyentil ja, tu'n jlu kykyaqil qeju in che ke'yin ti'j che okel ten tze'l ti'j,

³⁰ex ok kyma': Ate xjal lu ok ten b'inchal tja ex ma kyaj tx'aqe' tu'n, che chilo.

³¹Ex alkye jun rey, qa ma txi' q'ojlel ti'j juntl rey, ¿mlaypelo kub' qe' ximal ti'j nej qa jaku xkye' ti'j winqin mil t-soldad juntl rey in tzaj q'ojlel ti'j, atzun te noq laj mil q'i'n tu'n?

³²Ex qa mlay xkye' ti'j, na'nxtoq tul kanun juntl, che xel t-sama'n kab'e t-sanjel qanilte te juntl alkye taj tu'n t-xi q'ot te tu'ntzun twe' q'oj.

³³Kyja'tzun, alkye jun kyxole qa minti' xkyaj tq'o'n tkyaqilju at te, mlay tz'ok te nxnaq'tzb'ene.

³⁴B'a'n te atz'an; ex qa ma naj ta'w, ¿tza'n tten tu'n toktl ta'w?

³⁵Minti'tl tajb'en, mi te tx'otx', mi te t-samel tz'is, o'kx tu'n tex xo't. Alkye at t-ẍkyin, b'inx aju yol lu.