Read kumam Lucas 15 Bible Online

Lucas 15 - kumam bible

Lucas 15

¹Kykyaqil qe peyil pwaq kyuk'ix qe aj il e pon laq'e' ttxlaj Jesús tu'n kyb'inte tyol,

²atzun kye fariseo ex qe xnaq'tzal ti'j ley in che wululun ti'j Jesús, ex kyma: —Ate xjal lu in che tk'mo'n qe aj il ex in wa'n kyuk'il.

³Atzunte Jesús xi tma'n ju techal lu kye:

⁴—¿Alkye jun xinaq kyxole qa at jun syent t-ẍne'l, ex qa ma kyaj naj jun kyxol, mlaypelo che kyaj tq'o'n qeju 99 tuj kojb'il, ex kxe'l jyolte aju otoq kyaj tzpet okxi tknet tu'n?

⁵Oktzun tknet tu'n, kjawix tq'o'n twi t-semil in tzalaj ti'j;

⁶oktzun tul tja, che tzajel tchmo'n qe tamiw ex qe tvesin, ex kxel tma'n kye: Che tzalajxe wuk'ile porke ma knet ju tal nẍne'le aju otoq kyaj tzpet, chilo xjal.

⁷Kyja'tzun, kxel nma'ne kyeye: Mas che tzalajel qeju ate' tuj kya'j ti'j jun aj il qa ma tz'ajtz ti'j tanmi, kywitz qeju 99 xjal tuj kywitz qa tz'aqlxix qe ex mya il ti'j tu'n tajtz ti'j kyanmi.

⁸Ex alkye jun xu'j qa at laj saq pwaq tuk'il, ex qa ma txi naj jun saq pwaq, ¿mlaypelo tz'ok ttxaqo'n jun kandil, ex kb'ajel ttz'iso'n tuj ja, ex cheb'a kb'ajel tjyo'n tu'n tknet tu'n?

⁹Oktzun tknet pwaq tu'n, che okel tchmo'n qe tuk'il ex qe tvesin, ex kxel tma'n kye: Che tzalajxe wuk'ile porke ma knet aju saq pwaq otoq txi naj wu'ne, chilo xu'j.

¹⁰Kyja'tzun in xi nma'ne kyeye: Ax ikx at tzalajb'il kyxol qe t-anjel Dios ti'j jun aj il qa ma tz'ajtz ti'j tanmi.

¹¹Ax ikx xi tma'ntl Jesús: —At jun xjal attoq kab'e tky'ajal;

¹²atzunte tz'inb'aj xi tma'n te tman: Tat, q'ontza wetzb'ile aju at woklene ti'j. Xitzun tq'o'n mamb'aj kyetzb'il.

¹³Ex yajxi ch'intl, ok tchmo'n tz'inb'aj tkyaqilju tetzb'il ex xi' tuj juntl tnam najchaq; ex atzun b'aj tnajsa'n tkyaqilju tpwaq ti'j achb'il te twitz tx'otx'.

¹⁴Tej tb'aj tnajsa'n tkyaqilju tpwaq, tzaj jun we'yaj nimxix tuj tnam lu, ex ya minti' kanun aju in ajb'en te.

¹⁵Xi'tzun jyol taq'un ex pon tuk'il jun xjal aj tnam, ex xi lajo'n tuj kojb'il tu'n kyok tkwentin qe b'och.

¹⁶Ex o tajb'exix tu'n tnoj tk'u'j tu'n kylo' b'och, ex mi jun xjal tzaj q'onte te.

¹⁷Ex ultzun ti'j tk'u'j ex tma: Nimku majen ate' tja nmane at nimxix kywa, atzun weye tzalu ch'ix nkyime tu'n we'yaj.

¹⁸Chin ajel meltz'aje tuk'il nmane, ex kxel nma'ne te: Tat, ma chin b'inchane il twitz Dios ax ikx twitza.

¹⁹Mya b'a'n qintle tu'n tok nb'iye tk'wa'la, chin tq'o'nka ik tza'n jun tmajena, nchiye kxel nma'ne.

²⁰Kub'tzun b'e tu'n, ajtz meltz'aj tu'n tul tuk'il tman. Na'nxtoq tkanun, o ilwaj tu'n tman, tzaj q'aq'an tk'u'j tman ti'j, ex xi' qelan kanul ti'j, tzaj tchle'n, ex el ttz'ub'an twitz.

²¹Xitzun tma'n k'wa'l te tman: Tat, ma chin b'inchane il twitz Dios, ax ikx twitza; mya b'a'n qintle tu'n tok nb'iye tk'wa'la.

²²Atzunte mamb'aj xi tma'n kye tmajen: Juratx kyi'ntze aju tb'anil xb'alun ex kyq'o'nke ti'j; ex kyq'o'nke jun xmulq'ab' ti'j tal tq'ab', ex kyq'o'nke t-xajab'.

²³Kyi'ntze jun tb'anil tal wakẍ ex kyb'yonkuye tu'n qik'san ninq'ij ex tu'n qwa'n.

²⁴Porke aju nk'wa'le lu kyimnitoq, ex ma jaw anq'in, tzpetnitoq ex ma knet, chi mamb'aj. E oktzun ten ik'sal ninq'ij.

²⁵Atzunte tzikb'aj attoq tuj kojb'il, tej tul laq'e' niqayin ttxlaj ja o tb'i tq'ajq'ajel twi chnab' ex b'ixb'il.

²⁶Tzajtzun ttxko'n jun majen ex xi tqanin te ti in b'aj.

²⁷Atzunte majen tma: Ma tzul titz'ina ex ma tzaj tma'n tmana tu'n tkub' b'yet jun tal wakẍ tb'anilxix tu'nju b'a'n ma tzul.

²⁸Atzunte tzikb'aj tzaj nimxix tq'oj, ex minti' tajb'e tu'n tokx tuja. Etztzun tman ex o kub'san twitz tu'n tokx.

²⁹Atzunte tzikb'aj xi tma'n te tman: Ela'xi ab'q'i in chin ajb'ene teya ex minti' in chin ik'e tib'aj tleya, ex b'ajx tzaj tq'o'na jun tal chip weye tu'n tkub' wik'sane jun ninq'ij kyuk'il wamiwoye.

³⁰Tejtzun sul tk'wa'la lu, aju ma b'aj najsa'n tpwaqa tu'n kyuk'il qe xu'j jawni kywitz kyuk'il xinaq, ma kub' tb'yo'na jun tal wakẍ tb'anilxix, chi tzikb'aj.

³¹Atzunte mamb'aj xi tma'n te: Nk'wa'l, bay teya ax ta'ya wuk'ile, ex tkyaqilju at weye, teya.

³²Ex tuj tumelxix jlu tu'n qik'san ninq'ij ex tu'n qtzalaj; porke aju titz'ina lu kyimnitoq, ex ma jaw anq'in; tzpetnitoq, ex ma knet, chi mamb'aj.