Read kumam Lucas 16 Bible Online

Lucas 16 - kumam bible

Lucas 16

¹Ax ikx xi tma'ntl Jesús kye t-xnaq'tzb'en: —Attoq jun xinaq q'inun at jun tmayordom, ex e pon xjal q'malte te kyja': Aju tmayordoma noq in b'aj tnajsa'n tpwaqa, che chi.

²Atzunte patrón txket mayordom tu'n ex xi tma'n te: ¿Ti tten jlu in nb'i'ne ti'ja? Yek'untz taq'unb'ena, ex mlay tentla te nmayordome.

³Atzunte mayordom ok ten ximal ti'j: ¿Ti ok nb'incha'ye? Porke k'elel ti'n npatrone waq'une tu'n mi'n ntentle te tmayordom. Minti' wipune tu'n waq'nane ti'j tx'otx', ex kye chin ch'ixwiye tu'n nxi'ye mo'l.

⁴B'a'n wu'ne ti ok nb'incha'ye tu'ntzun nk'mete kyu'n xjal tuj kyja ok welq'i'ne ti'j waq'une.

⁵E tzajtzun ttxko'n teyle junjun qeju at kyk'as tuk'il tpatrón, ex xi tma'n teju tnejel: ¿Jte' tk'asa at tuk'il npatrone?

⁶Atzunte xjal tzaj tma'n: Jun syent barril aseyt nk'ase. Xitzun tma'n mayordom te: Lu u'j lu jatum tz'ib'an tk'asa; juratx qekuya ex tz'ib'an ku'xa o'kx 50.

⁷Ex xi tma'n te juntl: ¿Yajtzun teya, jte' tk'asa? Atzunte xjal tzaj tma'n: Jun syent caja triw. Xitzun tma'n mayordom te: Lu u'j lu jatum tz'ib'an tk'asa; tz'ib'an ku'xa o'kx 80, chi mayordom.

⁸Kyja'tzun xi tma'n patrón; Aju mayordom lu mya b'a'n ex list, tu'nju at tnab'l tu'n tb'inchante jlu, chi patrón. Porke qe xjal mya okslal ate' tuj tq'ijlalil ja'lo mas at kynab'l kyxolx kywitz qe okslal ate' tuj spik'un.

⁹Kyja'tzun kxel nma'ne kyeye, tz'ok tililx kyu'ne tu'n kychmet kyamiwoye tu'nju q'inumab'l at twitz tx'otx', tu'ntzun kyk'monjtze tuj najb'il te jumajx ok tkub' b'aj aju at kyeye.

¹⁰Alkye in japunxix tu'n tuj ch'in, ax ikx tuj nimxix in japun tu'n; ex alkye minti' in japunxix tu'n tuj ch'in, ax ikx tuj nim mlay japun tu'n.

¹¹Qatzun minti' xjapunxix kyu'ne ti'j ju q'inumab'l mya b'a'n, ¿alkyetzun tzul q'onte kyeye jun q'inumab'l axix tok?

¹²Ex qa minti' ma japun kyu'ne aju ma tzaj oqxenan kyeye tu'n juntl, ¿alkyetzun tzul q'onte kyeye aju kyexe?

¹³Mi jun majen jaku b'ant tajb'en te kab'e patrón; ok k'elel tik'un xjal jun patrón, atzun juntl ok tk'ujla'; ex qa o'kx ok tq'a' tib' te jun patrón, atzun te juntl minti' taj ti'j. Mlayx b'ant tu'n kyajb'ene te Dios ex te q'inumab'l.

¹⁴Ax ikx in che b'in qe fariseo ti'j ju yol lu, ex e ok ten xmayil ti'j Jesús, tu'nju atzun tokxix kyk'u'j ti'j q'inumab'l.

¹⁵Xitzun tma'n Jesús kye: —Aqeye in kyyek'un kyib'e kywitz xjal ik tza'n tz'aqlxix qeye, ex ojtzqi'n tu'n Dios aju at tuj kyanmiye; ex alkye qeju ma' kyoklen tuj kywitz xjal, ik'un qe tu'n Dios.

¹⁶Na'nxtoq tul Juan, o'kx tley Moisés at kyuk'ile ex kyyol t-sanjel Dios. Atzun ja'lo tzajni ti'j Juan, in pakb'anjtz tqanil b'a'n ti'j tkawb'il Dios, ex kykyaqil xjal in kyipuman kyib' tu'n kyokx tuj.

¹⁷Mas jurat jaku naj kya'j ex tx'otx' twitz tu'n tnaj jun tal letr te ley qa minti' ma japun.

¹⁸Qa at jun xinaq ma kub' tpa'n tib' tuk'il t-xu'jil, ex qa ma moje' tuk'il juntl xu'j, in tb'incha'n aj pajil; ex alkye jun xinaq ma moje' tuk'il ju xu'j otoq kub' tpa'n tib' tuk'il tchmil, ax ikx in tb'incha'n aj pajil.

¹⁹Attoq jun xjal q'inun nno'k t-xb'alumin tib' tu'n xb'alun tb'anilxix ex wi'yilxix, ex tkyaqil q'ij in ik'san ninq'ij ex nintz wa'n.

²⁰Ax ikx at jun xjal meb'axix, Lázaro tb'i, nim tx'a'k ti'j, ex tx'ayl twitz tx'otx' ttzi tja q'inun.

²¹Ex o tajb'e Lázaro tu'n tnoj tk'u'j tu'n tb'uchil wab'j nne'l tz'aq ttxa'n tmes q'inun; ex in che ul qe tx'yan leq'al twitz tx'a'k tok ti'j.

²²Kyimtzun te Lázaro ex xi q'i'n kyu'n anjel tu'n tpon ttxlaj Abraham. Ax ikx o kyim te q'inun ex ku'x maqu'n.

²³Ex tej tyajlanjtz q'inun tuj kynajb'il kyimni, jaw tke'yin twitz ex o til q'inun, lu Abraham najchaq ta' tuk'ix Lázaro tok ttxlaj.

²⁴Tzajtzun sch'in q'inun chi kyja': Nman Abraham, q'aq'antz tk'u'ja wi'je, samantza Lázaro ex mu'ntz twi' tal tq'ab' tu'n a' tu'n tchewix waq'e, ex nimxix in chin k'ixb'isanjtze tuj q'aq' tzalu, chi q'inun.

²⁵Xitzun tma'n Abraham te: Nk'wa'l, na'ntza, tej na'nxtoq tkyima tuj tzalajb'il o tena; atzunte Lázaro tuj b'is o ten. Atzun ja'lo in q'uqb'anjtz tk'u'j Lázaro tzalu, atzun teya in yajlanjtza ma chixin.

²⁶Ex mya o'kx jlu, ax ikx at juntl, at jun matij tqan xaq ma' t-xe' tkub' qxol; alkye taj tu'n t-xi' tzalu tu'n tpon kyuk'ile, mlay tzik'x; ex mlay tzaj jun xjal kyuk'ile tu'n tul quk'ile, chi Abraham.

²⁷Atzunte q'inun tzaj tma'n: Nman Abraham, chin kub'sale twitza tu'n t-xi t-sama'na Lázaro ma tja nmane,

²⁸porke ate' jwe' wermaniye; b'a'n tu'n tyolin Lázaro kyuk'il, tu'ntzun mi'n kyul tuj lugar tzalu te k'ixb'isab'l, chi q'inun.

²⁹Ex xi tma'n Abraham te q'inun: At tley Moisés kyuk'il tuk'ix kyu'jil t-sanjel Dios; b'a'n tu'n t-xi kyb'i'n.

³⁰Atzunte q'inun tzaj tma'n: Mlay nman Abraham; ex qa at jun kyxol kyimni ma txi' yolil kyuk'il, k'ajetz ti'j kyanmi.

³¹Atzunte Abraham xi tma'n te: Qa minti' in kub' kyb'i'n aju in tma'n tuj tley Moisés ex tuj kyu'jil t-sanjel Dios, ax ikx mlay txi kyoksla'n tyol jun xjal qa ma jaw anq'in kyxol kyimni, chi Abraham.