Read kumam Lucas 18 Bible Online

Lucas 18 - kumam bible

Lucas 18

¹Ax ikx xi tma'n Jesús jun techal kye, tma qa ilxix ti'j tu'n qna'n Dios tkyaqil q'ij ex tu'n mi'n qkub' numj.

²Ex tma Jesús: —Attoq jun jwes tuj jun tnam, minti' in xob' twitz Dios ex minti' tilwi jun xjal te.

³Ax ikx at jun meb'a xu'j tujx ju tnam lu, kukx in xi aj tuk'il jwes tu'n ttzaj b'incha'n ti'j tu'n tklet twitz aj q'oj ti'j.

⁴Atzunte jwes ela' maj minti' xi tb'i'n tyol xu'j; ex yajxitl kub' t-ximan: Maske minti' in chin xob'e twitz Dios ex minti' tilwi jun xjal tuj nwitze,

⁵ex tu'nju kukx in wulin meb'a xu'j lu wi'je, kxel nb'incha'ne ti'j, tu'ntzun mi'n tultl siksal weye, chi jwes.

⁶Xitzun tma'n Qajaw kye t-xnaq'tzb'en: —Atzun jlu o tma aju jwes mya b'a'n.

⁷¿Yajtzunlo te Dios, mlaypelo tzaj tb'i'n kyyol qeju sk'o'maj tu'n, aqeju in che kub'san twitz q'ijtl ex qonik'an? ¿Ex mlaypelo che tzaj tb'i'n naj?

⁸Kxel nma'ne kyeye: Juratlo che tzajel tb'i'n. Ex oktzun wule juntl maj, aqine sk'o'maj qine tu'n Dios tu'n ntene kyuk'il xjal, ¿atxpelo kyokslab'l xjal twitz tx'otx'?

⁹Ax ikx xi tma'n Jesús juntl techal kye junjun xjal, aqeju tuj kynab'l qa tz'aqlxix qe ex nne'l kyik'un qe txqantl. Chi Jesús kyja':

¹⁰—At kab'e xinaq e je'x na'l Dios tuj tja Dios, jun fariseo ex jun peyil pwaq.

¹¹Aju fariseo wa'l tten tej tok ten na'l Dios ex tma kyja': Dios, kxel nq'o'ne chjonte teya porke mya ik qine ik tza'n qe txqantl xjal, eleq' qe, mya b'a'n qe, aj pajil qe; ex mya ik qine ik tza'n jun peyil pwaq lu.

¹²Kab' maj in kub' nyo'ne we'yaj tuj seman, ex in xi nq'o'ne tlaji'n teya ti'j tkyaqilju in nkamb'a'ne, chi fariseo.

¹³Atzunte peyil pwaq najchaq xi we', minti' o tajb'e tu'n tjaw tke'yin twitz kya'j, o'kx ok tq'o'n tq'ab' ttzi t-xu'k, ex tma kyja': Dios, kuchiwt tu'n ttzaj q'aq'an tk'u'ja wi'je, aj il qine, chi peyil pwaq.

¹⁴Kxel nma'ne kyeye: Aju peyil pwaq lu xi' tja najsa'majtl til; atzunte fariseo minti'; ex alkye jun xjal ma jaw tniman tib', k'okel q'o'n te ch'in; ex alkye ma tz'ok tq'on tib' te ch'in, kjawil nimsa'n.

¹⁵Ex tzaj kyi'n xjal qe k'wa'l twitz Jesús tu'n kyok tmako'n; tejtzun kyke'yinte qe t-xnaq'tzb'en jlu, e mayet qe xjal kyu'n, aqeju e tzaj q'inte kye k'wa'l.

¹⁶E tzajtzun ttxko'n Jesús qe t-xnaq'tzb'en, ex tma: —Kyq'onxe amb'il kye k'wa'l tu'n kytzaj wuk'ile ex mi'n che'x kymayo'ne; porke aju tkawb'il Dios kyekye xjal aqeju nno'k kyq'on kyib' ik tza'n qe k'wa'l.

¹⁷Ax tok kxel nma'ne kyeye, alkye minti' ma tz'ok ik tza'n jun k'wa'l tu'n t-xi tniman tkawb'il Dios, mlay b'ant tu'n tokx tuj.

¹⁸At jun nejenel kye xjal xi tqanin te Jesús kyja': —Xnaq'tzal b'a'n, ¿ti ok nb'incha'ye tu'n nkamb'anteye chwinqlal te jumajx?

¹⁹Xi tma'n Jesús te: —¿Tiqu'n in chin ok tq'o'na te b'a'n? Mi a'l jun xjal b'a'n, o'kxte Dios b'a'n.

²⁰B'a'n qe mandamyent tu'na: Mi'n kyb'inchaye aj pajil; mi'n che b'iyune; mi'n che elq'ane; mi'n jaw kynik'ane yol ti'j juntl; kynimanxe kymane ex kytxu'ye, chi tuj Tu'jil.

²¹Atzunte nejenel xi tma'n: —Tkyaqil jlu o japun wu'ne ntzajlenxe matoq k'wa'lx qine.

²²Tej tb'inte Jesús jlu, xi tma'n te: —At jun atx taj teya: K'a'yinxa tkyaqilju at teya, ex q'onxa kye meb'a, kteltzun tq'inumab'la tuj kya'j; ex tzaja, lpe'ka wi'je.

²³Tej tb'inte nejenel tkyaqil jlu, tzaj nimxix tb'is, porke nimtoq tq'inumab'l at.

²⁴Ex tej tke'yinte Jesús in b'isunxix nejenel, tma: —Kyuw tu'n kyokx tuj tkawb'il Dios qeju at kyq'inumab'l.

²⁵Mas jurat jaku tz'ex jun chej camey tuj toy' jun b'aq, twitzju tu'n tokx jun q'inun tuj tkawb'il Dios.

²⁶Kymatzun qeju e b'inte: —Qa ikju, ¿alkyetzun jaku klet?

²⁷Ex tma Jesús kye: —Aju mlay b'ant kyu'n xjal, in b'ant tu'n Dios.

²⁸Xitzun tma'n Pedro te: —Tat, kina qo'ye ma kyaj qq'o'ne tkyaqilju at qeye ex ma qo ok lpe'ye ti'ja.

²⁹Ex tma Jesús kye: —Ax tok in xi nma'ne kyeye, qa at jun xjal ma kyaj tq'o'n tja, ex qa tman, ex qa ttzik ex qa titz'in, ex qa t-xu'jil, ex qa tk'wa'l, tu'n tlaj tkawb'il Dios,

³⁰ok tk'ma' nimxix t-xel tuj tq'ijlalil ja'lo, ex tuj tq'ijlalil tzul ok tk'ma' tchwinqlal te jumajx.

³¹E je'x tuk'in Jesús qeju kab'laj t-xnaq'tzb'en kyjunalx ex tma kye: —Kyb'intze, ja'lo qo jawix tuj tnam Jerusalén, ex kjapunel tkyaqilju tz'ib'amaj wi'je kyu'n t-sanjel Dios, aqine sk'o'maj qine tu'n Dios tu'n ntene kyuk'il xjal.

³²Chin xel q'o'ne tuj kyq'ab' stranjer xjal, ex chin okel xmayine kyu'n, ex chin okel yaso'ne, ex k'okel tzub'an tuj nwitze.

³³Ex nb'ajlenxi k'ixb'isa'ne, chin b'el b'yo'ne kyu'n; ex tuj toxin q'ij chin jawil anq'ine.

³⁴Atzun kye t-xnaq'tzb'en minti' el kynik' ti'j jlu, tu'nju myaxix clar ela tuj kywitz, ex minti' ex tuj kywi' aju tzaj q'ma'n kye.

³⁵Tejtzun tpon laq'e' Jesús ttxa'n tnam Jericó, at jun moẍ q'uqltoq ttzi b'e, in qanin tkotz.

³⁶Tej tb'inte moẍ nim xjal in che b'et tuj b'e, xi tqanin kye xjal ti t-xilen jlu.

³⁷Xitzun kyma'n xjal te: —Tzul Jesús aj Nazaret, che chi.

³⁸Atzunte moẍ jaw sch'in: —Jesús, Tk'wa'l David, q'aq'antz tk'u'ja wi'je, chi xjal.

³⁹Ex aqeju nejni twitz Jesús e ok ten ilil ti'j moẍ tu'n mi'n tq'ajt; atzunte moẍ mas jaw sch'in kyuwxix, ex tma: —Aya Tk'wa'l David, q'aq'antz tk'u'ja wi'je.

⁴⁰We'tzun Jesús ex xi tma'n kye xjal tu'n ttzaj q'i'n moẍ. Tejtzun tul laq'e' moẍ, xi tqanin Jesús te:

⁴¹—¿Alkye tajb'ila tu'n nb'inchanteye teya? Atzunte moẍ tma: —Tat, wajb'ile tu'n tjaqet nwitze.

⁴²Xitzun tma'n Jesús te: —Ma jaqet twitza; tu'nju ma tokslaya ma b'anixa.

⁴³Jurat jaqet twitz moẍ; ex ok lpe' ti'j Jesús ex jaw tnimsa'n tb'i Dios; ex kykyaqil xjal tej kylonte jlu, xi kyq'o'n chjonte te Dios.