Read kumam Lucas 19 Bible Online

Lucas 19 - kumam bible

Lucas 19

¹Okxtzun Jesús tuj tnam Jericó, ex o b'et tuj tnam.

²Ex at jun xjal Zaqueo tb'i, nejeneltoq kye peyil pwaq, ex q'inuntoq.

³O tajb'e Zaqueo tu'n tke'yinte alkye Jesús, ex minti' tumel tu'n tlonte tu'n tlaj nim xjal, porke ch'intoq twa'l Zaqueo.

⁴Xitzun nej kywitz xjal, jaw qelan ex jax twi' jun tze' sicómoro tu'n tke'yinte twitz Jesús; porke kyja'toq t-xi' Jesús.

⁵Tejtzun tkanun Jesús jatum ta' Zaqueo, jaw tke'yin jawni, o til, ex xi tma'n te: —Jurat tku'tza, Zaqueo, ex ax chin kyjel tene tjaya ja'lo.

⁶Jurattzun ku'tz Zaqueo ex o k'met Jesús tu'n tuj tja, in tzalaj ti'j.

⁷Tej kylonte xjal jlu, kykyaqil e jaw wululun kyxolx, ex kyma: —Ma tz'okx Jesús posadiyil tuj tja jun xjal aj il, che chi.

⁸Atzunte Zaqueo kub' we' ex xi tma'n te Qajaw: —Tat, mijku at weye kxel nq'o'ne kye meb'a; ex qa at jun ma tz'el welq'a'ne jun ti'xti te, jaku tz'aj nq'o'ne kyaje maj t-xel.

⁹Xitzun tma'n Jesús te: —Ja'lo ma tzul ju kolb'il tuj ju ja lu; ex ax tiyjil Abraham te xjal lu.

¹⁰Porke aqine, sk'o'maj qine tu'n Dios tu'n ntene kyuk'il xjal, ma chin ule jyolte ex klolte aju tzpetnitoq.

¹¹Ex in che b'intoq xjal ti'j tkyaqil jlu, xi tma'n Jesús juntl techal kye, porke ch'ixtoq tkanun tuj tnam Jerusalén, ex tuj kynab'l xjal qa tu'n tul naj tkawb'il Dios.

¹²Xitzun tma'n Jesús: —At jun xinaq ma' toklen xi' tuj jun tx'otx' najchaq k'molte toklen tu'n tok te rey ex tu'n tajtz meltz'aj.

¹³Na'nxtoq t-xi', e tzaj ttxko'n laj tmajen, ex xi tq'o'n jun pwaq ma' twitz te teyle junjun kye, ex xi tma'n: Che negosyarine ti'j pwaq lu aku in alin ch'in ok wule.

¹⁴Ex qe t-xjalil e ok ten ik'ul te, ex lepchix t-xi kysama'n jun comisyón q'malte kyja': Mi'n qaje tu'n tok jlu te rey tu'n tkawin qib'aje, che chi.

¹⁵Tejtzun tk'monte toklen, ajtz meltz'aj tuj ttanmi tu'n tok te rey. E je'xtzun txokb'aj qe majen tu'n, aqeju otoq txi q'o'n pwaq kye, tu'n tb'inte jte' otoq tkamb'a junjun.

¹⁶Ul aju tnejel ex tma: Tat, aju tpwaqa ma tkamb'a lajtl.

¹⁷Xitzun tma'n rey te majen: Ku, aya majen b'a'n; ch'in xi nq'o'ne teya ex ma tz'aq'nanxixa ti'j; kyja'tzun kxel nq'o'ne toklena tu'n tkawina kyib'aj laj tnam.

¹⁸Ul juntl ex tma: Tat, aju tpwaqa ma tkamb'a jwe'tl.

¹⁹Ax ikx xi tma'n rey te jlu: Ikx teya kkawila kyib'aj jwe' tnam.

²⁰Ul juntl ex tma: Lu tpwaqa lu, tat. B'i'x xi nk'u'ne tuj jun tal k'alb'il;

²¹ex tzaj nxob'ile twitza, aya jun xjal kyuw, in xi ttzyu'na aju minti' in kub' tq'o'na, ex in jaw tchmo'na twitz awal aju minti' in ku'x tawa'na.

²²Atzunte rey xi tma'n te: Aya majen mya b'a'n, tu'nx ju tyola kb'el tcastiwoya wu'ne. Qa b'a'n tu'na aqine jun xjal kyuwxix, in jaw ntzyu'ne aju minti' in kub' nq'o'ne, ex in jaw nchmo'ne aju minti' in ku'x wawa'ne;

²³¿tiqu'ntzun minti' okx tq'o'na npwaqe tuj banc? mawtlo nk'ame ch'in ta'l tej ẍin ule.

²⁴Xitzun tma'n rey kye qeju ate'toq: Kyi'mele pwaq te jlu, ex kyq'onxe teju at laj pwaq tuk'il.

²⁵Atzun kye xi kyma'n te rey: Tat, ex at laj pwaq tuk'il.

²⁶Xitzun tma'n rey: Kxel nma'ne kyeye: Alkyeju at ch'in te, mas kxel q'o'ntl te; atzun teju minti' te, aju ch'in at te, k'elel q'i'n.

²⁷Ax ikx qeju e q'ojin wi'je ex minti' o kyajb'e tu'n woke te rey te kawil kyib'aj, kyi'ntze qe tzalu, ex kyb'yonkuye nwitze, chi rey.

²⁸Tej tb'aj tma'n Jesús jlu kub' nej kywitz, kyja' t-xi' tuj tnam Jerusalén.

²⁹Tej ch'ixtoq tkanun kyuj qe tal tnam Betpagé tuk'ix Betania, otoq che pon t-xe' jun witz Olivos tb'i, e je'x t-sama'n Jesús kab'e t-xnaq'tzb'en,

³⁰ex xi tma'n kye: —Kyxi'ye tuj tal tnam tokx chixin; oktzun kyokxe knetel kyu'ne jun tal bur k'alo'n, aju na'nx tjax jun xjal chejil tib'aj; kypaju'mele, ex kyi'ntze.

³¹Ex qa at jun xjal ma tzaj qaninte kyeye: ¿Tiqu'n nne'l kypaju'ne? qa chi, kytzaq'wenxe te kyja': K'ajb'el te Qajaw, che chikuye.

³²E je'xtzun qe t-xnaq'tzb'en, ex knet tal bur kyu'n ik tza'n otoq tma Jesús.

³³Ex matoq nne'l kypaju'n ju tal bur, kyma qe tajwil kye: —¿Tiqu'n nne'l kypaju'ne ju tal bur?

³⁴Xitzun kyma'n kye: —K'ajb'el te Qajaw.

³⁵Tzajtzun kyi'n ju tal bur, ul kyi'n twitz Jesús; jax kyq'o'n kyxb'alun tib'aj tal bur tu'ntzun tjax qe' Jesús tib'aj.

³⁶Ex tej kyja'toq t-xi' Jesús, kub' kylik'un kyxb'alun tuj b'e.

³⁷Tejtzun kykanun ttxa'n witz Olivos tb'i tu'n kyxi' kub'l, kykyaqil t-xnaq'tzb'en e jaw tzalaj, in che sch'in wen, ex e ok ten nimsal tb'i Dios tu'nju otoq kyil tb'inchb'en Jesús nim tipumal,

³⁸in kyma'n: —Ky'iwla'n teju rey aju ma tzul, ma tzaj sama'n tu'n Qman. Atwit tzalajb'il tuj kya'j, ex nimanxwit tb'i Dios tuj kya'j.

³⁹At junjun fariseo kyxol xjal xi kyma'n te Jesús: —Xnaq'tzal, mayonxa qe t-xnaq'tzb'ena.

⁴⁰Xitzun ttzaq'we'n Jesús kye, chi kyja': —Kxel nma'ne kyeye, qa ma che q'ajen qe xjal lu, aqe ab'j che jawil sch'in.

⁴¹Tejtzun tpon laq'e' Jesús niqayin tib'aj tnam Jerusalén, xi tke'yin ju tnam ex jaw oq' ti'j,

⁴²ex tma: —Noqwit sel tnik'a ti'j ja'lo tza'n tten tu'n ttena tuj txub'txaj. Ex ja'lo ewan twitza ex mlay tz'el tnik'a ti'j.

⁴³Porke tzul jun tq'ijlalil mya b'a'n tib'aja, qe aj q'oj ti'ja kjawil kyb'u'yin tx'otx' ti'jeleya, che xel txole' soldad ti'jeleya, ex che okel tzoqpaj ti'ja tuj tkyaqil ttxlaja.

⁴⁴Kb'el xituna kyu'n, ex che b'el b'yo'n qe xjal ate' tuja, jumajx kb'el xituna tkyaqil, tu'nju minti' el tnik'a ti'j ju q'ij tej tul Dios onil teya.

⁴⁵Okxtzun Jesús tuj tja Dios, ex ok ten lajol kye xjal aqeju in che k'ayin tuj,

⁴⁶ex xi tma'n kye: —At jun yol in tma'n tuj Tu'jil, chi kyja': We nja, ja te nab'l Dios; atzun kyeye ma tz'ok kyq'o'ne te kyjul eleq'.

⁴⁷Xi tq'o'n Jesús xnaq'tzb'il tkyaqil q'ij tuj tja Dios; atzun kye nejenel kye pal kyuk'ix qe xnaq'tzal ti'j ley ex qe nejenel kye xjal ok tilil kyu'n alkye tumel tu'n tkub' b'yo'n Jesús kyu'n.

⁴⁸Ex minti' knet tumel kyu'n tza'n tten tu'n tkub' Jesús, ex kykyaqil xjal in kub' kyb'i'nxix tyol.