Read kumam Lucas 2 Bible Online

Lucas 2 - kumam bible

Lucas 2

¹Ex kyuj q'ij lu etz jun orden tu'n president Augusto tu'n tjaw kyajlal kykyaqil xjal.

²Atzun tnejel maj jaw kyajlal xjal tej in kawintoq Sirenio tuj tx'otx' Siria.

³E je'xtzun kykyaqil xjal tujx kytanmi tu'n ttz'ib'anjtz kyb'i.

⁴Kyja'tzun tzaj José tuj tnam Nazaret tuj tx'otx' Galilea, ja'wil tuj tnam Belén aju ttanmi David, tuj tx'otx' Judea, porke ate José tiyjil David.

⁵Ultzun José tu'n ttz'ib'anjtz kyb'i tuk'ix Mariy aju b'anin ti'j tu'n tmoje' tuk'il, aju otoq tz'ok ten tal.

⁶Ex axtoqtzun ate' tuj Belén tej tpon q'ij tu'n tul itz'j tal Mariy.

⁷Ex ul itz'j ju tnejel tal, ex okx tb'alq'i'n tuj tal tam, ex kub' tkoẍb'a'n tuj twab'l chej, tu'nju minti' knet kyposad tuj mesón.

⁸Niqayin ttxa'n tnam Belén ate'toq junjun pastor, ax in che kyaj ten tuj kojb'il te qonik'an tu'n kykwentin kyẍne'l.

⁹Ex jurat kub' tyek'un tib' jun t-anjel Qman kywitz, ex ju t-spik'umal Qman kub' spik'e' kyib'aj; atzun kye pastor tzaj nim kyxob'il.

¹⁰Atzunte anjel xi tma'n kye: —Mi'n che xob'e, porke kxel nma'ne b'a'n tqanil kyeye te nim tzalajb'il ex kye kykyaqil xjal.

¹¹Porke ja'lo ma tz'itz'j tuj ttanmi David jun Klol kyeye, ate Crist aju Qajaw.

¹²Ex atzun jun yek'b'il kyeye tu'n tel kynik'e ti'j; knetel tal ne' kyu'ne b'alq'i'n tuj tal tam, ex koẍl tuj twab'l chej, chi anjel kye.

¹³Ex minab'en kub' kyyek'un kyib' txqantl anjel nim kyajlal tzajni qe tuj kya'j, in kynimsa'n tb'i Dios, ex in kyma'n:

¹⁴Nimanxwit tb'i Dios tuj kya'j, ex tu'n kyten xjal twitz tx'otx' minti'tl kyb'is, aqeju in tzalaj Dios kyi'j, che chi anjel.

¹⁵Ex tej kyaj b'aj qe anjel tuj kya'j, kymatzun qe pastor kyxolx: —Qo'qe tuj Belén ke'yil te jlu ti ma b'aj aju ma tma Qman qe.

¹⁶Jurattzun e je'x, ex knet Mariy tuk'ix José kyu'n ex ju tal ne' koẍl tuj twab'l chej.

¹⁷Ex tej kyke'yinte, xi kytx'olb'a'n aju o tma anjel kye ti'j tal ne'.

¹⁸Ex kykyaqil qeju e b'inte kyyol pastor, e lab'in ti'j ju o kyma.

¹⁹Atzunte Mariy xi tk'u'n tkyaqilju yol lu tuj tanmi, ex o ximan ti'j.

²⁰Ex e ajtz meltz'aj qe pastor in kynimsa'n tb'i Dios ex in kyq'o'n chjonte te ti'j tkyaqilju o kyb'i ex o kyil, tu'nju ax tok aju otoq tma anjel kye.

²¹Ex tuj twajxaqin q'ij o sircunsidarinjtz ju ne', ex ok kyq'o'n tb'i JESÚS, axju tb'i ok ik tza'nxju otoq tma anjel te Mariy tej na'nxtoq tok ten tal.

²²Tej tjapun b'aj q'ij te saqsab'l kye ik tza'nx in tma'n tuj tley Moisés, xi kyi'n ju tal ne' tuj tnam Jerusalén tu'n t-xi kyq'o'n te Qman.

²³Xitzun kyi'n tu'n tjapun kyu'n aju tz'ib'an tuj tley Qman, in tma'n: Kykyaqil tnejel kyk'wa'le xinaq kxel kyq'o'ne tu'n tajb'en te Qman, chi tuj Tu'jil.

²⁴E je'xtzun tu'n t-xi kyq'o'n jun moj tal ẍpo'q ex qa kab'e tal paloma ik tza'nx in tma'n tuj tley Qman.

²⁵Attoq jun xinaq Simeón tb'i ax najl tuj Jerusalén. Ate xinaq lu tz'aqlxix ex nimal Dios ex in ayontoq ti'j tu'n kykolpet aj Israel. Aju Xewb'aj Xjan attoq tuk'il,

²⁶ex otoq tzaj yek'un te tu'n Xewb'aj Xjan qa mlayx kyim qa na'nxtoq tke'yinte twitz ju Crist aju attoq ttzajel t-sama'n Qman.

²⁷Xitzun q'i'n Simeón tu'n Xewb'aj Xjan, pon tuj tja Dios. Ex tej tul q'i'n tal ne' Jesús kyu'n tman tuj tja Dios tu'n tb'inchanjtz ti'j ik tza'nx in tma'n ley,

²⁸jawtzun tchle'n Simeón ju ne', xi tq'o'n chjonte te Dios, ex tma:

²⁹Ja'lotzun Nman, b'a'n tu'n nkyime tuj txub'txaj, porke ma japun ju yol tzaj tma'na weye, aqine tmajena.

³⁰Porke ma wile tu'n nwitze aju kolb'il tu'na,

³¹aju ma tb'inchaya kywitz kykyaqil xjal twitz tx'otx'.

³²Atzun jlu jun spik'un tu'n t-spik'b'anjtz kye txqantl tnam mya aj Israel qe, ex tu'n kyjaw nimsa'n aj Israel, aqeju etzan tu'na, chi Simeón.

³³Ex in lab'intoq tman ne' ex ttxu ne' ti'j tkyaqilju in tma'n Simeón ti'j ne'.

³⁴Ex e b'aj tky'iwla'n Simeón, ex xi tma'n te Mariy aju ttxu' ne': —Ate k'wa'l lu q'o'nmaj tu'n kykub' tz'aq nimku aj Israel ex tu'n kyjaw we' nimku. K'okel te jun señ, ex mlay txi kyniman tyol,

³⁵tu'ntzun tel tuj q'ancha'l tkyaqil kyximb'etz xjal at tuj kyanmi; ex atzun te teya ik k'okel jlu ik tza'n jun spad k'elex tuj tanmiya, chi Simeón.

³⁶Ax ikx axtoq ta' jun xu'j t-sanjel Dios, Ana tb'i; ate Ana tme'jel Fanuel ex tiyjil Aser. Otoq tijin te Ana, ex k'wa'lxtoq ta' tej tmoje' ex noq wuq ab'q'i ten tuk'il tchmil,

³⁷ex otoq b'ant 84 ab'q'i tkyajlen meb'a xu'j. Minti' nne'l tpa'n tib' Ana ti'j tja Dios, atzun in ajb'en te Qman qonik'an ex q'ijtl, in kub' tyo'n we'yaj ex in na'n Dios.

³⁸Ax or tej tpon Ana in tq'o'n chjonte te Dios, ex in yolin ti'j ne' kye kykyaqil qeju in che ayontoq ti'j tu'n kykolpet qe xjal tuj Jerusalén.

³⁹Ex tb'ajlenxi b'ant tkyaqil kyu'n ik tza'nx in tma'n tuj tley Qman, e aj meltz'aj, e pon tuj kytanmi Nazaret tb'i, tuj tx'otx' Galilea.

⁴⁰Ex ju ne' in ch'iytoq ex nno'ktoq tipun, ex nno'ktoq tnab'l; ex ju t-xtalb'il Dios tkub'toq tib'aj.

⁴¹Tkyaqil ab'q'i in che'xtoq qe tman Jesús tuj tnam Jerusalén tuj ninq'ij Xjan Q'ij tb'i.

⁴²Tej tjapun Jesús twi' kab'laj ab'q'i, e je'xtzun tuj Jerusalén ik tza'nx kymod tu'n kyxi' tuj ninq'ij.

⁴³Tejtzun tb'aj ninq'ij e ajtz meltz'aj, atzunju tal k'wa'l Jesús kyaj ten tuj Jerusalén, minti' che b'in tman ti'j.

⁴⁴Ximan kyu'n qa lepchix ttzaj Jesús kyxol xjal, ex e b'et junku q'ij; e oktzun ten jyolte kyxol qeju at kyxilen kyuk'il ex kyxol kyamiw;

⁴⁵ex tu'nju minti' knet kyu'n, e aj meltz'aj e pon tuj Jerusalén in che jyon ti'j.

⁴⁶Ex tb'ajlenxi ox q'ij knet kyu'n tuj tja Dios, q'uqltoq kyxol qe xnaq'tzal ti'j ley, in b'intoq kyi'j, ex in xjelintoq kye.

⁴⁷Ex kykyaqil qeju in che b'intoq ti'j tyol Jesús e lab'in ti'j ju tnab'l ex ti'j ju tzaq'web'l tu'n.

⁴⁸Tejtzun kylonte qe tman, e lab'in ti'j; xitzun tma'n ttxu' te: —Wal, ¿tiqu'n ma tb'inchaya jlu qi'je? Lu tmana ex qine in qo jyone ti'ja ex nim in qo b'isune.

⁴⁹Xitzun tma'n Jesús kye: —¿Tiqu'n in che jyone wi'je? ¿Maj minti' b'a'n kyu'ne qa ilxix ti'j tu'n ntene tuj tja Nmane?

⁵⁰Atzun kye minti' el kynik' ti'j tyol Jesús aju tzaj tma'n kye.

⁵¹Ajtzun Jesús kyuk'il, pontl tuj Nazaret, ex xi tniman qe. Atzunte ttxu' xi tk'u'n tkyaqilju yol lu tuj tanmi.

⁵²Ex nno'ktoq tnab'l Jesús ex in ch'iytoq ex b'a'n ela tmod tuj twitz Dios ex kywitz xjal.