Read kumam Lucas 20 Bible Online

Lucas 20 - kumam bible

Lucas 20

¹At jun q'ij in tq'o'ntoq Jesús xnaq'tzb'il kye xjal tuj tja Dios ex in pakb'an ti'j tqanil kolb'il, e pontzun qe nejenel kye pal kyuk'ix qe xnaq'tzal ti'j ley ex qe kytijil xjal,

²ex xi kyma'n te Jesús: —Q'mantza qeye: ¿ti toklena tu'n tb'inchanteya jlu? ¿Alkye ma tzaj q'onte toklena? Che chi.

³Xitzun ttzaq'we'n Jesús: —Ikx weye at jun nxjele kyeye; b'a'n tu'n ttzaj kytzaq'we'ne:

⁴¿Alkye tzaj q'onte toklen Juan tu'n kyb'yan xjal tu'n tuj a'? ¿Tu'npe Dios, ex qa kyu'n xjal? Chi Jesús kye.

⁵Atzun kye e ok ten yolil ti'j kyxolx: —Qa ma txi qma'n: Tu'n Dios tzaj q'o'n toklen Juan, ¿tiqu'ntzun minti' xi kyoksla'ne? Chilo qe.

⁶Ex qa ma txi qma'n: Kyu'n xjal tzaj q'o'n toklen Juan, jakulo qo kub' kyb'yo'n xjal tu'n ab'j, porke oksla'nxix kyu'n xjal qa t-sanjel Dios te Juan.

⁷Tzajtzun kytzaq'we'n: —Minti' b'a'n qu'ne alkye tzaj q'onte toklen Juan tu'n kyb'yan xjal tu'n.

⁸Atzunte Jesús xi tma'n kye: —Ikx weye mlay txi nma'ne kyeye alkye ma tzaj q'onte woklene tu'n nb'inchanteye tkyaqil jlu.

⁹Oktzun ten Jesús q'malte jun techal lu kye xjal: —At jun xjal ku'x tawa'n txqan uva tuj ttx'otx' ex xi tq'o'n xjal tx'otx' te kymajen xjal, xi'tzun tuj juntl lugar, ex o ten nim q'ij.

¹⁰Tejtzun tpon tq'ijlalil tu'n tkub' twitz awal, tzaj t-sama'n xjal jun majen kyuk'il majenal tx'otx', tu'n t-xi kyq'o'n ch'in twitz awal te; atzun kye majenal tx'otx' b'aj kyk'ixb'isa'n ex aj kysama'n minti' ch'in q'i'n tu'n.

¹¹Ex tzaj t-sama'n tajwil tx'otx' juntl majen; atzun kye majenal tx'otx' b'aj kyyaso'n, b'aj kyk'ixb'isa'n ex aj kysama'n minti' ch'in q'i'n tu'n.

¹²Ex tzaj t-sama'n tajwil tx'otx' juntl majen; atzun kye majenal tx'otx' b'aj kyk'ixb'isa'n ex ex kylajo'n ti'jxi.

¹³Atzunte tajwil tqan awal tma: ¿Ti ok nb'incha'ye? Mas b'a'n kxel nsama'ne nk'wa'le aju k'ujla'nxix wu'ne; qapelo at ch'in tchi tuj kywitz ok tpon, chi patrón.

¹⁴Atzun kye majenal tx'otx' tej kylonte kyja ttzaj tk'wa'l patrón, e ok ten yolil ti'j kyxolx: Atzunte etzal jlu; chux qeye, qb'yonku tu'ntzun tkyaj ten tetzb'il te qe, che chi.

¹⁵Extzun kyi'n ti'jxi tqan awal, ex kub' kyb'yo'n. —¿Titzun ok tb'incha' aju tajwil tqan awal kyi'j?

¹⁶Ktzajeltzun ex che b'el tb'yo'n qe majenal tx'otx', ex kxel tq'o'n ttx'otx' te kymajen txqantl xjal, chi Jesús xi tma'n kye. Tejtzun kyb'inte fariseo jlu, kyma: —Kuchiwt mi'n japun jlu.

¹⁷Atzunte Jesús e je'x tke'yin, ex xi tma'n kye: —¿Titzun t-xilen aju yol tz'ib'an tuj Tu'jil? Jatum in tma'n: Aju ab'j el kyik'un qe b'inchal ja, atzunju ma tz'ok te skyini te simyent.

¹⁸Alkye jun xjal ma jaw tolj ex ma kub' tz'aq tib'aj ab'j lu, b'i'x kb'ajel toqj; ex alkye jun xjal ma kub' tz'aq ab'j lu tib'aj, b'i'x kb'ajel b'uchj xjal tu'n, chi Jesús kye.

¹⁹Atzun kye nejenel kye pal kyxol xjal judiy kyuk'ix qe xnaq'tzal ti'j ley o kyajb'e b'i'x tu'n ttzyet Jesús kyu'n, tu'nju kanun tuj kynab'l qa kyib'aj otoq kub' tz'aq ju techal lu aju tma Jesús; ex tzaj kyxob'il kywitz xjal.

²⁰Tu'n jlu e kub' ten xq'uqil te Jesús, ex e je'x kysama'n kab'e xjal b'il tyol, ok kyq'on kyib' mejor xjal qe ex mya ax tok kyu'n, o kyajb'e tu'n tkub' tz'aq Jesús kyu'n tujx jun tyol, tu'ntzun t-xi kyi'n ex tu'n t-xi kyq'o'n tuj tkwent gobernador.

²¹Atzun kye xi kyqanin te Jesús: —Xnaq'tzal, b'a'n qu'ne in yolina tuj tumelxix ex in tq'o'na xnaq'tzb'il b'a'n, ex minti' nno'k tke'yina aju t-xilen xjal, noq o'kx in tq'o'na xnaq'tzb'il tza'n tten tu'n qb'ete tuj ju b'e in tzaj tyek'un Dios.

²²Q'mantza: ¿b'a'npe tu'n t-xi qq'o'ne chojenj in tqanin gobierni te Roma, ex qa mi'n? Che chi.

²³Eltzun tnik' Jesús ti'j kyximb'etz mya b'a'n, ex xi tma'n kye: —[¿Tiqu'n in che jyone tumel wi'je?]

²⁴Kyyek'untze jun pwaq weye. ¿Al e tilb'ilal tok twitz, ex al e b'iyb'aj tz'ib'an twitz? —Te gobierni, che chi.

²⁵Xitzun tma'n Jesús kye: — Kyq'onxe te gobierni aju te gobierni, ex kyq'onxe te Dios aju te Dios.

²⁶Ex minti' kub' tz'aq Jesús kyu'n tujx jun tyol kywitz xjal; o'kx e lab'in ti'j ju tzaq'web'l tu'n Jesús, ex minti'tl e q'ajt.

²⁷E pontzun junjun xjal saduceo tuk'il Jesús, aqeju in kyma'n qa mlay jatz anq'in jun xjal kyxol kyimni, ex xi kyqanin te:

²⁸—Xnaq'tzal, che chi, at jun yol kyaj ttz'ib'an Moisés qe: Qa at jun xjal ma kyim at t-xu'jil ex minti' jun tk'wa'l otoq tzaj, ax ju titz'in kmojeb'el tuk'il t-xu'jil qtzan ttzik, tu'ntzun tkyaj jun t-xel qtzan ttzik tu'n, tu'n mi'n tnaj tiyjil.

²⁹At wuq xjal e ten kyitz'in kyib'; aju tnejel knet t-xu'jil, ex o kyim minti' jun tk'wa'l kyaj.

³⁰Ax ju xu'j jaw ti'n tz'inb'aj te t-xu'jil, ax ikx o kyim, minti' jun tk'wa'l kyaj.

³¹Ex ax ju xu'j jaw ti'n tkab'in tz'inb'aj te t-xu'jil, ex elpun b'aj kywitz wuq xinaq tu'nju xu'j, ex e kyim kykyaqil, minti' jun kyk'wa'l kyaj.

³²Ex te mankb'ilxi kyim te xu'j.

³³Oktzun kyjaw anq'in qe kyimni, ¿alkyetzun jun kyxol kywuqil k'okel te tchmil ju xu'j lu? Porke kywuqil e xu'jlan te, che chi saduceo.

³⁴Xitzun ttzaq'we'n Jesús kye: —Qe xjal ate' tuj tq'ijlalil ja'lo, qe xinaq in knet kyxu'jil, ikx kye xu'j in knet kychmil.

³⁵Atzun kye xjal ma tzaj tq'o'n Dios kyoklen tu'n kyjaw anq'in kyxol kyimni ex tu'n kyten tuj juntl anq'ib'l, mi'n che moje'tl xinaq tuk'il xu'j ex qe xu'j tuk'il xinaq.

³⁶Ex mlay che kyim juntl maj, porke ik che okel ik tza'n qe anjel, ex tk'wa'l Dios qe, tu'nju otoq che jaw anq'in kyxol kyimni.

³⁷Ex ti'j tu'n kyjatz anq'in qe kyimni, ax Moisés kyaj q'onte jun xnaq'tzb'il tz'ib'an tuj Tu'jil jatum in tma'n ti'j ch'i'x in k'ant tu'n q'aq' tej tyolin ti'j Dios kyja': Ate Qman, Tdios Abraham, Tdios Isaac ex Tdios Jacob.

³⁸Ex ate Dios mya Kydios kyimni; noq o'kx Kydios itz', ex kykyaqil itz' qe twitz Dios.

³⁹Xitzun kytzaq'we'n junjun xnaq'tzal ti'j ley: —B'a'n ma tmaya, Xnaq'tzal.

⁴⁰Ex minti' ok kynimarin kyib' tu'n t-xi kyqanin mastl xjel te.

⁴¹Xitzun tma'n Jesús kye: —¿Tza'ntzun tten in kyma'n xjal qa tiyjil David ju Crist aju at toklen tu'n Dios?

⁴²Tu'nju axte David in q'mante tuj u'j Salmo; chi kyja': Xi tma'n Qman te Wajawe: Qe'kuya tuj nb'anq'ab'e,

⁴³akutzun in kub' kyi'j qe aj q'oj ti'ja wu'ne, chi tuj Tu'jil.

⁴⁴Qa in tma'n David qa a Crist Tajaw, ¿tza'ntzun tten tu'n tok Crist te tiyjil David? Chi Jesús kye.

⁴⁵Kykyaqil xjal in che b'intoq ti'j tyol Jesús tej t-xi tma'n kye t-xnaq'tzb'en kyja':

⁴⁶—Ten kykwente kyi'je kye xnaq'tzal ti'j ley; nim kygan ti'j tu'n kyb'et tok kyxb'alun ẍjo'w, ex kyajb'il tu'n kyok q'olb'e'n tuj plas, ex kyajb'il tu'n kykub' qe' kyuj kynejel q'uqb'il kyuj ja te k'ulb'il, ex kyajb'il tu'n kykub' qe' kyuj tb'anil q'uqb'il tuj nintz wa'n.

⁴⁷Nne'l kyi'n kyja meb'a xu'j, ex in che na'n Dios ma' tuj, tu'ntzun mi'n tel kynik' xjal ti'j kyb'inchb'en mya b'a'n; mas nim kycastiw jlu kb'el, chi Jesús kye.