Read kumam Lucas 22 Bible Online

Lucas 22 - kumam bible

Lucas 22

¹Ch'ixtoq Xjan Q'ij, atzun q'ij tu'n kywa'n xjal pan minti' t-samel tuj tu'n tjaw mal tk'u'j.

²Atzun kye nejenel kye pal kyxol xjal judiy kyuk'ix qe xnaq'tzal ti'j ley in che jyontoq tumel tza'n tten tu'n tkub' b'yet Jesús; ex in che xob'toq kywitz xjal.

³Okxtzun Satanás tuj tanmi Judas Iscariote, jun kyxol qeju kab'laj t-xnaq'tzb'en Jesús.

⁴Ex xi' Judas yolil kyuk'il nejenel kye pal kyxol xjal judiy ex kyuk'il qe nejenel kye polisiy tuj tja Dios, tza'n tten tu'n t-xi q'o'n Jesús tuj kyq'ab' tu'n.

⁵Atzun kye e jaw tzalaj, ex b'ant ti'j kyu'n kyxolx tu'n t-xi kyq'o'n pwaq te Judas.

⁶Ex xi ttziyan Judas kye, ex ok ten jyolte tumel tza'n tten tu'n t-xi q'o'n Jesús tu'n tuj kyq'ab' pal, minti' che b'in xjal ti'j.

⁷Ex o kanun aju ninq'ij tu'n kywa'n xjal pan minti' t-samel tuj tu'n tjaw mal tk'u'j, atzun q'ij lu ilxix ti'j tu'n tkub' b'yet ju tal ẍne'l tu'n tik'set Xjan Q'ij.

⁸Xitzun sama'n Pedro tuk'ix Juan tu'n Jesús, ex xi tma'n kye: —Kyxi'ye, kyb'inchame wab'j te Xjan Q'ij tu'ntzun qwa'n ti'j.

⁹Atzun kye xi kyqanin te: —¿Jatumtzun tajb'ila tu'n tb'aj qb'incha'ne?

¹⁰Xi tma'n Jesús kye: —Ok kyokxe tuj tnam, k'okel kyk'ulb'an kyib'e tuk'il jun xinaq q'i'n jun ẍoq' a' tu'n; che lpexe ti'j tu'n kypone tuj ja jatum k'okex,

¹¹ex kymanxe te tajaw ja: Chi xnaq'tzal in tma'n teya kyja': ¿Alkye jun kol ja jatum tu'n nwa'ne kyuk'il nxnaq'tzb'ene tu'n tik'set Xjan Q'ij?

¹²Ktzajeltzun tyek'un jun tkab' kolin ja ma'xix, b'animaj tten; atzun kyb'inchame wab'j.

¹³E je'xtzun ex knet tkyaqil kyu'n ik tza'n xi tma'n Jesús kye; ex b'aj kyb'incha'n wab'j tu'n tik'set Xjan Q'ij.

¹⁴Tej tpon or, kub' qe' Jesús ti'j mes kyuk'ix qe apostol.

¹⁵Xitzun tma'n Jesús kye: —Wajb'ilxixe tu'n nwa'ne kyuk'ile tu'n tik'set Xjan Q'ij na'nxtoq nkyime.

¹⁶Ex kxel nma'ne kyeye, mlay chin wa'ntle juntl maj ti'j wab'j lu, maxitzun chin wa'le juntl maj junx kyuk'ile tuj tq'ijlalil ok tul tkawb'il Dios.

¹⁷Ex jaw ttzyu'n ju vas, xi tq'o'n chjonte te Dios ex tma: —Kytzyunxe jlu, ex kysipanxe kyxolxe;

¹⁸ex kxel nma'ne kyeye, mlay txi nk'a'ntle juntl maj ta'l twitz uva lu, maxitzun kxel nk'a'ne juntl maj ok tjapun tq'ijlalil ok tul tkawb'il Dios.

¹⁹Ex jaw ttzyu'n ju pan, xi tq'o'n chjonte te Dios, kub' tpiẍk'u'n, xi tq'o'n kye, ex tma: —Atzun nximlale jlu kjawil q'o'n twitz crus tu'n tten kolb'il kyeye; kyb'inchame jlu te nab'l weye.

²⁰Ax ikx jaw ttzyu'n Jesús ju vas tb'ajlenxi wa'n, ex tma: —Aju tku'x tuj vas lu, atzun ak'aj yol ma kyaj b'ant ti'j tu'n Dios kyuk'ile, ex aju nchk'ele k'elel chitj te kolb'il kyeye, atzunju k'okel te kyuwsab'l teju yol lu.

²¹Ex aju xjal kxel q'onte weye tuj kyq'ab' xjal, lu at wuk'ile ti'j mes.

²²Ax tok chin xel q'o'ne tuj kyq'ab' xjal ik tza'nx b'animaj ti'j, aqine sk'o'maj qine tu'n Dios tu'n ntene kyuk'il xjal; ex b'ek'b'il twitz aju xjal kxel q'onte weye tuj kyq'ab' xjal.

²³Atzun kye t-xnaq'tzb'en e ok ten qanilte kyxolx alkye jun kxel q'onte Jesús tuj kyq'ab' xjal.

²⁴Ex jaw jun yol kyxol xnaq'tzb'en ti'j alkye jun tu'n tten mas toklen kyxol.

²⁵Atzunte Jesús xi tma'n kye: —Qe rey kye nasyon kyuw in che kawin kyib'aj xjal; ex qe nejenel ate' kyuj nno'k q'o'n kyb'i mejor xjal qe.

²⁶Atzun kyeye mlay che oke ikju; aju mas at toklen kyxole, q'o'nk tib' ik tza'n k'wa'lx ta'; ex aju nejenel kyxole, q'o'nk tib' ik tza'n jun ajb'el.

²⁷Ex ¿alkye mas at toklen, apeju in kub' qe' ti'j mes tu'n twa'n, ex qa aju tok te ajb'el? ¿Myapelo aju in kub' qe' ti'j mes? Ex aqine atine kyxole ik tza'n jun ajb'el.

²⁸Atzun kyeye kukx ma che tene wuk'ile tuj yajb'il weye.

²⁹Kyja'tzun, kxel nq'o'ne kyoklene tu'n kykawine, ik tza'n weye ma tzaj q'o'n woklene tu'n Nmane tu'n nkawine,

³⁰che wa'le ex che k'ale twi' nmese tuj nkawb'ile, ex che b'el qe'ye tuj q'uqb'il tu'n kykawine kyib'aj kab'laj k'loj kyiyjil aj Israel.

³¹Ax ikx tma Qajaw: —Simón, Simón, lu ma che qaninjtze tu'n Satanás tu'n kyoke tuj sarand ik tza'n triw;

³²ex ma chin kub'sane twitz Dios ti'ja tu'n mi'n tkub' numja tuj tokslab'la; oktzun tjaw twab'an tib'a juntl maj, kyuwsama qe termaniya.

³³Xi tma'n Simón te: —Tat, lu qine lu tu'n nxi'ye tuk'ila qa tuj pres ex qa tu'n nkyime junx tuk'ila.

³⁴Xi tma'n Jesús te: —Kxel nma'ne teya Pedro, na'nxtoq ttzaj oq' tzek' ja'lo, kb'el tewana ox maj qa minti' ojtzqi'n qine tu'na.

³⁵Ex xi tqanin Jesús kye t-xnaq'tzb'en: —Tej kyxi nsama'ne minti' kych'u'ẍe, ex minti' kypaye, ex minti' kyxajb'iye, ¿atpe jun minti' o kanun kyeye? Atzun kye xi kytzaq'we'n: —Tkyaqil o kanun, che chi.

³⁶Xitzun tma'n Jesús kye: —Ja'lotzun alkye at tch'u'ẍ, b'a'n tu'n t-xi ti'n tuk'ix tpa; ex alkye minti' t-spad, k'ayinx tchikyet ex laq'ontz jun t-spad.

³⁷Ex kxel nma'ne kyeye, ilxix ti'j tu'n tjapun wi'je aju tz'ib'amaj tuj Tu'jil, in tma'n kyja': Kyxol qe mya b'a'n ok te tajlal, chi tuj Tu'jil. Ex tkyaqilju tz'ib'amaj wi'je il ti'j tu'n tjapun.

³⁸Atzun kye kyma: —Tat, at kab'e spad lu. Ex tma Jesús kye: —Akux jlu.

³⁹Etztzun Jesús, ex xi' twi witz Olivos ik tza'nx tmod; ax ikx qe t-xnaq'tzb'en e je'x lpe' ti'j.

⁴⁰Tejtzun tkanun ma chixin, xi tma'n kye: —Che na'ne Dios tu'n mi'n kyoke tuj joyb'il kyi'je.

⁴¹Ex el laq'e' Jesús kytxlaj b'alo te kab' ox ech; ex kub' ẍmeje', ok ten na'l Dios,

⁴²ex tma: —Tat, qa tajb'ila chin tkloma tu'n mi'n tik'x ju k'ixk'oj lu wu'ne; ex kuchiwt mi'n b'ant aju weye wajb'il, o'kx aju teya tajb'ila, chi Jesús.

⁴³[Kub'tzun tyek'un tib' jun anjel tzajni tuj kya'j ul q'olte tipun.

⁴⁴Ex tej toktoq Jesús tuj k'ixk'oj, mas o na'n Dios tu'n tkyaqil tipun; ex tzaj a' ti'j ik ke'yin ik tza'n nmaq txutpin chik' e kub' tz'aq twitz tx'otx'.]

⁴⁵Jawtzun we' tb'ajlenxi na'n Dios, ul kyuk'il qe t-xnaq'tzb'en, ex e knet tu'n in che tan tu'n tlaj kyb'is.

⁴⁶Xitzun tma'n kye: —¿Tiqu'n in che tane? Che we'ktze, ex che na'ne Dios tu'ntzun mi'n kyoke tuj joyb'il kyi'je, chi Jesús.

⁴⁷Kukxtoq tyolin Jesús tej kypon nim xjal; nejni Judas kywitz, jun kyxol qeju kab'laj xnaq'tzb'en; ex pon laq'e' ttxlaj Jesús tu'n tel ttz'ub'an twitz.

⁴⁸Xitzun tma'n Jesús te: —Judas, ¿maj noq tu'nju nne'l ttz'ub'ana nwitze in chinx tq'o'na tuj kyq'ab' xjal, aqine sk'o'maj qine tu'n Dios tu'n ntene kyuk'il xjal?

⁴⁹Ex atzun qeju ate'toq tuk'il Jesús tej kylonte kyja'toq ttzyet, xi kyma'n te: —Tat, ¿okpe che okel qtx'emine qe jlu tu'n spad?

⁵⁰Ex at jun kyxol ok ttx'emin jun tmajen ju nejenel kye pal, ex b'i'x el t-ẍkyin tuj tb'anq'ab'.

⁵¹Tmatzun Jesús kye: —Kukx ttenju. Oktzun tmako'n Jesús t-ẍkyin majen, ex b'anix tu'n.

⁵²Ex xi tma'n Jesús te nejenel kye pal kyxol judiy ex kye nejenel kye polisiy tuj tja Dios ex kye kytijil xjal aqeju otoq che ul tzyul te: —¿Maj ma che tzaje tzyul weye q'i'n spad kyu'ne tuk'ix tze', mer ik tza'n eleq' qine tuj kywitze?

⁵³Tej atintoqe kyuk'ile tkyaqil q'ij tuj tja Dios, minti' in tzaj kytzyu'ne; ex atzun or jlu tu'n kyb'inchanteye kyajb'ile, ex atzun or tu'n tkawin tipumal qlolj.

⁵⁴Tzyettzun Jesús kyu'n, xi kyi'n tja nejenel kye pal kyxol judiy. Atzunte Pedro najchaq xi lpe'.

⁵⁵Ex kub' kyq'o'n q'aq' tmijil ttxa'n pe'n, ex e kub' qe' ti'j q'aq'; ax ikx te Pedro kub' qe' kyxol.

⁵⁶Oktzun tke'yin jun txin criad q'uqltoq Pedro ti'j q'aq', ax ok b'aj twitz ti'j, ex tma: —Ax ajun te jlu o ten tuk'il Jesús.

⁵⁷Ex kub' tewan Pedro ex tma: —Txin, minti' ojtzqi'n twitz xjal lu wu'ne.

⁵⁸Matoq ch'in tuj, o ilwaj Pedro tu'n juntl xjal, ex tma: —Ax ajun teya kyxol qe jlu. Xi ttzaq'we'n Pedro: —Xinaq, mya ajun we qin.

⁵⁹Ex tb'ajlenxi jun or tkyuwsa juntl ex tma: —Ax tok, ikx te jlu o ten tuk'il Jesús porke aj Galilea.

⁶⁰Xitzun tma'n Pedro te: —Xinaq, minti' b'a'n wu'ne aju in tma'na. Ex tzaj oq' naj tzek' matoq in yolin Pedro.

⁶¹Ajtztzun meltz'aj twitz Qajaw, ex tzaj tke'yin twitz Pedro; ex ul ti'j tk'u'j Pedro ti'j ju tyol Qajaw otoq txi tma'n te: Na'nxtoq ttzaj oq' tzek' ja'lo, kb'el tewana ox maj qa minti' ojtzqi'n qine tu'na.

⁶²Etztzun laq'e' Pedro ti'jtze, ex jaw oq'xix wen.

⁶³Atzun kye xinaq tzyu'ntoq Jesús kyu'n, in che xmayintoq ti'j ex ok kyb'ju'n.

⁶⁴Ok kymaqsi'n twitz, [ex ok kytz'ajan twitz,] ex xi kyqanin te: —Q'mantza, ¿alkye ma tz'ok b'jun teya? Che chi.

⁶⁵Ex in kyma'n nimku yol te xmayb'il te.

⁶⁶Ex tej qsqix, b'aj kychmon kyib' qe kytijil xjal judiy kyuk'ix qe nejenel kye pal kyxol xjal judiy ex qe xnaq'tzal ti'j ley, tzaj kyi'n Jesús kywitz Aj Sanjelal kye xjal judiy, ex xi kyqanin te:

⁶⁷—Q'mantza qeye, ¿apeya ju Crist aju at toklen tu'n Dios? Che chi. Xi ttzaq'we'n Jesús kye: —Qa ma txi nma'ne kyeye, mlay txi kyoksla'ne.

⁶⁸Ax ikx qa ma txi nqanine kyeye, mlay tzaj kytzaq'we'ne, [ex mlay chin tzaj kytzoqpi'ne.]

⁶⁹Ex texju ja'lo, chin b'el qe'ye tuj b'anq'ab'aj ttxlaj Dios nim tipumal, aqine sk'o'maj qine tu'n Dios tu'n ntene kyuk'il xjal.

⁷⁰Xitzun kyqanin kykyaqil te: —¿Apetzun aya tk'wa'l Dios? Xi tma'n Jesús kye: —Aqine, ik tza'n ma kymaye.

⁷¹Atzun kye kyma: —¿Ti til txqantl testiw qe? Ax qo' ma qo b'inte tyol.