Read kumam Lucas 23 Bible Online

Lucas 23 - kumam bible

Lucas 23

¹E jawtzun we' kykyaqil, xi kyi'n Jesús twitz Pilato.

²Ex e ok ten si'mil yol ti'j, ex kyma: —Aju xjal lu ma knet qu'ne in xitun kynab'l qxjalile. In tma'n tu'n mi'n qchojone te gobierni, ax ikx in tma'n qa ate ju Crist aju at toklen tu'n Dios, ex in tma'n qa axte rey.

³Xitzun tqanin Pilato te Jesús: —¿Apetzuna rey kye xjal judiy? Xi ttzaq'we'n Jesús: —Aqine, ik tza'n ma tmaya.

⁴Xitzun tma'n Pilato kye nejenel kye pal kyxol judiy ex kye xjal: —Ma tz'el nnik'e ti'j minti' jun til xjal lu.

⁵Atzun kye kykyuwsaxix kyib' ex kyma: —Ate jlu in b'aj ttxalpu'n kynab'l xjal, ex in tq'o'n xnaq'tzb'il kye kykyaqil xjal tuj tx'otx' Judea, tzaj xe't tu'n tuj tx'otx' Galilea ax ikx ma tzul tzalu.

⁶Tejtzun tb'inte Pilato jlu, xi tqanin kye qa aj Galilea te Jesús.

⁷Tejtzun tb'inte Pilato qa aj Galilea te Jesús, xi t-sama'n tuk'il Herodes, porke ate Herodes toktoq te gobernador tuj Galilea ex otoq tzul tuj Jerusalén tuj q'ij lu.

⁸Tej tke'yinte Herodes twitz Jesús, nimxix o tzalaj; tu'nju otoq tz'el q'ij o tajb'e tu'n tke'yinte; tu'nju otoq tb'i nimku tqanil ti'j Jesús, ex o tajb'e tu'n tke'yinte jun señ in tb'incha'n.

⁹Ex xi t-xjelin Herodes nimku te, ex minti' jun xi ttzaq'we'n Jesús.

¹⁰Ex e pon qe nejenel kye pal kyxol xjal judiy kyuk'ix qe xnaq'tzal ti'j ley, in che si'min yol ti'j kyuwxix.

¹¹Atzunte Herodes kyuk'ix qe t-soldad el kyik'un, ex e ok ten xmayil ti'j, ok kyq'o'n jun t-xb'alun tb'anilxix; ex ajtz t-sama'n Herodes juntl maj Jesús tuk'il Pilato.

¹²Ex ok kyamiwin kyib' Pilato tuk'il Herodes tujx ju q'ij lu; atzun nej kyajq'ojtoq kyib'.

¹³E b'ajtzun tchmo'n Pilato qe nejenel kye pal kyxol xjal judiy kyuk'ix qe aj sanjelal kyuk'ix qe xjal,

¹⁴ex xi tma'n kye: —Ma tzul kyi'ne aju xinaq lu nwitze, in kyma'ne qa noq in xitun kynab'l xjal; ex tej sok tuj xjel wu'ne kywitze, minti' ma knet jun til xjal lu wu'ne ti'j tkyaqilju in kyma'ne ti'j.

¹⁵Ax ikx te Herodes minti' ma knet jun til xjal lu tu'n, porke ma tz'ajtz t-sama'n juntl maj quk'il. Matzun kyile minti' jun mya b'a'n ma tb'incha xinaq lu tu'n tkyim.

¹⁶Kb'ajel asyalit ex te tib'ajxi kxel ntzoqpi'ne, chi Pilato xi tma'n kye.

¹⁷[Ex tkub'toq jun ley kyu'n tu'n tetz ttzoqpi'n Pilato jun pres tuj teyle junjun Xjan Q'ij.]

¹⁸Ex kykyaqil xjal e jaw sch'in junx ex kyma: —Aju xjal lu b'a'n tu'n tkyim, atzun te Barrabás tzoqpi'mexa, che chi.

¹⁹Ate Barrabás presintoq kyu'n tu'n tlaj ok ten q'ojlel ti'j gobierni tuj tnam, ex tu'nju otoq kub' jun xjal tu'n.

²⁰Ex o yolin Pilato juntl maj kyuk'il, porke o tajb'e tu'n t-xi tzoqpi'n Jesús tu'n.

²¹Atzun kye xjal mas e jaw sch'in juntl maj: —E tjaw twitz crus. E tjaw twitz crus, che chi.

²²Xitzun tma'n Pilato toxmaji'n kye: —¿Tiqu'n? ¿Alkyetzun mya b'a'n ma tb'incha xjal lu? Minti' jun til ma knet wu'ne tu'n tkyim; kyja'tzun, kb'ajel asyalin, ex jurat kxel ntzoqpi'ne, chi Pilato.

²³Atzun kye kukx e jaw sch'in wen, xi kyqanin tu'n tjaw q'o'n Jesús twitz crus. Kub'tzun ti'j tnab'l Pilato kyu'n xjal [ex kyu'n qe nejenel kye pal kyxol xjal judiy,] tu'nju in jaw tq'ajq'ajel kywi' nimxix.

²⁴Xitzun tma'n Pilato tu'n tb'ant aju in kyqanin;

²⁵kyja'tzun tten etz tzoqpi'n Barrabás tu'n Pilato, aju xi kyqanin tu'n tetz tzoqpi'n, porke tokx Barrabás tuj pres tu'n tlaj o q'ojin ti'j gobierni ex tu'n tlaj jun xjal kub' tu'n; xitzun q'o'n Jesús tuj kyq'ab' xjal tu'n Pilato tu'n kyb'inchante ti'j noq alkye kyajb'il.

²⁶Xitzun q'i'n Jesús kyu'n, ex tzaj kytzyu'n jun xjal aj Sirene, Simón tb'i, tzajni tuj kojb'il, ex xi kyq'o'n crus te tu'n t-xi tiqan ex lepchix tu'n t-xi' ti'j Jesús.

²⁷Ex nim xjal e je'x lpe' ti'j Jesús, kyuk'ix nimku xu'j in che oq' ti'j ex in che wu'yin.

²⁸Ajtztzun tke'yin Jesús kywitz ex xi tma'n kye: —Aqeye xu'j aj Jerusalén, mi'n che oq'e wi'je, o'kx che oq'e kyi'jxe ex kyi'j qe kyale.

²⁹Porke tzul q'ij ok kyma' xjal: Mas b'a'n kye xu'j mib'an che alin, ex mas b'a'n kye xu'j minti' tzaj kyal ex minti' o ch'u'n kyal kyi'j.

³⁰Oktzun kxel kyma'n xjal kye witz: Kytzaj tz'aqe qib'aje; ex kxel kyma'n kye tal witz: Qo kyewan kub'e, che chilo.

³¹Ex qa in kyb'incha'n jlu tuj tq'ijlalil cha'x tze', ¿yajtzun tuj tq'ijlalil tzqij tze', titzun kb'ajel? Chi Jesús.

³²Ax ikx xi kyi'n kab'etl xjal b'inchal mya b'a'n qe tu'n kykub' b'yo'n junx tuk'il Jesús.

³³Tejtzun kykanun tuj lugar Tb'aqil Wib'aj tb'i, atzun jaw q'o'n Jesús twitz crus, ex kyuk'ix qeju xjal b'inchal mya b'a'n e jaw q'o'n twitz crus, jun tuj tb'anq'ab' Jesús, ex juntl tuj tnayaj.

³⁴Tejtzun tjaw q'o'n Jesús twitz crus o na'n Dios ex tma: —Tat, najsama kyil xjal lu, porke minti' nne'l kynik' ti'j ju in kyb'incha'n. Ex jaw kyi'n soldad swert ti'j t-xb'alun Jesús alkye tu'n t-xi ti'n junjun, ex b'aj kysipan kyxolx.

³⁵Ex qe xjal in che ke'yintoq, kyuk'ix qe aj sanjelal, in che xmayintoq ti'j ex in kyma'n: —Qe txqantl xjal e klet tu'n; klomtzun tib' ja'lo qa ax tok ate ju Crist aju sk'o'maj tu'n Dios.

³⁶Ax ikx qe soldad in che xmayintoq ti'j, e je'x laq'e' ttxlaj ex ok kyo'yin vinagre te,

³⁷ex xi kyma'n te: —Qa aya rey kye xjal judiy, klom tib'a.

³⁸Ax at jun yol tz'ib'an [tuj yol griego ex tuj latín ex tuj hebreo,] jax kyq'o'n twitz crus, in tma'n: Ate jlu Rey kye xjal judiy.

³⁹Ex at jun b'inchal mya b'a'n, aju yob'intoq twitz crus, ok ten xmayil ti'j Jesús chi kyja': —Qa aya ju Crist aju at toklen tu'n Dios, klom tib'a, ax ikx qeye qo tkloma, chi xjal.

⁴⁰Atzunte juntl xjal ok tilin tuk'il, ex xi tma'n te: —¿Maj minti' in xob'a twitz Dios, ex ax tcastiwoya tkub' tuk'il ju xjal lu?

⁴¹Ax tok, qe in qo yajlanjtz tuj tumelxix, porke ma qk'am qcastiw tu'n tlaj qb'inchb'en; atzunte xjal lu minti' jun mya b'a'n o tb'incha, chi xjal.

⁴²Ex xi tma'n te Jesús: —Jesús, b'i'x chin ule ti'j tk'u'ja ok tula tu'n tkawina.

⁴³Atzunte Jesús xi tma'n te: —Ax tok kxel nma'ne teya: B'i'x ja'lo ktela wuk'ile tuj lugar te nim tzalajb'il Paraíso tb'i.

⁴⁴Ch'ixtoq tpon chilkuq'ij kub' qloljix tkyaqil twitz tx'otx', texi las tres te qale tel spik'e'.

⁴⁵Ok yupj twitz q'ij, ex aju nintz xb'alun tkub' te maqb'il tuj tmij tja Dios b'i'x kub' sb'it'j tuj tmijil.

⁴⁶Jawtzun tq'ajq'ajel twi' Jesús kyuwxix ex tma: —Nman, tuj tq'ab'a kxel woqxenane wanmiye, chi Jesús. Ex tej tb'aj tma'n jlu, kyimtzun.

⁴⁷Tejtzun tke'yinte capitán tej tb'aj jlu, jaw tnimsa'n tb'i Dios, ex tma: —Axix tok, ate xjal lu tz'aqlxix.

⁴⁸Ex tej kyke'yinte kykyaqil xjal jlu, aqeju otoq b'aj kychmon kyib', e ajtz meltz'aj, ok kyq'ajtza'n ttzi kyxu'k tu'n kyb'is.

⁴⁹Ex kykyaqil qeju ojtzqi'ntoq Jesús kyu'n, kyuk'ix qe xu'j otoq che ok lpe' ti'j Jesús tzajnix tuj Galilea, e kyaj ten najchaq in che ke'yin ti'j tkyaqil jlu.

⁵⁰At jun xinaq José tb'i, aj Arimatea; atzun ta' tnam lu tuj tx'otx' Judea; ate xjal lu ajun kyxol Aj Sanjelal kye xjal judiy. B'a'n te xjal lu ex tz'aqlxix.

⁵¹Ate José mya mojl tyol kyuk'il Aj Sanjelal ti'j ju b'aj kynak'u'n ti'j ex ti'j ju kyb'incha, porke in ayontoq ti'j tkawb'il Dios.

⁵²Ultzun José tuk'il Pilato, ex xi tqanin t-ximlal Jesús.

⁵³Tku'tzlenxi ti'n twitz crus, okx tb'alq'i'n tuj jun saq xb'alun, ex okx tq'o'n tuj jun pik laku'maj ik tza'n pantyón, na'nxtoq tokx q'o'n jun kyimni tuj jul lu.

⁵⁴Ex atzun q'ij tu'n tb'ant kyten xjal tu'n kyojlan tuj q'ij te ojlab'l, aju ch'ixtoq t-xe't.

⁵⁵Ex aqeju xu'j otoq che tzaj tuk'il Jesús tuj Galilea e je'x lpe' ti'j José, ex o kyil aju pantyón ex tza'n tten okx q'o'n t-ximlal Jesús tuj.

⁵⁶Tejtzun kyul meltz'aj kyja, b'aj kyb'incha'n perjum ex tk'ok'jal t-sem tib'; ex e ojlan tuj q'ij te ojlab'l ik tza'nx in tma'n mandamyent.