Read kumam Lucas 3 Bible Online

Lucas 3 - kumam bible

Lucas 3

¹Tej otoq b'ant olaj ab'q'i ttzyetlen tkawin aju president Tiberio, ex toktoq Ponsio Pilato te gobernador tuj tx'otx' Judea, ex toktoq Herodes te gobernador tuj tx'otx' Galilea, ex atzunte Felipe aju titz'in Herodes toktoq te gobernador tuj tx'otx' Iturea ex tuj tx'otx' Traconite, ex atzunte Lisanias toktoq te gobernador tuj tx'otx' Abilinia,

²ex ate'ktoq Anás ex Caipás te nejenel kye pal kyxol xjal judiy, tzaj yolin Dios tuk'il Juan aju tky'ajal Zacarías, tuj lugar minti' kynajb'il xjal tuj.

³Ultzun Juan, ik' kyuj kykyaqil lugar ttzi'yile nima Jordán in pakb'an ex in tma'n tu'n tajtz ti'j kyanmi xjal ex tu'n kyb'yan tu'ntzun tnajset kyil.

⁴Ex Juan pakb'al tu'ntzun tjapun aju yol tz'ib'an tuj tu'jil Isaías aju t-sanjel Dios, chi kyja': In jaw tq'ajq'ajel twi' jun xjal tuj lugar minti' kynajb'il xjal tuj, in tma'n: Kyb'inchame tb'e Qman; kyb'inchame jun tb'e jiqun ti'j.

⁵Tkyaqil tq'ab' xaq ok che nojsetel, tkyaqil witz ex tal witz chq'ajlaj che kyjel; qe b'e ẍo'k kyi'j che xel jiqumet, ex qe b'e busl kyuj che b'ajel tz'umset;

⁶ex kykyaqil xjal k'okel kyke'yin aju kolb'il in tzaj tq'o'n Dios, chi Isaías.

⁷Tej kyul xjal tuk'il Juan tu'n kyb'yan tu'n tuj a', xi tma'n Juan kye: —Tiyjil q'anti' qeye. ¿Alkye ma q'mante kyeye tu'n kyel oqe twitz ju castiw ma'xix tzul tu'n Dios?

⁸Kyb'inchame b'a'n, tu'ntzun tke'yinjtz qa otoq tz'ajtz ti'j kyanmiye, ex mi'n che ok tene q'malte tuj kyanmiye kyja': Tiyjil Abraham qo'ye; ex kxel nma'ne kyeye, jaku b'ant tu'n Dios tu'n kyok qe ab'j lu te tiyjil Abraham.

⁹Aju siwb'il k'uxb'il ya ma kanun t-xe tlok' tze'; kyja'tzun tkyaqil tze' minti' in tq'o'n twitz b'a'n, kjawil tx'emit, ex k'okex q'ot tuj q'aq', chi Juan kye.

¹⁰Xitzun kyqanin xjal te: —¿Titzun ok qb'incha'ye?

¹¹Xi ttzaq'we'n Juan: —Alkye at kab'e tkamiẍ, q'onx jun teju minti' tkamiẍ ex alkye at twa, q'onx ch'in teju minti' twa.

¹²Ax ikx e ul junjun peyil pwaq tu'n kyb'yan tu'n Juan, ex xi kyqanin te: —Xnaq'tzal, ¿yajtzun qeye, ti ok qb'incha'ye?

¹³Atzunte Juan xi tma'n kye: —Mi'n tz'el kypeyine mastl ti'j ju q'ma'maj kyeye tu'n ley.

¹⁴Ax ikx qe soldad xi kyqanin te: —Yajtzun qeye, ¿ti ok qb'incha'ye? Ex xi tma'n Juan kye: —Mi'n tz'el kyxk'ayine jun ti'xti te juntl, ex mi'n che si'mine yol kyi'j xjal; ex kykyaje conporm ti'j ju twi kyk'u'je.

¹⁵Ex in che ayontoq xjal, ex kykyaqil in che ximantoq ti'j tuj kyanmi, qapelo a Juan ju Crist aju at toklen tu'n Dios.

¹⁶Ex xi tma'n Juan kye kykyaqil xjal: —Axix tok aqine in che b'yane wu'ne tuj a'; ex tzul juntl mas nim tipumal nwitze, aju minti' woklene tu'n tel npaju'ne taq'al t-xajab'; oktzun che b'yale tu'n tu'n Xewb'aj Xjan ex tu'n q'aq'.

¹⁷Tzyu'n xupb'il triw tu'n, ex k'elel t-xupin ttz'isil triw tuj tpe'n; atzun twitz triw k'okel tchmo'n tuj ttx'utx', atzun ttz'isil triw kb'el tpatun tu'n q'aq' aju mlay yupj, chi Juan kye.

¹⁸Kyja'tzun in tq'o'ntoq Juan kynab'l xjal tu'n tyol ex tuj nimku tumel, ex in tpakb'a'n tqanil b'a'n kye.

¹⁹Atzunte Herodes aju gobernador, b'aj ilin tu'n Juan tu'n tlaj otoq tz'ok Herodías te t-xu'jil; ate Herodías t-xu'jil Felipe aju ttzik Herodes; ex b'aj ilin Herodes tu'n Juan tu'n tlaj tkyaqilju mya b'a'n tb'incha.

²⁰Mya o'kx jlu tb'incha Herodes, at juntl mya b'a'n tb'incha, okx lamo'n Juan tu'n tuj pres.

²¹Tej kyb'aj b'yan kykyaqil xjal tuj a' tu'n Juan, ax ikx te Jesús o b'yan tu'n Juan; ex matoq in na'n Jesús Dios, jaqet ttzi kya'j,

²²ex ku'tz Xewb'aj Xjan tuj kya'j, ul tib'aj Jesús, ik ke'yin ik tza'n paloma, ex tzaj q'ajt Dios tuj kya'j ex tma: —Aya Nk'wa'le k'ujla'nxixa wu'ne; in chin tzalaje ti'ja.

²³Matoq lajo'n 30 ab'q'i tu'n Jesús tej ttzyet taq'un. Tuj kynab'l xjal qa tky'ajal José te Jesús; atzunte José tky'ajal Elí;

²⁴atzunte Elí tky'ajal Matat; atzunte Matat tky'ajal Leví; atzunte Leví tky'ajal Melqui; atzunte Melqui tky'ajal Jana; atzunte Jana tky'ajal José;

²⁵atzunte José tky'ajal Matatías; atzunte Matatías tky'ajal Amós; atzunte Amós tky'ajal Nahúm; atzunte Nahúm tky'ajal Esli; atzunte Esli tky'ajal Nagai;

²⁶atzunte Nagai tky'ajal Maat; atzunte Maat tky'ajal Matatías; atzunte Matatías tky'ajal Semei; atzunte Semei tky'ajal José; atzunte José tky'ajal Judá;

²⁷atzunte Judá tky'ajal Joana; atzunte Joana tky'ajal Resa; atzunte Resa tky'ajal Zorobabel; atzunte Zorobabel tky'ajal Salatiel; atzunte Salatiel tky'ajal Neri;

²⁸atzunte Neri tky'ajal Melqui; atzunte Melqui tky'ajal Adi; atzunte Adi tky'ajal Cosam; atzunte Cosam tky'ajal Elmodam; atzunte Elmodam tky'ajal Er;

²⁹atzunte Er tky'ajal Josué; atzunte Josué tky'ajal Eliezer; atzunte Eliezer tky'ajal Jorim; atzunte Jorim tky'ajal Matat;

³⁰atzunte Matat tky'ajal Leví; atzunte Leví tky'ajal Simeón; atzunte Simeón tky'ajal Judá; atzunte Judá tky'ajal José; atzunte José tky'ajal Jonán; atzunte Jonán tky'ajal Eliacim;

³¹atzunte Eliacim tky'ajal Melea; atzunte Melea tky'ajal Mainán; atzunte Mainán tky'ajal Matata; atzunte Matata tky'ajal Natán;

³²atzunte Natán tky'ajal David; atzunte David tky'ajal Isaí; atzunte Isaí tky'ajal Obed; atzunte Obed tky'ajal Booz; atzunte Booz tky'ajal Salmón; atzunte Salmón tky'ajal Naasón;

³³atzunte Naasón tky'ajal Aminadab; atzunte Aminadab tky'ajal Aram; atzunte Aram tky'ajal Esrom; atzunte Esrom tky'ajal Fares; atzunte Fares tky'ajal Judá;

³⁴atzunte Judá tky'ajal Jacob; atzunte Jacob tky'ajal Isaac; atzunte Isaac tky'ajal Abraham; atzunte Abraham tky'ajal Taré; atzunte Taré tky'ajal Nacor;

³⁵atzunte Nacor tky'ajal Serug; atzunte Serug tky'ajal Ragau; atzunte Ragau tky'ajal Peleg; atzunte Peleg tky'ajal Heber; atzunte Heber tky'ajal Sala;

³⁶atzunte Sala tky'ajal Cainán; atzunte Cainán tky'ajal Arfaxad; atzunte Arfaxad tky'ajal Sem; atzunte Sem tky'ajal Noé; atzunte Noé tky'ajal Lamec;

³⁷atzunte Lamec tky'ajal Matusalén, atzunte Matusalén tky'ajal Enoc; atzunte Enoc tky'ajal Jared; atzunte Jared tky'ajal Mahalaleel; atzunte Mahalaleel tky'ajal Cainán;

³⁸atzunte Cainán tky'ajal Enós; atzunte Enós tky'ajal Set; atzunte Set tky'ajal Adán; atzunte Adán tk'wa'l Dios.