Read kumam Lucas 4 Bible Online

Lucas 4 - kumam bible

Lucas 4

¹Ajtz meltz'aj Jesús ttzi nima Jordán, nojni tu'n Xewb'aj Xjan, ex xi q'i'n tu'n Xewb'aj Xjan tuj jun lugar minti' kynajb'il xjal tuj.

²Axtzun kyaj ten 40 q'ij, ex ok tuj joyb'il ti'j tu'n tajaw il. Ex minti' o wa'n tuj 40 q'ij, ex tb'ajlenxi jlu, tzaj el tk'u'j.

³Xitzun tma'n tajaw il te: —Qa Tk'wa'l Diosa, q'manxa te ab'j lu tu'n tok te wab'j.

⁴Xi ttzaq'we'n Jesús: —At jun yol in tma'n tuj Tu'jil: Mya noq o'kx tu'n wab'j k'anq'il xjal, [ax ikx jaku tz'anq'in xjal tu'n tkyaqil yol in tma'n Dios.]

⁵Xitzun q'i'n Jesús tu'n tajaw il twi' jun witz ma' twa'l, ex jurat naj xi tyek'un tkyaqil tnam twitz tx'otx' te.

⁶Ex xi tma'n tajaw il te: —Teya kxel nq'o'ne tkyaqil kyipumal tnam lu tuk'ix kyoklen; porke weye o tzaj q'o'n, ex kxel nq'o'ne noq al e wajb'ile.

⁷Qa ma kub' ẍmeje'ya k'ulul nwitze, tkyaqil jlu kxel nq'o'ne teya, chi tajaw il.

⁸Ex xi ttzaq'we'n Jesús: —[Pa'mil tib'a wi'je Satanás, porke] at jun yol in tma'n tuj Tu'jil: Twitz Qman tu'n kyk'ulune, aju Kydiose, ex o'kx te tu'n kyajb'ene, chi tuj Tu'jil.

⁹Xitzun q'i'n Jesús tu'n Satanás tuj tnam Jerusalén ex jax tq'o'n max twi' tja Dios, ex xi tma'n te: —Qa Tk'wa'l Diosa xonku'x tib'a twitz tx'otx';

¹⁰tu'nju at jun yol in tma'n tuj Tu'jil: Kxel tma'n Dios kye t-anjel tu'n tok kwentina kyu'n.

¹¹Ktzyetela kyu'n tu'n kyq'ab' tu'n mi'n tok tokpaj tqana ti'j ab'j, chi tuj Tu'jil.

¹²Xi ttzaq'we'n Jesús: —Ax ikx at jun yol in tma'n tuj Tu'jil: Mi'n tz'ok kyq'o'ne Qman Dios tuj malb'il.

¹³Ex toklenxitzun Jesús tuj joyb'il ti'j tu'n tajaw il, el ti'n tgan ti'j noq te kab' q'ij.

¹⁴Aj meltz'aj Jesús, pon tuj tx'otx' Galilea, nojni tu'n tipumal Xewb'aj Xjan, ex el tqanil ti'j tuj tkyaqil tx'otx' Galilea.

¹⁵Ex in tq'o'n xnaq'tzb'il kye xjal kyuj ja te k'ulb'il tuj junjun tnam ate' tuj tx'otx' Galilea, ex kykyaqil xjal in che yolin b'a'n ti'j.

¹⁶Pontzun Jesús tuj tnam Nazaret jatum o ch'iy: ex okx tuj ja te k'ulb'il tuj q'ij te ojlab'l ik tza'nx tmod, jaw we' ex jaw t-sch'i'n Tu'jil Tyol Dios.

¹⁷Xi kyq'o'n xjal tu'jil Isaías te, aju t-sanjel Dios; ex tej tjaqet ju libro, knet tu'n jatum tz'ib'an qeju yol lu:

¹⁸T-xew Qman at wuk'ile, porke ma tzaj tq'o'n woklene tu'n t-xi nq'o'ne tqanil b'a'n kye meb'a: [ma chin tzaj sama'ne tu'n kyb'anix qeju in b'isun kyanmi,] ex tu'n t-xi npakb'a'ne kye pres tu'n kytzoqpet, ex tu'n tjaqet kywitz moẍ; ex tu'n kytzoqpet qeju in che yajlanjtz;

¹⁹ex tu'n t-xi nq'o'ne tqanil ti'j tq'ijlalil tu'n tul kanun t-xtalb'il Qman, chi tuj Tu'jil.

²⁰Kub'tzun tb'alq'i'n Jesús aju u'j, aj tq'o'n teju xjal kwentil tuj ja te k'ulb'il, ex kub' qe'; kykyaqil qeju ate' tuj ja te k'ulb'il ok ten kywitz ti'j.

²¹Oktzun ten Jesús q'malte kye: —Ja'lo ma japun ju yol lu kywitze, aju tz'ib'amaj.

²²Ex kykyaqil in che yolintoq b'a'n ti'j Jesús, ex in che lab'in ti'j ju yol in tzaj tma'n tb'anilxix, ex in kyma'n: —¿Myapetzun tk'wa'l José jlu?

²³Xitzun tma'n Jesús kye: —Oklo ktzajel kyma'ne ju yol lu weye: Q'anan ok tib'a aya q'anal; ex tkyaqil b'i'n qu'ne aju tb'inchaya tuj tnam Capernaum, ax ikx b'inchama tzalu tuj ttanmiya, che chiloye.

²⁴Pero ax tok kxel nma'ne kyeye minti' jun t-sanjel Dios in k'monjtz tuj tex ttanmi.

²⁵Ex ax tok kxel nma'ne kyeye, ate'toq nimku meb'a xu'j tuj tx'otx' Israel tuj tq'ijlalil tej tten Elías aju t-sanjel Dios, tej minti' tzaj jb'al ox ab'q'i tuk'il qaq xjaw, ex tzaj nim we'yaj tuj tkyaqil tx'otx' Israel;

²⁶pero minti' xi sama'n Elías tu'n Dios tu'n tpon kyuk'il meb'a xu'j tuj tx'otx' Israel, o'kx xi sama'n Elías tu'n tpon tuk'il jun meb'a xu'j tuj tnam Sarepta niqayin ttxlaj tnam Sidón.

²⁷Ax ikx nimku xjal tx'a'k kyi'j ate'toq tuj tx'otx' Israel tuj tq'ijlalil tej tten Eliseo aju t-sanjel Dios; ex mi jun o b'anix kyxol, noq o'kx Naamán b'anix, aju aj Siria, chi Jesús kye.

²⁸Ex kykyaqil qeju ate'toq tuj ja te k'ulb'il tzaj nim kyq'oj tej kyb'inte jlu.

²⁹Ex e jaw tzoqpaj xjal, ex kylamo'n Jesús ttxa'n tnam, xi kyi'n ttxa'n xaq tu'n tex kyxo'n, ex atzun tkub' kytanmi twi' jun tal witz.

³⁰Atzunte Jesús etz kyxol, ex ik'tzun.

³¹Ex ku'pun Jesús tuj tnam Capernaum tuj tx'otx' Galilea; ex xi tq'o'n xnaq'tzb'il kye xjal tuj q'ij te ojlab'l.

³²Ex qe xjal in che lab'intoq ti'j ju t-xnaq'tzb'il porke nim toklen ju tyol.

³³Ex attoq jun xinaq tuj ja te k'ulb'il at jun ju'ẍ tuj tanmi, jaw tq'ajq'ajel twi' kyuw ex tma:

³⁴—Qo tq'onkja, ¿ti toklena qi'je, Jesús aj Nazaret? ¿Maj ma tzula tu'n qnaje tu'na? B'a'n wu'ne alkyeya, aya xjan Tk'wa'l Dios, chi ju'ẍ.

³⁵Xi tmayo'n Jesús aju ju'ẍ, ex tma: —K'ol ttzi'ya, tetza tuj tanmi xjal, chi Jesús. Ex kub' xo'n xjal twitz tx'otx' tu'n ju'ẍ kywitz txqantl xjal, etz ju'ẍ tuj tanmi xjal ex minti' k'ixb'i xjal tu'n.

³⁶B'i'x e jaw sek'paj kykyaqil xjal, in che yolintoq kyxolx ex in kyma'n: —¿Ti t-xilen ju yol lu? Ate xjal lu at toklen ex at tipumal tu'n t-xi tma'n kye ju'ẍ tu'n kyetz, ex in che etz tu'n, che chi xjal.

³⁷Ex el tqanil ti'j Jesús kyuj txqantl tnam ate' tuj tx'otx' Galilea.

³⁸Etztzun Jesús tuj ja te k'ulb'il, okx tuj tja Simón. Atzunju xu'j tji' Simón yab'toq tu'n nim kyaq; ex e kub'san twitz Jesús ti'j ju yab'.

³⁹Kub' mok'e' Jesús twitz yab', xi tmayo'n kyaq; b'i'x ik' kyaq ti'j xu'j, ex jurat jaw we' ex ok ten xu'j ajb'el kye.

⁴⁰Tej tex q'ij, kykyaqil qe xjal attoq yab' tuj kyja, noq alkyex txkaj kyyab'il, e tzaj kyi'n twitz Jesús. Atzunte Jesús kub' tq'o'n tq'ab' kyib'aj kykyaqil, ex e b'anix tu'n.

⁴¹Ax ikx in che etztoq ju'ẍ tuj kyanmi nimku xjal, in che sch'in ju'ẍ ok kyetz ex in kyma'n: —Aya Tk'wa'l Dios. Ex e je'x tmayo'n Jesús qe ju'ẍ ex minti' xi tq'o'n amb'il tu'n kyyolin, porke b'a'ntoq kyu'n qa ate Jesús ju Crist aju at toklen tu'n Dios.

⁴²Tej qsqix, ex Jesús, xi' tuj jun lugar minti' kynajb'il xjal tuj; ex qe xjal in che jyontoq ti'j, ex e pon tuk'il, o kyajb'e tu'n mi'n tel tpa'n tib' kyi'j.

⁴³Atzunte Jesús xi tma'n kye: —Ax ikx kyuj txqantl tnam ilxix ti'j tu'n t-xi npakb'ane tqanil b'a'n ti'j tkawb'il Dios; ex atzun waq'une ma chin tzaj sama'ne, chi Jesús.

⁴⁴Kyja'tzun tten kukx in pakb'an Jesús kyuj ja te k'ulb'il tuj tx'otx' Galilea.