Read kumam Lucas 7 Bible Online

Lucas 7 - kumam bible

Lucas 7

¹Tej tb'aj yolin Jesús kyuk'il xjal, xi' tuj tnam Capernaum.

²Ex at jun capitán aj Roma tuj tnam at jun tmajen k'ujla'nxix tu'n; yab'toq tmajen ex ch'ixtoq tkyim.

³Tej tb'inte capitán tqanil ti'j Jesús, e je'x t-sama'n qe kytijil xjal judiy tu'n kykub'san twitz Jesús tu'n ttzaj ex tu'n tb'anix ju majen tu'n.

⁴Tejtzun kypon kytijil xjal judiy tuk'il Jesús, e kub'sanxix twitz ex xi kyma'n te: —B'a'n te capitán lu, b'a'n tu'n t-xi'ya tuk'il;

⁵tu'nju at tk'ujlalil kyi'j qxjalil, ex o b'aj tb'incha'n jun ja qeye te k'ulb'il, che chi.

⁶Xi'tzun Jesús kyuk'il. Ex tej ch'ixtoq kykanun tja capitán, e tzaj t-sama'n capitán kab' tamiw q'malte te Jesús: —Tat, mi'n b'isuna tu'n ttzaja max tzalu, mya b'a'n qine tu'n toktza tuj njaye,

⁷porke ma kub' nximane qa mya b'a'n qine tu'n npone tuk'ila; o'kx q'mantza yol ex aju nmajene kb'antel.

⁸Porke ikx weye atine tjaq' tkawb'il juntl, ex ate' soldad tjaq' nkawb'ile; qa ma txi nma'ne te jun soldad: Txi'ya, in xi'tzun; ex qa ma txi nma'ne te juntl: Tzaja, in tzajtzun; ex qa ma txi nma'ne te nmajene: B'inchama jlu, in b'anttzun tu'n, chi capitán.

⁹Tej tb'inte Jesús jlu, jaw lab'in ti'j, ajtz tke'yin ex xi tma'n kye xjal lepchqe'k ti'j: —Kxel nma'ne kyeye, mi kyxol aj Israel minti' ma wile qa at kyokslab'l xjal ik tza'n tokslab'l xjal lu, chi Jesús kye.

¹⁰Qe xjal otoq che'x sama'n, tej kyul meltz'aj ja, o kyil otoq b'ant ju majen.

¹¹Yajxitl xi' Jesús tuj jun tnam Naín tb'i; kyuk'ix qe t-xnaq'tzb'en e je'x tuk'il ex kyuk'ix nim xjal.

¹²Ch'ixtoq tpon Jesús niqayin ttxa'n tnam, lu nne'tzku q'i'n jun kyimni, tal jun meb'a xu'j, o'kxku jun tal attoq; ex nim xjal te tnam otoq che tzaj tuk'il xu'j.

¹³Tej tlonte Qajaw ju xu'j, tzaj q'aq'an tk'u'j ti'j ex xi tma'n te: —Mi'n tz'oq'a.

¹⁴Ex pon laq'e' Jesús, ok tmako'n ju kax; b'i'x e we' qe xjal iqal te. Ex xi tma'n Jesús teju ku'xun otoq kyim: —We'ktza q'a.

¹⁵Jawtzun qe' ju ku'xun otoq kyim, ex ok ten yolil. Xitzun tma'n Jesús te xu'j: —Lu tala lu.

¹⁶Tejtzun kylonte xjal jlu, kykyaqil tzaj kyxob'il, ex xi kyq'o'n chjonte te Dios in kyma'n: —Jun t-sanjel Dios nim toklen ma tzul qxol; ex ma tzul Dios onil teju tnam etzan tu'n, che chi.

¹⁷Ex aju tb'incha Jesús, pon tqanil ti'j tuj tkyaqil tx'otx' Judea ex tuj tkyaqil lugar ti'jele.

¹⁸Qe t-xnaq'tzb'en Juan pon tqanil kyu'n ti'j tkyaqil jlu. E tzajtzun ttxko'n Juan kab'e t-xnaq'tzb'en,

¹⁹ex e je'x t-sama'n tuk'il Jesús qanil te kyja': ¿Apeya ju Crist aju at tulel, ex qa qo ayole ti'j juntl? Che chikuye.

²⁰E ultzun qe xinaq tuk'il Jesús, ex xi kyma'n te: —Ma qo tzaj sama'ne tu'n Juan aju in che b'yan xjal tu'n tuj a', ma qo ule qanilte teya: ¿Apeya ju Crist aju at tulel, ex qa qo ayole ti'j juntl? Che chi.

²¹Tuj or tej kypon qe xjal otoq che'x t-sama'n Juan, in che b'anttoq nimku xjal yab' tu'n Jesús, aqeju at kyyab'il ex at k'ixk'oj kyi'j, ex in che etztoq ju'ẍ tuj kyanmi xjal, ex nimku moẍ in jaqet kywitz tu'n.

²²Kyja'tzun xi ttzaq'we'n Jesús: —Kyxi'ye ex kymanxe te Juan aju ma kyb'iye ex ma kyile. Kymanxe te: Qe moẍ in b'ant kyke'yin, qe kox in b'ant kyb'et, qe xjal at tx'a'k kyi'j minti' q'anb'il ti'j in che b'anix, qe chkyin kywi' in b'ant kyb'in, qe kyimni in che jaw anq'in, ex in pakb'anjtz tqanil kolb'il kye meb'a.

²³At tzalajb'il teju xjal minti' in jawje' tk'u'j wi'je, chi Jesús kye t-xnaq'tzb'en Juan.

²⁴Tejtzun kyaj meltz'aj qe t-xnaq'tzb'en Juan, ok ten Jesús yolil ti'j Juan kye xjal: —¿Titzun xi kyla'kje tuj lugar minti' kynajb'il xjal tuj? ¿Ikpe tten xjal o kyile ik tza'n jun ajlaj in yukch tu'n kyq'iq'? Mi'n.

²⁵Ex ¿ti'tzun xi kyla'kje? ¿Tb'anilpe t-xb'alun xinaq tok xi kyla'kje? Mi'n, porke b'a'n kyu'ne, qe xjal tok kyxb'alun tb'anilxix ex ate' tuj achb'il, atzun ate' tuj kyja rey.

²⁶Ex ¿titzun xi kyla'kje? ¿Jun t-sanjel Diospe xi kyla'kje? Kxel nma'ne kyeye ax tok jun t-sanjel Dios xi kyla'kje ex mas ma' t-xilen twitz jun t-sanjel Dios.

²⁷Tu'nju at jun yol tz'ib'an tuj Tu'jil in yolin ti'j Juan, chi kyja': Kxel nsama'ne nsanjele tu'n tkub' nej twitza b'inchalte tb'eya, chi tuj Tu'jil.

²⁸Kxel nma'ne kyeye: Kyxol kykyaqil xjal minti' juntl mas ma' toklen ik tza'n te Juan aju in che b'yan xjal tu'n tuj a'; ex aju mas ch'in toklen tuj tkawb'il Dios, mas ma' toklen twitz toklen Juan, chi Jesús kye.

²⁹Tej kyb'inte kykyaqil xjal kyuk'ix qe peyil pwaq, o kyma qa tz'aqlxix te Dios, tu'nju otoq che b'yan tu'n Juan tuj a'.

³⁰Ex qe fariseo ex qe chik'b'al ti'j ley el kyik'un aju kub' t-ximan Dios kyi'j, ex minti' e b'yan tu'n Juan.

³¹Tmatzun Qajaw: —At jun techal kxel nma'ne tza'n tten kymod xjal ate' tuj tq'ijlalil ja'lo.

³²Ik kyten xjal ik tza'n qe k'wa'l q'uql qe tuj plas ex in che sch'in in kyma'n kye kyuk'il: Nno'k qq'ajtzane xux kywitze ex minti' ma che b'ixane; in qo b'itzane jun b'itz b'isb'ajil kywitze, ex minti' ma che ok tene oq'el, che chi k'wa'l.

³³Ex ul Juan aju e b'yan xjal tu'n tuj a', mib'an wa'n wab'j ex mib'an k'an vin, ex in kyma'ne at ju'ẍ tuj tanmi.

³⁴Atzun weye ma chin ule, aqine sk'o'maj qine tu'n Dios tu'n ntene kyuk'il xjal, in chin wa'ne ex in chin k'ane, ex in kyma'ne: Lu jun xjal kye wa'n ex kye k'an vin, tamiw tib' kyuk'il peyil pwaq ex kyuk'il aj il, che chiye.

³⁵Ex k'elel qnik' ti'j jun xjal qa at tnab'l tu'n Dios tu'nju tb'inchb'en, chi Jesús kye.

³⁶Ex at jun fariseo kub'san twitz Jesús tu'n twa'n tuk'il. Okxtzun Jesús tuj tja fariseo ex kub' qe' ti'j mes.

³⁷Ex at jun xu'j aj ilxix ax najl tuj tnam, tej tb'inte qa otoq pon Jesús wa'l tuj tja fariseo, tzaj ti'n jun tal botey alabastro ttx'otx'il tku'x perjum tuj,

³⁸kub' ten xu'j t-xe tqan Jesús, in oq', ex kub' ta'l twitz tib'aj tqan Jesús; ex el t-su'n tu'n ttzmal twi', ex el ttz'ub'an ti'j tqan Jesús, ex ok t-su'n perjum ti'j tqan.

³⁹Tej tke'yinte fariseo jlu, aju xi txkonte Jesús, kub' t-ximan: Noqwit ax tok t-sanjel Dios xjal lu, mawtlo tz'el tnik' ti'j alkye ju xu'j lu aju nno'k makonte te, ex tza'n tten tchwinqlal xu'j lu, ate xu'j lu aj ilxix.

⁴⁰Xitzun tma'n Jesús te fariseo: —At jun nyole teya, Simón. Atzunte Simón xi ttzaq'we'n: —Q'mantza Xnaq'tzal.

⁴¹Xitzun tma'n Jesús te: —At kab'e xjal attoq kyk'as tuk'il jun xinaq jatum in knet kych'ex xjal. Jun k'asb'enan jwe' syent denari pwaq tu'n, atzun juntl 50;

⁴²ex tu'nju minti' tumel tu'n tchjet kyu'n, kub' tnajsa'n xjal ju kyk'as kykab'il. Q'mantztzuna weye ja'lo, ¿alkyetzun kyxol qeju kab'e k'asb'enal lu mas at tk'ujlalil ti'j ju xjal q'ol kych'ex?

⁴³Xi ttzaq'we'n Simón: —Tuj nnab'le aju mas nim tk'as najset. Ex xi tma'n Jesús te: —Tuj tumelxix ma tmaya.

⁴⁴Ajtztzun tke'yin Jesús ju xu'j, ex xi tma'n te Simón: —¿Mape tila ju xu'j lu? Ma chin oktze tuj tjaya ex minti' saj tq'o'na ch'in a' te tx'ajb'il nqane; pero ate xu'j lu ma kub' ta'l twitz tib'aj nqane, ex ma tz'el t-su'n tu'n ttzmal twi'.

⁴⁵Minti' sel ttz'ub'ana ch'in nwitze te jun q'olb'eb'l te weye, pero te xu'j lu tej ẍino'ktze kukx tel ttz'ub'an ti'j nqane.

⁴⁶Minti' xjax tqo'na ch'in aseyt tib'aj nwi'ye, pero te xu'j lu ma kub' tqo'n perjum tib'aj nqane.

⁴⁷Kyja'tzun kxel nma'ne teya, qeju til xu'j lu nimxix ma che najset, porke nim ma chin k'ujlanjtze tu'n; atzun teju xjal noq ch'in til ma kub' najset, ax noq ch'in tk'ujlalil at wi'je, chi Jesús.

⁴⁸Ex xi tma'n Jesús te xu'j: —Qe tila ma che najset.

⁴⁹Ex kykyaqil qeju q'uql qe ti'j mes tuk'il Jesús kymatzun kyxolx: —¿Alkyetzun ju xjal lu in najset kyil xjal tu'n?

⁵⁰Ex xi tma'n Jesús te xu'j: —Tu'n tokslab'la ma kleta; txi'ya tuj tzalajb'il, chi Jesús.