Read kumam Lucas 8 Bible Online

Lucas 8 - kumam bible

Lucas 8

¹Tb'ajlenxitzun jlu, in b'ettoq Jesús kyuj nimku tnam ex kyuj nimku aldey, in pakb'antoq ex in xi tma'n tqanil b'a'n ti'j tkawb'il Dios; ex qeju kab'laj apostol in che b'ettoq tuk'il.

²Ax ikx in che b'ettoq junjun xu'j tuk'il, otoq che etz ju'ẍ tuj kyanmi, kyuk'ix qeju otoq che b'anix. Kyxol qe jlu a juntoq Mariy aj Magdala aju otoq che etz wuq ju'ẍ tuj tanmi,

³tuk'ix Juana aju t-xu'jil Chuza aju mayordomtoq te Herodes, tuk'ix Susana, ex kyuk'ix ela'tl xu'j in che ajb'entoq te Jesús, in xi kyq'o'n aju at kyuk'il.

⁴Ex nim xjal e ul chmet e tzaj tuj junjun tnam e ul tuk'il Jesús, xitzun tma'n Jesús jun techal kye:

⁵—At jun xjal xi' awal triw; tej t-xi tchitun iyaj, ch'in iyaj kub' tz'aq tuj b'e, b'aj kywab'an xjal, ex jaw kywa'n chyu'j.

⁶Ex ch'intl iyaj kub' tz'aq tib'aj pk'at; tej kyja'wil, jurat e tzqij porke minti'toq tcha'xil tx'otx'.

⁷Ch'intl iyaj kub' tz'aq kyxol ch'i'x k'ul, ex junx e tzaj ch'iy ch'i'x k'ul tuk'il triw, ex xk'ost triw tu'n.

⁸Ex ch'intl iyaj kub' tz'aq tuj tb'anil tx'otx', ex ch'iy, ex ti'j jun tqan ok jun syent twitz, chi Jesús kye. Tej t-xi tma'n Jesús jlu, jaw yolin kyuwxix: —Alkye at t-ẍkyin, b'inx ju yol lu.

⁹Xitzun kyqanin t-xnaq'tzb'en Jesús te: —¿Ti t-xilen ju techal lu?

¹⁰Xitzun tma'n Jesús kye: —Te kyeye ma tzaj tq'o'n Dios b'a'n tu'n tel kynik'e ti'j ju yol aju ewantoq nej ti'j tkawb'il Dios; atzun kye txqantl in xi nma'ne kye tuj techal tu'n mi'n tkyil aju in xi kyke'yin, ex tu'n mi'n tel kynik' ti'j aju in kyb'i'n.

¹¹Atzun in tma'n ju techal lu: Aju iyaj, atzun tyol Diosju.

¹²Aju b'e jatum kub' tz'aq ju iyaj, atzun in yolin kyi'j xjal in xi kyb'i'n tyol Dios, ex jurat nnu'l tajaw il ex nne'l ti'n tyol Dios tuj kyanmi, tu'n mi'n t-xi kyoksla'n ex tu'n mi'n kyklet.

¹³Aju pk'at jatum kub' tz'aq ju iyaj tib'aj, atzun in yolin kyi'j xjal in xi kyb'i'n tyol Dios ex in che tzalaj ti'j; ex minti' tlok' iyaj kyuj; noq te nik'xi kab'e q'ij in xi kyoksla'n, oktzun tul joyb'il kyi'j nne'l kypa'n kyib'.

¹⁴Aju tx'otx' at ch'i'x k'ul tuj jatum kub' tz'aq ju iyaj, atzun in yolin kyi'j xjal in xi kyb'i'n tyol Dios, ex cheb'a in xk'ost iyaj kyuj tu'nju in b'aj kyk'u'j ti'j nimku, ti'j kyq'inumab'l ex ti'j kyachb'il, ex minti' in witzan iyaj kyuj.

¹⁵Aju tb'anil tx'otx' jatum kub' tz'aq ju iyaj, atzun in yolin kyi'j xjal in xi kyb'i'n tyol Dios, porke b'a'n kyanmi ex tz'aqlxix, atzun kukx in xi kyk'u'n ju yol ex in tq'o'n twitz ju iyaj kyuj.

¹⁶Qa at jun xjal ma tz'ok txaqonte jun kandil, mlay tz'okx tq'o'n tjaq' k'il, ex mlay tz'okx tq'o'n tjaq' watb'il: noq o'kx in jax tq'o'n tib'aj jun tkub'il tu'n t-spik'b'anjtz kywitz qeju in che okx tuja.

¹⁷Ex tkyaqilju at tuj ewaj ktzajel yek'un, ex tkyaqilju ewan, k'elel tuj q'ancha'l.

¹⁸Kyq'o'nke kwent ti'j ju in kyb'i'ne, ex alkye jun xjal at ch'in te, ktzajel q'o'n mastl te; ex alkye jun xjal minti' te, aju ch'in at te, k'elel q'i'n.

¹⁹Ex ul ttxu' Jesús tuk'il, kyuk'ix qe titz'in, ex minti' b'ant tu'n kyokx tuk'il tu'n kylaj nim xjal.

²⁰Ex q'onjtz tqanil te Jesús kyu'n xjal: —Lu ttxu'ya ex qe titz'ina ate' ttxa'n pe'n, kyaj tu'n kyyolin tuk'ila, che chi.

²¹Xitzun tma'n Jesús kye: —Alkye qeju in xi kyb'i'n tyol Dios ex in xi kyniman, atzun qe we ntxu' ex qe witz'ine.

²²At jun q'ij okx Jesús tuj barc kyuk'il qe t-xnaq'tzb'en, ex xi tma'n kye: —Qo ik'x jlajxi laguna. Ex e ik'xtzun.

²³Ex matoq in che ik'x tuj a', ik' tan Jesús. Ex jurat tzaj jun nintz kyq'iq' tib'aj a'; ex aju barc kyja'toq tnoj tu'n a', ex kyja'toq t-xi mulq'aj barc.

²⁴E pontzun laq'e' k'asul te Jesús, ex xi kyma'n te: —Xnaq'tzal. Xnaq'tzal. Ch'ix qnaj. Jawtzun we' Jesús, ex xi tmayo'n kyq'iq' ex tipumal a'; ex jurat we', ex b'i'x take'.

²⁵Xitzun tma'n kye t-xnaq'tzb'en: —¿Jatumtzun ta' kyokslab'le? Atzun kye tzaj nim kyxob'il, ex in che lab'in ti'j, ex kyma kyxolx: —¿Alkyetzun ju xjal lu? Porke tuk'ix kyq'iq' ex a' in xi kyniman tyol, che chi xnaq'tzb'en.

²⁶E pontzun tuj kytx'otx' aj Gadara jlajxi laguna te Galilea.

²⁷Tej tetz Jesús tuj barc, ul jun xjal tuk'il tzaj tuj tnam, otoq tz'el q'ij attoq ju'ẍ tuj tanmi. Otoq tz'el q'ij minti' nno'k t-xb'alun, ex mya najl tuj tja, atzun najl tuj camposant.

²⁸Tej tilwaj Jesús tu'n xjal jaw sch'in kyuwxix, kub' ẍmeje' twitz ex jaw tq'ajq'ajel twi' kyuw ex xi tma'n: —¿Ti toklena wi'je Jesús, aya Tk'wa'l Dios ma'xix toklen? Chin kub'sale twitza, mi'n chin kub' tyajla'na.

²⁹Tma xjal ju yol lu, tu'nju otoq txi tma'n Jesús te ju'ẍ tu'n tetz tuj tanmi xjal. Tu'nju otoq tz'el q'ij kukx in tzyet xjal tu'n ju'ẍ; ex nno'k kyk'alo'n xjal tqan ju xjal lu tu'n caden kyuk'ix tq'ab', ex nno'k xq'uqin; ex in che kub' tzaqj caden tu'n xjal ex in xi lajo'n tu'n ju'ẍ tuj lugar minti' kynajb'il xjal tuj.

³⁰Xitzun tqanin Jesús te: —¿Ti tb'iya? Atzunte xjal xi tma'n: —Legión we nb'i. Porke nimtoq ju'ẍ otoq che okx tuj tanmi.

³¹Ex e kub'san ju'ẍ twitz Jesús tu'n mi'n kyxi tlajo'n tuj jul jalo ponin t-xe'.

³²Tuj ju lugar lu ate'toq nim b'och in che wa'n twi witz; ex e kub'san qe ju'ẍ twitz Jesús tu'n ttzaj q'o'n permis kye tu'n kyokx kyuj b'och; xitzun tq'o'n Jesús permis kye.

³³E je'tztzun ju'ẍ tuj tanmi xinaq, ex e okx kyuj qe b'och; atzun qe b'och ex kyxo'n kyib' ttxa'n xaq, e ku'pun tuj a', ex e naj.

³⁴Tej kyke'yinte qe kwentil otoq che naj b'och, e je'l oq, ex xi kyma'n tqanil kye xjal tuj tnam ex kye xjal tuj kojb'il.

³⁵E je'tztzun qe xjal tu'n kyke'yinte ti otoq b'aj; tejtzun kyul tuk'il Jesús o kyil aju xinaq otoq che etz ju'ẍ tuj tanmi, q'uqltoq t-xe tqan Jesús, tok t-xb'alun ex otoq b'anix tnab'l; ex tzaj kyxob'il.

³⁶Atzun qeju e ke'yinte te, xi kyma'n kye xjal tza'n tten b'anix ju xjal aju attoq ju'ẍ tuj tanmi.

³⁷Kykyaqiltzun xjal aj Gadara e kub'san twitz Jesús tu'n tex tuj kytanmi, tu'nju otoq tzaj nim kyxob'il. Okxtzun Jesús tuj barc ex ajtz meltz'aj.

³⁸Atzun teju xjal, aju otoq che etz ju'ẍ tuj tanmi, o kub'san twitz Jesús tu'n t-xi' tuk'il; ex aj t-sama'n Jesús, ex xi tma'n te:

³⁹—Taja tjaya, ex q'manxa tkyaqilju ma tb'incha Dios teya, chi Jesús te. Xi'tzun ju xjal, ex xi ttx'olb'a'n tuj tkyaqil tnam aju otoq tb'incha Jesús te.

⁴⁰Tej tul meltz'aj Jesús o che tzalaj xjal ti'j ex kykyaqil in che ayontoq ti'j.

⁴¹Ex ul jun xinaq Jairo tb'i, nejeneltoq tuj ja te k'ulb'il. Kub' mutze' t-xe tqan Jesús, ex o kub'san twitz tu'n t-xi' Jesús tuk'il tuj tja;

⁴²porke o'kxku jun tme'jel attoq, te kab'laj ab'q'ilo, ex ch'ixtoq tkyim. Tej in b'ettoq Jesús, ok kyb'etz'an kyib' xjal ti'j, porke nim xjal lepchqe'k ti'j.

⁴³Ex tzaj laq'e' jun xu'j yab'toq tu'n ẍwo'j otoq b'ant kab'laj ab'q'i tyab'tlen, ex tkyaqilju attoq te otoq b'aj tnajsa'n ti'j twi kyk'u'j q'anal, ex mi jun o b'ant tq'anan ti'j tu'n tb'anix.

⁴⁴Ex tzaj laq'e' xu'j ttzal ti'j Jesús, ok tmako'n ttxa'n t-xb'alun; ex jurat naj o we' ẍwo'j ti'j.

⁴⁵Tmatzun Jesús: —¿Al u'n ma chin ok mako'ne? —Mi jun ma tz'ok makonte teya, che chi xjal. Xitzun tma'n Pedro kyuk'ix qeju ate' tuk'il: —Xnaq'tzal, qe xjal nno'k kyb'etz'an kyib' ti'ja, [ex in tma'na: ¿Al u'n ma chin ok mako'ne? Chitzuna.]

⁴⁶Tmatzun Jesús: —At jun sok makonte weye porke ma tz'el nnik'e ti'j, at jun xjal ma b'anix tu'n wipumale.

⁴⁷Tej tke'yinte xu'j qa otoq tz'el tnik' Jesús ti'j, ul in lu'luntoq, kub' ẍmeje' t-xe tqan Jesús, ex xi tma'n kywitz kykyaqil xjal tiqu'n ok tmako'n, ex tza'n tten b'anix te jurat naj.

⁴⁸Xitzun tma'n Jesús te: —Nme'jel, tu'n tokslab'la ma b'anta, txi'ya tuj tzalajb'il.

⁴⁹Matoq in yolin Jesús tej tul jun xjal tzaj tuj tja Jairo aju nejenel tuj ja te k'ulb'il, xi tma'n xjal te Jairo: —Ma kyim tme'jela; tigan sikt xnaq'tzal tu'na.

⁵⁰Tej tb'inte Jesús, xi tma'n te Jairo: —Mi'n xob'a; o'kx qe' tk'u'ja, ex aju tme'jela ok kb'antel.

⁵¹Tejtzun kypon tja Jairo okx Jesús tuja ex tma mi jun xjal tu'n tokx tuk'il, o'kx Pedro, tuk'ix Jacobo, ex Juan, ex tuk'ix tman txin ex ttxu'.

⁵²Kykyaqil xjal in che oq' ex in che wu'yin ti'j, ex xi tma'n Jesús: —Mi'n che oq'e; mya kyimni te txin, noq in tan.

⁵³Ex qe xjal noq e jaw tze'n ti'j Jesús, porke b'a'n kyu'n otoq kyim te txin.

⁵⁴Tzajtzun ttzyu'n Jesús tq'ab' txin, xi yolin kyuw, ex xi tma'n te: —Txin, we'ktza.

⁵⁵Ex aju t-xew txin jurat ul meltz'aj tuj, ex jurat jaw we'; ex xi tma'n Jesús tu'n t-xi q'o'n twa.

⁵⁶Atzun qe tman nimtoq in che lab'in ti'j; ex xi tma'n Jesús kye tu'n mi'n txi kyma'n kye xjal ti'j ju otoq tb'incha.