Read kumam Lucas 9 Bible Online

Lucas 9 - kumam bible

Lucas 9

¹E tzaj ttxko'n Jesús qeju kab'laj t-xnaq'tzb'en, xi tq'o'n kyipumal ex kyoklen tu'n kyetz qe ju'ẍ tuj kyanmi xjal kyu'n, ex tu'n kyb'ant qe yab' kyu'n;

²e je'x t-sama'n tu'n kypakb'an ti'j tkawb'il Dios, ex tu'n kyb'anix yab' kyu'n.

³Ex xi tma'n kye: —Mi jun txi kyi'ne tuj kyb'eye, mi tze', mi pa, mi wab'j, mi pwaq; ex mi'n txi kyi'ne kab'e kykamiẍe.

⁴Ex alkye jun ja ma knet kyu'ne te kyposadiye, axtzun che posadiyile, maxitzun che ik'ele okxi kyetze tuj tnam.

⁵Ex alkye jun tnam jatum minti' ma che k'mete kyu'n xjal, kyetze tuj kytanmi, ex kychto'mele quq ti'j kyqane te jun yek'b'il qa mya b'a'n qe, chi Jesús kye.

⁶E je'xtzun, in che b'et kyuj kykyaqil tal tnam, in che pakb'an ti'j tqanil kolb'il, ex in che b'anix qe yab' kyu'n tuj tkyaqil lugar.

⁷O tb'i gobernador Herodes ti'j tkyaqilju in tb'incha'n Jesús; ex nim o jolpaje' tk'u'j, porke in kyma'n junjun xjal: —Ate Juan ma jatz anq'in kyxol kyimni;

⁸Ex txqantl in kyma'n: —Ma kub' tyek'un tib' Elías aju t-sanjel Dios; Ex txqantl in kyma'n: —Ma jaw anq'in jun kye t-sanjel Dios e ten ojtxi, che chi xjal.

⁹Atzunte Herodes tma: —Ate Juan el wi'ne twi'. ¿Alkyetzun ju xjal lu in nb'i'ne in che yolin kykyaqil xjal ti'j? Chi Herodes. Ex o tajb'e Herodes tu'n tke'yinte twitz Jesús.

¹⁰Tej kyajtz meltz'aj qe apostol, xi kytx'olb'a'n te Jesús tkyaqil aju kyb'incha. E je'xtzun ti'n Jesús tuk'il, el laq'e' kyi'j xjal, e je'x tuj jun tnam Betsaida tb'i.

¹¹Ex tej kyb'inte xjal, e je'x lpe' ti'j Jesús; ex e k'met tu'n, ex xi tma'n kye ti'j tkawb'il Dios, ex in che b'ant qe yab' tu'n.

¹²Ex ch'ixtoq tex q'ij, e tzaj laq'e' qeju kab'laj t-xnaq'tzb'en, ex xi kyma'n te Jesús: —Samanxa qe xjal tu'n kyxi' kyuj aldey ex tuj kyja xjal ate' niqayin, tu'n tknet kyposad ex tu'n tknet kywa; porke ato' tuj jun lugar minti' kynajb'il xjal tuj, che chi.

¹³Xi tma'n Jesús kye: —Kyq'onxe kywa. Atzun kye xi kyma'n te: —Noq o'kx jwe' wab'j at quk'ile ex kab'e kyiẍ, o'kx qa ma qo'xe laq'ol wab'j tu'n kywa'n kykyaqil xjal lu, che chi.

¹⁴Porke b'alo jwe' miltoq xinaq. Xitzun tma'n Jesús kye t-xnaq'tzb'en: —Kymanxe kye xjal tu'n kykub' qe' tuj tnejin te 50 junjun tnej.

¹⁵Xitzun kyma'n kye xjal, ex e kub' qe' kykyaqil xjal kyu'n.

¹⁶Jawtzun ttzyu'n Jesús aqeju jwe' wab'j kyuk'ix kab'e kyiẍ, jaw tke'yin twitz kya'j xi tq'o'n chjonte te Dios kyi'j ex e kub' tpiẍk'u'n, ex xi tq'o'n kye t-xnaq'tzb'en tu'n t-xi kysipan kye xjal.

¹⁷E wa'ntzun kykyaqil ex e b'aj noj; ex jaw kychmo'n kab'laj chi'l ttx'aqan wab'j kyaj ten.

¹⁸At jun q'ij xi' Jesús na'l Dios, kyuk'ix qe t-xnaq'tzb'en e je'x tuk'il; ex xi tqanin kye: —¿Chi tok kyu'n xjal wi'je? ¿Alkye qine, che chi xjal?

¹⁹Xi kytzaq'we'n t-xnaq'tzb'en: —At junjun xjal in kyma'n qa aya Juan aju e b'yan xjal tu'n; ex txqantl xjal in kyma'n qa aya Elías; ex txqantl in kyma'n, ma jaw anq'in jun kye t-sanjel Dios e ten ojtxi.

²⁰Xitzun tma'n Jesús kye: —¿Yajtzun kyeye, alkye qine tuj kywitze? Xi ttzaq'we'n Simón Pedro: —Aya ju Crist ma tzaj sama'na tu'n Dios.

²¹Ex xi tma'n Jesús kye ex xi tkyuwsa'nxix tu'n mi'n t-xi kyma'n jlu kye xjal.

²²Ex xi tma'n kye: —Ilxix ti'j tu'n tik'x nimku wu'ne, aqine sk'o'maj qine tu'n Dios tu'n ntene kyuk'il xjal, ex il ti'j tu'n wel ik'une kyu'n kytijil xjal, ex kyu'n nejenel kye pal ex kyu'n xnaq'tzal ti'j ley; ex tu'n nkub' b'yo'ne, ex tu'n njatz anq'ine tuj toxin q'ij, chi Jesús kye.

²³Ax ikx xi tma'n kye kykyaqil: —Qa at jun xjal tajb'il tu'n tok lpe' wi'je, xk'ayink tib' teju tex tajb'il, q'inx tcrus tkyaqil q'ij, ex lpe'k wi'je.

²⁴Ex alkye jun xjal o'kx tok tk'u'j ti'j tu'n tten tchwinqlal twitz tx'otx', mlay tkamb'a aju chwinqlal in tzaj tq'o'n Dios; ex alkye jun xjal tq'on tib' tu'n tnaj tchwinqlal twitz tx'otx' noq tu'n nlaje, ok tkamb'a' aju chwinqlal in tzaj tq'o'n Dios.

²⁵Ex ¿ti tajb'en te xjal qa ma tkamb'a tkyaqilju at twitz tx'otx' ex qa ma naj tu'nx tib'?

²⁶Ex alkye ma ch'ixwi wi'je ex ti'j nyole, ax ikx weye chin jawil ch'ixwiye ti'j ok wule in chin qoptz'aje tu'n t-spik'umal Nmane ex tu'n kyspik'umal qe anjel xjan, aqine sk'o'maj qine tu'n Dios tu'n ntene kyuk'il xjal.

²⁷Ax tok in xi nma'ne kyeye, at junjun ate' tzalu k'okel kyke'yin tkawb'il Dios na'nxtoq kykyim.

²⁸Otoq b'ant wajxaq q'ij tb'ajlen tma'n Jesús ju yol lu, xi uk'in Pedro tu'n Jesús tuk'ix Juan ex Jacobo, jax twi witz na'l Dios.

²⁹Matoq in na'n Dios o ch'expaj tilb'ilal, ex puro saq ok t-xb'alun, in qoptz'aj wen.

³⁰Ex lu kab'e xinaq kub' kyyek'un kyib' in che yolin tuk'il Jesús, atoq Moisés tuk'ix Elías;

³¹in che qoptz'aj wen, in che yolin ti'j tkamik Jesús, ex atzun tu'n tkyim tuj Jerusalén.

³²Atzunte Pedro ex qeju ate'toq tuk'il otoq tzaj kywatl; ex el kywatl, ex o kyil t-spik'umal Jesús ex kyuk'ix qe kab'e xinaq ate'toq tuk'il.

³³Ex ch'ixtoq tel kypa'n kyib' xinaq ti'j Jesús, xi tma'n Pedro te: —Xnaq'tzal, b'a'n ax tu'n qten tzalu. E tjaw qb'incha'ne ox tal ja t-xaq tze'yin kywi': jun teya, jun te Moisés, ex jun te Elías, chi Pedro. Pero minti' b'a'ntoq tu'n Pedro ti in tma'n.

³⁴Matoq in yolin Pedro, tzaj jun muj, kub' ten muj kyib'aj; ex nim e xob' tej kyten tuj muj.

³⁵Ex at jun tzaj yolin tuj muj in tma'n: —Atzun Nk'wa'le jlu, sk'o'maj wu'ne; kyb'inxe tyol.

³⁶Tejtzun tb'aj ju yol lu, o kyil xnaq'tzb'en tjunalxtoq Jesús at; ex minti' e q'ajt, ex minti' xi kyma'n kye xjal ti'j ju otoq kyil.

³⁷Te juntl q'ij, tej kyku'tz twi witz, nim xjal e je'tz kanul ti'j Jesús.

³⁸Ex at jun xinaq kyxol xjal jaw sch'in, ex tma: —Xnaq'tzal, chin kub'sale twitza tu'n tok tke'yina nk'wa'le, porke o'kx junx nk'wa'le at;

³⁹in tzyet tu'n ju'ẍ ex minab'en in jaw sch'in k'wa'l, in tzaj tuj twitz tu'n ju'ẍ, ex in swakin tuj ttzi' tu'n, nim in k'ixb'i k'wa'l tu'n, ex peni nne'l tpa'n tib' ju'ẍ ti'j k'wa'l.

⁴⁰Ex ma chin kub'sane kywitz t-xnaq'tzb'ena tu'n tetz ju'ẍ kyu'n tuj k'wa'l, pero minti' xb'ant kyu'n, chi xjal.

⁴¹Xitzun ttzaq'we'n Jesús: —Aqeye, minti' in xi kyoksla'ne ex minti' nne'x tuj kywi'ye. ¿Jte' q'ij tu'n ntene kyuk'ile ex tu'n kyik'xe wu'ne? Q'intza tk'wa'la tzalu, chi Jesús.

⁴²Matoq in tzaj laq'e' k'wa'l, kub' xo'n tu'n ju'ẍ, ex tzaj juntl maj tuj twitz tu'n; pero xi mayo'n ju'ẍ tu'n Jesús ex kyaj b'anix k'wa'l tu'n, ex xi tq'o'n juntl maj te tman.

⁴³Ex kykyaqil xjal e lab'in ti'j tipumal Dios nim. Ex in che lab'intoq xjal ti'j tkyaqilju in tb'incha'n Jesús, ex xi tma'n kye t-xnaq'tzb'en:

⁴⁴—Tz'okxwit tuj kywi'ye aju yol lu; chin xel q'o'ne tuj kyq'ab' xjal, aqine sk'o'maj qine tu'n Dios tu'n ntene kyuk'il xjal.

⁴⁵Pero minti' el kynik' xnaq'tzb'en ti'j ju yol lu, tu'nju na'nxtoq ttzaj yek'un kye tu'n tel kynik' ti'j; ex e xob' tu'n t-xi kyqanin ti'j ju yol lu.

⁴⁶E oktzun ten t-xnaq'tzb'en yolil ti'j, in kyma'n kyxolx alkye mas at toklen kyxol.

⁴⁷Ex el tnik' Jesús ti'j ju in che ximan ti'j tuj kyanmi. Tzajtzun ti'n Jesús jun k'wa'l kub' tq'o'n ttxlaj,

⁴⁸ex xi tma'n kye: —Alkye jun xjal ma k'monte ju k'wa'l lu tu'nju at tk'ujlalil xjal wi'je, aqine in chin tk'mo'n; ex alkye jun xjal ma chin k'monjtze tu'n, ax ikx in k'monjtz Nmane tu'n, aju tzaj samante weye; porke aju mas ch'in kyxole, atzunju mas ma' toklen.

⁴⁹Atzunte Juan xi tma'n te Jesús: —Xnaq'tzal, ma qile jun xjal in ajb'en tb'iya tu'n tu'n kyetz qe ju'ẍ tuj kyanmi xjal tu'n, ex mya a jun quk'ile, kyja'tzun xi qmayo'ne, porke mya quk'ile in b'et, chi Juan.

⁵⁰Xi tma'n Jesús te: —Mi'n txi kymayo'ne; porke alkyeju minti' in q'ojl qi'j, axtzun quk'ilju.

⁵¹Tej ch'ixtoq tpon tq'ijlalil tu'n taj Jesús tuj kya'j, o tkyuwsa tk'u'j tu'n t-xi' tuj Jerusalén.

⁵²E je'x t-sama'n junjun sanjel tu'n kyxi' nej twitz, e pontzun tuj jun tal tnam kye aj Samaria tu'n tknet tposad Jesús kyu'n.

⁵³Ex minti' k'met Jesús kyu'n aj Samaria, porke o kyil kyja' t-xi' tuj Jerusalén.

⁵⁴Tej kylonte Jacobo tuk'ix Juan minti' k'met Jesús kyu'n xjal, xi kyma'n te: —Tat, ¿tajpeya tu'n t-xi qma'ne tu'n tku'tz q'aq' twitz kya'j tu'n kynaj xjal lu, ik tza'n tb'incha Elías?

⁵⁵Aj meltz'aj twitz Jesús kyuk'il, e je'x tmayo'n ex tma: —Minti' nne'l kynik'e ti'j tza'n tten kyanmiye;

⁵⁶porke minti' ma chin ule tu'n kynaj xjal, noq o'kx tu'n kyklet wu'ne, aqine sk'o'maj qine tu'n Dios tu'n ntene kyuk'il xjal. E je'xtzun tuj juntl tnam.

⁵⁷Kyja'toq kyxi' tuj b'e, at jun xjal xi tma'n te Jesús: —Tat, chin okel lpe'ye ti'ja noq jatum ma txi'ya.

⁵⁸Atzunte Jesús xi tma'n te: —Qe wech at kyjul, ex qe chyu'j at kyq'u'; atzun weye, minti' jatum tu'n nkub' tane, aqine sk'o'maj qine tu'n Dios tu'n ntene kyuk'il xjal, chi Jesús te.

⁵⁹Ex xi tma'n Jesús te juntl xjal: —Lpe'ka wi'je. Atzunte xjal xi ttzaq'we'n: —Tat, chin tyoma nej, nej kyjel nmaqu'ne nmane.

⁶⁰Xi tma'n Jesús te: —Q'onkja kye kyimni tu'n kyku'x kymaqu'n kykyimni; atzun teya, b'et-xa ex pakb'anxa ju yol ti'j tkawb'il Dios.

⁶¹Ax ikx xi tma'n juntl: —Tat, chin okel lpe'ye ti'ja; ex chin tyoma nej, che kyjel nq'olb'e'ne qeju ate' tuj njaye.

⁶²Ex xi tma'n Jesús te: —Alkye jun xjal ma tzyet tqan punt tu'n ex in aj tke'yin ti'jxi, mlay tz'ajb'en tu'n taq'nan tuj tkawb'il Dios.