Read kumam Deuteronomio 1 Bible Online

Deuteronomio 1 - kumam bible

Deuteronomio 1

¹Atzun qe yol lu xi tma'n Moisés kye kykyaqil aj Israel tej kyten tuj tzqij tx'otx' tuj tumlal tjawitz q'ij te nima Jordán, tuj tx'otx' Arabá. Atzun ta' lugar lu twitz Suf, kyxol qe tnam Parán, Tofel, Labán, Hazerot ex Dizahab.

²Tu'n qtzaj t-xe witz Horeb tu'n qul tuj Cades-barnea, junlaj q'ij b'e qa ma qo tzaj tuj b'e tuj tiwitz tx'otx' Seir.

³O yolin Moisés kyuk'il aj Israel tuj tnejel q'ij te tjunlajin xjaw, tb'ajlenxi 40 ab'q'i kyetzlen tuj Egipto, ex xi tma'n kye alkye tu'n kyb'inchante ik tza'nx otoq tzaj q'ma'n te tu'n Qman.

⁴Atzun jlu o b'aj tkub'lenxi ti'j Sehón aju rey kye aj Amorreo, aju najl tuj tnam Hesbón, ex tkub'lenxi ti'j Og aju rey tuj tx'otx' Basán, aju najl tuj tnam Astarot ex tuj tnam Edrei.

⁵Atzun kub' ten Moisés chik'b'alte ley lu tuj tumlal tjawitz q'ij te nima Jordán tuj tx'otx' Moab, ex tma:

⁶—T-xe witz Horeb o tzaj tma'n Qman Dios qe kyja': Ma b'et-xi q'ij ma che tene t-xe witz lu.

⁷Kyb'incham kytene ex kyxi'ye tuj tiwitz tx'otx' kye aj Amorreo ex kyuj qe tx'otx' niqayin ate' ttxlaj: tuj tx'otx' Arabá kyxol witz ex t-xe witz, ex tuj tx'otx' Néguev, ax ikx tuj tx'otx' ttzi Nintz mar aju kytanmi aj Canaán, ax ikx tuj Líbano, okxi kypon b'aje max ttzi nima Éufrates.

⁸O txi nq'o'ne tx'otx' lu te kyeye; kyxi'ye ex kyoke tajwil, ex tziyimaj wu'ne kye kyxe'chele: te Abraham, te Isaac, te Jacob, ex kye kyiyjil che ul itz'j te tib'ajxi, chi Qman, chi Moisés.

⁹Ax tuj tq'ijlalil lu o txi nma'ne kyeye kyja': Mlayx b'ant tu'n kykyaj tene tuj nkwente njunalxe.

¹⁰Nimku kyk'wa'le o tzaj tq'o'n Qman Dios, ja'lo ma chmet kyb'aje, ik tten kyajlale ik tza'n qe che'w twitz kya'j.

¹¹Chmet-xwit nimxix kyajlale tu'n Qman aju Kydios kyxe'chele, ex che kub'xwit ky'iwla'ne tu'n ik tza'nx o tzaj ttziyan.

¹²Qa o'kx qine, ¿tza'n tten tu'n tk'isj tkyaqil iqtz wu'ne, tu'n t-xi nb'incha'ne kyi'je ti'j tkyaqil mya b'a'n in tzaj kyxole, kyuk'ix qe q'oj?

¹³Kyja'tzun xi nma'ne kyeye: Kysk'o'n jawe kyxol kykyaqil k'loj kyiyjile, junjun xinaq at kynab'l, at kysek'al ex at kyojtzqib'l, tu'ntzun kyok nq'o'ne te nejenel kyxole.

¹⁴Atzun kyeye tzaj kytzaq'we'ne weye: B'a'n ma tz'ela tuj qwitze tu'n tb'ant aju ma tzaj tma'na.

¹⁵Tzajtzun wi'ne junjun xinaq kyxole, aqeju at nimxix kynab'l ex at kyojtzqib'l, ex xi nq'o'ne kyoklen tu'n kykawin kyib'aje. At junjun xi nq'o'ne mil xjal tuj tkwent, junjuntl 100; junjuntl 50; ex at junjuntl xi nq'o'ne laj xjal tuj tkwent; ax ikx at junjuntl e jo'k nq'o'ne te kawil kyib'aj junjun k'loj kyeye.

¹⁶Tujx tq'ijlalil lu xi nma'ne kye jwes kyja': Kyb'inxe kyyol kykyaqil ex kyb'inchanxe kyi'j tuj tumelxix, tza'nx kyi'j qe kyxjalile ax ikx kyi'j qe stranjer xjal ate' kyxole.

¹⁷Ok kyok xjal tuj xtis kyu'ne, mi'n tz'ok kyq'o'ne kywitze ti'j ju kyxilen; noq o'kx kyb'inchanxe kyi'j kykyaqil, qa ch'in kyoklen ex qa ma'. Mi jun tu'n kyxob'e kywitz, porke te te Dios aju kawb'il. Qatzun at jun ma pon kyuk'ile ex mlay b'ant ti'j kyu'ne, kysamantze wuk'ile, jakutzun txi nb'incha'ne ti'j tzalu, nchiye kye.

¹⁸Tujx tq'ijlalil lu xi nma'ne kyeye tkyaqil alkye tu'n kyb'inchanteye.

¹⁹Tejtzun qetz tuj Horeb, atzun o qo tzaj tuj b'e in xi' kyuj tiwitz tx'otx' kye aj Amorreo ik tza'n tzaj tma'n Qman Dios qe. B'aj qb'etin tkyaqil tzqij tx'otx' ma'xix ex xob'ajilxix ik tza'n o kyile, max tejxi qul tuj lugar Cades-barnea.

²⁰Xitzun nma'ne kyeye kyja': Ma qo ul ttxa'n tiwitz tx'otx' kye aj Amorreo, aju ktzajel tq'o'n Qman Dios qe.

²¹Ktzajel tq'o'n Qman Dios aju tx'otx' lu te qe. Chux qeye, kytzyume ik tza'nx o tma Qman aju Kydios kyxe'chele. Mi'n che xob'e ex mi'n b'aj kyk'u'je.

²²Atzun kyeye tzaj kyma'ne weye kyja': Maslo b'a'n atwit junjun qe ẍe'x nej ke'yilte tx'otx', ex tu'n kyul q'malte qe alkye b'e tu'n t-xi qi'n, ex alkye qe tnam tu'n qokx kyuj.

²³B'a'n ela tuj nwitze aju tzaj kyma'ne weye, ex jaw nsk'o'ne kab'laj xinaq kyxole, jun kyxol junjun k'loj kyiyjile.

²⁴Kub'tzun b'e kyu'n, e jax tuj tiwitz tx'otx' tejxi kypon tuj chq'ajlaj Escol, ex b'aj kyb'etin tkyaqil tx'otx'.

²⁵Tzaj kyi'n junjun twitz awal at tuj tx'otx' lu, ex tej kyul meltz'aj tzaj kyma'n kyja': Tb'anilxix aju tx'otx' ktzajel q'o'n qe tu'n Qman Dios, che chi.

²⁶Atzun kyeye, minti' kub' tuj kywitze tu'n kyxi'ye k'molte te, minti' xi kynimane aju otoq tzaj tma'n Qman Dios,

²⁷e jaw wululune tuj kyjaye ex o kymaye kyja': Minti'tl taj Qman qi'j ja'lo; o qo etz ti'n tuj Egipto noq tu'n qxi tq'o'n tuj kyq'ab' aj Amorreo ex tu'n qkub' b'aj kyu'n.

²⁸¿Jatum qo xe'l klol qib' ja'lo? Porke qe xjal ate' ma chixin mas nim kyipun ex mas matij kywa'l qwitz, ex ma' kywa'l qe muro kyok kyi'j kytanmi. Ax ikx ma qile qe tiyjil Anac ma' kywa'l, che chi. Tu'n tlaj tkyaqil jlu, b'i'x ma tzaj b'aj qk'u'je, che chiye.

²⁹Atzun weye xi nma'ne kyeye: Mi'n tzaj b'aj kyk'u'je ex mi'n che xob'e kywitz.

³⁰Ate Qman Dios kb'el nej kywitze, ex a k'okel ten q'ojlel te kyxele ik tza'n o kyile aju o tb'incha tuj Egipto

³¹ex tuj tzqij tx'otx'. A Qman Dios tzaj ẍaqlunte kyeye tuj tkyaqil b'e jatum o che b'ete tejxi kyule tuj lugar lu, ik tza'n jun mamb'aj ẍaqlu'n tk'wa'l tu'n.

³²Maske ikju, pero minti' ok qe' kyk'u'je ti'j Kymane aju Kydiose;

³³aju kub' nej kywitze tuj b'e tu'n tjaw t-sk'o'n aju lugar jatum tu'n kykub' tene. Te qonik'an tzaj tyek'un kyb'eye tu'n tqan q'aq', atzun q'ijl tzaj tyek'un kyb'eye tu'n muj.

³⁴Tej tb'inte Qman aju kyyole tej kyjaw wululune, tzaj nim tq'oj kyi'je ex tma jun tyol axix tok kyja':

³⁵Kyxol qe xjal mya b'a'n lu, mi jun ok tila' aju tb'anil tx'otx' xi ntziyane kye kyxe'chel;

³⁶o'kx Caleb aju tky'ajal Jefone ok tila'; ex kxel nq'o'ne te ex kye tiyjil aju tx'otx' o b'aj tb'etin tuj, tu'nju o b'et tz'aqlxix nwitze, chi Qman.

³⁷Noq tu'n kyeye kylaj jaw q'ojl Qman wi'je, ex tzaj tma'n weye kyja': Ax ikx teya mlay tz'okxa tuj tx'otx' lu;

³⁸aju k'okex, atzun Josué aju tky'ajal Nun ex onil teya. Kyuwsanxa tk'u'j, ex atzun kxel sipante kytx'otx' aj Israel.

³⁹Atzun qe kyk'wa'le, aqeju na'nx tel kynik' ti'j alkye b'a'n ex alkye mya b'a'n, aqeju o kymaye kyi'j qa tu'n kyxi q'i'n kyu'n qe aj q'oj kyi'je, alpe qe che okex tuj tx'otx' lu; wu'ne kxel nq'o'ne kye tu'n kyok te tajwil.

⁴⁰Atzun kyeye, kyaj meltz'aje juntl maj tuj tzqij tx'otx', ex kyxi'ye juntl maj jatum ta' mar Kyaq Ke'yin, chi Dios.

⁴¹Tzajtzun kytzaq'we'ne: Ma qo b'inchane il twitz Qman, atzun ja'lo qo xe'le q'ojlel ik tza'nx o tma Qman Dios qeye, che chiye. Xitzun kyi'ne qe kymakb'ile in che ajb'en tuj q'oj; tuj kywitze mya kyuw tu'n kyjaxe kyuj qe tiwitz tx'otx'.

⁴²Atzunte Qman tzaj tma'n weye kyja': Q'manxa kye tu'n mi'n kyxi' q'ojlel, tu'ntzun mi'n tkub' kyi'j kyu'n qe aj q'oj kyi'j, ex mi a'l qine kyuk'il.

⁴³Xitzun nma'ne kyeye tu'n mi'n kyxi'ye, ex minti' xi kyb'i'ne ex minti' xi kynimane aju tzaj tma'n Qman; e jaxe kyuj qe tiwitz tx'otx' tuk'il kynimb'il kyib'e.

⁴⁴E je'tztzun qe aj Amorreo q'ojlel kyi'je, aqeju najl kyuj tiwitz tx'otx'; e jo'k lpe' kyi'je ik tza'n in kyb'incha'n ttxu aq, ex e kub'e kyu'n, xi'x qe' tuj Seir ex pon b'aj tuj tx'otx' Horma.

⁴⁵Tejtzun kyul meltz'aje, e jaw oq'e twitz Qman ex minti' tzaj tb'i'n tq'ajq'ajel kywi'ye, ex minti' tzaj tq'o'n twi' kyi'je.

⁴⁶Kyja'tzun, ax e kyaj tene najal nimku q'ij tuj tx'otx' Cades.