Read kumam Deuteronomio 10 Bible Online

Deuteronomio 10 - kumam bible

Deuteronomio 10

¹Tujtzun q'ij lu tzaj tma'n Qman weye: Jaso'n b'aja kab'e tz'lom ab'j ik tza'n qeju e b'ant nej, b'inchama jun kax tz'lom tze', ex tjatza twi witz tu'n tyolina wuk'ile.

²Kb'el ntz'ib'ane kywitz ab'j lu ax qe yol tz'ib'an wu'ne nej kywitz qeju e kub' tb'uchina, ex che b'elex tk'u'na tuj kax.

³Kub'tzun nb'incha'ne jun kax ti'j tze' ch'i'x acacia, b'aj njaso'ne kab'e tz'lom ab'j ik tza'nx qe otoq b'ant nej, ex e jax wi'ne twi witz.

⁴Kub' ttz'ib'an Qman qe laj mandamyent kywitz kykab'il tz'lom ab'j, ik tza'n tz'ib'antoq tu'n nej, ex ik tza'n tzaj tma'n kyeye tej ttzaj yolin kyuk'ile tuj tqan q'aq' twi witz, tej tb'aj kychmon kyib'e. E tzajtzun tq'o'n Qman weye,

⁵atzun weye in ajtz meltz'aje twi witz ex e ku'x nk'u'ne qe kab'e tz'lom ab'j tuj kax, aju otoq b'ant wu'ne ik tza'nx otoq tzaj tma'n Qman weye. Ex lu qe ax kyku'x ja'lo.

⁶(E je'tztzun qe aj Israel tuj lugar Beerot-bene-jaacán tu'n kypon tuj lugar Mosera. Atzun kyim Aarón, ex ax ku'x maqu'n; atzunte Eleazar ok te pal te t-xel qtzan tman.

⁷E je'tztzun tuj Mosera tu'n kypon tuj lugar Gudgoda, ex e ik'tzun tuj Gudgoda tu'n kypon tuj lugar Jotbata, atzun lugar lu at nim a' tuj.

⁸Atzun q'ij tej tjaw t-sk'o'n Qman qe tiyjil Leví, tu'n t-xi kyiqan aju kax k'ub'l tley Dios, tu'n kykub' ten twitz Dios tu'n kyajb'en te, ex tu'n kyky'iwlanjtz xjal kyu'n tuj tb'i Qman, ik tza'n kukx tb'ant kyu'n ja'lo.

⁹Kyja'tzun, minti' xi q'o'n jun piẍ tx'otx' kye tiyjil Leví tu'n tok te kyetzb'il, ik tza'n xi q'o'n kye kyiyjil kyerman, porke ate Qman k'okel te kyetzb'il ik tza'nx o tma Qman kye.)

¹⁰Atzun weye in tene twi witz 40 q'ij ex 40 qonik'an, ik tza'n tuj tnejel maj; ax ikx in tzaj b'i'ne juntl maj tu'n; kub' tuj twitz tu'n mi'n kynaje tu'n,

¹¹ex tzaj tma'n weye: Chux txi'ya, nejkuya kywitz xjal tu'n kyxi' ex tu'n kyok tajwil tx'otx' aju xi ntziyane kye kyxe'chel.

¹²Ja'lotzun aqeye aj Israel: ¿Alkye in tqanin Qman Dios kyeye? Atzun in tqanin, tu'n t-xi kynimane, tu'n kyok lpe'ye ti'j tuj tkyaqil, tu'n kyk'ujlanteye, tu'n kyajb'ene te tu'n tkyaqil kyk'u'je ex tu'n tkyaqil kyanmiye,

¹³ex tu'n kyjapun qe tmandamyent ex qe tley kyu'ne, aqeju in che'x nma'ne kyeye ja'lo, tu'ntzun tel b'a'n kyeye.

¹⁴Che ximane ti'j jlu: Ate Qman Dios tajaw kya'j ex tajaw tkyaqil jatum ponin b'aj kya'j, ex ax Qman tajaw tx'otx' ex tkyaqilju at twitz.

¹⁵Maske ikju, ex o'kx kyi'j kyxe'chele o pon tgan Qman, e tk'ujla ex te tib'ajxi e jaw t-sk'o'n kyiyjil kyxol qe txqantl nasyon, ik tza'n in kyile ja'lo; atzun qeye kyiyjil.

¹⁶Kyq'o'nkxe tuj kyanmiye aju techal ti'j yol kyaj b'ant ti'j tu'n Qman kyuk'ile, ex mya kukx tu'n tkub' kykyuwsa'n kyanmiye,

¹⁷porke ate Qman Dios ma'xix toklen kywitz qeju in che ok kyq'o'n xjal te kydios ex ax kyajaw kykyaqil qeju in che ok kyq'o'n xjal te kyajaw; porke ate jun Dios ma'xix toklen, nimxix tipumal ex xob'ajilxix, minti' nno'k tke'yin Dios aju t-xilen xjal, ex minti' in xi tk'mo'n pwaq tu'n t-xi b'incha'n kyi'j xjal at kyil,

¹⁸in xi tb'incha'n kyi'j qe k'wa'l minti' kyman ex minti' kytxu', ax ikx kyi'j qe meb'a xu'j, in che tk'ujla'n qe stranjer xjal najl kyxole, ex in xi tq'o'n kywa ex kyxb'alun.

¹⁹Kyja'tzun kyk'ujlame qe stranjer xjal, porke ikx kyeye stranjer xjal qeye tej kytene tuj Egipto.

²⁰Tenx tchiylal Qman Dios tuj kywitze, o'kx te che ajb'ene, che lpe'ke o'kx ti'j, ex o'kx tb'i Qman ktzajel kyna'ne ti'j kyyole ok t-xi kytziyane.

²¹Atzun Kydiose, ex atzunju kjawil kynimsa'ne tb'i; xob'ajilxix, ex ma'xix kyoklen qe tb'inchb'en o tb'incha kyi'je ex o kyile tu'n kywitze.

²²Tej kypon qe kyxe'chele tuj Egipto noq 70 kyb'aj, atzun ja'lo tu'n Qman ma chmet kyb'aje ik tza'n qe che'w twitz kya'j nimxix kyajlal.