Read kumam Deuteronomio 12 Bible Online

Deuteronomio 12 - kumam bible

Deuteronomio 12

¹Atzun qe ley lu ex qe xnaq'tzb'il il ti'j tu'n kyjapun kyu'ne tkyaqil q'ij ok kytene tuj tx'otx' aju tzaj ttziyan Qman Dios kye kyxe'chele tu'n tok te kyetzb'ile.

²B'i'x che b'ajel kyxitune te jumajx kykyaqil lugar jatum in che k'ulun qe xjal kywitz kydios, aqeju k'elel kyi'ne kytx'otx' tu'n tok te kyetzb'ile: Che b'ajel kyxitune qe lugar lu kywi' qe nmaq witz, kywi' qe tal witz ex kyjaq' qe tze' nim kyxaq.

³Kyxitun kub'e qe ky-altar, kypa'n kub'e qe ab'j b'inchamaj kyu'n te kydios tu'n kyk'ulun kywitz, kypatun kub'e qe kydios b'inchamaj kyu'n ti'j tze', ex kyq'uchin b'aje qe tilb'ilal kydios; kykyaqil qe jlu b'i'x che najel kyu'ne, tu'ntzun mi'n kytzaj na'ntl kyu'n xjal.

⁴Mi'n che k'ulune twitz Qman Dios noq tuj alkyex lugar.

⁵Ax kyxol kab'laj k'loj kyiyjile, kjawil t-sk'o'n Qman jun lugar jatum tu'n tten tnajb'il ex te nab'l tb'i, ex tujtzunju lugar lu b'a'n tu'n kyxi'ye k'ulul twitz.

⁶Atzun kpol kyi'ne qe alumaj tu'n kykub' patit te oyaj, qe alumaj te chojb'il, qe tlaji'n, qe kyoyaje yek'un in xi' twitz Qman, qe oyaj kxel kytziyane te Qman, ex qe txqantl oyaj tu'n kyexe kygan kxel kyq'o'ne, ax ikx qe kynejel kyal kywakẍe ex qe kynejel kyal kyẍne'le.

⁷Atzun che wa'le twitz Qman Dios, ex che tzalajele ti'j twitz kyaq'unb'ene junx kyuk'il qeju ate' tuj kyjaye, tu'nju otoq che kub' ky'iwla'ne tu'n Qman Dios.

⁸Mi'n kyb'inchaye ik tza'n in qb'incha'n ja'lo, teylex te junjun in tb'incha'n aju b'a'n tuj twitz,

⁹tu'nju na'nx kypone tuj lugar te ojlab'l tuj kyetzb'ile, aju ktzajel tq'o'n Qman Dios kyeye.

¹⁰Ex kyik'xlenxiye tuj nima Jordán, ex ok kynajane tuj tx'otx' aju ktzajel q'o'n te kyetzb'ile tu'n Qman Dios, ok t-xi kykolin aj q'oj tu'n kyq'ojin kyi'je, aqeju txolin kyi'je kyu'n, ex ok kytene minti'tl xob'ajil kyi'je,

¹¹kpoltzun kyi'ne tkyaqilju o txi nma'ne kyeye tuj lugar kjawil t-sk'o'n Qman Dios te nab'l tb'i: Qe alumaj patun in che kub', qe chojb'il, qe tlaji'n, qe kyoyaje yek'un in xi' twitz Qman, ex tkyaqil oyaj tb'anilxix kxel kytziyane te Qman,

¹²ex che tzalajeltzune twitz Qman Dios junx kyuk'il qe kyky'ajale ex qe kyme'jele, qe kymajene xinaq ex qe kymajene xu'j, kyuk'ix qe aj Leví najl kyxole, ex mi'n tzaj q'o'n jun piẍ tx'otx' te kyetzb'il qe aj Leví, ik tza'n kyeye.

¹³Kyq'onke kwent kyi'je tu'n mi'n tkub' kypatune alumaj te kyoyaje tuj noq alkyexku lugar;

¹⁴noq o'kx che pole q'olte kyoyaje tuj lugar kjawil t-sk'o'n Qman kyxol kab'laj k'loj kyiyjile. Atzun kb'antel kyu'ne tkyaqilju ma txi nma'ne kyeye.

¹⁵Maske ikju, ex b'a'n tkub' kyb'yo'ne alumaj ex b'a'n t-xi kychyo'ne noq tuj alkyex lugar jatum najl qeye, noq alkyex q'ij kyajb'ile ex noq alkyex ktzajel q'o'n kyeye tu'n Qman Dios. Qa tz'il qeye ex qa saq qeye ik tza'n in tma'n ley, b'a'n tu'n t-xi kychyo'ne, ik tza'n in xi chyo't tchib'jal masat.

¹⁶Atzunju tchk'el mi'n txi kychyo'ne, ax kb'el kyqo'ne twitz tx'otx' ik tza'n a'.

¹⁷Mi'n txi kywa'ne kyuj qe kytanmiye aju tlaji'n ti'j twitz kytriwoye, mi'n txi kyk'a'ne aju tlaji'n ti'j ta'l twitz ky-uvaye, ex mi'n txi kychyo'ne aju tlaji'n ti'j kychi'ye aseyt, mi qe kynejel kyal kywakẍe, mi qe kynejel kyal kyẍne'le, mi qe oyaj in che'x kytziyane te Qman, mi qe txqantl oyaj tu'n kyexe kygan in che'x kyq'o'ne.

¹⁸Che nik'b'ele kyi'j jlu twitz Qman Dios tuj lugar kjawil t-sk'o'n kyxole. Kykyaqile che wa'le, che k'a'le ex che chyo'le kyi'j, kyuk'il qe kyky'ajale, qe kyme'jele, qe kymajene xinaq, qe kymajene xu'j ex qe aj Leví najl qe kyxole. Junx che tzalajele kykyaqile twitz Qman Dios ti'j kyaq'unb'ene.

¹⁹Noq jte'x q'ij che tele twitz tx'otx', mi'n tzik' kyna'l qe aj Leví kyu'ne.

²⁰Oktzun tel laq'e' kytx'otx'e tu'n Qman Dios ik tza'nx o tzaj ttziyan kyeye, qa ma tzaj tqanin kyk'u'je chib'j, b'a'n t-xi kychyo'ne noq alkyex q'ij kyajb'ile.

²¹Qatzun najchaq ate'ye ti'j lugar otoq jaw t-sk'o'n Qman Dios te nab'l tb'i, b'a'n tu'n tkub' kyb'yo'ne wakẍ te kychi'ye ex qa ẍne'l aju o tzaj tq'o'n kyeye, ex b'a'n tu'n kychyo'ne ti'j tkyaqil noq alkye kyajb'ile tuj lugar jatum najl qeye, ik tza'nx ma txi nma'ne kyeye.

²²Ik tza'n in xi kychyo'ne tchib'jal masat, ax ikx b'a'n tu'n kychyo'ne kychib'jal alumaj, qa tz'il qeye ex qa saq qeye ik tza'n in tma'n ley.

²³Ex kyq'onke kwent kyi'je tu'n mi'n t-xi kychyo'ne chik', porke tuj tchk'el alumaj ta' tchwinqlal; kyja'tzun mi'n txi kychyo'ne tchwinqlal alumaj junx tuk'il tchib'jal.

²⁴Mi'n txi kychyo'ne chik', kukx kb'el kyqo'ne twitz tx'otx' ik tza'n a'.

²⁵Mi'n txi kychyo'ne, tu'ntzun kytene b'a'n kyuk'ix qe kyk'wa'le che ul itz'j te tib'ajxi; che tele b'a'n qa ma b'ant kyu'ne aju b'a'n tuj twitz Qman.

²⁶Atzun qe kyoyaje pa'maj kyu'ne tu'n kyxi kyq'o'ne te Qman, ex aqeju otoq che'x kytziyane tu'n kyxi kyq'o'ne te, atzun che pol kyi'ne tuj lugar kjawil t-sk'o'n Qman,

²⁷ex atzun tib'aj t-altar Qman Dios che xel kyq'o'ne qe kyoyaje patun in che kub' tuk'ix kychk'el. Atzun kychk'el txqantl chojb'il in xi kyq'o'ne, k'okel kyqo'ne ti'jele t-altar, ex atzun tchib'jal b'a'n tu'n t-xi kychyo'ne.

²⁸Kyb'inxe ex japunx kyu'ne aju ma txi nma'ne kyeye, tu'ntzun kytene b'a'n te jumajx kyuk'ix qe kyk'wa'le che ul itz'j te tib'ajxi; che tele b'a'n qa ma b'ant kyu'ne aju in tzalaj Qman Dios ti'j ex aju b'a'n tuj twitz.

²⁹Ok kyb'aj naj qe nasyon tu'n Qman Dios kywitze jatum che pole tu'n kyoke tajwil kytx'otx', ok tel kyetzane kytx'otx' ex ok kynajane tuj,

³⁰ten kykwente kyi'je tu'n mi'n kyok lpe'ye kyi'j kyb'inchb'en qe nasyon lu tkub'lenxi kyi'j kyu'ne, ex mi'n kub' kyximane tu'n kyxi'ye k'ulul kywitz kydios ik tza'n kye in b'ant kyu'n.

³¹Mi'n che k'ulune twitz Qman Dios ik tza'n kye in kyb'incha'n kywitz kydios, porke ik'b'ilxix tuj twitz Qman aju kye in kyb'incha'n kywitz kydios; ajunlpe kyky'ajal ex kyme'jel in kub' kypatun te kyoyaj kywitz kydios.

³²Tz'ok tililxix kyu'ne tu'n tjapun tkyaqilju ma txi nma'ne kyeye; mi'n tz'ok kyq'o'ne juntl yol ti'j, ex mi'n tz'el kyi'ne jun yol ti'j.