Read kumam Deuteronomio 14 Bible Online

Deuteronomio 14 - kumam bible

Deuteronomio 14

¹Tk'wa'l Qman Dios qeye. Mi'n b'aj kyqesine kyximlale, ex mi'n tz'el kymatzo'ne ttzmal kywi'ye tib'aj kywitze tu'n tlaj otoq kyim jun xjal,

²porke jun tnam xjan qeye te Qman Dios; ate jaw sk'onte kyeye kyxol kykyaqil xjal twitz tx'otx' tu'ntzun kyoke te jun k'loj xjal etzan tu'n.

³Mi'n txi kychyo'ne jun txkup tz'il, aju mayo'n tu'n ley.

⁴Atzun qe txkup lu b'a'n tu'n kyxi kychyo'ne: Wakẍ, ẍne'l, chip,

⁵kyuk'ix kykyaqil wiq masat atzun kyb'i jlu: Ciervo, gacela, gamo, corzo, íbice ex antílope, ex chip ex ẍne'l te tjaq' k'ul.

⁶B'a'n tu'n kyxi kychyo'ne kykyaqil qe txkup b'a'n che kok'san kywa ex pa'n tten t-xol t-xpak'il kyqan.

⁷Ex mi'n che'x kychyo'ne qe txkup lu: Chej camey, ẍik ex cuatusa; maske in b'aj kykok'sa'n kywa, pero mya pa'n tten t-xol t-xpak'il kyqan; aqe jlu che okel kyq'o'ne te tz'il.

⁸Ax ikx qe b'och, maske pa'n tten t-xol t-xpak'il kyqan, pero minti' in b'aj kykok'san kywa; a jlu k'okel kyq'o'ne te tz'il. Mi'n txi kychyo'ne kychib'jal qe txkup lu, ex mi'n tz'ok kymako'ne kyximlal qa otoq che kyim.

⁹Kyxol qe txkup najl tuj a', b'a'n tu'n kyxi kychyo'ne qeju at kyq'ab' ex at tpwaqil kyi'j,

¹⁰ex mi'n che'x kychyo'ne qeju minti' kyq'ab' ex minti' tpwaqil kyi'j; aqe jlu che okel kyq'o'ne te tz'il.

¹¹B'a'n tu'n t-xi kychyo'ne tkyaqil txkaj chyu'j aqeju saq,

¹²o'kxku qe jlu mi'n che'x kychyo'ne: t'iw, quebrantahuesos, juntl wiq t'iw at ttzi mar,

¹³milano, tkyaqil txkaj halcón,

¹⁴tkyaqil txkaj joj,

¹⁵avestrúz, xitx', gaviota, tkyaqil txkaj q'anjan,

¹⁶tol, ibis, cisne,

¹⁷pelícano, k'utz, somormujo,

¹⁸tkyaqil txkaj garza, abubilla ex sotz'.

¹⁹Qe tal jil at kyxik', che okel kyq'o'ne te tz'il ex mi'n che'x kychyo'ne,

²⁰ex qe chyu'j saq, b'a'n tu'n kyxi kychyo'ne.

²¹Mi'n txi kychyo'ne jun txkup tajx kymel, tu'nju aqeye jun k'loj xjal pa'nmaj tu'n Qman Dios; atzun qe stranjer xjal najl kyuj kytanmiye b'a'n tu'n t-xi kychyo'n, ex qa b'a'n tu'n t-xi kyk'ayine kye b'etin xjal. Mi'n jax kytxko'ne tal chip tujx ta'l tim ttxu'.

²²Teyle junjun ab'q'i il ti'j tu'n tel kypa'ne tlaji'n ti'j tkyaqil twitz kyawale kjawil kychmo'ne.

²³Kxel kywa'ne tlaji'n k'elel kypa'ne ti'j kytriwoye, ti'j ta'l twitz ky-uvaye ex ti'j kychi'ye aseyt, kyuk'ix kyi'j qe tnejel kyal kywakẍe ex qe tnejel kyal kyẍne'le; che xel kywa'ne twitz Qman Dios tuj lugar kjawil t-sk'o'n te nab'l tb'i, tu'ntzun tb'ant kynimane te Qman te jumajx.

²⁴Ok kykub' ky'iwla'ne tu'n Qman, qa najchaq tu'n t-xi kyi'ne aju tlaji'n otoq tz'el kypa'ne, tu'nju najchaq najl qeye ti'j lugar otoq jaw t-sk'o'n Qman te nab'l tb'i,

²⁵kyk'ayinxe aju tlaji'n, atzun twi' kxel kyi'ne tuj lugar otoq jaw t-sk'o'n Qman.

²⁶Aju pwaq lu k'ajb'el kyeye tu'n tjaw kylaq'o'ne ma chixin noq alkye kyajb'ile: Qa wakẍ, qa ẍne'l, qa ta'l twitz uva ex qa noq alkyexku k'ab'j tx'amsamaj. Atzun kxel kywa'ne twitz Qman Dios noq alkye kyajb'ile, ex kb'antel jun ninq'ij kyu'ne junx kyuk'il qeju ate' tuj kyjaye.

²⁷Mi'n tz'ik kyna'l aj Leví kyu'ne, aqeju najl qe tuj kytanmiye, porke minti' kye kytx'otx' ok kyk'ma te kyetzb'il ik tza'n kyeye.

²⁸Ok tel oxchaq ab'q'i, k'elel kypa'ne aju tlaji'n ti'j twitz kyawale tuj ab'q'i lu, ex kxel kyk'u'ne kyuj qe tnam jatum ate'ye,

²⁹tu'ntzun tajb'en kye aj Leví, aqeju mi'n kyk'am kytx'otx' te kyetzb'il ik tza'n kyeye, tuk'ix kye stranjer xjal aqeju ax najl kyxole, ex tu'n tajb'en kye k'wa'l minti' kyman ex kytxu' ex kye meb'a xu'j. B'a'n tu'n kywa'n ti'j okxi tnoj kyk'u'j wen. Kyja'tzun che b'el ky'iwla'ne tu'n Qman Dios ti'j tkyaqilju kb'antel kyu'ne.