Read kumam Deuteronomio 15 Bible Online

Deuteronomio 15 - kumam bible

Deuteronomio 15

¹Tuj wuqchaq ab'q'i kb'el kynajsa'ne kyk'as qe k'asb'enal kyuk'ile.

²Aju najsb'il k'as iktzun ktemb'il kyja': Tkyaqil xjal otoq txi tq'o'n tch'ex jun tuk'il, kb'el tnajsa'n aju otoq txi tq'o'n te ch'ex. Mlay tz'ok tentl qanilte te tuk'il ex qa te t-xjalil tu'n tajtz tchjo'n, tu'nju otoq q'manjtz aju ab'q'i te najsb'il k'as tu'n Qman.

³Atzun te jun stranjer xjal, b'a'n tu'n t-xi kyqanine tu'n tajtz tchjo'n tk'as, atzunte kyermaniye, kb'el kynajsa'ne aju otoq txi tch'exo'n kyeye;

⁴tu'ntzun mi'n tten jun meb'a kyxole, ok che b'el ky'iwla'ne tu'n Qman Dios tuj tx'otx' ktzajel tq'o'n kyeye te kyetzb'ile.

⁵Qa kukx ma che nimane te, ex qa ma che japun kykyaqil qe mandamyent lu kyu'ne aqeju ma che'x nma'ne kyeye ja'lo,

⁶ax tok che b'el ky'iwla'ne tu'n Qman Dios ik tza'nx o tzaj ttziyan kyeye, ex kxel kyq'o'ne kych'ex nimku nasyon, atzun kyeye mi'n txi kyqanine kych'exe kye. Nimku nasyon che tel tjaq' kykawb'ile, atzun kyeye mlay che okx tene tjaq' kykawb'il.

⁷Qa at jun meb'a kyxol qe kyermaniye tuj jun tnam tuj tx'otx' ktzajel q'o'n kyeye tu'n Qman Dios, mi'n kub' kykyuwsa'n kyanmiye ex mi'n kub' kyxk'ayine onb'ilte,

⁸noq o'kx che onine ti'j ex kyq'onxe tch'ex, noq nik'pun at tajb'en te.

⁹Ten kykwente kyi'je, mi'n kub' kyximane mya b'a'n lu tuj kyanmiye tu'n kymanteye kyja': Ch'ix tul kanun twuqin ab'q'i, aju ab'q'i te najsb'il k'as, jaku che chiye, ex tu'n jlu che okele xk'a twitz kyermaniye meb'a ex minti' tch'ex kxel kyq'o'ne, porke mya yajku txi tma'n xjal lu te Qman, ex aju kyb'inchb'ene lu k'okel te il te kyeye.

¹⁰Il ti'j kxel kyq'o'ne tkyaqil aju at tajb'en te, ex mi'n tzaj kyb'ise ok t-xi kyq'o'ne, porke tu'n jlu che b'el ky'iwla'ne tu'n Qman Dios ti'j tkyaqil kyaq'unb'ene ex ti'j tkyaqilju kyajb'ile tu'n tb'ant.

¹¹Kukx che tel qe xjal meb'a kyxole. Tu'ntzun jlu, in xi nma'ne kyeye tu'n t-xi kyq'o'ne tkyaqilju at tajb'en kye kyermaniye meb'a ex kye qeju minti' at kye, aqeju ate' tuj kytanmiye.

¹²Qa at jun kyermaniye ax aj Hebreo ma tzaj tk'ayin tib' kyeye tu'n tok te kymajene, qa xinaq ex qa xu'j, o'kx qaq ab'q'i k'ajb'el kyeye; atzun tuj twuqin ab'q'i kxel kytzoqpi'ne.

¹³Oktzun tex tuj kyjaye, mi'n tz'ex kytzoqpi'ne noq kukx minti' ch'in q'i'n tu'n,

¹⁴noq o'kx kyq'onxe talun kyxol qe alumaj ate' kyuk'ile, tuk'ix triw ex ta'l twitz uva; kxel kyq'o'ne ch'in te ti'j kyq'inumab'le, ik tza'nx otoq tzaj tq'o'n Qman Dios kyeye.

¹⁵Mi'n tzik' tna'l kyu'ne, ax ikx kyeye o che tene te majen tuj Egipto, ex tu'n Qman Dios e etz kolpi'ne. Tu'ntzunju in xi nma'ne jlu kyeye ja'lo.

¹⁶Qatzun ma tma kymajene kyja': Mlay kyaj nkolina tu'nju at nk'u'je ti'ja ex kyi'j qeju ate' tuj tjaya, ex tu'nju b'a'na wi'je, qa chi,

¹⁷ktzajeltzun kyi'ne jun b'aq tz'u'p twi', kpol kylaq'b'a'ne t-ẍkyin majen ttzi tlamel kyjaye, ex k'elex kyq'o'ne toy'; atzun jun yek'b'il tu'n tok te kymajene te jumajx, qa xinaq ex qa xu'j.

¹⁸Ok t-xi kytzoqpi'ne kymajene, mi'n tz'ok jlu kyuw te kyeye, ex qaq ab'q'i otoq aq'nan kyuk'ile ex aju otoq txi kyq'o'ne te, noq mij ik tza'n twi tk'u'j aq'nal; ex che b'el ky'iwla'ne tu'n Qman Dios ti'j tkyaqilju kb'antel kyu'ne.

¹⁹Kyq'onxe te Qman Dios kykyaqil qe kynejel kyal kywakẍe ex kynejel kyal kyẍne'le, aqeju tman qe. Mi'n che ok kyq'o'ne te aq'nal qe kynejel kyal kywakẍe, aqeju tor qe, ex mi'n tz'el kymatzo'ne kylan qe kynejel kyal kyẍne'le, aqeju tman qe.

²⁰Teyle te junjun ab'q'i che chyo'le kyi'j twitz Qman Dios, junx kyuk'il qeju ate' tuj kyjaye, tuj lugar otoq jaw t-sk'o'n Qman.

²¹Qatzun at tpaltil, qa kox, qa moẍ ex qa at juntl tpaltil, mi'ntzun txi kyq'o'ne te jun chojb'il te Qman Dios.

²²A jlu kxel kychyo'ne tuj tnam jatum najl qeye, ex kykyaqile b'a'n tu'n kychyo'ne ti'j, qa tz'il qeye ex qa saq qeye ik tza'n in tma'n ley, b'a'n t-xi kychyo'ne ik tza'n in xi chyo't masat.

²³Atzunju tchk'el alumaj, mi'n txi kychyo'ne, ax kb'el kyqo'ne twitz tx'otx' ik tza'n a'.