Read kumam Deuteronomio 16 Bible Online

Deuteronomio 16 - kumam bible

Deuteronomio 16

¹Ok tul kanun xjaw Abib, kyik'san kub'e aju Xjan Q'ij te nimb'il te Qman Dios, porke tuj jun qonik'an te xjaw lu e jetz q'i'ne tuj Egipto tu'n Qman Dios.

²Tuj Xjan Q'ij kb'el kyb'yo'ne wakẍ ex qa ẍne'l te chojb'il te Qman Dios tuj lugar kjawil t-sk'o'n te nab'l tb'i.

³Kxel kychyo'ne tuk'il pan minti' t-samel tuj tu'n tjaw mal tk'u'j. Wuq q'ij che wa'le pan minti' t-samel tuj tu'n tjaw mal tk'u'j; pan te b'is k'okel tb'i, porke noq elakyim e je'tze tuj Egipto. Akux itz' qeye tzalu twitz tx'otx' kyna'ntze aju q'ij tej kyetze tuj Egipto.

⁴Kyuj wuq q'ij lu minti' tu'n tten t-samel pan tu'n tjaw mal tk'u'j tuj tkyaqil kytanmi, ex mi'n kyaj kyq'o'ne tuj juntl q'ij ch'intl tchib'jal alumaj otoq txi kyq'o'ne te chojb'il te qale tuj tnejel q'ij.

⁵Mi'n txi kyq'o'ne chojb'il tuj Xjan Q'ij noq tuj alkyechaqx tnam ktzajel tq'o'n Qman Dios kyeye,

⁶noq o'kx tuj lugar kjawil t-sk'o'n te nab'l tb'i, ex atzun kxel kyq'o'ne chojb'il okxi tex q'ij, ex atzun or lu tej kyetze tuj Egipto.

⁷K'okex kytxo'ne alumaj twitz q'aq' ex kxel kychyo'ne tuj lugar kjawil t-sk'o'n Qman Dios, ex te prim tuj juntl q'ij che ajel meltz'aje kyjaye.

⁸Kyuj qaq q'ij che wa'le pan minti' t-samel tuj tu'n tjaw mal tk'u'j, ex tuj twuqin q'ij k'okel jun b'uyj tib'il tb'anilxix kyu'ne te nimb'il te Qman Dios; tuj q'ij lu minti' aq'untl kb'antel kyu'ne.

⁹Kb'el kyajla'ne wuq seman, ktzajel qe' tajlet tuj q'ij ok ttzyet tu'n tjaw chmet twitz triw,

¹⁰kb'eltzun kyik'sa'ne jun ninq'ij te nimb'il te Qman Dios ok kyjapun b'aj qe wuq seman, ex che xe'l kyq'o'ne kyoyaje tu'n kyexe kygan, ik tza'nx tky'iwb'il Qman Dios otoq kyk'ame.

¹¹Che tzalajele twitz Qman Dios tuj lugar otoq jaw t-sk'o'n te nab'l tb'i, junx kyuk'il qe kyky'ajale, qe kyme'jele, qe kymajene xinaq, qe kymajene xu'j, kyuk'ix qe aj Leví, qe stranjer xjal, qe k'wa'l minti' kyman ex kytxu', ex qe meb'a xu'j najl tuj kytanmiye.

¹²Kyna'ntze, ikx kyeye o che tene te majen tuj Egipto; tu'ntzun jlu japunx kyu'ne kykyaqil qe ley lu.

¹³Oktzun tb'aj kychmo'ne twitz triw ex ok tb'aj kyyatz'o'ne ta'l twitz uva, kb'el kyik'sa'ne wuq q'ij ninq'ij kyuj qe tal ja t-xaq tze'yin kywi'.

¹⁴Che tzalajxe tuj ninq'ij lu junx kyuk'il qe kyky'ajale, qe kyme'jele, qe kymajene xinaq, qe kymajene xu'j, kyuk'ix qe aj Leví, qe stranjer xjal, qe k'wa'l minti' kyman ex kytxu', ex qe meb'a xu'j najl tuj kytanmiye.

¹⁵Wuq q'ij kb'el kyik'sa'ne ninq'ij lu te nimb'il te Qman Dios tuj lugar kjawil t-sk'o'n; ok che b'el ky'iwla'ne tu'n Qman Dios kyi'j kykyaqil kywitz kyawale ex kyi'j kykyaqil kyaq'unb'ene, ex che tzalajelxixe wen.

¹⁶Ox maj tuj ab'q'i tu'n kypon kykyaqil xinaq aj Israel twitz Qman Dios tuj lugar kjawil t-sk'o'n. Atzun tu'n kypon kyuj qe ninq'ij lu: Tuj ninq'ij kye pan minti' kysamel kyuj tu'n tjaw mal kyk'u'j, tuj ninq'ij kye seman, ex tuj ninq'ij kye tal ja t-xaq tze'yin kywi'. Mi jun jaku pon twitz Qman qa minti' q'i'n tu'n;

¹⁷teyle te junjun kxel ti'n toyaj ik tza'nx tky'iwb'il Qman Dios otoq tk'am.

¹⁸Kyq'on oke qe jwes ex qe ajkal kyuj kykyaqil tnam che tzajel tq'o'n Qman Dios te teyle junjun k'loj kyiyjile, tu'ntzun kykawin tuj tumelxix kyib'aje.

¹⁹Mi'n b'aj kych'expu'ne qe ley; mi'n tz'ok kyke'yine kyxilen xjal ex mi'n txi kyk'mo'ne pwaq tu'n mi'n tkub' kysentens xjal b'inchal mya b'a'n, porke tu'ntzun pwaq lu in moẍsanjtz kywitz qe xjal at kynab'l, ex in b'aj tzpet-sa'n kyyol qe xjal tz'aqlxix.

²⁰Tuj tumelxix kxel kyb'inchane kyi'j xjal, tu'ntzun kyanq'ine ex tu'n kyoke tajwil tx'otx' ktzajel tq'o'n Qman Dios kyeye.

²¹Mi'n ku'x kyawa'ne jun tze' te nimsab'l te tilb'ilal xu'j dios Asera ttxlaj t-altar Qman Dios, aju otoq jaw kyb'incha'ne,

²²ex mi'n jaw kywab'ane jun ab'j tu'n kyk'ulune twitz, porke ik'un jlu tu'n Qman Dios.