Read kumam Deuteronomio 17 Bible Online

Deuteronomio 17 - kumam bible

Deuteronomio 17

¹Mi'n txi kyq'o'ne jun tor ex qa ẍne'l at tpaltil, ex qa at juntl ti'xti mya b'a'n tok ti'j, te chojb'il te Qman Dios, porke ik'un jlu tu'n.

²Kyuj qe tnam che tzajel tq'o'n Qman Dios kyeye, qa at jun xinaq ex qa jun xu'j ma tz'el knet in tb'incha'n aju minti' in tzalaj Qman ti'j, qa otoq tzik' tib'aj ju yol kyaj b'ant ti'j tu'n Dios kyuk'ile,

³qa in k'ulun kywitz junxitl dios ex in kub' ẍmeje' kywitz, qa twitz q'ij, twitz xjaw ex qa kywitz qe che'w, aju minti' o tzaj tma'n Qman;

⁴qa ma kyb'iye jlu, kb'ajel kyqanine wen ex kb'ajel kyb'i'ne; ex qatzun ma tz'el knet ax tok otoq b'inchanjtz aju mya b'a'n kyxol aj Israel,

⁵tu'n jlu aju xjal otoq b'inchante mya b'a'n, kyi'n exe ttzi tlamel tnam ex kyxo'n oke tu'n ab'j okxi tkyim.

⁶Tu'n kyyol kab'e ex qa ox testiw jaku kub' t-sentens jun xjal tu'n tkyim,; noq tu'n tyol junx testiw mi jun xjal jaku kub' t-sentens tu'n tkyim.

⁷Aqe testiw che okel xo'nte ab'j ti'j xjal tnejel, ex te tib'ajxi k'okel xo'n ab'j ti'j kyu'n kykyaqil xjal aj tnam. Kyja'tzun knajel aju mya b'a'n kyxole.

⁸Qatzun at jun xtis mlay b'ant ti'j kyu'ne tu'nju kyuw ma tz'ela te kyeye, ik tza'n jun b'yoj xjal, qa q'oj, qa otoq tza'w jun tu'n juntl, ex qa juntl ti'xti in b'aj tuj tnam, che xe'le tuj lugar kjawil t-sk'o'n Qman Dios,

⁹tu'n kypone kyuk'il qe pal aj Leví ex tuk'il jwes toksa'n, tu'ntzun t-xi kyqanine alkye tu'n tb'ant ti'j. Atzun qe che q'malte kyeye alkye kb'antel ti'j kyu'ne tu'n tkub' kyq'o'ne t-sentens.

¹⁰Kyb'inchame tkyaqil ik tza'nx otoq tzaj q'ma'n kyeye max tuj lugar otoq jaw t-sk'o'n Qman.

¹¹Kb'el kyq'o'ne t-sentens ik tza'nx otoq tzaj tma'n jwes kyeye, ex japunx kyu'ne aju ktzajel q'man kyeye, mi'n b'aj kych'expu'ne.

¹²Qatzun at jun ma jaw tniman tib' ex minti' ma txi tniman tyol pal aju in ajb'en te Qman, ex qa tyol jwes, aju xjal lu il ti'j kb'el b'yet. Kyja'tzun knajel aju mya b'a'n at kyxole, aqeye aj Israel.

¹³Oktzun kyb'inte kykyaqil xjal jlu, ktzajel t-xob'il kyi'j ex kxel kykolin tu'n tjaw kyniman kyib'.

¹⁴Oktzun kypone tuj tx'otx' ktzajel tq'o'n Qman Dios kyeye, kyoklenxiye tajwil, ok kynajane tuj ex ok kymanteye kyja': Qajb'ile jun qreye tu'n tkawin qib'aje ik tza'n kye kykyaqil nasyon qvesin qib'e kyuk'il, qa che chiye,

¹⁵k'okeltzun kyq'o'ne te kyreye jun kyermaniye aju kjawil t-sk'o'n Qman Dios. Mi'n tz'ok kyq'o'ne jun stranjer xjal te kyreye, aju mya kyerman kyib'e tuk'il.

¹⁶Aju k'okel te rey mi'n b'aj tchmo'n nim tchej, ex mi'n che aj t-sama'n qe xjal tuj Egipto tu'ntzun kychmet nim tchej, porke o tma Qman kyeye kyja': Mi'n che aj meltz'aje juntl maj tuj b'e lu, chi Qman.

¹⁷Ax ikx mi'n tzaj ti'n nim t-xu'jil tu'ntzun mi'n tel tzpet kyu'n; ex mi'n b'aj tchmo'n nimxix q'an pwaq ex saq pwaq.

¹⁸Oktzun tk'monte toklen te rey, kxel tma'n tu'n tkub' tz'ib'et jun copya ti'j ley lu, ax ti'j ttxuylal at tuj kykwent qe pal aj Leví, tu'ntzun tajb'en te te.

¹⁹Kukx ktel aju copya lu tuk'il, ex kjawil t-sch'i'n tuj tkyaqil q'ij ok tten tzalu twitz tx'otx', tu'ntzun t-xob' twitz Qman Dios, tu'n t-xi tniman tkyaqilju in tma'n ley lu, ex tu'n kyjapun tu'n;

²⁰tu'ntzun mi'n tok tq'on tib' te ma'xix kywitz qe terman, ex tu'n mi'n tel tpa'n tib' kyi'j qe mandamyent lu. Kyja'tzun, tza'nxix te, ax ikx qe tiyjil, che kawil nim tyemp kyxol aj Israel.