Read kumam Deuteronomio 18 Bible Online

Deuteronomio 18 - kumam bible

Deuteronomio 18

¹Qe pal aj Leví, aqe jlu kykyaqil qe tiyjil Leví, minti' kyoklen ti'j etzb'il ik tza'n kye txqantl aj Israel. O'kx che anq'il kyi'j qe chojb'il ex qe oyaj che xel q'ot te Qman.

²Mi'n kyk'am kyetzb'il ik tza'n kye txqantl kyerman, porke ate Qman k'okel te kyetzb'il, ik tza'nx o tma Qman kye.

³Aju at kyoklen qe pal ti'j kyi'j qe tor ex qe ẍne'l che xel kyq'o'n xjal te chojb'il, atzun qe jlu: Jun tq'ab', tuk'ix chib'j tjaq' tb'aqil ttzi', ex tpans.

⁴Ax ikx k'okel te kye, tnejel twitz triw, tnejel ta'l twitz uva, tnejel chib'j aseyt, ex aju tnejel lan k'elel matzet kyi'j qe ẍne'l;

⁵porke o che jaw t-sk'o'n Qman Dios kyxol kykyaqil k'loj kyiyjil aj Israel tu'n kyajb'en te jumajx tuj k'ulb'il te, kyuk'ix qe kyk'wa'l.

⁶Qa at jun aj Leví ma tz'etz tuj jun tnam kyxole, ex qa ma pon tu'n tkyaqil tgan tuj lugar otoq jaw t-sk'o'n Qman,

⁷jaku tz'ajb'en te pal tuj tb'i Qman, ik tza'nx in che ajb'en te Qman kykyaqil qe txqantl tuk'il ax aj Leví qe,

⁸ex ok tk'ma' twa ik tza'nx kye txqantl in kyk'mo'n, ex part aju ok tk'ma' ti'j tetzb'il.

⁹Ok kyokxe tuj tx'otx' ktzajel tq'o'n Qman Dios kyeye, mi'n tz'el kykano'ne aju costumr ik'b'ilxix in kyb'incha'n qe nasyon ma chixin.

¹⁰Mi jun kyeye txi q'onte jun tk'wa'l te chojb'il tu'n tkub' patit tuj q'aq', mi jun tu'n tb'ant tq'ijin, mi jun tz'ok tq'o'n tib' q'malte alkye tzul te tib'ajxi, mi jun tu'n tb'ant tky'a'n,

¹¹mi jun tu'n tb'ant mañ tu'n, mi jun tu'n t-xi tqanin jun t-xjel kye aj q'ij ex mi kye qeju in tzaj kytxko'n kyanmi kyimni, ex mi jun tu'n t-xi tqanin jun t-xjel kye kyimni.

¹²Porke ik'un tu'n Qman aju xjal in tb'incha'n tkyaqil jlu, ex tu'ntzunju ik'b'ilxix in kyb'incha'n qe nasyon lu, che elex tlajo'n Qman Dios kywitze.

¹³Che okxe tz'aqlxix twitz Qman Dios.

¹⁴Aqeju nasyon lu, aqeju che okele te tajwil kytx'otx', in xi kyb'i'n kyyol qe chman ex qe aj q'ij; atzun kyeye minti' tzoqpi'n qeye ti'j tu'n Qman Dios tu'n tb'ant jlu kyu'ne.

¹⁵Kjawil t-sk'o'n Qman Dios jun t-sanjel kyxole ik tza'nx qine, ex kxel kynimane tyol.

¹⁶Atzun jlu xi kyqanine te Qman Dios tuj q'ij tej tok kychmon kyib'e kykyaqile t-xe witz Horeb, tej kymanteye kyja': Qk'i'ye qo b'ine juntl maj tq'ajq'ajel twi Qman Dios, mi tu'n tqile aju nintz q'aq' lu, tu'ntzun mi'n qkyime, che chiye.

¹⁷Tzajtzun tma'n Qman weye: B'a'n aju yol ma kyma aj Israel.

¹⁸Ax kyxol kyerman kjawil nsk'o'ne jun nsanjele ik tza'nx aya, ex kxel tma'n kye tkyaqil nyole kxel nma'ne te.

¹⁹Qatzun at jun xjal minti' ma txi tb'i'n tyol nsanjele, aju k-yolil kyuk'il te nxele, k'okel te xjal lu tuj xjel wu'ne.

²⁰Aju sanjel tu'nx tib' in yolin jun yol ex in tman qa wu'ne otoq txi nsama'ne, ex minti' otoq txi nma'ne jun yol te, ex qa in tma'n qa otoq tzaj sama'n kyu'n junxitl dios, il ti'j kb'el b'yet, chi Qman.

²¹Qatzun ma kymaye kyja': ¿Tza'ntzun tten k'elel qnik'e ti'j qa mya tyol Qman in yolin ti'j? qa che chiye, il ti'j tu'n tok kykwente ti'j jlu:

²²Qa minti' ma japun aju yol otoq tma sanjel tuj tb'i Qman, atzun k'elel kynik'e ti'j mya a Qman otoq q'mante te, noq tu'nx otoq tz'ok tq'o'n tib' te t-sanjel Dios tu'n tnimb'il tib'; tu'ntzun jlu mi'n che xob'e twitz.