Read kumam Deuteronomio 20 Bible Online

Deuteronomio 20 - kumam bible

Deuteronomio 20

¹Ok kyexe tuj q'oj kyi'j qe aj q'oj kyi'je, qa ma kyile q'i'n chej kyu'n, kyuk'ix carwaj in che ajb'en tuj q'oj, ex qa mas nim kyajlal soldad ik tza'n kyeye, mi'n che xob'e kywitz, porke ate Qman Dios ktel kyuk'ile, aju etz q'inte kyeye tuj Egipto.

²Oktzun tpon or tu'n ttzyet q'oj, kpol laq'e' pal tu'n tyolin kyuk'il soldad aj Israel,

³ex kxel tma'n kye kyja': Kyb'intze aqeye aj Israel, ja'lo che q'ojele kyi'j aj q'oj kyi'je. Mi'n b'aj kyk'u'je ex mi'n che xob'e; mi'n che tzaj lu'lune ex mi'n che jaw sek'paje,

⁴porke ate Qman Dios at kyuk'ile; ate kq'ojel kyi'j qe aj q'oj te kyxele, ex kyja'tzun aqeye che kamb'al. Atzun jlu kxel tma'n pal.

⁵Ax ikx kxel kyma'n qe nejenel kyja': Qa at jun kyeye ma b'ant jun tja ak'aj ex na'nx tokx ten najal tuj, e taj tja; mya yajku kyim tuj q'oj ex jaku juntl tz'okx ten najal tuj tja.

⁶Qa at jun kyeye ma ku'x tawa'n uva ex na'nx tnik'b'en ti'j, e taj tja; mya yajku kyim tuj q'oj ex jaku juntl jaw chmonte twitz t-uva.

⁷Qa at jun kyeye ma b'ant ti'j tu'n tmoje' ex na'nx tmoje', e taj tja; mya yajku kyim tuj q'oj ex jaku juntl moje' tuk'il txin attoq tmojeb'el tuk'il. Atzun jlu kxel kyma'n qe nejenel.

⁸Te tib'ajxi ok kyma'tl qe nejenel kyja': Qa at jun in xob' ex mya kyuw tk'u'j tuj q'oj, e taj tja tu'ntzun mi'n tb'aj kyk'u'j qe tuk'il tu'n.

⁹Oktzun kyb'aj yolin qe nejenel, k'okeltzun q'ot kyoklen qe capitán tu'n kykub' nej kywitz junjun k'loj soldad.

¹⁰Oktzun kypon laq'e'ye ti'j jun tnam tu'n kyok tzoqpaje ti'j, tnejel kxel kyma'ne kye qa jaku kub' tuj kywitz tu'n kykyaj tjaq' kykawb'ile.

¹¹Qatzun ma kub' tuj kywitz qe xjal najl tuj tnam, ex qa ma kyaq' amb'il tu'n kyokxe tuj tnam, oktzun che okel te kymajene ex che ajb'el kyeye.

¹²Qatzun kyk'i' ex qa ma kyma tu'n tok q'oj, b'ixtzun b'aj kytxolin kyib'e ti'jele tnam ex b'ix che ok tzoqpaje kyi'j.

¹³Oktzun kykub' tz'aq tu'n Qman Dios tuj kyq'ab'e, che b'el kyb'yo'ne tu'n spad kykyaqil qe xinaq najl tuj tnam.

¹⁴Atzun qe xu'j, qe k'wa'l, qe wakẍ, ex tkyaqilju at tuj tnam, te kyeye che okel; che nik'b'ele ti'j tkyaqilju k'elel kyi'ne kye aj q'oj kyi'je, aju ktzajel tq'o'n Qman Dios kyeye.

¹⁵Kyja'tzun che temb'il kykyaqil qe tnam kyu'ne, aqeju ate' najchaq kyi'je, aqeju mya ax ate' kyuj qe nasyon jatum che tele.

¹⁶Atzun qe tnam kye nasyon che tzajel tq'o'n Qman Dios tu'n kyok te kyetzb'ile, mi jun kyjel anq'in kyu'ne kyuj;

¹⁷noq o'kx tu'n kynaj kyu'ne te jumajx kykyaqil qe xjal lu: Qe aj Heteo, qe aj Amorreo, qe aj Cananeo, qe aj Ferezeo, qe aj Heveo ex qe aj Jebuseo, ik tza'nx o tma Qman,

¹⁸tu'ntzun mi'n kytzaj xnaq'tza'ne kyu'n tu'n kyb'inchanteye aju ik'b'ilxix in b'ant kyu'n te nimb'il kye kydios, ex tu'n mi'n kyb'inchane il twitz Qman Dios.

¹⁹Qatzun nim q'ij che tele ti'jele jun tnam tu'n ttzyet kyu'ne, mi'n jaw kytx'emine qe tze' b'a'n tlonjtz kywitz ate' ti'jele tnam, ex jaku tz'ajb'en kywitz tu'n kylo'ne kyi'j, ex aqe jlu, tze' qe, mya xjal qe tu'n kyok tzoqpaj kyi'je.

²⁰Atzun qe tze' ojtzqi'n kyu'ne mib'an tlo'njtz kywitz, b'a'n tu'n kyjaw kytx'emine, qa tu'n kyajb'en kyu'ne te kyxwe'tzb'ile ti'j tnam aju che okel tzoqpaje ti'j, okxi ttzyet kyu'ne.