Read kumam Deuteronomio 22 Bible Online

Deuteronomio 22 - kumam bible

Deuteronomio 22

¹Qa ma kyile twakẍ jun kyxjalile ex qa t-ẍne'l otoq kyaj tzpet, mi'n noq kukx tz'ok kyke'yine, noq o'kx kyinxe tu'n tpon tuk'il kyxjalile.

²Qatzun mya kyvesine ex qa minti' ojtzqi'n kyu'ne aju tajwil alumaj, kxe'ltzun kyi'ne max kyjaye, ex ax ktel kyuk'ile. Oktzun tpon kyxjalile qanil te, kxe'ltzun kyq'o'ne.

³Ax jlu kb'antel kyu'ne ti'j jun bur, jun xb'alun ex qa noq alkyex juntl ti'xti otoq kyaj tz'aq te jun kyxjalile, qa ma che ok noje ti'j. Mi'n noq kukx tz'ok kyke'yine.

⁴Qa ma kyile tbur jun kyxjalile ex qa twakẍ otoq kub' tz'aq tuj b'e, mi'n tz'el kykumin kyib'e ti'j, noq o'kx tu'n kyonine tu'n tjaw twab'an.

⁵Mi'n tz'ok tq'o'n xu'j t-xb'alun xinaq ti'j, ax ikx te xinaq mi'n tz'ok tq'o'n t-xb'alun xu'j ti'j, porke ik'un tu'n Qman Dios aju xjal in b'inchante jlu.

⁶Qa ma che ok noje ti'j jun q'u' chyu'j tjax twi' jun tze' ex qa tkub' twitz tx'otx', qa ate' qe tal chyu'j tuj tq'u' ex qa tjos, ex qa b'unl kytxu' kyib'aj, mi'n tzaj kyi'ne aju kytxu' kyuk'ix qe tal;

⁷noq o'kx qe tal tu'n ttzaj kyi'ne, atzun kytxu' kxel kytzoqpi'ne, tu'ntzun tten b'a'n kyeye ex tu'n kyxi laq'e' tuj kyq'ije.

⁸Ok tjaw kyb'incha'ne jun kyjaye, il ti'j tu'n tjaw kyb'incha'ne jun tal maqb'il ti'jele twi ja, tu'ntzun mi'n ttzaj kyil qeju ate' tuj kyjaye ti'j tkamik jun xjal qa ma tzaj tz'aq twi ja.

⁹Mi'n ku'x kyawa'ne juntl wiq iyaj kyxol tqan uva, tu'ntzun mi'n tel q'i'n tkyaqil kyeye tu'n tajb'en tuj tja Dios, tza'nx ju iyaj otoq ku'x kyawa'ne, ax ikx twitz uva.

¹⁰Mi'n tz'ok kyq'o'ne jun bur ch'okil tuk'il jun wakẍ.

¹¹Mi'n tz'ok kyq'o'ne kyxb'alune smo'n lan ex noq' lino tuj.

¹²Kyq'onke xk'alo'xin kyi'j kykyajil ttxa'n kymante tok kyi'je.

¹³Qa at jun xinaq ma tzaj ti'n jun txin tu'n tok te t-xu'jil, ex qa ma tz'el tik'un toklenxi moje' tuk'il,

¹⁴qa ma tz'ok ten yolil mya b'a'n ti'j ex qa ma tma' kyja': In moje'ye tuk'il xu'j lu, ex tej nmoje'ye tuk'il el nnik'e ti'j otoq til xinaq, qa chi,

¹⁵atzun kye tman txin kxel kyi'n jun yek'b'il kywitz qe tij xjal te tnam, tu'n kyyek'unte qa na'nxtoq ttil txin xinaq;

¹⁶ex kxel tma'n tman txin kye tij xjal kyja': Xi nq'o'ne nme'jele te t-xu'jil xinaq lu, atzun ja'lo minti'tl tgan ti'j

¹⁷ex in tma'n qa at tpaltil ex qa otoq tilxi nme'jele xinaq, ex lu yek'b'il q'i'n wu'ne tu'n tyek'unjtz ax tok na'nxtoq ttil nme'jele jun xinaq, chi tman txin kxel tma'n. Ex kb'el kylik'un xb'alun kywitz qe tij xjal te tnam.

¹⁸Ktzajeltzun kytzyu'n qe tij xjal aju xinaq lu, ex kb'el kyq'o'n tcastiw,

¹⁹k'elel kyi'n syen saq pwaq tmult tu'n t-xi q'ot te tman txin, tu'n tlaj otoq yolin mya b'a'n ti'j jun txin aj Israel b'ajxtoq til xinaq; ex ax xu'j lu k'okel te t-xu'jil, ex mlay kub' tpa'n tib' tuk'il xu'j tuj tkyaqil tanq'ib'l.

²⁰Qatzun ax tok otoq tilxi txin xinaq,

²¹k'eletztzun kyi'n ttzi tlamel tja tman, ex k'okel xo'n ab'j ti'j kyu'n qe tij xjal te tnam tu'ntzun tkyim, tu'nju otoq tb'incha jun mya b'a'n ma'xix kyxol aj Israel ex otoq yaẍin tuj tja tman. Kyja'tzun ktelb'a tu'n tnaj mya b'a'n kyxole.

²²Qa at jun xinaq ma tz'el knet in tan tuk'il jun xu'j mejeb'ni, kykab'il che b'el byet. Kyja'tzun ktelb'a tu'n tnaj mya b'a'n kyxole, aqeye aj Israel.

²³Qa at jun txin na'nxtoq ttil xinaq ex otoq b'ant ti'j tu'n tmoje', qa ma tz'ok noj juntl xinaq ti'j tuj tnam, ex qa ma kub' tan tuk'il,

²⁴kykab'iltzun che xel q'it ttzi tlamel tnam, ex che okel xo't tu'n ab'j tu'n kykyim. Kymel txin tu'n tlaj minti' jaw sch'in ex tuj tnam ta'toq, ex kymel xinaq tu'n tlaj otoq kub' tmojb'an tib' tuk'il t-xu'jil tuk'il. Kyja'tzun ktelb'a tu'n tnaj mya b'a'n kyxole.

²⁵Qatzun at jun xinaq ma tz'ok noj ti'j jun txin tuj kojb'il ex qa otoq b'ant ti'j tu'n tmoje' txin, ex qa ma tz'ok tq'o'n il ti'j tu'n tkub' tan txin tuk'il, o'kx te xinaq lu kb'el b'yet, aju otoq kub' tan tuk'il txin.

²⁶Atzunte txin mi'n kub' b'yet, porke minti' otoq tb'incha jun il tu'n tkyim. Junx ta' jlu ik tza'n jun xinaq nno'k tzoqpaj ti'j juntl ex in kub' tb'yo'n,

²⁷tu'nju otoq tz'ok noj ti'j txin tjunalx ta'toq tuj kojb'il, ex maske jaw sch'in, ex mi a'l jun jaku kolin ti'j.

²⁸Qa at jun xinaq ma tz'ok noj ti'j jun txin na'nx ttil xinaq ex minti' ttrat tuk'il juntl tu'n tmoje', qa ma tz'ok tq'o'n il ti'j tu'n tkub' tan txin tuk'il, ex qa ma che el knet,

²⁹ate xinaq lu kxel tq'o'n 50 saq pwaq te tman txin; il ti'j tu'n tjaw t-xu'jla'n, tu'nju otoq kub' tmojb'an tib' tuk'il, ex mi'n kub' tpa'n tib' tuk'il tuj tkyaqil tanq'ib'l.

³⁰Mi jun xinaq kjawil t-xu'jla'n t-xu'jil tman, mi tu'n tkub' tan tuk'il t-xu'jil tman.