Read kumam Deuteronomio 23 Bible Online

Deuteronomio 23 - kumam bible

Deuteronomio 23

¹Qa at jun xinaq o che pax qe tb'aq' ex qa o tz'el qesin ttz'a'lb'il, mlay tz'ok te tajlal kyxol qe xjal etzan tu'n Qman.

²Aju sik'aj k'wa'l kyuk'ix qe tiyjil che ul itz'j te tib'ajxi, mlayx che ok te tajlal kyxol qe xjal etzan tu'n Qman.

³Qe aj Amón ex qe aj Moab kyuk'ix qe kyiyjil che ul itz'j te tib'ajxi, minti' kyoklen tu'n kyok te tajlal kyxol qe xjal etzan tu'n Qman;

⁴porke tej kyik'tze tuj kytx'otx' kyetzlenxiye tuj Egipto, minti' tzaj kyq'o'n a' te kyk'a'ye ex mi kywaye; ax ikx xi kychjo'n twi tk'u'j Balaam aju tky'ajal Beor ex tzajni tuj Petor te Mesopotamia, tu'n t-xi tqanin te Dios tu'n ttzaj mya b'a'n kyib'aje.

⁵Pero minti' tzaj tb'i'n Qman Dios aju tyol Balaam, noq o'kx ok tq'o'n te jun ky'iwb'il aju mya b'a'n kyja'toq t-xi tqanin, porke k'ujla'n qeye tu'n Dios.

⁶Mi'n moje' kyyole tu'n kytene tuj txub'txaj kyuk'il tuj tkyaqil kyanq'ib'le.

⁷Atzun qe aj Edom, mi'n che el kyik'une porke kyermaniye qe jlu; ax ikx mi'n che el kyik'une qe aj Egipto, porke o che najane tuj kytx'otx'.

⁸Qe tal kychman qe xjal lu jaku che ok te tajlal kyxol qe xjal etzan tu'n Qman.

⁹Ok kyexe q'ojlel kyi'j qe aj q'oj kyi'je, ten kykwente kyi'je tu'n mi'n kyb'inchanteye jun mya b'a'n.

¹⁰Qa at jun kyeye mya saq ta' tu'n tlaj otoq jaw tuj twi ttz'a'lb'il noq tajx tuj twatl, k'elex ti'jxi campament, ex tuj enter q'ij mlay tz'okx tuj.

¹¹Oktzun tok qax, kb'ajel ttx'jon tib' tu'n a'; ex ok tex q'ij, b'a'ntzun tu'n tokx juntl maj tuj campament.

¹²Ok kyxi'ye txa'l, knetel jun lugar kyu'ne ti'jxi campament,

¹³Kyxol kymakb'ile kxel kyi'ne jun tze', tu'ntzun tajb'en tu'n tku'x kylaku'ne jun jul ok kyxi'ye txa'l, ex te tib'ajxi kyjel kymaqu'ne tu'n tx'otx'.

¹⁴Porke kb'etel Qman Dios kyxole tuj campament tu'n tkolin kyi'je ex tu'n kykamb'ane kyi'j aj q'oj kyi'je. Kyja'tzun, il ti'j tu'n tok kycampamente te jun lugar xjan, tu'ntzun mi'n ttil Dios jun ti'xti mya b'a'n tuj campament jatum che b'el tene, porke qa ma ten jun mya b'a'n kyxole, jaku tz'el tpa'n tib' Dios kyi'je.

¹⁵Qa ma tz'el oq jun majen twitz tpatrón, ex qa ma pon kyuk'ile, mi'n tz'aj kyq'o'ntle te tpatrón tu'n taj juntl maj tuk'il.

¹⁶Kyq'onxe amb'il te tu'n tnajan kyuk'ile, noq tuj alkyex tnam at mas tgan ti'j, ex tuj alkyex lugar kjawil t-sk'o'n, ex mi a'l jun tu'n tlab't ti'j.

¹⁷Mi jun xu'j aj Israel tu'n t-xi tq'on tib' tuj yaẍb'il te jun k'ulb'il kywitz qe tilb'ilal, ik tza'n in b'ant kyu'n qe xjal mya nimal Dios, ex mi jun xinaq tu'n tyaẍin ax tuk'il juntl xinaq.

¹⁸Mi'n kyaq'e amb'il tu'n tokx tuj tja Qman Dios te chojb'il jun yol otoq txi tziyan, aju pwaq otoq kykamb'a xjal noq tu'n kyyaẍb'il, porke ik'un jlu tu'n Qman.

¹⁹Mi'n txi kyqanine ta'l kypwaqe kxel kyq'o'ne te tch'ex jun kyxjalile, mi ti'j jun ti'xti b'a'n twanjtz, ex mi ti'j noq alkyex jun ti'xti.

²⁰Atzun te stranjer xjal, b'a'n t-xi kyqanine tu'n ttzaj tq'o'n ta'l pwaq otoq txi kyq'o'ne te tch'ex, ex mi'n kyb'inchaye jlu ti'j jun kyxjalile, tu'ntzun kykub' ky'iwla'ne tu'n Qman Dios ti'j tkyaqilju kb'antel kyu'ne tuj tx'otx' k'okel te kyetzb'ile.

²¹Ok t-xi kytziyane jun yol te Qman Dios, kyq'onke tilil tu'n tjapun naj kyu'ne, porke ax tok che okele tuj xjel tu'n Qman Dios ti'j, ex at kyile ti'j qa mi'n ma japun kyu'ne.

²²Qatzun minti' ma txi kytziyane jun yol, minti' kyile ti'j jlu;

²³pero qa tu'n kyexe kygan ma txi kytziyane jun yol te Qman Dios, japunxtzun kyu'ne.

²⁴Ok kyokxe kyxol qe tqan t-uva jun kyuk'ile, b'a'n tu'n kylo'ne ti'j uva noq nik'punx kyaje, ex mi jun ktzajel kyi'ne tuj chi'l.

²⁵Qa ma che okxe kyxol tqan triw te jun kyuk'ile, b'a'n tu'n tjaw kyi'ne twi triw tu'n kyq'ab'e tu'n kywa'ne ti'j, pero mi'n jaw kyi'ne tu'n job'l te.