Read kumam Deuteronomio 24 Bible Online

Deuteronomio 24 - kumam bible

Deuteronomio 24

¹Ok tmoje' jun xinaq tuk'il jun xu'j, qa te tib'ajxi mya b'a'n ma tz'ela tuj twitz tu'n tlaj jun tpaltil, b'a'n tu'n tkub' ttz'ib'an jun u'j tu'n tkub' pa't mejeb'le'n; kxel tq'o'n te xu'j ex k'elex tlajo'n tuj tja.

²Texlenxi xu'j tja tchmilb'en, jaku moje' tuk'il juntl xinaq.

³Qatzun ma tz'el ik'un xu'j tu'n tkab'in xinaq ex qa ma kub' ttz'ib'an jun u'j tu'n tkub' pa't mejeb'le'n, qa ma txi tq'o'n tuj tq'ab' xu'j ex ma tz'ex tlajo'n tuj tja; ex qa ma kyim tkab'in tchmil,

⁴mlay b'ant tu'n tmoje' juntl maj tuk'il nej tchmil, tu'n tlaj otoq txi aj tja juntl tchmil, ex tu'nju otoq tz'ilix, porke mya b'a'n jlu tuj twitz Qman. Mi'n b'aj kytz'ilsa'ne kytanmiye aju ktzajel tq'o'n Qman Dios te kyetzb'ile.

⁵Qa at jun xinaq k'itzqetoq toklen moje', mi'n tz'ex tuj q'oj ex mi'n kyaj ten te sanjelal tuj enter jun ab'q'i; tu'ntzun tten tuj tja tuj enter ab'q'i, ex tu'n ttzalaj t-xu'jil.

⁶Mi'n txi kyqanine tkya' xjal te prent ex mi tal tkya', porke a jlu mer ik tza'n aku tchwinqlal xjal nne'l kyi'ne te prent.

⁷Qa at jun aj Israel ma knet kyu'ne in xi telq'a'n jun t-xjalil tu'n tok te tmajen ex qa tu'n t-xi tk'ayin, aju xjal lu il ti'j tu'n tkub' b'yet, tu'ntzun tkub' naj mya b'a'n kyxole.

⁸Atzun ti'j tx'a'k minti' q'anb'il te, ten kykwente ti'j tu'n tjapun tkyaqilju ktzajel q'ma'n kyeye kyu'n qe pal aj Leví. Il ti'j tu'n tjapun kyu'ne ik tza'n o txi nma'ne kye.

⁹Kyna'ntze aju tb'incha Qman Dios ti'j Mariy tuj b'e, tej otoq che etze tuj Egipto.

¹⁰Qa ma txi kyq'o'ne tch'ex jun kyuk'ile, mi'n che okxe tuj tja tu'n tetz kyi'ne jun ti'xti te prent;

¹¹ax che ayone ttxa'n pe'n, ex ax te xjal k'eletz q'o'nte jun prent kyeye.

¹²Qatzun meb'a xjal, mi'n kyaj kytzyu'ne prent ok tok qonik'an;

¹³k'ajel kyq'o'ne ok tex q'ij, tu'ntzun t-xi tb'oq'in tib' xjal tuj t-xb'alun ok t-xi' tal. Tu'ntzun jlu ktzajel tqanin xjal tky'iwb'il Dios kyib'aje, ex b'a'n k'elel jlu tuj twitz Qman Dios.

¹⁴Mi'n kub' kyyajla'ne jun majen meb'a ex minti' at te, qa ax kyxjalile ex qa jun stranjer xjal ax najl kyxole.

¹⁵B'i'x kychjonxe twi tk'u'j ok tex q'ij, porke meb'a xjal lu, ex in ajb'en twi tk'u'j tu'n tanq'in. Qa minti' ma txi kyq'o'ne twi tk'u'j, kxel tma'n jlu te Dios, ex attzun kyile twitz Dios ti'j jlu.

¹⁶Mi'n che kub' b'yet qe mamb'aj tu'n tlaj kyil kyk'wa'l, ax ikx qe k'wa'lb'aj, mi'n che kub' b'yet tu'n tlaj kyil kyman; teylex te junjun kymel tu'n tlaj tex til.

¹⁷Mi'n kyb'inchaye jun ti'xti mya tuj tumel kyi'j qe stranjer xjal, mi kyi'j qe k'wa'l minti' kyman ex kytxu', ex mi'n tzaj kyi'ne te prent t-xb'alun jun meb'a xu'j.

¹⁸Mi'n tzik' tna'l kyu'ne, ax ikx kyeye o che tene te majen tuj Egipto, ex tu'n Qman Dios e etz tzoqpi'ne. Tu'ntzun jlu in xi nma'ne kyeye tu'n tjapun tkyaqil jlu kyu'ne.

¹⁹Ok tjaw kychmo'ne twitz kyawale, qa ma tzik' tna'njtz tu'n ttzaj kyi'ne jun che'l triw, mi'n che aje q'il te; ax e tkyaj ten tu'n tajb'en kye stranjer xjal ax najl kyxole, kye k'wa'l minti' kyman ex kytxu' ex kye meb'a xu'j, tu'ntzun kykub' ky'iwla'ne tu'n Qman Dios ti'j tkyaqilju kb'antel kyu'ne.

²⁰Ok t-xi kyyukune tqan olivo tu'n tkub' twitz, qa ma kyaj junjuntl twitz twi tqan, mi'n kub' kyi'ntle; ax e tkyaj ten tu'ntzun tajb'en kye stranjer xjal ax najl kyxole, kye k'wa'l minti' kyman ex kytxu' ex kye meb'a xu'j.

²¹Ok tkub' twitz ky-uvaye, mi'n che aje q'ilte aju otoq kyaj ten twi tqan; ax e tkyaj ten, tu'ntzun tajb'en kye stranjer xjal ax najl kyxole, kye k'wa'l minti' kyman ex kytxu' ex kye meb'a xu'j.

²²Kyna'ntze, ax ikx kyeye o che tene te majen tuj Egipto. Tu'ntzun jlu in xi nma'ne kyeye tu'n tjapun tkyaqil jlu kyu'ne.