Read kumam Deuteronomio 26 Bible Online

Deuteronomio 26 - kumam bible

Deuteronomio 26

¹Ok kyokxe tuj tx'otx' ktzajel tq'o'n Qman Dios te kyetzb'ile ex ok kynajane tuj,

²ktzajel kyi'ne ch'in ti'j tnejel twitz kyawale, aju tzul tq'o'n tx'otx', ex kxel kyi'ne tuj jun chi'l, tuj lugar kjawil t-sk'o'n Qman Dios te nab'l tb'i.

³Che poltzune twitz pal aju in ajb'en tuj q'ij lu, ex teyle junjun kxel tma'n te kyja': Kxel nma'ne twitz Qman Dios ja'lo, o chin oktze tuj tx'otx' tzaj ttziyan Qman kye qxe'chel tu'n ttzaj tq'o'n qe.

⁴K'ik'eltzun ti'n pal aju chi'l tuj kyq'ab'e ex kb'el tq'o'n twitz t-altar Qman Dios,

⁵atzun kyeye kxel kyma'ne twitz Qman Dios kyja': Aj Arameotoq qe nxe'chele nej, mya nimtoq kyb'et ex b'etin xjaltoq qe. E pon tuj Egipto ex ax e kyaj ten najal. Te tib'ajxi e ok te jun nasyon matijxix at tipun ex nim kyajlal.

⁶Pero o kyb'incha aj Egipto nim mya b'a'n kyi'j, e b'aj yajla'n kyu'n, ex kub' kyq'o'n aq'untl kyuwxix kyib'aj.

⁷E kub'santzun twitz Qman aju Kydios qxe'chel tu'n tonin kyi'j; tzaj tb'i'n kyqanb'etz, tzaj tke'yin kymeb'ayil ex aq'untl kyuwxix tkub'toq kyib'aj, tuk'ix yajb'il kye,

⁸e etz q'i'n tu'n Qman tuj Egipto tu'n tipumal ma'xix, tuk'il xob'ajil nimxix, kyuk'ix qe techal ex qe b'inchb'en nim kyipumal;

⁹e ul q'i'n tu'n tuj lugar lu ex o tzaj tq'o'n tx'otx' lu te kye, jun tx'otx' q'inunxix ex tb'anilxix.

¹⁰Tu'ntzun jlu ma tzaj wi'ne aju tnejel twitz awal ma jaw nchmo'ne twitz tx'otx', aju o tzaj tq'o'n Qman weye, che chikuye txi kyma'ne. Kb'eltzun kyq'o'ne chi'l twitz Qman Dios, ex che b'el ẍmeje'ye k'ulul te.

¹¹Te tib'ajxi kb'el kyik'sa'ne jun ninq'ij, junx kyuk'il aj Leví ex qe stranjer xjal najl kyxole, ti'j tkyaqilju otoq tzaj tq'o'n Qman Dios kyeye ex kye qeju ate' tuj kyjaye.

¹²Oktzun tjapun toxin ab'q'i, aju ab'q'i tu'n t-xi q'ot tlaji'n ti'j tkyaqil, k'elel tpa'n teyle junjun kyeye tlaji'n ti'j tkyaqil twitz tawal, ex kxel tq'o'n kye aj Leví ex kye stranjer xjal najl kyxole, kyuk'ix kye k'wa'l minti' kyman ex kytxu' ex kye meb'a xu'j, tu'ntzun kywa'n ti'j tuj kytanmiye noq nik'pun kyajb'il.

¹³Kxe'ltzun kyma'ne twitz Qman Dios kyja': Ma tz'el npa'ne ch'in ti'j twitz wawale at tuj njaye, tu'n tajb'en teya, ex ma b'aj nsipane kye aj Leví ex kye stranjer xjal najl tuj ntanmiye, kyuk'ix kye k'wa'l minti' kyman ex kytxu' ex kye meb'a xu'j, ex ma japun wu'ne tkyaqilju tzaj tma'na weye; minti' ma chin ik'e kyib'aj tmandamyenta, ex minti' ma tzik' kyna'l wu'ne.

¹⁴Minti' o chin wa'ne ti'j tej atintoqe tuj b'is ti'j jun kyimni, minti' o chin wa'ne ti'j tej tz'iltoq qine, ex minti' o txi woyine kye kyimni. Nman Dios, ma txi nnimane tyola ex ma japun wu'ne tkyaqilju tzaj tma'na weye.

¹⁵Qo tke'yintza tuj tnajb'ila xjan max tuj kya'j, ex ky'iwlan kub'a qe aj Israel aqeju etzan tu'na, tuk'ix tx'otx' aju tzaj tq'o'na qeye, ik tza'nx xi ttziyana kye qxe'chele. Aju tx'otx' lu q'inunxix ex tb'anilxix, che chikuye.

¹⁶In tma'n Qman Dios kyeye ja'lo tu'n kyjapun qe ley ex qe mandamyent lu kyu'ne. Ten kykwente kyi'je tu'n kyjapun kyu'ne tu'n tkyaqil kyanmiye ex tu'n tkyaqil kyk'u'je.

¹⁷Ma txi kytziyane ja'lo qa ate Qman Kydiose, ex qa kukx tu'n kyxi lpe'ye ti'j, kukx tu'n t-xi kynimane te jumajx, ex kukx tu'n kyjapun qe tley, qe tmandamyent ex qe tkawb'il kyu'ne.

¹⁸Ax ikx ma tzaj tma'n Qman kyeye ja'lo, qa aqeye aj Israel jun k'loj xjal etzan tu'n ex o'kx tekuxix ik tza'nx o tzaj ttziyan kyeye, ex ma tma tu'n kyjapun kykyaqil qe tmandamyent kyu'ne.

¹⁹Tu'n Qman che okel q'o'ne te jun nasyon ma'xix toklen kywitz qe txqantl nasyon o che b'ant tu'n, tu'ntzun kyjaw nimsa'ne, tu'n kyyolin xjal b'a'n kyi'je, ex tu'n tten nimb'il kyeye; ex che okele te jun k'loj xjal pa'nmaj tu'n kyajb'ene o'kx te, ik tza'nx o tma.