Read kumam Deuteronomio 27 Bible Online

Deuteronomio 27 - kumam bible

Deuteronomio 27

¹Xi tma'n Moisés kyuk'ix qe tij xjal kyxol aj Israel qe orden lu kye xjal: —Japunx kyu'ne tkyaqilju kxel nma'ne kyeye ja'lo.

²Ok kyik'xe jlajxi nima Jordán ex ok kyokxe tuj tx'otx' ktzajel tq'o'n Qman Dios kyeye, b'ix che jaw kywab'ane txqan ab'j nmaq, ex k'okel kyq'o'ne ta'l txun kyi'j,

³tu'ntzun kyok tz'ib'et kyi'j qe ab'j lu kykyaqil qe xnaq'tzb'il o che'x nma'ne kyeye. Kyb'inchame jlu ok kyokxe tuj tx'otx' q'inunxix ex tb'anilxix aju ktzajel tq'o'n Qman Dios kyeye, ik tza'nx o tzaj ttziyan kye kyxe'chele.

⁴Kyja'tzun, kyik'xlenxiye tuj nima Jordán, che jawil kywab'ane twi witz Ebal qe ab'j ma txi nma'ne kyeye, ex k'okel kyq'o'ne ta'l txun kyi'j.

⁵Atzun kjawil kyb'incha'ne jun altar puro ab'j te Qman Dios; mi'n tz'el xpe'lit kyi'j,

⁶enterx qe ab'j che ajb'el. Tib'ajtzun altar lu, kb'el kyq'o'ne aju oyaj patun in kub' te Qman Dios,

⁷tuk'ix chojb'il te mojb'ab'l tib'il, ex atzun che wa'le ma chixin ex kb'el kyik'sa'ne ninq'ij twitz Qman Dios.

⁸B'ix che ok kytz'ib'ane clarxix kyi'j qe ab'j lu qe xnaq'tzb'il ma che'x nma'ne kyeye ja'lo.

⁹Atzunte Moisés, kyuk'ix qe pal aj Leví aqeju ate'toq tuk'il, xi tma'ntl kye aj Israel kyja': —Aqeye aj Israel, che txulekuye ex kyb'intze. Ja'lo ma che oke te jun k'loj xjal etzan tu'n Qman Dios.

¹⁰Tu'ntzun jlu, kynimanxe ex japunx qe tmandamyent ex qe tley kyu'ne, aqeju in che'x nma'ne kyeye ja'lo.

¹¹Ax q'ij xi tma'n Moisés jun orden kye xjal kyja':

¹²Kyik'xlenxiye tuj nima Jordán, che b'el ten qe tiyjil Simeón, qe tiyjil Leví, qe tiyjil Judá, qe tiyjil Isacar, qe tiyjil José ex qe tiyjil Benjamín twi witz Gerizim qanil ky'iwb'il kyib'aj xjal.

¹³Atzun qe tiyjil Rubén, qe tiyjil Gad, qe tiyjil Aser, qe tiyjil Zabulón, qe tiyjil Dan ex qe tiyjil Neftalí che b'el ten twi witz Ebal, tu'ntzun kymante aju mya b'a'n tzul kyib'aj xjal mib'an che niman.

¹⁴Atzun kye aj Leví kxel kyma'n kye kykyaqil aj Israel tu'n tq'ajq'ajel kywi' kyuwxix qe yol lu:

¹⁵Tzajxwit mya b'a'n tib'aj ju xjal kb'el b'inchante jun tilb'ilal ex k'okex tewan, qa jso'n otoq kub' tu'n, qa xpe'lin otoq b'ant ex qa ti'j k'uxb'il otoq kub' ulj tuj q'aq', b'inchamaj qe tu'n jun xjal at tnab'l ti'j tu'n tb'inchante, porke a jlu ik'un tu'n Qman. Ex kykyaqil xjal kxel kytzaq'we'n: Ikxwitju.

¹⁶Kxel kyma'ntl aj Leví: Tzajxwit mya b'a'n tib'aj ju xjal k'elel ik'unte tman ex qa ttxu'. Ex kykyaqil xjal kxel kytzaq'we'n: Ikxwitju.

¹⁷Kxel kyma'ntl aj Leví: Tzajxwit mya b'a'n tib'aj ju xjal kb'ajel ch'expunte tmojonil ttx'otx' tvesin tu'n tel telq'a'n. Ex kykyaqil xjal kxel kytzaq'we'n: Ikxwitju.

¹⁸Kxel kyma'ntl aj Leví: Tzajxwit mya b'a'n tib'aj ju xjal k'elel tzpet-sante jun moẍ ti'j tb'e. Ex kykyaqil xjal kxel kytzaq'we'n: Ikxwitju.

¹⁹Kxel kyma'ntl aj Leví: Tzajxwit mya b'a'n tib'aj ju xjal minti' in xi tb'incha'n ti'j jun stranjer xjal, ex qa ti'j jun meb'a xu'j ex qa ti'j jun k'wa'l minti' tman ex ttxu'. Ex kykyaqil xjal kxel kytzaq'we'n: Ikxwitju.

²⁰Kxel kyma'ntl aj Leví: Tzajxwit mya b'a'n tib'aj ju xinaq kb'el tan tuk'il t-xu'jil tman, porke tu'n jlu kb'el tq'o'n tch'ixwi tman. Ex kykyaqil xjal kxel kytzaq'we'n: Ikxwitju.

²¹Kxel kyma'ntl aj Leví: Tzajxwit mya b'a'n tib'aj ju xjal k'okel ten ti'j jun alumaj. Ex kykyaqil xjal kxel kytzaq'we'n: Ikxwitju.

²²Kxel kyma'ntl aj Leví: Tzajxwit mya b'a'n tib'aj ju xjal kb'el tan tuk'il tanb', maske o'kx kyman junx ex qa kytxu'. Ex kykyaqil xjal kxel kytzaq'we'n: Ikxwitju.

²³Kxel kyma'ntl aj Leví: Tzajxwit mya b'a'n tib'aj ju xinaq kb'el tan tuk'il xu'j tji'. Ex kykyaqil xjal kxel kytzaq'we'n: Ikxwitju.

²⁴Kxel kyma'ntl aj Leví: Tzajxwit mya b'a'n tib'aj ju xjal kb'el tb'yo'n jun tuk'il tuj ewaj. Ex kykyaqil xjal kxel kytzaq'we'n: Ikxwitju.

²⁵Kxel kyma'ntl aj Leví: Tzajxwit mya b'a'n tib'aj ju xjal ktzajel k'monte pwaq tu'n tkub' tb'yo'n jun xjal minti' til. Ex kykyaqil xjal kxel kytzaq'we'n: Ikxwitju.

²⁶Kxel kyma'ntl aj Leví: Tzajxwit mya b'a'n tib'aj ju xjal mi'n che'x tniman qe ley lu, ex qa mi'n ma che japun tu'n. Ex kykyaqil xjal kxel kytzaq'we'n: Ikxwitju.