Read kumam Deuteronomio 28 Bible Online

Deuteronomio 28 - kumam bible

Deuteronomio 28

¹Qa axix tok ma txi kynimane Qman Dios ex qa ma che japun kykyaqil qe tmandamyent kyu'ne, aqeju in che'x nma'ne kyeye ja'lo, che okeltzun q'o'ne tu'n Qman te ma'xix kyoklene kyxol kykyaqil nasyon twitz tx'otx'.

²Che tzajeltzun tq'o'n kykyaqil qe ky'iwb'il lu kyib'aje qa ma txi kynimane Qman Dios:

³Che b'el ky'iwla'ne tu'n Qman tuj tnam ex tuj kojb'il.

⁴Che b'el ky'iwla'n kyk'wa'le tu'n, tuk'ix twitz kyawale, kyal kyalune, kyal kywakẍe ex kyẍne'le.

⁵Che b'el ky'iwla'n tu'n Qman tkyaqilju twitz kyawale tku'x tuj kychi'le, ex aju arin tku'x tuj chok jatum in kub' xyoq'it.

⁶Che b'el ky'iwla'ne tu'n Qman ok kyxi'ye tuj kyb'eye ex ok kyul meltz'aje.

⁷Che tzajel tq'o'n Qman qe aj q'oj tuj kyq'ab'e ok kyok tzoqpaj kyi'je. Tuj txolin kyten ok kyok tzoqpaj kyi'je, pero che elel oq kywitze ex b'i'x kb'ajel kysputun kyib'.

⁸Kb'el tky'iwla'n Qman aju at tuj kytx'utx'e ex tkyaqilju kb'antel kyu'ne, ex che anq'ile tu'n tuj tzalajb'il tuj tx'otx' ktzajel tq'o'n kyeye.

⁹Qa ma che japun qe tmandamyent kyu'ne ex qa ma che b'ete tuj tb'e, kukxtzun che tele te jun k'loj xjal pa'nmaj te Qman Dios ik tza'nx o tzaj ttziyan kyeye.

¹⁰Kykyaqiltzun tnam twitz tx'otx' ok kyila' qa kyi'je tok tb'i Qman, ex che xob'el kywitze.

¹¹Ktzajel tq'o'n Qman nim t-xtalb'il kyeye, ktzajel tq'o'n nimxix kyk'wa'le, nimxix kyal kyalune ex nimxix twitz kyawale tuj tx'otx' tzaj ttziyan kye kyxe'chele tu'n ttzaj tq'o'n kyeye.

¹²Ktzajel tq'o'n Qman nim tq'inumab'l kyeye aju at twitz kya'j, ktzajel tq'o'n jb'al twitz kya'j tib'aj kytx'otx'e tujxix tq'ijlalil, tu'ntzun tky'iwla'njtz tkyaqil kyaq'unb'ene. Kxel kyq'o'ne kych'ex ela' nasyon, atzun kyeye mlay txi kyqanine kych'exe kye.

¹³Che okel q'o'ne te tnejel tu'n Qman, ex mya te mankb'il; kukx che tele te ma' kyoklene kyxol txqantl, ex mlay che ok q'o'ne te ch'in kyoklene qa ma txi kynimane ex qa ma che japun qe tmandamyent Qman Dios kyu'ne, aqeju in che'x nma'ne kyeye ja'lo,

¹⁴qa mi'n ma tz'el kypa'n kyib'e kyi'j, ex qa mi'n ma che'x lpe'ye kyi'j junxitl dios tu'n kyk'ulune kywitz.

¹⁵Qatzun mi'n ma txi kynimane Qman Dios, ex qa mi'n ma che japun kykyaqil qe tmandamyent ex qe tley kyu'ne, aqeju in che'x nma'ne kyeye ja'lo, che tzajeltzun kykyaqil qe mya b'a'n lu kyib'aje:

¹⁶Ktzajel mya b'a'n kyib'aje tuj tnam ex tuj kojb'il.

¹⁷Ktzajel mya b'a'n ti'j tkyaqil twitz kyawale tku'x tuj kychi'le, ex ti'j arin tku'x tuj chok jatum in kub' xyoq'it.

¹⁸Ktzajel mya b'a'n kyib'aj kyk'wa'le, kyib'aj twitz kyawale, kyib'aj kyal kywakẍe ex kyal kyẍne'le.

¹⁹Ktzajel mya b'a'n kyib'aje ok kyxi'ye tuj kyb'eye ex ok kyul meltz'aje.

²⁰Ktzajel t-sama'n Qman mya b'a'n kyib'aje, kb'ajel ttzpet-sa'n kynab'le ex ktzajel b'is kyi'je ti'j tkyaqilju kb'antel kyu'ne, okxi kynaje tu'n jurat naj, tu'n tlaj kyb'inchb'ene mya b'a'n ex tu'nju otoq kyaj kykoline.

²¹Ktzajel t-sama'n Qman jun tx'u'j yab'il kyib'aje tuj tx'otx' che najale tuj, okxi kyb'aj naje tu'n.

²²Ax ikx ktzajel t-sama'n yab'il cheb'a in che naj xjal tu'n, tuk'ix kyaq ex mal; ktzqijel tx'otx' tu'nju mi'n tzaj jb'al, ex ktzajel soj ex txqantl yab'il kyi'j awal. Kukx che tzajel qe jlu kyib'aje okxi kyb'aj naje.

²³Mlay tzajtl jb'al twitz kya'j kyib'aje, ex aju tx'otx' kkyuwixtel ik tza'n k'uxb'il.

²⁴Ktzajel tq'o'n Qman quq tuk'ix tza'j kyib'aje te t-xel jb'al, okxi kynaje.

²⁵Tu'n Qman kb'el kyi'je kyu'n aj q'oj. Tuj txolin kytene ok kyok tzoqpaje kyi'j, ex che elel oqe kywitz, b'i'x kb'ajel kysputun kyib'e, ex kykyaqil qe kawb'il twitz tx'otx' che jawil lab'in kyi'je.

²⁶Qe txkup in che lipan twitz kya'j ex qe txkup te tjaq' k'ul che chyo'l ti'j kyximlale ex mi a'l jun kxel sek'punte kye.

²⁷Che k'ixb'isetele tu'n tx'a'k tu'n Qman, ik tza'n e tenb'a aj Egipto, che jawil kyaqk'u ex kyqach tx'a'k kyi'je, tuk'ix sal. Mlay che q'ananjtz qe yab'il lu kyu'ne.

²⁸Ax ikx che okele te lok tu'n, che okele te moẍ, kb'ajel tzpet kynab'le tu'n,

²⁹ex xmakan che b'etele q'ijtl ik tza'n moẍ in b'et tuj qlolj. Mi jun ti'xti ok kyb'inchaye b'a'n k'elel. Kukx che b'ajel yajla'ne, kukx k'elel q'i'n aju at kyeye, ex mi a'l jun ktzajel onil kyeye.

³⁰Kb'antel ti'j tu'n kymoje'ye tuk'il jun xu'j, pero junxitl xinaq kb'el tan tuk'il; kjawil kyb'incha'ne kyjaye, pero mlay che najane tuj; kb'elex kyawa'ne tqan uva, pero mlay che lo'ne ti'j twitz.

³¹Kywitzxe kb'el b'yo'n kywakẍe, pero mlay che chyo'ne ti'j tchib'jal; kywitzxe k'elel q'i'n kyburre, ex mlay tz'ajtz q'o'ntl; che xe'l q'i'n kyẍne'le kyu'n aj q'oj kyi'je, ex mi a'l jun k-onil kyi'je tu'n kyel q'it tuj kyq'ab'.

³²Kywitzxe che xel q'o'n qe kyky'ajale ex kyme'jele kye stranjer xjal, kukx che ke'yile kyi'j tu'n kyul juntl maj, che siktel qe tb'aq' kywitze ex minti' jaku b'ant kyu'ne kyi'j.

³³Qe xjal minti' ojtzqin kywitz kyu'ne che wa'l ti'j twitz kyawale tzul tq'o'n tx'otx' ex ti'j tkyaqilju kyaq'unb'ene; kukx che b'ajel yajla'ne kyu'n, ex kykyaqil q'ij k'okel kyb'incha'n mya b'a'n kyi'je.

³⁴Oktzun tkyile tkyaqil jlu, che okele te lok tu'n.

³⁵Che k'ixb'isetele tu'n Qman tu'n tx'a'k plojxix kjawil jlet twi kych'eke, ti'j kykuxe ex ti'j tkyaqil kyximlale, ex mlay che b'anixe.

³⁶Che elex lajo'ne tu'n Qman tuk'ix kyreye; che pol q'o'ne tuj tx'otx' minti' ojtzqi'n kyu'ne mi kyu'n kymane. Atzun che ajb'ele kye junxitl dios, aqeju b'inchamaj ti'j tze' ex ti'j ab'j.

³⁷Che jawil lab'in xjal kyi'je, che okele te kyxmayb'il, ex che tze'l kyi'je kyuj kykyaqil tnam jatum che pol lajo'ne tu'n Qman.

³⁸Kb'elex kyawa'ne nim iyaj, pero nik'xi twitz kjawil kychmo'ne, ex kb'ajel kywa'n ẍplon.

³⁹Kb'elex kyawa'ne tqan uva ex k'okel kykwentine, pero mlay jaw kychmo'ne twitz, ex mlay che k'ane ti'j ta'l twitz, porke knajel tkyaqil kyu'n ẍuq'.

⁴⁰Ktel tqan olivo tuj tkyaqil kytx'otx'e, pero mlay tz'ok kyq'o'ne aseyt kyi'je, aju nne'l ti'j twitz olivo, ex kyajx qe kywitz che tzajel tz'aq na'nxtoq tpon kyq'ij.

⁴¹Che ul itz'j kyky'ajale ex kyme'jele, pero mlay che ten kyuk'ile, porke che xel q'i'n pres kyuj txqantl tnam.

⁴²Che najel kykyaqil tze' kyu'n ẍplon, tuk'ix tkyaqil twitz awal ktzajel tuj kytx'otx'e.

⁴³Aqe stranjer xjal najl tuj kytx'otx'e k'okel mas kyoklen, atzun kyeye noq kyja' k'elel kyoklene.

⁴⁴Ktzajel kyq'o'n kych'exe, atzun kyeye minti' kypwaqe ktel tu'n t-xi kyq'o'ne te kych'ex. Che okel te tnejel, atzun kyeye che okele te mankb'il.

⁴⁵Tkyaqil mya b'a'n lu ktzajel kyib'aje noq jatum che tele, okxi kykub' b'aje, porke minti' otoq txi kynimane Qman Dios ex minti' otoq che japun qe tmandamyent ex qe tley kyu'ne, aqeju o tzaj tma'n kyeye.

⁴⁶Aqeju mya b'a'n lu che ajb'el te jumajx te jun yek'b'il ma'xix t-xilen ex xob'ajilxix te kyeye ex kye kyiyjile.

⁴⁷Tu'nju minti' otoq che k'ulune twitz Qman Dios tuk'il tzalajb'il ex axix tok tu'n tkyaqil kyanmi ok ttzaj tq'o'n nimku kyq'inumab'le,

⁴⁸kyja'tzun che ajb'ele kye aj q'oj kyi'je, aqeju che tzajel t-sama'n Qman. K'ik'ex nim we'yaj kyu'ne ex nim txqetle'n, minti' kyxb'alune ktel ex tuj meb'ayil che tele. Che okel q'o'ne te kymajen xjal tu'n Qman, tu'ntzun tik'x nimku kyu'ne okxi kynaje.

⁴⁹Max ttxa'npun tx'otx' najchaq wen ktzajel ti'n Qman jun nasyon kyi'je, ik lipan ik tza'n t'iw, ex mlay tz'el kynik'e ti'j tyol.

⁵⁰Qe xjal lu puro tx'u'j kywitz, mlay che niman kye tij xjal ex mlay tzaj tz'e'y kyk'u'j kyi'j k'wa'l.

⁵¹Che xel kychyo'n kyal kywakẍe ex kxel kywa'n twitz kyawale ktzajel tuj kytx'otx'e, okxi kynaje kyu'n; mlay kyaj kyq'o'n kytriwoye mi kyk'aye ta'l twitz uva, mi kychi'ye aseyt, mi kyal kywakẍe ex mi kyal kyẍne'le, okxi kynaje kyu'n.

⁵²Kb'ajel kytxolb'an kyib' kyi'j kykyaqil kytanmiye, ex che okel tzoqpaj kyi'j, okxi kykub' kyxitun qe muro ma' kywa'l, aqeju otoq tz'ok qe' kyk'u'je kyi'j. Kb'ajel kytxolb'an kyib' kyi'jele, ex che okel tzoqpaj kyi'j kykyaqil tnam ate' tuj tx'otx' ktzajel q'o'n kyeye tu'n Qman Dios.

⁵³Ok tb'aj kytxolb'an kyib' qe aj q'oj kyi'jele kytanmiye, ktzajel b'aj kyk'u'je, ktzajel nimxix we'yaj kyi'je, ex axpe kyky'ajale ex kyme'jele kxel kychyo'ne, aqeju otoq che tzaj q'o'n kyeye tu'n Qman Dios.

⁵⁴Ikxpeju xinaq at kyxole, aju mas b'a'n tmod ex che'w tk'u'j, mlay tzaj q'aq'an tk'u'j ti'j terman mi ti'j t-xu'jil aju k'ujla'nxix tu'n, ex mi kyi'j tk'wa'l aqeju ate'x,

⁵⁵ex mlay kub' t-sipan kyxol aju tchib'jal tk'wa'l in xi tchyo'n, ex minti' jun ti'xti at tu'n t-xi twa'n ok kyok tzoqpaj qe aj q'oj kyi'je, ex ok kyb'aj yajla'ne nimxix kyuj kykyaqil kytanmiye.

⁵⁶Ikxpeju xu'j at kyxole, aju mas b'a'n tmod ex che'w tk'u'j, aju minti'toq in kub' aj tqan twitz tx'otx' qa minti' t-xajab' tok, mlay txi tq'o'n ch'in tchi' te tchmil aju k'ujla'nxix tu'n, ex mi kye tal;

⁵⁷ok tul itz'j jun tal, tuj ewaj kxel tchyo'n tuk'ix tmuj, ex mi'n kub' t-sipan kyxol qeju ate' tuj tja; ex minti' jun ti'xti at tu'n t-xi twa'n ok kyok tzoqpaj qe aj q'oj kyi'j qe kytanmiye.

⁵⁸Qa mi'n ma che japun qe ley kyu'ne, aju tz'ib'an tuj u'j lu, ex qa mi'n ma che xob'e twitz b'iyb'aj tb'anilxix ex xob'ajilxix, aju tb'i Qman Dios,

⁵⁹che tzajeltzun t-sama'n Qman k'ixb'isab'l ma'xix ex xob'ajilxix kyib'aje ex kyib'aj qe kyiyjile che ul itz'j te tib'ajxi, ex che tzajel t-sama'n qe yab'il plojxix kyi'je, aqeju minti' q'anb'il kyi'j.

⁶⁰Ktzajel tq'o'n kykyaqil k'ixb'isab'l kyib'aje, aqeju e tzaj tuj Egipto, aqeju tzaj nimxix t-xob'il kyi'je kyu'n, ex kukx che k'ixb'isetele kyu'n.

⁶¹Mya o'kx jlu, ax ikx che tzajel t-sama'n Qman txqantl yab'il ex k'ixb'isab'l kyib'aje, aqeju mya tz'ib'an tuj u'j te ley lu, okxi kykub' b'aje kyu'n.

⁶²Maske otoq chmet nim kyb'aje ik tza'n qe che'w twitz kya'j, pero nik'xi kyb'aje kyjel ten, tu'nju minti' otoq txi kynimane Qman Dios.

⁶³Ik tza'nx o tzalaj Qman kyi'je tu'n tb'inchante b'a'n kyeye ex tu'n tchmet kyb'aje, ax ikxtzun ktzalajel ok kynaje tu'n; che elex q'i'ne tu'n tuj tx'otx' jatum che pole tu'n kyoke te tajwil.

⁶⁴Che b'ajel sputune tu'n Qman kyuj kykyaqil nasyon max ttxa'npun tx'otx'. Atzun che k'ulule kywitz junxitl dios, aqeju tze' ex ab'j kytx'otx'il, aqeju minti' ojtzqi'n kyu'ne ex mi kyu'n qe kyxe'chele.

⁶⁵Oktzun kytene kyuj qe nasyon lu, mlay che tene tuj txub'txaj ex mlay che ojlane. Tu'n Qman che anq'ile tuk'il kyxob'ile, b'is ktel kywitze, ex ktzajel b'aj kyk'u'je.

⁶⁶Tuj xob'ajil che anq'ile, che xob'tele q'ijtl ex qonik'an ex mlayx che tene tuj segur.

⁶⁷Te prim ok kyma'ye: Noqwit b'a'n tok qax naj, ex te qonik'an ok kyma'ye: Noqwit b'a'n tkub' naj q'ij, tu'nju nimxix t-xob'il ktzajel kyi'je, ex tu'nju ti'chaq k'okel kyke'yine.

⁶⁸Maske o tma Qman kyeye tu'n mi'n kyaj meltz'aje tuj tb'eyil Egipto, che ajel meltz'aje tu'n juntl maj tuj Egipto kyuj barc. Atzun kxel kyk'ayin kyib'e tu'n kyoke te majen kye aj q'oj kyi'je, ex mi jun kxel laq'onte kyeye.