Read kumam Deuteronomio 29 Bible Online

Deuteronomio 29 - kumam bible

Deuteronomio 29

¹Atzun yol lu kyaj b'ant ti'j tu'n Qman kyuk'il aj Israel, aju tzaj tma'n te Moisés tuj tx'otx' Moab, ex part aju otoq kyaj b'ant ti'j tu'n kyuk'il twi witz Horeb.

²Oktzun tchmo'n Moisés kykyaqil aj Israel ex xi tma'n kye kyja': O kyile tkyaqilju o tb'incha Qman tuj tx'otx' Egipto ti'j Faraón, ex kyi'j qe xjal at kyoklen ttxlaj ex ti'j tkyaqil ttanmi,

³ex aqeye testiw kyi'j qe nmaq k'ixb'isab'l, qe techal ex qe b'inchb'en nim kyipumal e b'ant.

⁴Ex asta ja'lo, na'nx ttzaj tq'o'n Qman kynab'le, na'nx ttzaj tq'o'n amb'il tu'n tel kynik'e ti'j, mi tu'n tex tuj kywi'ye ti t-xilen tkyaqil jlu.

⁵Tuj 40 ab'q'i aqine ma chin ẍaqlunte kyeye tuj tzqij tx'otx'. Tuj tyemp lu minti' o b'aj kyxb'alune ex mi kyxajb'iye,

⁶minti' o che wa'ne pan in b'ant ti'j triw, minti' o che k'ane ta'l twitz uva, ex minti' o che k'ane q'e'n tu'ntzun tel kynik'e ti'j Qman Dios.

⁷Tej qul tuj lugar lu, etz tzoqpaj Sehón qi'j, aju rey te tnam Hesbón, tuk'ix Og aju rey te tx'otx' Basán, ex kub' kyi'j qu'n;

⁸tzyettzun kytx'otx' qu'n, ex o txi qq'o'n te kyetzb'il qe tiyjil Rubén, qe tiyjil Gad, tuk'ix mij tiyjil Manasés.

⁹Tu'ntzun jlu, kynimanxe ex japunx kyu'ne aju yol ma kyaj b'ant ti'j kyuk'ile, tu'ntzun tel b'a'n kyeye tuj tkyaqilju kb'antel kyu'ne.

¹⁰Ja'lo, lu qeye kyb'uyin kyib'e kykyaqile twitz Qman Dios: Qe nejenel kye junjun k'loj kyiyjile, qe tij xjal, qe xjal at kyoklen, ex kykyaqil qe xinaq aj Israel,

¹¹kyuk'ix qe k'wa'l, qe xu'j ex qe stranjer xjal aqeju ax najl kyxole, tza'nx qe xjal tx'emil kysi'ye ax ikx qe xjal iqal kya'ye;

¹²tu'ntzun tokx kyq'on kyib'e axix tok tjaq' yol kyjel b'ant ti'j tu'n Qman Dios kyuk'ile ja'lo.

¹³Aju yol kyjel b'ant ti'j kyuk'ile ja'lo atzun jlu: Aqeye che okel te jun k'loj xjal etzan tu'n, atzun te k'okel te Kydiose, ik tza'nx o tma kyeye ex ik tza'nx tzaj ttziyan kye kyxe'chele Abraham, Isaac ex Jacob.

¹⁴Ex mya o'kx kyuk'ile kyjel b'ant ti'j yol ma tzaj ttziyan Qman,

¹⁵aqeye kykub'sa'ne twitz; ax ikx kyuk'il qeju che ul itz'j te tib'ajxi.

¹⁶B'a'n kyu'ne tza'n tten o qo anq'in tuj Egipto, ex tza'n tten o qo ik' kyuj qe nasyon e knet qu'n tuj qb'e.

¹⁷Atzun o kyile qe kydios xjal mya ax tok dios qe, ex qe tilb'ilal ik'b'ilxix b'inchamaj ti'j tze', ti'j ab'j, ti'j saq pwaq ex ti'j q'an pwaq, aqeju in che k'ulun xjal lu kywitz.

¹⁸Ten kykwente kyi'je, minti'wt jun xinaq ex mi jun xu'j, minti'wt jun ja xjal ex mi jun k'loj kyiyjil aj Israel, kyaj kolinte Qman Dios tu'n tok ten k'ulul kywitz kydios qe nasyon lu. Miwt tz'ok jun kyeye ik tza'n jun k'ul k'a ex venen tlok'.

¹⁹Tb'ajlenxi kyb'i'ne qe yol lu kyi'j mya b'a'n ktzajel kyi'je, qa at jun kyeye ok tna'nte puro b'a'n ta' ex ma kub' t-ximan kyja': Tkyaqil k'elel b'a'n weye maske nb'inchaye noq alkyex wajb'ile, qa chi; tu'n tlaj xjal lu, ok che najel kykyaqil xjal.

²⁰Mlay kub' tnajsa'n Qman til xjal lu, mlay kub' tuj twitz aju il otoq tb'incha, noq o'kx ktzajel tq'oj ti'j; ktzajel ti'j xjal lu tkyaqilju mya b'a'n tz'ib'amaj tuj u'j lu, ex b'i'x che najel qe tiyjil twitz tx'otx' tu'n Qman.

²¹K'elel tpa'n Qman aju xjal lu kyi'j kykyaqil k'loj kyiyjil aj Israel, tu'n ttzaj mya b'a'n ti'j ik tza'nx tkyaqil mya b'a'n ma kyaj b'ant ti'j, aju tz'ib'an tuj u'j te ley lu.

²²Qe kyiyjile che ul itz'j tuj q'ijlalil tzul, ax ikx qe stranjer xjal che tzajel kyuj tx'otx' najchaq, ok kyila' qe k'ixb'isab'l ex qe yab'il che tzajel t-sama'n Qman tib'aj tx'otx' lu.

²³Tuj tkyaqil tx'otx' lu ok kyila' puro azufre ex atz'an ex otoq b'aj tz'e'y tx'otx', mlay b'ant tu'n tok awal tuj, ex minti' jun ti'xti ktzajel tpoq'sa'n; milpe jun wi' k'ul kch'iyil tuj. Ik k'okel ik tza'n o tenb'a tej kynaj qe tnam Sodoma, Gomorra, Adma ex Seboím, aqeju e b'aj tz'e'y tu'n tq'oj Qman ex tu'n ttx'u'jil.

²⁴Kykyaqiltzun xjal kyuj txqantl nasyon che qanil ti'j kyja': ¿Tiqu'n o tb'incha Dios jlu ti'j tx'otx' lu? ¿Tiqu'n o tzaj nimxix ttx'u'jil?

²⁵Ktzajeltzun tzaq'we'n kye kyja': Tu'nju o kyaj kykolin aju yol kyaj b'ant ti'j tu'n Dios kyuk'il, aju Kydios kyxe'chel, aju b'ant ti'j tu'n kyuk'il tej kyetz q'i'n tu'n tuj Egipto,

²⁶ex tu'nju e k'ulun ex e kub' ẍmeje' kywitz txqantl dios, aqeju minti' ojtzqi'n kyu'n ex minti' o tzaj q'o'n jun ti'xti kye kyu'n.

²⁷Tu'ntzun jlu tzaj tq'oj Dios ti'j tx'otx' lu ex tzaj tq'o'n tkyaqil mya b'a'n tib'aj, aju tz'ib'an tuj u'j lu.

²⁸Tuk'il tq'oj ex nimxix ttx'u'jil, e je'x tlajo'n qe xjal tuj kytx'otx' tu'n kyxi q'i'n tuj juntl tx'otx', ik tza'n in b'aj ja'lo, che chilo xjal kxel kytzaq'we'n.

²⁹Tkyaqilju minti' ma tzaj tyek'un Dios qe, te Qman Dios qe; atzun qeju o che tzaj yek'un, qe qe jlu ex kye qe qk'wa'l te jumajx, tu'ntzun kyjapun qu'n kykyaqil qe mandamyent in tma'n tuj u'j te ley lu.