Read kumam Deuteronomio 3 Bible Online

Deuteronomio 3 - kumam bible

Deuteronomio 3

¹Xi qlajo'ntl qb'e, o jax tuj b'e in xi' tuj Basán, ex ate Og aju rey te Basán etz q'ojlel qi'j, kyuk'ix kykyaqil t-soldad, ex e jo'k tzoqpaj qi'j tuj tnam Edrei.

²Atzunte Qman tzaj tma'n weye kyja': Mi'n xob'a twitz, porke ma txi nq'o'ne tuj tq'ab'a kyuk'ix qe t-soldad ex tkyaqil ttx'otx'. B'inchama ti'j ik tza'nx o tb'inchaya ti'j Sehón aju rey kye aj Amorreo, aju najltoq tuj tnam Hesbón.

³Kyja'tzun tzaj tq'o'n Qman Dios aju rey Og tuj qq'ab', ex kykyaqil qe t-soldad. Kub' qb'yo'n kykyaqil ex mi jun kyaj anq'in qu'n.

⁴Ax ikx e tzyet kykyaqil tnam qu'n; mi jun o tzoqpaj. Tzyet 60 tnam qu'n tuj tkyaqil tx'otx' Argob, aqeju ate'toq tjaq' tkawb'il Og tuj tx'otx' Basán.

⁵Kykyaqil tnam lu ma' twa'l muro tok kyi'j; at kylamel ex tok k'uxb'il tzyulte kye; minti' e ok te tajlal qe tnam minti' muro kyi'j.

⁶Kykyaqil qe jlu b'i'x e naj qu'n, ik tza'nx otoq qb'incha ti'j Sehón aju rey te tnam Hesbón, ex kub' qb'yo'n qe xinaq, qe xu'j ex qe k'wa'l;

⁷o'kx qe alumaj ex kykyaqil ti'xti wi'yilxix at kye aj q'oj qi'j, e kyaj qklo'n tu'n tajb'en te qe.

⁸Kyja'tzun, tuj tq'ijlalil lu o jo'k te kyajwil qe tx'otx' tzyu'ntoq kyu'n kab'e rey aj Amorreo, aqeju najltoq tuj tumlal tjawitz q'ij te nima Jordán, tzajnix qe' ttzi tq'ab' xaq Arnón ex ponin b'aj max twi witz Hermón.

⁹(Aju witz lu, Sirión tb'i kyu'n aj Sidón, ex Senir tb'i kyu'n aj Amorreo.)

¹⁰E tzyet qu'n kykyaqil tnam kykub'sa'n tuj chq'ajlaj tuj tiwitz tx'otx', tuk'ix tkyaqil tx'otx' Galaad ex Basán, aju ponin b'aj max kyuj tnam Salca ex Edrei, aqeju ate'toq tjaq' tkawb'il Og tuj Basán.

¹¹(O'kx te rey Og otoq kyaj anq'in kyxol kyiyjil xjal ma' kywa'l. Aju twatb'il puro k'uxb'il te kyaje var tnuqb'il ex var tuk' mey twitz. Ax ta' watb'il ja'lo tuj tnam Rabá tuj kytx'otx' aj Amón.)

¹²Tejtzun ttzyet tx'otx' lu qu'n, xi nq'o'ne kye tiyjil Rubén ex kye tiyjil Gad aju tx'otx' xi'ynix tuj tnam Aroer, aju tkub' ttzi tq'ab' xaq Arnón ex ponin b'aj max tuj tmijil tx'otx' Galaad, kyuk'ix kykyaqil tnam ate' tuj.

¹³Atzun juntl piẍ tx'otx' Galaad, ex tkyaqil tx'otx' Basán aju tkyajsa'ntoq tjaq' tkawb'il rey Og, tuk'ix tkyaqil tx'otx' Argob aju toktoq tb'i kytx'otx' aj Refait, xi nq'o'ne kye mij tiyjil Manasés.

¹⁴(Ate Jair tiyjil Manasés ok te tajwil tx'otx' Argob, aju ponin b'aj max tuj tmojonil tx'otx' Gesur ex Maaca, ex tex tb'i ok tq'o'n ti'j tx'otx' Basán, atzun jlu: Havot-jair, ex axtzun tb'i toksa'n ja'lo.)

¹⁵Aju tx'otx' Galaad xi nq'o'ne te Maquir;

¹⁶atzun kye tiyjil Rubén ex kye tiyjil Gad xi nq'o'ne aju tx'otx' tkub'sa'n t-xol Galaad tuk'il tq'ab' xaq Arnón, ex atzun nne'x tmojonil tuj tmijil tq'ab' xaq, ex ponin b'aj max ttzi tq'ab' xaq Jaboc, aju tmojonil kytx'otx' aj Amón.

¹⁷Atzun ponin tmojonil kytx'otx' ttzi nima Jordán, tzajnix qe' ttzi lagun Cineret ex ponin b'aj max ttzi mar at tuj chq'ajlaj Arabá, ex nnik' ttzi'yile mar t-xe'yile witz Pisga tuj tumlal tjawitz q'ij.

¹⁸Xitzun nma'ne kyeye kyja': Ate Qman Dios ktzajel q'onte tx'otx' lu kyeye tu'n tok te kyetzb'ile. Kykyaqil qeju o b'ant kyq'ojin, kyi'nx kymakb'il in che ajb'en tuj q'oj, ex e kykub' nej kywitz qe kyerman ax aj Israel;

¹⁹o'kx qe xu'j kyuk'ix qe k'wa'l ex qe wakẍ che kyjel ten kyuj qe tnam o txi nq'o'ne kyeye, porke b'a'n wu'ne nimxix kywakẍe at.

²⁰Okxi ttzaj tq'o'n Qman kye kyermaniye jun lugar jatum tu'n kyojlan, ik tza'n o tzaj tq'o'n kyeye, ikxtzun kye tu'n kyetzan ti'j tx'otx' aju ktzajel tq'o'n Qman kye jlajxi nima Jordán, maxitzun k'ajel meltz'aj teyle junjun kyeye tuj kyetzb'ile o txi nq'o'ne.

²¹Ax ikx xi nma'ne te Josué kyja': O tila tkyaqilju o tb'incha Qman Dios kyi'j kab'e rey; ikxtzun kb'antel tu'n Qman kyi'j kykyaqil qe kawb'il ate' jatum k'ik'el b'eta.

²²Mi'n xob'a kywitz, porke ate Qman Dios ktel kyuk'ile tuj q'oj.

²³Tujx tq'ijlalil lu in kub'sane twitz Qman ex xi nma'ne te kyja':

²⁴Nman, tu'na tzaj xe't tu'n ttzaj tyek'una tajwalila ex tipumala weye, aqine tmajena. Minti' juntl Dios at tuj kya'j mi twitz tx'otx' jaku b'ant tu'n ik tza'n qe teya taq'unb'en ex qe techal ma'xix kyxilen in che b'ant tu'na.

²⁵In chin kub'sane twitza tu'n ttzaj tq'o'na amb'il weye tu'n wik'xe jlajxi nima Jordán, ex wajb'ile tu'n twile aju tb'anil tx'otx' at ma chixin, ex aju tiwitz tx'otx' tb'anilxix, ax ikx aju witz Líbano, nchiye te.

²⁶Ex otoq jaw q'ojl Qman wi'je noq tu'n kyeye kylaj, ex minti' tzaj tb'i'n nyole, o'kx tzaj tma'n weye kyja': Mi'n kukx tyolina. Mi'n tzaj tma'na txqantl tyola weye ti'j jlu.

²⁷Tjaxa twi witz Pisga ex ke'yinxa tx'otx' te jawni, te kub'ni, te elni ex te okni, ex tu'n tik'xa tuj nima Jordán, mi'n txi nq'o'ne amb'il teya.

²⁸O'kx q'manxa te Josué alkye tu'n tb'ant tu'n, kyuwsanxa tk'u'j ex q'onxa tipun, porke ate Josué kb'el nej kywitz qe xjal, ex tu'n ktzyetel tx'otx' aju kxel tke'yina, tu'n tok te kyetzb'il.

²⁹Axtzun o qo kyaj ten tuj chq'ajlaj tkub'sa'n tumlal twitz lugar Bet-peor.