Read kumam Deuteronomio 30 Bible Online

Deuteronomio 30 - kumam bible

Deuteronomio 30

¹Oktzun ttzaj kyib'aje tkyaqilju ma txi nma'ne kyeye, qa ky'iwb'il ex qa mya b'a'n, ex ok kyximane kyi'j jlu kyuj qe nasyon jatum che pol lajo'ne tu'n Qman Dios,

²qa ma che ajtz meltz'aje tuk'il kyuk'ix qe kyk'wa'le, ex qa tu'n tkyaqil kyanmiye ex tu'n tkyaqil kyk'u'je ma txi kynimane aju yol in xi nma'ne kyeye ja'lo,

³che ajetztzun q'i'ne juntl maj tu'n Qman Dios, ktzajel q'aq'an tk'u'j kyi'je, ex che ajetz chmo'ne tu'n juntl maj, noq jatum otoq che pon sputje tu'n kyuj txqantl nasyon.

⁴Maske otoq che ex lajo'ne tuj kytanmiye ex otoq che pon sputje kyuj lugar mas najchaq wen, ex che ajetz q'i'ne tu'n Qman Dios ex max ma chixin che ajetz chmo'ne tu'n.

⁵Che ajetz q'i'ne tu'n Qman Dios juntl maj tuj tx'otx' aju kyetzb'il kyxe'chele ojtxi, che okeltzune tajwil juntl maj, b'a'n k'elel tkyaqil te kyeye tu'n, ex kchmetel mas nim kyb'aje ik tza'n kye qtzan kyxe'chele.

⁶Kch'expetel kyanmiye tu'n Qman Dios ax ikx kye kyiyjile che ul itz'j te tib'ajxi, tu'ntzun kyk'ujlanteye Qman Dios tu'n tkyaqil kyk'u'je ex tu'n tkyaqil kyanmiye, tu'ntzun tten kychwinqlale.

⁷Kb'eltzun tq'o'n Qman Dios tkyaqil mya b'a'n lu kyib'aj qe aj q'oj kyi'je, aqeju o che el ik'unte kyeye ex o che b'aj yajla'ne kyu'n;

⁸atzun kyeye che ajetz meltz'aje tuk'il Qman, kxel kynimane, ex k'okel tilil kyu'ne tu'n kyjapun kykyaqil qe tmandamyent kyu'ne, aqeju in che'x nma'ne kyeye ja'lo.

⁹Che b'eltzun ky'iwla'ne tu'n Qman Dios ti'j tkyaqilju kb'antel kyu'ne, che ul itz'j nim kyk'wa'le ex nim kyalune ex kchmetel nim twitz kyawale. Ktzalajel Qman Dios kyi'je juntl maj, ex ok tb'incha' b'a'n kyeye, ik tza'n o tzalaj nej kyi'j qe kyxe'chele ex o tb'incha b'a'n kye.

¹⁰Tzul tq'o'n tkyaqil jlu kyeye qa ma txi kynimane Qman Dios, qa ma che japun qe tmandamyent ex qe tley kyu'ne, aqeju tz'ib'an tuj u'j te ley lu, ex qa ma che ajtz meltz'aje tuk'il tu'n tkyaqil kyk'u'je ex tu'n tkyaqil kyanmiye.

¹¹Aju mandamyent in xi nma'ne kyeye ja'lo mya kyuw te kyeye, ex mya mlay b'ant kyu'ne.

¹²Mya max ta' tuj kya'j, tu'ntzun kymanteye kyja': ¿Alkye jun jaku jax tuj kya'j tu'n ttzaj tb'i'n ex tu'n ttzaj tma'n qe, tu'ntzun tjapun qu'n?

¹³Ax ikx mya max ta' jlajxi mar, tu'ntzun kymanteye kyja': ¿Alkye jun jaku tzik'x jlajxi mar tu'n ttzaj tb'i'n ex tu'n ttzaj tma'n qe, tu'ntzun tjapun qu'n?

¹⁴Niqa' ta' mandamyent kyuk'ile; ax ta' tuj kytzi'ye, ex ax ta' tuj kyanmiye, tu'ntzun tjapun kyu'ne.

¹⁵Kyb'intze ja'lo: Kb'el nq'o'ne kab'e tumel kywitze tu'n tjaw kysk'o'ne alkye kyajb'ile; qa chwinqlal ex qa kamik; qa tu'n kytene b'a'n ex qa tu'n kytene mya b'a'n.

¹⁶Qa ma txi kyb'i'ne aju in xi nma'ne kyeye ja'lo, qa ma kyk'ujlaye Qman Dios, qa ma che ok lpe'ye ti'j, qa ma che japun qe tmandamyent kyu'ne kyuk'ix qe tley ex qe tkawb'il, che anq'iltzune, kchmetel nim kyk'wa'le, ex che ky'iwlanjtzele tu'n tuj tx'otx' ktzajel tq'o'n kyeye tu'n kyoke te tajwil.

¹⁷Qatzun ma tz'el kypa'n kyib'e ti'j Qman, qa minti' ma txi kyb'i'ne tyol, qa ma txi kyq'o'ne amb'il tu'n kyxi lpe'ye kyi'j junxitl dios tu'n kyk'ulune kywitz ex tu'n kykub' ẍmeje'ye kywitz,

¹⁸b'i'x kxel nma'ne kyeye ja'lo, ax tok il ti'j che najele, ex mlay che tene nim q'ij tuj tx'otx' ktzyetel kyu'ne kyik'xlenxiye tuj nima Jordán.

¹⁹Tuj q'ij lu in che ok nq'o'ne kya'j tuk'ix tx'otx' te testiw kyi'je, qa ax tok ma txi nma'ne tu'n tjaw kysk'o'ne kyxol kab'e tumel lu: Qa chwinqlal ex qa kamik, qa ky'iwb'il ex qa mya b'a'n. Kyja'tzun kysk'on jawe chwinqlal, tu'ntzun kyanq'ine kyuk'ix qe kyiyjile che ul itz'j te tib'ajxi.

²⁰Kyk'ujlame Qman Dios, kynimanxe, ex kukx che lpe'ke ti'j, porke a q'olte kychwinqlale, ex tu'n che tele nim q'ij twitz tx'otx' tzaj ttziyan tu'n ttzaj tq'o'n kye kyxe'chele Abraham, Isaac ex Jacob.