Read kumam Deuteronomio 31 Bible Online

Deuteronomio 31 - kumam bible

Deuteronomio 31

¹O yolin Moisés juntl maj kyuk'il kykyaqil aj Israel ex xi tma'n kye kyja':

²Ma chin japune twi' 120 ab'q'i, ex mlay chin kub' nejtle kywitze. Ax ikx o tzaj tma'n Qman weye kyja': Mlay tz'ikxa jlajxi nima Jordán, chi Qman.

³Axte Qman Dios kb'el nej kywitze, ex kywitzxe che najel qe nasyon lu tu'n, tu'ntzun kyoke tajwil kytx'otx'. Ate Josué k'okel te nejenel tu'n tkub' nej kywitze ik tza'nx o tma Qman.

⁴Ok tb'incha' Qman kyi'j qe nasyon lu ik tza'nx o tb'incha ti'j Sehón ex Og, aqeju rey kye aj Amorreo; e naj qe jlu tu'n, kyuk'ix kytanmi.

⁵Che tzajel tq'o'n Qman qe nasyon lu tuj kyq'ab'e. Kyb'inchame kyi'j ik tza'nx o txi nma'ne kyeye.

⁶Tenx kyipune ex kyuwx kyk'u'je, mi'n che xob'e ex mi'n tzaj b'aj kyk'u'je ok kypon we'ye kywitz, ex ktel Qman Dios kyuk'ile; mlay che kyaj q'o'ne ex mlay che kyaj koline tu'n.

⁷Tzajtzun txko'n Josué tu'n Moisés, ex kywitz kykyaqil aj Israel xi tma'n te kyja': Tenx tipuna ex kyuwx tk'u'ja, porke aya kb'el nej kywitz xjal lu tu'n kypon tuj tx'otx' aju tzaj ttziyan Qman kye kyxe'chel tu'n ttzaj tq'o'n kye. Aya kb'el sipante kyetzb'il.

⁸Axte Qman kb'el nej twitza ex ktel tuk'ila; mlay kyaj q'o'na tu'n, ex mlay kyaj kolina tu'n. Tu'ntzun jlu, mi'n xob'a ex mi'n b'aj tk'u'ja.

⁹Kub' ttz'ib'an Moisés aju ley lu ex xi tq'o'n kye pal aj Leví, aqeju tok kyoklen tu'n t-xi kyi'n aju kax k'ub'l tley Dios, ax ikx xi tq'o'n kye kykyaqil tij xjal kyxol aj Israel,

¹⁰ex xi tma'n kye kyja': Tuj wuqchaq ab'q'i, ok tjapun ab'q'i te najsb'il k'as, tuj ninq'ij ok kyjaw b'inchet qe ja t-xaq tze'yin kywi',

¹¹ok tok kychmon kyib' kykyaqil aj Israel twitz Qman Dios tuj lugar kjawil t-sk'o'n, kjawiltzun kysch'i'ne libro te ley lu kywitz.

¹²Kykyaqil xjal il ti'j tu'n kyok chmet, tza'nx qe xinaq ikx qe xu'j, qe k'wa'l ex qe stranjer xjal ax najl kyxole, tu'ntzun kyb'inte ok tjaw sch'it libro te ley, tu'n tb'ant kyniman te Qman Dios, ex tu'n tjapun kyu'n tkyaqilju in tma'n ley,

¹³tu'ntzun kyb'inte qe k'wa'l aqeju na'nxtoq kyb'inte, ex tu'n tb'ant kyniman te Qman Dios tuj tkyaqil q'ij ok kyten twitz tx'otx', aju ktzajel q'o'n kyeye kyik'xlenxiye tuj nima Jordán.

¹⁴Tzaj tma'n Qman te Moisés kyja': B'intza, in laq'e' ttzaj tq'ijlalil tu'n tkyima. Tu'ntzun jlu txkontza Josué, ex kykab'ile kyxi'ye tuj ja te mojb'ab'l tib'il tu'ntzun t-xi nma'ne te alkye tu'n tb'ant tu'n. Xi'tzun Moisés tuk'ix Josué, ex e okx tuj ja te mojb'ab'l tib'il.

¹⁵Tujtzun ja lu kub' tyek'un tib' Qman kywitz tuj txqan muj kub' ten ttzi ja.

¹⁶Tmatzun Qman te Moisés kyja': Ch'ix tpon tq'ijlalil tu'n tkyima. Qe xjal lu k'elel kypa'n kyib' wi'je, ok che okel ten k'ulul kywitz kydios xjal tuj tx'otx' jatum che pol; atzun weye chin kyjel koline kyu'n ex mlay japun kyu'n aju yol kyaj b'ant ti'j wu'ne kyuk'il.

¹⁷Oktzun tel kypa'n kyib' wi'je ktzajel nimxix nq'oje kyi'j, che kyjel nkoline, k'elel wewan wib'e kywitz ex che najel kykyaqil, ktzajel nim mya b'a'n kyib'aj ex nim yajb'il kye tzul. Maxitzun ok kyma': ¿Myapelo tu'nju mi a'l Dios quk'il o tzaj tkyaqil mya b'a'n lu qib'aj?

¹⁸Ok tb'ant tkyaqil jlu kyu'n, ax tok k'elel npa'n wib'e kyi'j tu'n tlaj tkyaqil mya b'a'n otoq kyb'incha, ex tu'n tlaj otoq che k'ulun kywitz junxitl dios.

¹⁹Ja'lotzun, kytz'ib'an kub'e aju b'itz lu ex kyxnaq'tzanxe kye aj Israel, tu'ntzun t-xi kyb'itzan ex tu'n tok b'itz lu te jun testiw wu'ne kyi'j,

²⁰ex kyokxlenxi nq'o'ne tuj tx'otx' aju xi ntziyane kye kyxe'chele, aju tx'otx' q'inunxix ex tb'anilxix, atzun che nojel wen ex che gordyixel, ex oktzun kynoj wen che okel lpe' kyi'j junxitl dios ex che k'ulul kywitz, atzun weye chin elel ik'une kyu'n, ex mlay japun kyu'n aju yol ma kyaj b'ant ti'j wu'ne kyuk'il.

²¹Oktzun ttzaj nim mya b'a'n ex yajb'il kyib'aj, atzunju b'itz lu k'okel te testiw kyi'j, porke ktzajel kyna'n ex kxel kyb'itzan qe kyiyjil che ul itz'j te tib'ajxi. Tej na'nxtoq kyokx nq'o'ne tuj tx'otx' o txi ntziyane kye, ya b'a'ntl wu'ne alkye kyximb'etz, chi Dios.

²²Tujx q'ij lu kub' ttz'ib'an Moisés aju b'itz lu, ex xi t-xnaq'tza'n kye aj Israel tu'n tb'ant kyu'n.

²³Xitzun tma'n Qman te Josué aju tky'ajal Nun, chi kyja': Tenx tipuna ex kyuwx tk'u'ja, porke aya k'okex q'inte kye aj Israel tuj tx'otx' o txi ntziyane kyeye, ex aqine chin tel tuk'ila.

²⁴Tej tb'aj ttz'ib'an Moisés tkyaqil ley lu tuj jun libro,

²⁵xi tma'n kye aj Leví aqeju at kyoklen tu'n t-xi kyi'n kax k'ub'l tley Dios, ex chi kyja':

²⁶Kyi'nxe aju libro lu jatum tz'ib'an ley, ex kyq'onkuye ttxlaj kax k'ub'l tley Dios tu'ntzun ax tu'n tten te jun testiw kyi'je.

²⁷B'a'n wu'ne, aqeye jun k'loj xjal mib'an che niman ex kyuw kywi'ye. Qatzun minti' ma txi kynimane Qman akux itz'x qine kyxole, pyortzunlo kyu'ne ok nkyime.

²⁸Kyi'ntze kykyaqil qe tij xjal ex qe nejenel kyxol kykyaqil k'loj kyiyjile, tu'ntzun t-xi nma'ne tkyaqil yol lu kye, ex che okel nq'o'ne kya'j ex tx'otx' te testiw kyi'j.

²⁹B'a'n wu'ne, nkyimlenxiye che elel txalpuje ex kyjel kykoline b'e otoq txi nma'ne kyeye. Ax ikx b'a'n wu'ne, tzul mya b'a'n kyib'aje tu'n tlaj mya b'a'n otoq kyb'inchaye twitz Qman, ex tzul tq'oj kyi'je tu'n tlaj kyb'inchb'ene mya b'a'n, chi Moisés.

³⁰Xitzun tma'n Moisés aju b'itz lu kye kykyaqil aj Israel otoq b'aj kychmon kyib', tzajx qe' tu'n t-xe tnejel tejxi tpon b'aj: